សមត្ថកិច្ចរាប់ឈើដែលឆែកឃើញ និងរឹបអូសនាពេលកន្លងមក។ រូបថត NRWPO
Thu, 3 March 2016
ប៉ិច សុធារី
ភ្នំពេញប៉ុស្តិ៍
ភ្នំពេញៈ បណ្តាញជនជាតិដើមភាគតិច និងព្រៃឈើចំនួន ២៧ អង្គការបានស្នើដល់រាជរដ្ឋាភិបាលជាពិសេសគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើបង្ហាញលទ្ធផលនៃការបង្ក្រាបបទល្មើសព្រៃឈើនាពេលកន្លងមក និងត្រូវចាត់វិធានការបង្ក្រាបទូទាំងប្រទេសខណៈពួកគេមើលឃើញថាការនាំឈើចេញពីប្រភពផ្សេងៗនៅមិនមានទិន្នន័យច្បាស់លាស់នៅឡើយ។
សេចក្តីថ្លែងការណ៍របស់បណ្តាញជនជាតិដើមភាគតិច និងព្រៃឈើកាលពីថ្ងៃម្សិលមិញបានសាទរចំពោះការបង្កើតគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើស្របពេលដែលស្ថានភាពនៃការកាប់បំផ្លាញ និងការដឹកជញ្ជូនឈើចេញទៅវៀតណាមកំពុងតែមានសកម្មភាពខ្លាំងក្លា។ ប៉ុន្តែពួកគេនៅបារម្ភពីខ្សែចង្វាក់នៃការផ្គត់ផ្គង់ឈើដែលមិនមានទិន្នន័យច្បាស់លាស់បញ្ជាក់ពីបរិមាណឈើនាំចេញពីសហគមន៍ព្រៃឈើ ចម្ការឈើ និងដីឯកជន គម្រោងអាជីវកម្មរ៉ែ ទំនប់វារីអគ្គិសនី ជាពិសេសពីសម្បទានដីសេដ្ឋកិច្ចដែលពាក់ព័ន្ធនឹងការប្រមូលទិញឈើពីសំណាក់ឈ្មួញឈើខុសច្បាប់នៅជុំវិញតំបន់សម្បទាន។
សេចក្តីថ្លែងការណ៍បន្តថា «កត្តាទាំងនេះនឹងបណ្តាលឲ្យព្រៃឈើនៅកម្ពុជាបាត់បង់ក្នុងរយៈពេលដ៏ខ្លីប្រសិនបើពុំមានអន្តរាគមន៍ដោះស្រាយទាន់ពេលវេលាទេនឹងធ្វើឲ្យប៉ះពាល់ដល់កម្មវិធីស្តារគម្របព្រៃឈើ កម្មវិធីឥណទានកាបូន ប៉ះពាល់ដល់ការជួយរក្សាលំនឹងទឹកក្រោមដីជាពិសេសប៉ះពាល់ដល់ជីវភាពសហគមន៍ដែលអាស្រ័យអនុផលព្រៃឈើ»។
ករណីនេះក្រុមបណ្តាញជនជាតិដើមភាគតិច និងព្រៃឈើបានស្នើដល់រាជរដ្ឋាភិបាល ក្រសួងពាក់ព័ន្ធ និងគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ ចាត់វិធានការអន្តរាគមន៍ជាបន្ទាន់ដើម្បីទប់ស្កាត់បទល្មើសព្រៃឈើនៅទូទាំងប្រទេស និងបង្ហាញពីតម្លាភាពចំពោះលទ្ធផលនៃការបង្ក្រាបដល់សាធារណជនបានដឹងទាំងបរិមាណឈើដែលបានចាប់ជនល្មើសពាក់ព័ន្ធព្រមទាំងចាត់ការជនល្មើសដែលលួចដុតឈើ។
ក្រៅពីនោះពួកគេស្នើឲ្យមានការពង្រឹងការអនុវត្តច្បាប់ និងបញ្ឈប់ការគំរាមកំហែងគ្រប់រូបភាពទៅលើសកម្មជនការពារព្រៃឈើជាដើម។
មន្ត្រីកម្មវិធីនៃមជ្ឈមណ្ឌលអប់រំច្បាប់សម្រាប់សហគមន៍ លោក ឯម សុភ័ក្រ បានថ្លែងថាការបង្ក្រាបបទល្មើសព្រៃឈើកន្លងមកធ្វើឡើងតែនៅខេត្តមួយចំនួនប៉ុណ្ណោះខណៈខេត្តផ្សេងៗទៀតនៅតែមានបទល្មើសច្រើនដដែលហើយការបង្ក្រាបនោះក៏ពុំទាន់បង្ហាញពីលទ្ធផលនៅឡើយ។
លោកថា៖ «ក្នុងយុទ្ធនាការបង្ក្រាបម្តងៗសកម្មភាពបទល្មើសឃើញថាថយចុះមែនតែផុតពីហ្នឹងទៅគឺកើនឡើងទ្វេដងយើងសង្ឃឹមថាយុទ្ធនាការលើកនេះមិនដូចពីមុនៗទេ»។
អ្នកនាំពាក្យកងរាជអាវុធហត្ថលើផ្ទៃប្រទេសលោក អេង ហ៊ី បានថ្លែងថាគណៈកម្មការធ្លាប់បានបង្ហាញលទ្ធផលជាបន្តបន្ទាប់ចំពោះបទល្មើសដែលមិនពាក់ព័ន្ធនឹងការស៊ើបអង្កេតហើយប្រសិនបើអង្គការទាំងនោះចង់ដឹងពីព័ត៌មានណាមួយពួកគេអាចដាក់សំណើសុំជួបប្រធានគណៈកម្មការបាន។
លោកថា៖ «អ្វីដែលអាចបង្ហាញបានយើងបង្ហាញតែអ្វីដែលនៅក្នុងការស៊ើបអង្កេតដែលជាការសម្ងាត់នៅឡើយយើងមិនទាន់បង្ហាញទេមិនមែនពួកគាត់ចេះតែទាមទារអ្វីហួសពីច្បាប់កំណត់ទេ»។
ជំហានដំបូងការបង្ក្រាបបទល្មើសព្រៃឈើគឺធ្វើឡើងនៅខេត្តចំនួន ៦ គឺខេត្តកំពង់ចាម ត្បូងឃ្មុំ ក្រចេះ ស្ទឹងត្រែង រតនគិរី និងមណ្ឌលគិរី។ ចំពោះការស្នើរបស់អង្គការទាំងនោះលោកថាគណៈកម្មការនឹងដាក់សំណើជូនរដ្ឋាភិបាលដើម្បីពិចារណាវិធានការបន្តទៀត។
កាលពីចុងខែកុម្ភៈលោកនាយករដ្ឋមន្ត្រី ហ៊ុន សែន ធ្លាប់បានបញ្ជាឲ្យលោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើប្រើឧទ្ធម្ភាគចក្រដោយប្រើរ៉ុក្កែតបាញ់ទៅលើឈ្មួញដែលនៅតែព្រហើនកាប់ឈើខុសច្បាប់៕
Contact author: ប៉ិច សុធារី