ដោយ លោក លី បេឡា​​ | ថ្ងៃចន្ទ ទី៤ ខែមេសា ឆ្នាំ២០១៦​ | ម៉ោង 3:42 PM
http://vodhotnews.com

សិទ្ធិមនុស្ស

អ្នកតវ៉ាម្នាក់ដែលត្រូវបានគេវាយឲ្យរបួសឈ្មោះ ស៊ុត ចិត្រ

មន្ត្រីសហជីពម្នាក់បានរងរបួសនៅពេលក្រុមសន្តិសុខសាលារាជធានីភ្នំពេញបំបែកការតវ៉ានៅមុខរដ្ឋសភាដែលប្រឆាំងទៅនឹង​ការអនុម័តច្បាប់ស្ដីពីសហជីពនៅព្រឹកថ្ងៃចន្ទនេះ។

ប្រធានសម្ព័ន្ធសហជីពកម្ពុជាអ្នកស្រី យ៉ាង សុភ័ណ្ឌ ដែលអះអាងថាត្រូវបានសន្តិសុខច្រានឲ្យ​ដួល មានប្រសាសន៍ថាខណៈដែលក្រុមកម្មករនិង​សហជីពកំពុងតែឈរតវ៉ាដោយសន្តិវិធីត្រូវបានក្រុម​សន្តិសុខជាច្រើននាក់បានលើកគ្នាមករុញច្រាននិងវាយឲ្យមន្រ្តីសហជីពម្នាក់រងរបួសធ្ងន់ចំក្បាល។

អ្នកស្រី យ៉ាង សុភ័ណ្ឌ បន្ថែមថា៖ “យើងប្រើនីតិវិធីត្រឹមត្រូវ​ធ្វើកូដកម្មដោយស្ងៀមស្ងាត់សោះត្រូវ​បានគេប្រើកំលាំងហិង្សាមកលើពួកយើងអញ្ចឹងអាចឆ្លុះបញ្ចាំងថាប្រទេសនេះមិនមែនកាន់របបលទ្ធិប្រជា​ធិបតេយ្យទេជារបបផ្ដាច់ការ។ ព្រោះអីយើងឃើញថាប្រសិនបើគ្នាគេ គេការពារគ្នា តែយើងជាសហជីព​ដែលការពារប្រយោជន៍កម្មករ​ត្រូវបានគេប្រើហិង្សាមកលើពួកយើង។ ដូចជាថ្ងៃមុនមានការធ្វើកូដកម្ម​រឿងលោក កឹម សុខា យើងឃើញថាពួកគាត់ធ្វើកូដកម្មដោយរលូនមិនមានរឿងអ្វីកើតឡើងលើពួកគាត់ហាក់ដូចជាមានការគាំទ្រទៀត”។

អ្នកតវ៉ាម្នាក់ដែលត្រូវបានគេវាយឲ្យរបួសនោះឈ្មោះ ស៊ុត ចិត្រ ដែលជា​មន្រ្តីសហជីពចលនាកម្មកររបស់លោក ប៉ាវ ស៊ីណា។​

ប្រធានសម្ព័ន្ធសហជីពចលនាកម្មករលោក ប៉ាវ ស៊ីណា មានប្រសាសន៍ថាមន្រ្តីសហជីព​របស់​លោក​ត្រូវបាន​សន្តិសុខខណ្ឌវាយឲ្យរបួសដេរជាច្រើនថ្នេរលើចិញ្ចើមភ្នែកខាងឆ្វេង។ លោកបន្ថែមថាលោកមិនអាចទទួលយកបានទេចំពោះទង្វើរបស់​សន្តិសុខទាំងនោះដែលវាយមកលើក្រុមសហជីពដោយគ្រាន់តែតវ៉ាដោយសន្តិវិធី។ លោកបន្ថែម​ថាលោកបានជួបជាមួយក្រុម​អង្គការសិទ្ធិមនុស្សនិងក្រុមអ្នកច្បាប់ដើម្បីរៀបចំដាក់ពាក្យ​បណ្ដឹងលើ​ករណី​នេះផងដែរ។

អ្នកនាំពាក្យសាលារាជធានីភ្នំពេញលោក ឡុង ឌីម៉ង់ មានប្រសាសន៍ថាករណីនេះជាការប៉ះទង្គិច​គ្នាទៅវិញទៅមករវាងក្រុមអ្នកតវ៉ានិងក្រុមសន្តិសុខ។ លោកបន្ថែមថាក្រុមអ្នកតវ៉ាទាំងនោះបានរៀបចំ​ក្បួនដោយមិនមានច្បាប់អនុញ្ញាតិនិងបានវាយមកលើក្រុមសន្តិសុខមុន។

លោកមានប្រសាសន៍ថា៖ “យើងបានហាមឃាត់ពួកគាត់កុំឲ្យធ្វើអ្វីដែលអត់មានច្បាប់ព្រោះ​គាត់​ធ្វើការរៀបក្បួនរៀបអីរបស់គាត់ដោយអត់មានការសញ្ញេច្បាប់អនុញ្ញាតិ ហើយពួកគាត់បានវាយ​ទៅលើ​ក្រុមសន្តិសុខមុន។ ដូច្នេះខ្ញុំអត់ដឹងថាអ្នកណាយ៉ាងម៉េចនោះទេមិនមែនបានន័យថាវាយនោះទេគឺជា​ការប៉ះទង្គិចគ្នា”។

អនុប្រធាន​ផ្នែក​សិទ្ធិមនុស្ស​របស់​សមាគម​កា​រពារ​សិទ្ធិមនុស្ស​អាដហុកលោក ណៃ វ៉ង់ដា​ បានធ្វើ​ការថ្កោលទោសចំពោះការប្រើហិង្សាមកលើក្រុមសហជីព។ លោកបន្ថែមថាក្រុមអ្នកសន្តិសុខទាំង​នោះក៏បានប្រើពាក្យសម្ដីមិនសមរម្យទៅលើមន្ត្រីសិទ្ធិមនុស្សផងដែរ។

លោកបន្ថែមថា៖ “សន្តិសុខខណ្ឌដូនពេញនេះនៅតែមានអាកប្បកិរិយាសាហាវយង់ឃ្នង​ដដែលក្នុងការបង្រ្កាបទៅលើក្រុមអ្នកតវ៉ាដោយសន្តិវិធី។ យើងសូមថ្កោលទោសនិងអំពាវនាវឲ្យសហគមអន្តរ​ជាតិពិនិត្យមើលឡើងវិញទាក់ទងនឹងការផ្ដល់ជំនួយដល់រដ្ឋាភិបាលមួយនេះដោយសារសកម្មភាពបង្ក្រាបទៅ​លើសហជីពនិងការគំរាមកំហែងលើអ្នកធ្វើការលើសិទ្ធិមនុស្ស​វាជារឿងដែលយើងទទួលយកអត់បាន”។

គួរបញ្ជាក់ថាការប៉ះទង្គិចដោយហិង្សានេះគឺចំពេលដែលសភាកំពុងប្រជុំអនុម័តច្បាប់ស្ដីពីសហជីពនៅព្រឹកថ្ងៃទី០៤ ខែមេសា នេះដែលមាន​ភាពចម្រូងចម្រាសដោយសហជីពនិងកម្មករអះអាងថា​ច្បាប់នេះធ្វើ​ឲ្យប៉ះ​ពាល់ដល់សិទ្ធិរបស់​ពួកគេស្នើឲ្យពន្យាពេលអនុម័ត៕

សរសេរមកកាន់ លោក លី បេឡា តាមរយៈ bela@vodhotnews.com