ដោយ អ៊ុំ រង្សី
2016-06-22
RFA
ប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈនៃអគ្គស្នងការដ្ឋាននគរបាលជាតិ លោក រុន រ័ត្នវាសនា ក្នុងកម្មវិធីវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃទី១៥ ខែមករា ឆ្នាំ២០១៦។ Photo: RFA
របាយការណ៍អគ្គស្នងការនគរបាលជាតិ បង្ហាញថា តាមការអនុវត្តរយៈពេល ២០ថ្ងៃ គិតចាប់ពីថ្ងៃទី១ ដល់ថ្ងៃទី២០ ខែមិថុនា ឆ្នាំ២០១៦ គ្រោះថ្នាក់ចរាចរណ៍ករណីធ្ងន់ធ្ងរនៅតែបន្តកើតមាន ដែលបានជំរុញឲ្យមានកំណើនជនរងគ្រោះ។ សង្គមស៊ីវិលធ្វើការទាក់ទងចរាចរណ៍នៅតែជំរុញឲ្យសមត្ថកិច្ចត្រូវរឹតបន្តឹងមូលហេតុសំខាន់ៗនៃគ្រោះថ្នាក់ចរាចរណ៍ឲ្យមានប្រសិទ្ធភាពខ្ពស់។
សង្គមស៊ីវិលជំរុញឲ្យសមត្ថកិច្ចត្រូវរឹតបន្តឹងច្បាប់ចរាចរណ៍ និងអំពាវនាវដល់ប្រជាពលរដ្ឋ ត្រូវចូលរួមគោរពច្បាប់ចរាចរណ៍ឲ្យបានទាំងអស់គ្នា ពិសេសអ្នកបើកបរម៉ូតូ និងអ្នករួមដំណើរត្រូវពាក់មួកការពារសុវត្ថិភាពឲ្យបានគ្រប់ពេល ទោះចម្ងាយផ្លូវជិត ឬឆ្ងាយបែបណាក្ដី។
ការលើកឡើងរបស់ក្រុមសង្គមស៊ីវិលដែលធ្វើការពាក់ព័ន្ធនឹងចរាចរណ៍នៅពេលនេះ ធ្វើឡើងបន្ទាប់ពីនាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈនៃអគ្គស្នងការនគរបាលជាតិ បានបង្ហាញរបាយការណ៍ថា រយៈពេល ២០ថ្ងៃ ចាប់ពីថ្ងៃទី១ ដល់ទី២០ ខែមិថុនា ឆ្នាំ២០១៦ នៅទូទាំងប្រទេសកម្ពុជា មានគ្រោះថ្នាក់ចរាចរណ៍ចំនួន ១៦៣ករណី មានអ្នកស្លាប់រហូត ៧០នាក់ ខណៈរបួសធ្ងន់ជិតរហូត ១៦៨នាក់ និងរបួសស្រាលចំនួន ៨០នាក់។
ប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈនៃអគ្គស្នងការដ្ឋាននគរបាលជាតិ នៃក្រសួងមហាផ្ទៃ លោក រុន រ័ត្នវាសនា បានប្រាប់វិទ្យុអាស៊ីសេរី នៅថ្ងៃទី២១ ខែមិថុនា ថា មូលហេតុដែលបណ្ដាលឲ្យមានចំនួនអ្នកស្លាប់ និងអ្នករបួសកើនឡើង បើទោះជាសមត្ថកិច្ចបានដំណើរការច្បាប់ចរាចរណ៍ថ្មីក៏ដោយ ភាគច្រើនបណ្ដាលមកពីការបើកបរមិនពាក់មួកសុវត្ថិភាពដែលមានរហូតជាង ៩០% ដែលក្នុងនោះជាបើកបរដោយម៉ូតូ៖ «ទីមួយគឺឃើញចំនួនអ្នកស្លាប់ដោយការមិនពាក់មួកសុវត្ថិភាពកើនឡើង ក្នុងនោះអ្នកស្លាប់ដែលធ្វើដំណើរតាមដងផ្លូវដោយម៉ូតូ ក្នុងនោះ ១០០នាក់ មានស្លាប់ជាង ៨០ ទៅ ៩០% ហើយអ៊ីចឹងវាចំនួនដែលយើងត្រូវយកចិត្តទុកដាក់ និងក្តីបារម្ភខ្លាំង»។
ទាក់ទិននឹងករណីនេះ ប្រធានអង្គការសម្ព័ន្ធអន្តរជាតិ ទប់ស្កាត់ផលប៉ះពាល់គ្រឿងស្រវឹង (IARD) លោក គង់ សុវណ្ណ យល់ថា ការអនុវត្តច្បាប់ចរាចរណ៍របស់សមត្ថកិច្ច មិនទាន់មានប្រសិទ្ធភាព និងមិនទាន់ឆ្លើយតបនឹងការកាត់បន្ថយគ្រោះថ្នាក់ចរាចរណ៍នៅកម្ពុជា នៅឡើយ ព្រោះការអនុវត្តមិនទាន់ចំចំណុចសំខាន់ដែលបណ្ដាលឲ្យកើតគ្រោះថ្នាក់ចរាចរណ៍ពិតប្រាកដ។
អ្នកជំនាញខាងចរាចរណ៍រូបនេះ ស្នើឲ្យសមត្ថកិច្ចត្រូវរឹតបន្តឹងលើកត្តាសំខាន់ៗ គឺការបើកបរមិនពាក់មួកសុវត្ថិភាព ការបើកបរក្នុងល្បឿនលឿន និងបើកក្នុងឥទ្ធិពលគ្រឿងស្រវឹង ព្រោះកត្តាទាំងនេះបណ្ដាលឲ្យមនុស្សជាច្រើននាក់ស្លាប់ និងរបួសរហូតជាង ៩០%៖ «ចង់សំណូមពរទៅអាជ្ញាធរ និងសមត្ថកិច្ចជាជំហាន សំខាន់ខ្លាំងជាងប្រជាពលរដ្ឋ ព្រោះខណៈនេះយើងមានច្បាប់ហើយ តែនៅខ្សោយការអប់រំ និងកញ្ជ្រៀបចំណេះដឹងទៅប្រជាពលរដ្ឋ អនុវត្តច្បាប់ឲ្យបានតឹងរ៉ឹង ឲ្យបានល្អប្រសើរ ខ្ញុំជឿថា នឹងជោគជ័យ»។
ប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈនៃអគ្គស្នងការដ្ឋាននគរបាលជាតិ លោក រុន រ័ត្នវាសនា ក៏បានបញ្ជាក់ថា ខេត្តនិងរាជធានីដែលមានគ្រោះថ្នាក់មនុស្សស្លាប់ និងរបួសច្រើនជាងគេ ក្នុងនោះមានភ្នំពេញ ស្វាយរៀង កំពង់ធំ ព្រៃវែង និងខេត្តកោះកុង។ លោកអះអាងថា សមត្ថកិច្ចកំពុងផ្ដោតការយកចិត្តខ្លាំងលើការអប់រំប្រជាពលរដ្ឋឲ្យពាក់មួកសុវត្ថិភាព និងច្បាប់ចរាចរណ៍ផ្លូវគោកថ្មី ដើម្បីឈានទៅកាត់បន្ថយជនរងគ្រោះដោយគ្រោះថ្នាក់ចរាចរណ៍។
ពាក់ព័ន្ធនឹងការបើកបរដោយមិនពាក់មួកសុវត្ថិភាពនេះដែរ ក្នុងពិធីចែកសញ្ញាប័ត្រដល់សិស្សសាលាភូមិន្ទរដ្ឋបាលលោកនាយករដ្ឋមន្ត្រី ហ៊ុន សែន បានថ្លែងសុំទោសជាសាធារណៈ និងព្រមទទួលការពិន័យតាមច្បាប់ កាលដែលលោកជិះម៉ូតូមិនបានពាក់មួកសុវត្ថិភាព និងបានអំពាវនាវដល់ប្រជាពលរដ្ឋទាំងអស់ត្រូវគោរពច្បាប់ចរាចរណ៍ និងត្រូវតែពាក់មួកសុវត្ថិភាពគ្រប់ពេល ទោះបីជិះម៉ូតូជិត ឬឆ្ងាយក្តីដើម្បីចៀសវាងការយកគំរូអាក្រក់តាមលោកលើករណីនេះ។
ការថ្លែងរបស់ប្រមុខរដ្ឋាភិបាល លោកនាយករដ្ឋមន្ត្រី ហ៊ុន សែន បែបនេះ ត្រូវបានគេមើលបន្ទាប់ពីលោកបានជិះម៉ូតូជាមួយអ្នករត់ម៉ូតូឌុប ខណៈលោកចុះជួបប្រជាពលរដ្ឋនៅខេត្តកោះកុង ដោយពុំបានពាក់មួកសុវត្ថិភាព។
ការបើកបរដោយមិនពាក់មួកសុវត្ថិភាពរបស់ថ្នាក់ដឹកនាំនេះដែរ ក៏ទទួលរងការរិះគន់ពីអ្នកប្រើប្រាស់បណ្ដាញសង្គមហ្វេសប៊ុក (Facebook) និងអ្នកធ្វើការពាក់ព័ន្ធនឹងចរាចរណ៍ថា ជាការអនុវត្តគំរូមិនល្អសម្រាប់សង្គម បើទោះជាកំហុសអចេតនាក្ដី។ សង្គមស៊ីវិលទាំងនោះបានជំរុញឲ្យថ្នាក់ដឹកនាំជាន់ខ្ពស់ និងសមត្ថកិច្ចត្រូវតែអនុវត្តន៍រឹតបន្តឹងច្បាប់ឲ្យបានម៉ឺងម៉ាត់ ដើម្បីឲ្យកម្ពុជា គេចចេញពីសោកនាដកម្មដោយសារគ្រោះថ្នាក់ចរាចរណ៍៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- មន្ត្រី៖ គ្រោះថ្នាក់ចរាចរណ៍នៅខេត្តព្រះសីហនុកើនឡើងខ្ពស់
- សពពលករខ្មែរ៦នាក់និងអ្នករបួសដោយគ្រោះថ្នាក់ចរាចរណ៍នៅថៃត្រូវបានបញ្ជូនមកដល់កម្ពុជា
- ពលករខ្មែរ៦នាក់ស្លាប់និង១៨នាក់របួសក្នុងហេតុការណ៍គ្រោះថ្នាក់ចរាចរណ៍នៅថៃ
- កម្មវិធីប្រកួតអត្ថបទអ្នកកាសែតស្ដីពីការពាក់មួកសុវត្ថិភាព
- មនុស្ស៨នាក់ស្លាប់និងជាង៣០នាក់របួសដោយសារគ្រោះថ្នាក់ចរាចរណ៍នៅបាត់ដំបង
- ចំនួនអ្នកស្លាប់និងរបួសដោយគ្រោះថ្នាក់ចរាចរណ៍នៅថ្ងៃ១៣ មេសា កើនឡើង
- អ្នកជំនាញខាងសុវត្ថិភាពចរាចរណ៍បារម្ភគ្រោះថ្នាក់ចរាចរណ៍កើនឡើង
- សមត្ថកិច្ចរឹតបន្តឹងការអនុវត្តច្បាប់ចរាចរណ៍ផ្លូវគោកថ្មី
- លោក ហ៊ុន សែន បន្តបញ្ជាឲ្យមានវិធានការលើករណីឡានដឹកអង្ករលើសចំណុះ
- គ្រួសារជនរងគ្រោះដោយគ្រោះថ្នាក់ចរាចរណ៍នៅខណ្ឌឫស្សីកែវកំពុងរង់ចាំយុត្តិធម៌
Cambodia still a poor country ‘ compare to next door ‘ . why don’t they employ more polices ? polices must be clean record not criminal ,that make people have a job’ and every polices station should have computer record all the people who not obey the law’ ‘.people very poor but polices should warn them in the first time’ then second time ‘ the 3 must fine them ‘.the advertise BEER or Vine should not on the T V till 8 pm .A lot of way to adjust the people cultural ‘ or maybe thnak lour not allowed? drink driving must fine them strait.GOD bless all cambodian people’