ដោយ សូត សុខប្រាថ្នា
2016-07-01
RFA
ស្ដាប់ ឬ ទាញយកសំឡេង
មន្ទីរអប់រំយុវជន និង កីឡា ខេត្តកំពង់ចាម។ រូបថតថ្ងៃទី៣០ មិថុនា ឆ្នាំ២០១៦ (RFA/Saut Sokprathna)
ក្រុមគ្រូបង្រៀននៅអនុវិទ្យាល័យ និងវិទ្យាល័យក្នុងខេត្តកំពង់ចាម ត្អូញត្អែរចំពោះភាពយឺតយ៉ាវក្នុងការផ្តល់ប្រាក់ម៉ោងជូនពួកគាត់ ដែលមានរយៈពេលជិត ៣ត្រីមាសមកហើយ។ គ្រូទាំងនោះឱ្យដឹងថា ប្រាក់ម៉ោងនេះវាតិចតួច ប៉ុន្តែក៏អាចជួយដោះទាល់ចំពោះបញ្ហាប្រឈមក្នុងការរស់នៅបានមួយផ្នែកដែរ។ ចំណែកប្រធានមន្ទីរអប់រំយុវជន និងកីឡា ខេត្តកំពង់ចាម បញ្ជាក់ថា ប្រាក់ម៉ោងទាំងនោះនឹងបានដល់ដៃលោកគ្រូអ្នកគ្រូក្នុងពេលឆាប់ៗ។
ក្រុមគ្រូបង្រៀននៅខេត្តកំពង់ចាម ស្នើឱ្យក្រសួងពាក់ព័ន្ធមានវិធានការចំពោះភាពយឺតយ៉ាវនៃប្រាក់ម៉ោងដែលតែងតែកើតមាននៅខេត្តមួយនេះស្ទើរជារៀងរាល់ឆ្នាំ។ ពួកគាត់លើកឡើងថា ហេតុផលដែលខាងមន្ទីរប្រាប់ទៅគ្រូបង្រៀនតាមរយៈនាយកសាលាវិញ គឺជាហេតុផលដដែលៗ ស្របពេលខេត្តគេផ្សេងៗ មិនសូវជួបបញ្ហាប្រាក់ម៉ោងយឺតយ៉ាវដូច្នេះឡើយ។
ក្រុមគ្រូបង្រៀននៅវិទ្យាល័យមួយក្នុងខេត្តកំពង់ចាម ស្នើមិនបញ្ចេញឈ្មោះឱ្យដឹងថា ពួកគាត់នៅមិនទាន់ទទួលប្រាក់ម៉ោងចំនួន ២ត្រីមាស និងជិតចូលបីត្រីមាសទៅហើយ ពោលគឺតាំងពីដើមឆ្នាំសិក្សាមក។ ភាពយឺតយ៉ាវនេះ ពួកគាត់នៅមិនបានដឹងពីបញ្ហាពិតប្រាកដទេ ប៉ុន្តែពួកគាត់ចង់ឱ្យមន្ទីរអប់រំមានការទទួលខុសត្រូវជុំវិញបញ្ហានេះ និងស្នើឱ្យខាងមន្ទីរជួយពន្លឿនបើកប្រាក់ម៉ោងទាំងនោះឱ្យបានឆាប់ៗ៖ «យើងដឹកស្រាប់ហើយ គ្រូបង្រៀនពឹងផ្អែកលើប្រាក់ខែប៉ុណ្ណឹង បានប្រាក់ម៉ោងតិចតួចប៉ុណ្ណឹង ហើយបើកយឺតយ៉ាវអីចឹង។ បើបើកលឿនទៅយើងមានទឹកចិត្ត។ ស្នើសុំឱ្យគាត់ជួយរៀបចំដូចជាមួយត្រីមាសអ៊ីចឹងជួយផ្ដល់ឱ្យទាន់ដូចប្រាក់បៀវត្សរ៍យើងធម្មតាអ៊ីចឹង»។
ប្រាក់ម៉ោងបង្រៀនលើសសម្រាប់គ្រូកម្រិតវិទ្យាល័យ ឬកម្រិតឧត្ដមសិក្សា គឺទទួលបានចំនួន ៥.២០០រៀលក្នុងមួយម៉ោង និងកម្រិតមធ្យមសិក្សា ឬកម្រិតអនុវិទ្យាល័យទទួលបានចំនួន ២.៦០០រៀលក្នុងមួយម៉ោង។ ក្នុងរយៈពេល ២ត្រីមាសនេះ លោកគ្រូ អ្នកគ្រូដែលមានប្រាក់ម៉ោងបង្រៀនលើស អាចទទួលចន្លោះពី ៥០ម៉ឺនរៀល ទៅជាង ១លានរៀល។
ទាក់ទងបញ្ហានេះ ប្រធានមន្ទីរអប់រំយុវជន និងកីឡា ខេត្តកំពង់ចាម លោក លី ម៉េងសាន មានប្រសាសន៍នៅថ្ងៃទី១ ខែកក្កដា ថាហេតុផលដែលនាំឱ្យមានភាពយឺតយ៉ាវ គឺដោយសារឯកសារបញ្ជូនមកពីតាមសាលាមួយចំនួននៅមិនទាន់ត្រឹមត្រូវតាមបច្ចេកទេស ពោលគឺខុសទិន្នន័យខ្លះៗ ដែលទាមទារឱ្យសាលាបំពេញខុសទាំងនោះកែតម្រូវឡើងវិញ។ ក្រោយពេលកែតម្រូវរួច លោកបញ្ជាក់ថា ខាងមន្ទីរបានបញ្ជូនឯកសារប្រាក់ម៉ោងទាំងនោះទៅរតនាគាររួចរាល់ហើយ ដោយលោកអះអាងថា ប្រាក់ម៉ោងនឹងទទួលបានក្នុងពេលឆាប់ៗ។ ជាមួយគ្នានេះ លោកនឹងកោះប្រជុំនាយកសាលាទាំងអស់ដើម្បីកែប្រែនូវចំណុចខ្វះខាតទាំងនោះ ហើយសង្ឃឹមថា ត្រីមាសក្រោយៗ នឹងមិនជួបបញ្ហាយឺតយ៉ាវនេះទៀតទេ៖ «ខ្ញុំជឿថា កែ ព្រោះអ្វីដែលគាត់ជួបខ្ញុំថ្មី ហើយខ្ញុំចាប់អារម្មណ៍ខ្លាំងទៅលើការងារនេះ ហើយនៅថ្ងៃទី១០ (កក្កដា) ហ្នឹង ខ្ញុំនឹងប្រជុំមួយសាទៀតហើយ ទាក់ទងគ្រូនៅវិទ្យាល័យហ្នឹង»។
សាលាវិទ្យាល័យ និងអនុវិទ្យាល័យនៅទូទាំងខេត្តកំពង់ចាម គឺមានចំនួន ១២០សាលា។ ចំណែកគ្រូបង្រៀនទូទាំងខេត្ត រាប់បញ្ចូលទាំងគ្រូបឋមសិក្សាផង គឺមានជាង ៧ពាន់នាក់។
ប្រធានស្តីទីសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី យល់ថា បញ្ហានេះជាការធ្វេសប្រហែសរបស់អ្នកពាក់ព័ន្ធទាំងនោះដែលមិនបានគិតគូរសុខទុក្ខគ្រូបង្រៀន ប៉ុន្តែហាក់យកចិត្តទុកដាក់ទៅលើការងារបក្សច្រើនជាង ពីព្រោះស្ទើរតែគ្រប់ខេត្តក្រុងផ្សេងៗទៀត គេទទួលបានប្រាក់ម៉ោងនេះរួចទៅហើយ៖ «មូលហេតុយឺតយ៉ាវ ខ្ញុំគិតថា គាត់យករឿងបក្សច្រើនជាងរឿងរបស់លោកគ្រូអ្នកគ្រូយើង»។
អ្នកស្រីមើលឃើញថា នៅពេលប្រាក់ម៉ោងយឺតយ៉ាវបែបនេះ គឺធ្វើឱ្យប៉ះពាល់ដល់ជីវភាពគ្រូបង្រៀនមួយផ្នែក ព្រមទាំងធ្វើឱ្យប៉ះពាល់ដល់ការបង្រៀនសិស្សថែមទៀត។ អ្នកស្រីស្នើឱ្យក្រសួងអប់រំ គប្បីចាត់វិធានការឱ្យមានប្រសិទ្ធភាព ជៀសវាងធ្វើឱ្យបញ្ហានេះនៅតែកើតឡើងដដែលៗនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- សមាគមគ្រូបង្រៀនបារម្ភថាគ្រូនិងសិស្សនៅពោធិ៍សាត់រងគំនាបពីគណបក្សកាន់អំណាច
- លោក ហ៊ុន សែន ថាមិនបានដណ្ដើមការងាររដ្ឋមន្ត្រីអប់រំរឿងចែកសញ្ញាប័ត្រ
- ក្រសួងអប់រំនិងស្ថាប័នពាក់ព័ន្ធជំរុញឲ្យយុវជនចូលរួមការងារស្ម័គ្រចិត្តឲ្យបានច្រើន
- យុវជននគររាជធ្វើទស្សនាចរដើម្បីទីផ្សារអចលនទ្រព្យនិងការងារមនុស្សធម៌នៅមណ្ឌលគិរី
- រដ្ឋាភិបាលដកតួនាទីប្រធាននាយកដ្ឋានម្នាក់ក្រោយលេចព័ត៌មានបៀតបៀនរាងកាយនារីកូរ៉េ
- ក្រសួងអប់រំថានឹងបន្តរឹតបន្តឹងការប្រឡងសញ្ញាបត្រមធ្យមសិក្សាទុតិយភូមិឬបាក់ឌុប
- សង្គមស៊ីវិលមួយចំនួននឹងចូលរួមសង្កេតការណ៍ប្រឡងបាក់ឌុបឆ្នាំ២០១៦
- ប្រវត្តិស្ពានឫស្សីនៅខេត្តកំពង់ចាម
- អង្គការសង្គ្រោះកុមារចំណាយថវិកា១១លានដុល្លារអាមេរិកលើកស្ទួយវិស័យអប់រំនៅកម្ពុជា
- ក្រសួងអប់រំជំរុញឲ្យសិស្សចាប់យកជំនាញវិទ្យាសាស្ត្រពិតដើម្បីផ្គត់ផ្គង់តម្រូវការទីផ្សារការងារ