លោក នី ចរិយា ពេលឆ្មាំពន្ធនាគារនាំខ្លួនចូលសាលាដំបូងរាជធានីកាលពីសប្តាហ៍មុន។ ហុង មិនា
Mon, 26 September 2016
ឡាយ សាមាន
ភ្នំពេញប៉ុស្តិ៍
ភ្នំពេញៈ គណៈកម្មាធិការជាតិរៀបចំការបោះឆ្នោត គជប នៅតែរក្សាតួនាទី និងប្រាក់បៀវត្សរ៍ជូនមន្ត្រីរបស់ខ្លួនលោក នី ចរិយា ដែលត្រូវតុលាការសម្រេចផ្តន្ទាទោសឱ្យជាប់ពន្ធនាគារ ៦ ខែរហូតដល់សាលក្រមរបស់លោកចូលជាស្ថាពរទើបស្ថាប័នមួយនេះរកអ្នកថ្មីជំនួស។
អតីតមន្ត្រីសិទ្ធិមនុស្ស និងជាអគ្គលេខាធិការរង (គជប) លោក នី ចរិយា ត្រូវបានចៅក្រមជំនុំជម្រះនៃសាលាដំបូងរាជធានីភ្នំពេញលោក ឃី ឆៃ កាលពីថ្ងៃទី ២២ ខែកញ្ញាបានសម្រេចផ្តន្ទាទោសដាក់ពន្ធនាគាររយៈពេល ៦ ខែ និងពិន័យជាប្រាក់ចំនួន ៦ លានរៀលចូលរដ្ឋក្រោមការចោទប្រកាន់ពីបទបរិហារកេរ្តិ៍ជាសាធារណៈ មួលបង្កាច់កេរ្តិ៍ និងផ្សព្វផ្សាយនូវការអត្ថាធិប្បាយដើម្បីដាក់សម្ពាធលើយុត្តាធិការតាមបណ្តឹងរបស់មន្ត្រីតុលាការខេត្តសៀមរាបពីររូបកាលពីឆ្នាំ ២០១៥ ដែលគ្រានោះលោក ចរិយា បានរកឃើញថាទាំងចៅក្រមលោក គី រិទ្ធី និងតំណាងអយ្យការខេត្តសៀមរាបលោក សុខ កែវ បណ្ឌិតបានចោទប្រកាន់ និងចាប់ពលរដ្ឋ ២ រូបដាក់ពន្ធនាគារដោយបំពានច្បាប់ដោយពុំបានបើកការស៊ើបអង្កេតឲ្យបានច្បាស់លាស់ឡើយនៅក្នុងសំណុំរឿងវិវាទដីធ្លីមួយជាមួយក្រុមហ៊ុនវៀតណាម។
ក្រោយការសម្រេចនេះអ្នកនាំពាក្យ គជប លោក ហង្ស ពុទ្ធា បានប្រាប់ភ្នំពេញប៉ុស្តិ៍ថាស្ថាប័ន គជប នឹងនៅតែបន្តបើកប្រាក់ខែ និងរក្សាតួនាទីរបស់លោក នី ចរិយា ដដែលពុំទាន់មានគម្រោងរើសអ្នកថ្មីមកជំនួសឡើយរហូតមានការសម្រេចផ្តន្ទាទោសជាស្ថាពររបស់តុលាការកំពូល។
លោកថា៖ «សាលាដំបូងកាត់ឱ្យគាត់ជាប់ពន្ធនាគារ ៦ ខែប៉ុន្តែពុំទាន់ស្ថាពរនៅឡើយដោយសារគាត់នៅមានឱកាសប្តឹងទៅសាលាឧទ្ធរណ៍ និងតុលាការកំពូលអ៊ីចឹងក្នុងឱកាសនេះ គជប នៅរក្សាទុកតំណែង និងប្រាក់បៀវត្សរ៍គាត់ដដែលហើយយើងកំពុងរង់ចាំមើលចំណាត់ការរបស់តុលាការបន្តទៀត»។
លោកឱ្យដឹងដែរថា គជប បានបង្កើតក្រុមអ្នកច្បាប់សម្រាប់តាមដានករណីលោក នី ចរិយា ដែរប៉ុន្តែមិនបានផ្តល់មេធាវីឱ្យនោះទេដោយបញ្ជាក់ថារឿងក្តីនោះកើតឡើងមុនពេលលោកចូលបម្រើការងារនៅ គជប។
លោកបញ្ជាក់ថា៖ «ករណីកាត់ទោសរបស់គាត់គឺជាករណីដែលពាក់ព័ន្ធសកម្មភាពពីមុនមកមិនមែនអំឡុងពេលគាត់ចូលមកជាអគ្គលេខាធិការរង គជប នោះទេអ៊ីចឹងមន្ត្រី និងអ្នកច្បាប់ គជប ក៏មិនបានបង្ហាញខ្លួនក្នុងពេលសវនាការដែរតែយើងនៅតាមការតាមដានដិតដល់ពីបញ្ហានេះ»។
ទោះយ៉ាងណាក៏ដោយលោកថាអវត្តមានរបស់លោក នី ចរិយា មិនប៉ះពាល់ដល់ដំណើរការចុះឈ្មោះបោះឆ្នោតនោះទេ។
លោក សំ សុគង់ មេធាវីការពារក្តីឲ្យលោក នី ចរិយា នឹងដាក់ពាក្យបណ្តឹងទៅសាលាឧទ្ធរណ៍នៅដើមខែក្រោយដោយអះអាងថាការសម្រេចរបស់សាលាដំបូងមិនអាចទទួលយកបានទេ។
លោកថា៖ «នៅថ្ងៃចន្ទនេះលោកនឹងទៅជួបជាមួយកូនក្តីដើម្បីពិគ្រោះយោបល់ក៏ដូចជាប្រាប់អំពីសិទ្ធិរបស់ខ្លួនហើយគ្រោងប្តឹងឧទ្ធរណ៍ក្រោយបុណ្យភ្ជុំបិណ្ឌក្នុងអំឡុងថ្ងៃទី ៥ ខែក្រោយព្រោះការសម្រេចរបស់តុលាការក្រុងប៉ះពាល់សិទ្ធិ និងសេរីភាពនៃការបញ្ចេញមតិរបស់កូនក្តី»។
លោក នី ចរិយា បានចូលបម្រើការងារជាអគ្គលេខាធិការរង គជប មានឋានៈ និងបុព្វសិទ្ធិស្មើនឹងអនុរដ្ឋលេខាធិការកាលពីខែ កុម្ភៈ ឆ្នាំ ២០១៦ ។ តែលោកត្រូវបានតុលាការក្រុងសម្រេចឃុំខ្លួនក្នុងពន្ធនាគារនៅដើមខែឧសភាដោយចោទប្រកាន់ពីបទសមគំនិតក្នុងអំពើសូកប៉ាន់សាក្សីពាក់ព័ន្ធនឹងរឿងសេ្នហារវាងអ្នកនាង ខុម ចាន់តារាទី ហៅ ស្រីមុំ ជាមួយប្រធានស្តីទីគណបក្សសង្គ្រោះជាតិលោក កឹម សុខា ដែលមជ្ឈដ្ឋាននានាចាត់ទុកថាជារឿងនយោបាយ។
លោក អ៊ូ វីរៈ អ្នកវិភាគឯករាជ្យបានថ្លែងថាបរិយាកាសរបស់គណៈកម្មាធិការជាតិរៀបចំការបោះឆ្នោតមើលទៅមានភាពតានតឹងក្នុងការនិយាយថាវាមានលក្ខណៈយ៉ាងណាចំពោះសំណុំរឿងរបស់លោក នី ចរិយា ។
លោកបានបញ្ជាក់ថា៖ «ខ្ញុំសន្មតថាមនុស្សដ៏ទៃទៀតនឹងមានការប្រុងប្រយ័ត្ន និងមានការភ័យខ្លាចបន្ថែមទៀតហើយថានឹងបង្កើតឱ្យមានបញ្ហាសម្រាប់សមាជិករបស់គណៈកម្មាធិការជាតិរៀបចំការបោះឆ្នោត។ …នេះប្រហែលជាបញ្ហាដ៏ធំបំផុតមួយ»។
លោក វីរៈ បានចោទសួរថាតើអ្នកណានឹងត្រូវចូលទៅជំនួសតំណែងលោក នី ចរិយា ខណៈដែលការកាត់ទោសនេះបង្ហាញថាវាគឺជាការគំរាមកំហែងមួយ។
លោកបន្តថា ការងាររបស់លោក នី ចរិយា ជាការងារដែលទទួលបានប្រាក់ខែទាបប៉ុន្តែមានហានីភ័យខ្ពស់។ «មនុស្សល្អប្រហែលជាមិនដាក់ពាក្យនោះទេបន្ទាប់មកនឹងមានបេក្ខជនដែលមិនសូវល្អដាក់ពាក្យមកហើយគេដឹងថាគេនឹងមិនហ៊ាននិយាយអ្វីដែលនាំឲ្យខ្លួនគេមានបញ្ហានោះទេ។ ខ្ញុំសូមធ្វើការសន្មតថាការងារនេះគឺវាមានការលំបាកណាស់ដូច្នេះមានបេក្ខជនជាច្រើនអាចនឹងមិនចង់ចូលទៅក្នុងស្ថាបន័នយោបាយបែបនេះទេ»៕ NS
រាយការណ៍បន្ថែមដោយ Christina Maza
Contact author: ឡាយ សាមាន
This is what CPP did not like him from the begining, therefor , the CPP leaders try find his mistake and remove him out of this post. Now they easy to find majority in this election committe. Now they control and can declar vote result as they did in last election. Sick
This is what CPP did not like him from the begining, therefor , the CPP leaders try find his mistake and remove him out of this post. Now they easy to find majority in this election committe. Now they control and can declar vote result as they did in last election. Sick
who care about that position , they hurt you that much I felling you should have much better position then this.