ដោយ យ៉ង ចាន់តារា
2016-09-26
RFA
ស្ដាប់ ឬ ទាញយកសំឡេង
ឯកអគ្គរដ្ឋទូតអាមេរិកប្រចាំកម្ពុជា លោក វីល្លៀម ហៃដ្ដ៍ (William Heidt) (កាន់ក្បាលមេក្រូ) ថ្លែងក្នុងពិធីចុះហត្ថលេខាផ្តល់ថវិកាពីមូលនិធិឯកអគ្គរដ្ឋទូតសម្រាប់ការអភិរក្សវប្បធម៌ នៅភ្នំដា ស្រុកអង្គរបូរី ខេត្តតាកែវ ព្រឹកថ្ងៃទី២៦ ខែកញ្ញា ឆ្នាំ២០១៦។ RFA/Yang Chandara
ឯកអគ្គរដ្ឋទូតសហរដ្ឋអាមេរិក ប្រចាំកម្ពុជា ចុះហត្ថលេខាផ្តល់ថវិកាជំនួយផ្នែកអភិរក្សវប្បធម៌ជាមួយរដ្ឋមន្ត្រីក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជា។ ពិធីចុះហត្ថលេខានេះ ធ្វើឡើងនៅជើងភ្នំដា ក្នុងស្រុកអង្គរបូរី ខេត្តតាកែវ ព្រឹកថ្ងៃទី២៦ ខែកញ្ញា។
ស្ថានទូតអាមេរិកប្រចាំកម្ពុជា ផ្តល់ថវិកាជាង ១២ម៉ឺនដុល្លារសហរដ្ឋអាមេរិក (១២១.៧៤៥ដុល្លារ) ដល់ក្រសួងវប្បធម៌ និងវិចិត្រសិល្បៈ ដើម្បីអនុវត្តគម្រោងចងក្រង និងរៀបចំបញ្ជីសារពើភ័ណ្ឌប្រាសាទចំនួន២៤ ដែលត្រូវបានសាងសង់នៅសតវត្សទី៦ និងទី៧ ស្ថិតក្នុងខេត្តតាកែវ និងខេត្តចំនួន៦ ផ្សេងទៀត។
ថវិកាទាំងនេះបានមកពីមូលនិធិឯកអគ្គរដ្ឋទូតសម្រាប់ការអភិរក្សវប្បធម៌ (AFCP) នៃក្រសួងការបរទេសអាមេរិក ដែលជាកម្មវិធីសំខាន់មួយរបស់រដ្ឋាភិបាលសហរដ្ឋអាមេរិក ដើម្បីជួយប្រទេសដទៃក្នុងការអភិរក្សបេតិកភណ្ឌវប្បធម៌រូបិយ និងអរូបិយ។
ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក វីល្លៀម ហៃដ្ដ៍ (William Heidt) ថ្លែងថា មូលនិធិឯកអគ្គរដ្ឋទូតសម្រាប់ការអភិរក្សវប្បធម៌ គឺជាការវិនិយោគមួយទៅលើប្រវត្តិសាស្ត្រនៃវប្បធម៌ និងប្រជាជនកម្ពុជា។ លោកបញ្ជាក់ថា បេតិកភណ្ឌវប្បធម៌ធ្វើឲ្យសហរដ្ឋអាមេរិក និងកម្ពុជា នៅជាមួយគ្នា ទោះឆ្លងកាត់រយៈពេលយូរ និងចម្ងាយឆ្ងាយយ៉ាងណាក្តី៖ «សហរដ្ឋអាមេរិកមានមោទនភាពក្នុងការជួយដល់ការខិតខំរបស់ប្រទេសកម្ពុជា ដើម្បីការពារចងក្រងឯកសារ និងចែករំលែកដល់ពិភពលោក នូវបេតិកភណ្ឌវប្បធម៌ដ៏ពិសេសរបស់កម្ពុជា»។
រដ្ឋមន្ត្រីក្រសួងវប្បធម៌ និងវិចិត្រសិល្បៈ អ្នកស្រី ភឿង សកុណា ថ្លែងអំណរគុណសហរដ្ឋអាមេរិក ដែលបានផ្តល់ជំនួយជាថវិកាដើម្បីកិច្ចការពារ និងអភិរក្សប្រាសាទបុរាណខ្មែរ ដែលមានអាយុកាលរាប់ពាន់ឆ្នាំ ហើយនិងផ្តល់កិច្ចសហប្រតិបត្តិការដ៏ល្អក្នុងការនាំយកវត្ថុបុរាណខ្មែរ ដែលត្រូវបានគេលួចយកទៅលក់នៅក្រៅប្រទេស ត្រឡប់មកកម្ពុជា វិញជាបន្តបន្ទាប់៖ «ប្រាសាទពិតមែនថាជារបស់ខ្មែរដែលបានកសាងដោយបុព្វបុរសខ្មែរ ក៏ប៉ុន្តែមានតម្លៃរបស់មនុស្សជាតិទាំងមូលតែម្តង ពីព្រោះគឺជាលំអ គឺជាស្ថាបត្យកម្មសម្រាប់ឲ្យប្រជាជនទាំងអស់នៅលើពិភពលោក បានយល់ដឹងអំពីបញ្ញាញាណរបស់មនុស្សជំនាន់មុន»។
ថវិកាជាង ១២ម៉ឺនដុល្លារអាមេរិកនេះ គឺជាអំណោយលើកទី១៨ ហើយរបស់មូលនិធិឯកអគ្គរដ្ឋទូតអាមេរិកសម្រាប់ការអភិរក្សវប្បធម៌ ដែលកម្ពុជា ទទួលបានគិតចាប់តាំងពីឆ្នាំ២០០១។ ក្នុងរយៈពេល ១៥ឆ្នាំកន្លងទៅនេះ សហរដ្ឋអាមេរិក បានចំណាយប្រាក់ចំនួនជិត ៤លានដុល្លារ (៣,៨លានដុល្លារ) ទៅលើកម្មវិធីនានាដែលទ្រទ្រង់ការអភិរក្សបេតិកភណ្ឌវប្បធម៌របស់កម្ពុជា ដែលរួមមាន យុទ្ធនាការប្រឆាំងនឹងការលួចប្លន់វត្ថុបុរាណ ការវិភាគទិន្នន័យ និងការអភិរក្សទីតាំងប្រាសាទបុរាណមួយចំនួនជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
-
វិចិត្រករខ្មែរម្នាក់យកកាកសំណល់ផ្ទះបាយនិងសំរាមសរីរាង្គច្នៃធ្វើផ្ទាំងគំនូរនិងវត្ថុអនុស្សាវរីយ៍
-
ក្រុមគ្រួសារនឹងប្រារព្ធខួប១០០ថ្ងៃជូនកវីនិពន្ធ គង្គ ប៊ុនឈឿន នៅថ្ងៃទី២៧កក្កដា
-
នារីខ្មែរ-អាមេរិកាំងជាប់ជាបវរកញ្ញា Intercontinental USA 2016
-
កម្ពុជាយកល្ខោនខោលទៅសម្ដែងក្នុងពិធីសិល្បៈនៅប្រទេសថៃ
-
បទសម្ភាសន៍អំពីការចូលរួមរបស់សិល្បករក្នុងការបង្កើតសារមន្ទីរមរតកខ្មែរនៅអាមេរិក
-
បទសម្ភាសន៍អំពីការបើកសារមន្ទីរនៅអាមេរិកបង្ហាញអំពីបញ្ហាដែលពលរដ្ឋខ្មែរធ្លាប់ឆ្លងកាត់
-
ក្រសួងវប្បធម៌អំពាវនាវឲ្យពលរដ្ឋប្រកាន់យកឥរិយាបថថ្លៃថ្នូរពេលជជែករឿងល្ខោនខោល
-
រដ្ឋាភិបាលបញ្ជាក់ពីការខិតខំបញ្ជូនល្ខោនខោលទៅក្នុងបញ្ជីបេតិកភណ្ឌពិភពលោក
-
មន្ត្រីព្រះបរមរាជវាំងនិងអាជ្ញាធរខេត្តសៀមរាបហាត់សមពិធីច្រត់ព្រះនង្គ័ល
-
សម្ភាសសិល្បករបីនាក់ដែលទើបបញ្ចប់ការសម្ដែងឧបករណ៍ភ្លេងខ្មែរនៅអាមេរិក