ដោយ ហ៊ុំ ចំរើន
2016-09-26
RFA
ប្រជាកសិករលីស្រូវដាក់រថយន្តឲ្យឈ្មួញទិញតាមផ្ទះនៅភូមិវត្តកណ្ដាល ឃុំរាំងកេសី ស្រុកសង្កែ ខេត្តបាត់ដំបង កាលពីថ្ងៃទី១០ ខែកញ្ញា ឆ្នាំ២០១៦។ RFA/Hum Chamroeun
ប្រជាកសិកររាប់រយគ្រួសារនៅស្រុករុក្ខគិរី ខេត្តបាត់ដំបង កំពុងខ្វល់ខ្វាយខ្លាចក្រែងមិនអាចរកប្រាក់ចំណូលដោះស្រាយជីវភាពគ្រួសារប្រចាំថ្ងៃបាននៅពេលខាងមុខ។ ការខ្វាយខ្វល់នេះ កើតមានដោយសារទិន្នផលស្រូវរបស់ពួកគាត់ផលិតបានរាប់ពាន់តោនតែគ្មានទីផ្សារសម្រាប់លក់ ហើយឈ្មួញឲ្យតម្លៃថោកធ្វើឲ្យមិនអាចលក់ចេញបាន។
ប្រជាកសិករនៅស្រុករុក្ខគិរី មួយចំនួន លើកឡើងថា ពួកគាត់បាននាំគ្នាស្វះស្វែងរកទីផ្សារលក់ស្រូវពីឃុំមួយទៅឃុំមួយជាបន្តបន្ទាប់ ក៏ប៉ុន្តែពុំមានឈ្មួញណាហ៊ានឲ្យតម្លៃខ្ពស់នោះទេ។
ប្រជាកសិករនៅភូមិព្រះអណ្ដូង ឃុំស្ដុកប្រវឹក ស្រុករុក្ខគិរី លោក វន ចំរើន ឲ្យដឹងនៅថ្ងៃទី២៦ ខែកញ្ញា ថា លោកធ្វើស្រូវសែនក្រអូបប្រមាណ ៥ហិកតារ ហើយដល់ពេលប្រមូលផលហើយ ប៉ុន្តែគ្មានទីផ្សារសម្រាប់លក់ទិន្នផលស្រូវនោះទេ៖ «បាទ! អត់អាចលក់កើត ព្រោះអីយើងចំណាយដើមទុនអស់ច្រើន ដូចជាចំណាយទៅលើការបូមទឹក ថ្លៃជី និងថ្លៃថ្នាំបាញ់ស្រូវជាដើម»។
ស្រដៀងគ្នានេះដែរ កសិករនៅភូមិព្រះអណ្ដូង ម្នាក់ទៀត គឺលោក ប៉ែន វណ្ណ ថ្លែងថា ដំណាំស្រូវរបស់លោកប្រមាណ ២ហិកតារ ទុំក្រហមពេញស្រែ ល្មមនឹងប្រមូលផលហើយ ប៉ុន្តែលោកថា មិនទាន់ហ៊ានច្រូតកាត់នៅឡើយទេ ព្រោះតម្លៃស្រូវថោកពេក ហើយលក់មិនបានប្រាក់កម្រៃ។លោកបញ្ជាក់ថា តម្លៃស្រូវសែនក្រអូបសព្វថ្ងៃដែលឈ្មួញកណ្ដាលប្រមូលទិញចន្លោះពី ៦០០ ទៅ ៦២០រៀលក្នុងមួយគីឡូក្រាម៖ «ឥឡូវបើសើនជាទុកចោលក៏មិនដឹងទុកធ្វើយ៉ាងមិច! ដល់អ៊ីចឹងអ្នកណាស្រូវទុំក៏ច្រូតបណ្ដោះចេញបណ្ដើរសិនទៅ។ មិនដឹងធ្វើម៉េច ហើយមេឃចេះតែភ្លៀង ហើយតម្លៃអ្នកណាមកក៏គេឲ្យអ៊ីចឹង»។
កាលពីថ្ងៃទី២៥ ខែកញ្ញា កន្លងទៅ ប្រជាកសិករនៅស្រុករុក្ខគិរី ប្រមាណ ១០នាក់ នាំគ្នាទៅរកទីផ្សារលក់ទិន្នផលស្រូវដោយខ្លួនឯង នៅឃុំកំពង់ព្រៀង ស្រុកសង្កែ ខេត្តបាត់ដំបង ដែលមានចម្ងាយប្រមាណ ៥០គីឡូម៉ែត្រពីតំបន់ពួកគាត់រស់នៅ ដែលកន្លែងនោះជាទីតាំងទិញស្រូវរបស់រដ្ឋាភិបាល តែពុំទទួលបានលទ្ធផលនៅឡើយ។
ឆ្លើយតបនឹងបញ្ហានេះ អភិបាលរងស្រុករុក្ខគិរី លោក គ្រឿម រដ្ឋា មានប្រសាសន៍ថា អាជ្ញាធរស្រុកបានទាក់ទងទៅខាងធនាគារស្រូវប្រចាំខេត្តបាត់ដំបង ដើម្បីទៅទិញស្រូវពីប្រជាកសិកររួចមកហើយ។ លោកអះអាងថា មន្ត្រីពាក់ព័ន្ធនឹងចុះទៅពិនិត្យទិន្នផលស្រូវដល់ទីកន្លែងប្រជាកសិករនៅថ្ងៃទី២៧ ខែកញ្ញា៖ «ប៉ុន្តែមួយរយៈនេះគឺ នៅក្នុងឃុំដែលប្រមូលផលនេះ ជាក់ស្ដែងឃុំមុខរា មានឈ្មួញមកទិញដល់ស្រែក្នុងតម្លៃ ៧១០រៀលក្នុងមួយគីឡូក្រាម»។
កន្លងមកទាំងអ្នកជំនាញសេដ្ឋកិច្ច និងលោកនាយករដ្ឋមន្ត្រី ហ៊ុន សែន បានបញ្ជាក់ថា តម្លៃស្រូវចុះថោកបណ្ដាលមកពីផ្សារស្រូវនៅលើពិភពលោកធ្លាក់ចុះ ដោយសារប្រទេសមួយចំនួនផលិតស្រូវសែនក្រអូបច្រើនលើសតម្រូវការ ជាពិសេសនៅប្រទេសថៃ និងប្រទេសវៀតណាម ជាដើម។
រដ្ឋាភិបាលបានបញ្ចេញថវិកាចំនួន ២៧លានដុល្លារអាមេរិក ក្នុងនោះមានប្រាក់ពីធនាគារអភិវឌ្ឍន៍ជនបទ (RDB) ចំនួន ៧លានដុល្លារ ដើម្បីរក្សាស្ថិរភាពតម្លៃស្រូវនៅលើទីផ្សារ និងជំរុញការទិញស្រូវនៅក្នុងប្រទេស។ រដ្ឋាភិបាលបានកំណត់តម្លៃស្រូវសែនក្រអូបប្រភេទលេខ១ ចំនួន ៨៤០រៀលក្នុងមួយគីឡូក្រាម។ ទោះជាយ៉ាងណាប្រជាកសិករនៅស្រុករុក្ខគិរី អះអាងថា ពុំមានឈ្មួញណាចុះទៅទិញស្រូវតាមតម្លៃដែលរដ្ឋាភិបាលកំណត់នៅឡើយ។ របាយការណ៍សាលាស្រុករុក្ខគិរី បង្ហាញថា ប្រជាកសិករនៅក្នុងស្រុកនេះ ផលិតស្រូវសែនក្រអូបដែលកំពុងប្រមូលផលបណ្ដើរៗប្រមាណ ៤០០ហិកតារ ដោយទិន្នផលប្រមាណ ៤តោនក្នុងមួយហិកតារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
-
ជនជាតិដើមភាគតិចកួយនៅខេត្តស្ទឹងត្រែងផលិតចង្កឹះពីរុក្ខជាតិព្រៃ
-
“កម្ពុជាបាត់ទឹកប្រាក់ជាង៧០០លានដុល្លារពីការនាំចេញខ្សាច់ទៅក្រៅប្រទេសរយៈពេល៨ឆ្នាំ”
-
ឯកអគ្គរដ្ឋទូតអាមេរិកផ្សព្វផ្សាយពីដំណើរទស្សនកិច្ចទាក់ទាញអ្នកវិនិយោគមកកម្ពុជា
-
គ្រឹះស្ថានធនាគារនិងហិរញ្ញវត្ថុនឹងពិចារណាលើលក្ខខណ្ឌសងឥណទានរបស់កសិករ
-
រដ្ឋាភិបាលប្រកាសបញ្ចេញថវិកាជិត២០លានដុល្លារដើម្បីអន្តរាគមន៍បញ្ហាតម្លៃស្រូវចុះថោក
-
ធនាគារស្រូវប្រកាសទិញស្រូវពីកសិករក្នុងខេត្តបីមិនក្រោមតម្លៃ៨៤០រៀលមួយគីឡូក្រាម
-
អ្នកជំនាញថារដ្ឋាភិបាលនៅតែបរាជ័យក្នុងស្វែងរកទីផ្សារលក់កសិផលជូនកសិករ
-
កសិករនៅស្រុកគូលែនជួបវិបត្តិដោយសារតែផ្លែល្ពៅគ្មានទីផ្សារ
-
កសិករនៅខេត្តត្បូងឃ្មុំត្អូញត្អែរពីផលប៉ះពាល់ក្រោយពេលដំណាំដំឡូងមានតម្លៃថោក
-
កសិករនៅស្រុកបាកានខេត្តពោធិ៍សាត់ត្អូញត្អែររឿងតម្លៃស្រូវចុះថោក