IPU ព្រួយ​បារម្ភ​ពីការ​ប្រើ​ប្រាស់​ប្រព័ន្ធតុលាការ​រំលោភ​សិទ្ធិ​​តំណាងរាស្ត្រ​នៅ​កម្ពុជា

ដោយ អ៊ឹម រចនា
28/10/2016
RFI

media
សាលប្រជុំនៃរដ្ឋសភាកម្ពុជា។ RFI/ Siv Channa


សហភាព​អន្ដរសភា IPU នៅ​ថ្ងៃ​ទី​២៧​តុលា​ម្សិលមិញ បាន​សម្ដែង​ការ​ព្រួយ​បារម្ភ​អំពី​ការ​ប្រើ​ប្រាស់​ប្រព័ន្ធតុលាការ ដើម្បី​គាប​សង្កត់ និង​បំបិទ​សិទ្ធិ​សេរីភាព​នៃ​ការ​បញ្ចេញ​មតិ​របស់​តំណាង​រាស្ត្រ​នៅ​ទូទាំង​ពិភពលោក​។ នៅ​ក្នុង​សេចក្ដី​សម្រេចជា​ស៊េរី​កម្រាស់​៤០​ទំព័រ សហភាព​អន្ដរសភា​បាន​លើក​ឡើង​ពី​ករណី​គាប​សង្កត់​ និង​រំលោភ​សិទ្ធិ​​អ្នក​តំណាង​រាស្ត្រចំនួន​១២៩​រូប ​នៅ​ប្រទេស​ចំនួន៨​​ផ្សេង​គ្នា ដែល​ក្នុង​នោះ​ក៏​មាន​តំណាង​រាស្ត្រ​ម​ក​ពី​បក្ស​ប្រឆាំងចំនួន​​១៥​រូប​របស់​កម្ពុជា​ផង​ដែរ​។

តំណាង​រាស្ត្រ​និង​សមាជិក​ព្រឹទ្ធសភា​មក​ពី​គណបក្ស​ប្រឆាំង​ទាំង​១៥​រូប​ ដែល​សហភាព​អន្ដរសភា​ IPU អះអាង​ថា ត្រូវ​ប្រឈម​មុខ​នឹង​ការ​រំលោភ​បំពាន​សិទ្ធិ​ជា​មូលដ្ឋាន ការ​វាយ​ដំ​ប្រើ​អំពើ​ហិង្សា និង​ការ​ប្ដឹង​ផ្ដល់​​​តាម​ផ្លូវ​តុលាការ​នោះ​​រួម​មាន លោក សម រង្ស៊ី, លោក កឹម សុខា, លោក ហុង សុខហួរ, លោក អ៊ុំ សំអាន, លោក ញ៉យ ចំរើន, លោក គង់ សភា, លោក​ស្រី ថាក់ ឡានី, លោក​ស្រី មួរ សុខហួរ, លោក កែវ ភីរម្យ, លោក ហូរ វ៉ាន់, លោក ឡុង រី, លោក នុត រំដួល, លោក ម៉ែន សុថាវរិន្ទ្រ, លោក រៀល ខេមរិន្ទ្រ, និង លោក ចាន់ ចេង​។

បើ​តាម​ IPU​ ការ​គំរាម​កំហែង រំលោភ​​សិទ្ធិ និង​ការ​ប្ដឹង​ផ្ដល់​នៅ​តុលាការ បាន​រារាំង​​តំណាងរាស្ត្រ និង​សមាជិក​ព្រឹទ្ធសភា​ទាំង​១៥​រូប មិនឲ្យ​​បំពេញ​តួនាទី​ខ្លួន​ឯង​បាន​យ៉ាង​ពេញ​លេញ ដោយ​គ្មាន​ភាព​ភ័យ​ខ្លាច​ពី​ការ​កាត់​ទោស ខណៈ​ពេល​ដែល​ការ​បោះ​ឆ្នោត​ឃុំ​សង្កាត់ និង​ការ​បោះ​ឆ្នោត​ជាតិ​កាន់​តែ​ខិត​ជិត​ចូល​មក​ដល់​។
 
ការ​ព្រួយ​បារម្ភ​របស់ IPU ​យ៉ាង​ដូច្នេះ​បាន​ធ្វើ​ឡើង បន្ទាប់​ពី​បាន​ជួប​សវនាការ​ជាមួយ​លោក សម រង្ស៊ី ប្រធាន​គណបក្ស​សង្គ្រោះ​ជាតិ នៅ​​ក្នុង​សន្និបាត​លើកទី​១៣៥ ​នៅ​ទីក្រុង​ហ្សឺណែវ ប្រទេស​ស្វីស​។ នៅ​ក្នុង​ជំនួប​នោះ លោក សម រង្ស៊ី បាន​ជម្រាប​ប្រាប់​ទៅ​ IPU ​ថា លោក​ដែល​កំពុង​រង​បណ្ដឹង​តាម​ផ្លូវ​តុលាការ ​ត្រូវ​បាន​រដ្ឋាភិបាល​កម្ពុជា​រារាំង​មិន​ឲ្យ​ត្រឡប់​ចូល​ប្រទេស ដោយ​ប្រើ​ប្រាស់​វិធី​គ្រប់​សព្វ​បែប​យ៉ាង​។ ហើយ​លោក​ព្រួយ​ថា ការ​បោះ​ឆ្នោត​នា​ពេល​ខាង​មុខ ​អាច​នឹង​មិន​មាន​ភាពយុត្តិធម៌ ប្រសិន​បើ​រូប​លោក​ក៏​ដូច​ជា​គណបក្ស​សង្គ្រោះ​ជាតិ​ទាំង​មូល ត្រូវ​រង​បណ្ដឹង ហើយ​មិន​អាច​ចូល​រួមក្នុង​ឆាក​នយោបាយ​​ដោយ​សេរី និង​ពេញ​លេញ​ទេ​នោះ​។
 
ផ្ទុយ​ពី​លោក សម រង្ស៊ី ប្រតិភូ​កម្ពុជា​ដែល​បាន​ចូល​រួម​សន្និបាត​សហភាព​អន្ដរសភា​លើក​ទី​១៣៥ បាន​អះអាង​​ថា គណបក្ស​សង្គ្រោះជាតិ អាច​ចូល​រួម​នៅ​ក្នុង​ដំណើរ​ការ​បោះ​ឆ្នោត លើក​លែង​តែ​សមាជិក​ណា​ដែលបាន​ប្រព្រឹត្ត​បទ​ល្មើស​ប៉ុណ្ណោះ​។ បើ​តាម​ប្រតិភូ​ដដែល ខណៈ​ពេល​ដែល​លោក សម រង្ស៊ី និរទេស​ខ្លួន​នៅ​ក្រៅ​ប្រទេស បក្ស​ប្រឆាំង​អាច​តែងតាំង​ថ្នាក់​ដឹកនាំ​ថ្មី ដែល​អាច​ឈរ​ឈ្មោះ​នៅ​ក្នុង​ការ​បោះ​ឆ្នោត​បាន​។ ចំណែក​​សំណុំ​រឿង​លោក កឹម សុខា គ្មាន​ដីកា​តុលាការ​មួយ​ណា​ដែល​ហាម​ឃាត់​រូប​លោក​មិន​ឲ្យ​ចាក​ចេញ​ពី​ទីស្នាក់ការ​គណបក្ស​ឡើយ​។ ប្រតិភូ​កម្ពុជា​បាន​បញ្ជាក់​ប្រាប់ IPU ​ទៀត​ថា សេរីភាព​បញ្ចេញ​មតិ​នៅ​កម្ពុជា​ខុស​ពី​បស្ចឹម​ប្រទេស ហើយ​ចាំ​បាច់​ត្រូវ​ថ្លឹង​ថ្លែង​ជាមួយ​ស្ថិរភាព​នៃ​ប្រទេស​។ សម្រាប់​ប្រតិភូ​កម្ពុជា បក្ស​ប្រឆាំង​នឹង​មិន​ធ្លាក់​ក្នុង​ស្ថានភាព​ដូច​សព្វ​ថ្ងៃ​នេះ​ទេ ប្រសិន​បើ​គណបក្ស​នេះមិន​ចាក់​សាំង​លើ​ភ្លើង ហើយ​បង្ហាញ​ជំហទន់ភ្លន់ មិន​រិះគន់​វាយ​ប្រហារ​លោក ហ៊ុន សែន នាយករដ្ឋ​មន្ដ្រី​កម្ពុជា​​​។ នេះ​បើ​តាម​ប្រតិភូ​កម្ពុជា​។
 
យ៉ាង​ណា​ក៏​ដោយ IPU ​បាន​ទាមទារ​ឲ្យ​កម្ពុជា គោរព​អភ័យឯកសិទ្ធិសភា​របស់​អ្នក​តំណាងរាស្ត្រ ក៏​ដូច​ជា​សិទ្ធិ​សេរីភាព​បញ្ចេញ​មតិ​ និង​សិទ្ធិ​ទទួល​បាន​នូវ​ការ​ជំនុំ​ជម្រះ​ដោយ​ឯករាជ្យ​និង​យុត្តិធម៌​។ សហភាព​អន្ដរសភា IPU ក៏​ចង់​ឲ្យ​បក្ស​ប្រជាជន​និង​សង្គ្រោះ​ជាតិ ស្វែង​រក​ដំណោះ​ស្រាយ​នយោបាយ​តាមផ្លូវ​ចរចា ដើម្បី​បង្កើត​បរិយាកាស​នយោបាយ​ដ៏​ល្អ​ប្រសើរ​មួយ​សម្រាប់​ការ​បោះ​ឆ្នោត​នា​ពេល​ខាង​មុខ​៕

What Next?

Recent Articles

2 Responses to "IPU ព្រួយ​បារម្ភ​ពីការ​ប្រើ​ប្រាស់​ប្រព័ន្ធតុលាការ​រំលោភ​សិទ្ធិ​​តំណាងរាស្ត្រ​នៅ​កម្ពុជា"

  1. ?? says:

    I knew it some thing is coming down . all those wild group can not do what they alway wanted. you can run but you can not hiding from the world. GOD is the witness some one have to responsible on what they have done wrong . no one can be on top of the law , the law is the law no matter what or who you are every one have to obey it. there will be no peace if some one interpret the law to suit his own benefit .

  2. ?? says:

    I knew it some thing is coming down . all those wild group can not do what they wanted. you can run but you can not hiding from the world. GOD is the witness some one have to responsible on what they have done wrong . no one can be on top of the law , the law is the law no matter what or who you are every one have to obey it. there will be no peace if some one interpret the law to suit his own benefit .