លោក ហ៊ុន សែន កោត​សរសើរ​ឡាវ​ថា​លក់​អគ្គិសនី​ឲ្យ​ខ្មែរ​ក្នុង​តម្លៃ​ថោក

ដោយ ម៉ែន សុធីរ
2017-01-10
RFA

ស្ដាប់ ឬ ទាញ​យក​សំឡេង
ស្តាប់សំឡេង ថតសំឡេង

លោក​នាយក​រដ្ឋមន្ត្រី​ឡាវ លោក ថងលួង ស៊ីស៊ូលីត (Thongloun Sisoulith) (ឆ្វេង) និង​លោក​នាយក​រដ្ឋមន្ត្រី​កម្ពុជា លោក ហ៊ុន សែន ក្នុង​ពិធី​សម្ពោធ​ច្រក​ទ្វារ​អន្តរជាតិ​ត្រពាំង​ក្រៀល នៅ​ព្រំដែន​ខែត្រ​ស្ទឹងត្រែង ប្រទេស​កម្ពុជា និង​ខែត្រ​ចម្ប៉ាសាក់ ប្រទេស​ឡាវ នៅ​ព្រឹក​ថ្ងៃ​ទី​១០ ខែ​មករា ឆ្នាំ​២០១៧។ RFA/Men Sothyr
លោក​នាយក​រដ្ឋមន្ត្រី​ឡាវ លោក ថងលួង ស៊ីស៊ូលីត (Thongloun Sisoulith) (ឆ្វេង) និង​លោក​នាយក​រដ្ឋមន្ត្រី​កម្ពុជា លោក ហ៊ុន សែន ក្នុង​ពិធី​សម្ពោធ​ច្រក​ទ្វារ​អន្តរជាតិ​ត្រពាំង​ក្រៀល នៅ​ព្រំដែន​ខែត្រ​ស្ទឹងត្រែង ប្រទេស​កម្ពុជា និង​ខែត្រ​ចម្ប៉ាសាក់ ប្រទេស​ឡាវ នៅ​ព្រឹក​ថ្ងៃ​ទី​១០ ខែ​មករា ឆ្នាំ​២០១៧។ RFA/Men Sothyr


លោក​នាយក​រដ្ឋមន្ត្រី ហ៊ុន សែន ថ្លែង​កោត​សរសើរ​រដ្ឋាភិបាល​ឡាវ ថា​បាន​លក់​អគ្គិសនី​ឲ្យ​កម្ពុជា ក្នុង​តម្លៃ​ថោក បើ​ទោះ​បី​ជា​ពលរដ្ឋ និង​ក្រុម​អង្គការ​សង្គម​ស៊ីវិល​មាន​ក្តី​កង្វល់​ពី​ផល​ប៉ះពាល់​បរិស្ថាន និង​សង្គម ដោយសារ​គម្រោង​សាងសង់​ទំនប់​វារីអគ្គិសនី​ដន​សាហុង (Don Sahong) នៅ​មិន​ទាន់​ដោះស្រាយ​នៅ​ឡើយ។

ការ​ថ្លែង​នេះ ក្នុង​ពិធី​សម្ពោធ​ច្រក​ទ្វារ​អន្តរជាតិ​ត្រពាំង​ក្រៀល និង​អគារ​ត្រួត​ពិនិត្យ​ច្រក​ទ្វារ​អន្តរជាតិ​ត្រពាំង​ក្រៀល នៅ​ព្រំដែន​ខែត្រ​ស្ទឹងត្រែង និង​ខែត្រ​ចម្ប៉ាសាក់ ប្រទេស​ឡាវ នៅ​ព្រឹក​ថ្ងៃ​ទី​១០ មករា។

នេះ​មិន​មែន​ជា​លើក​ទី​មួយ​នោះ​ទេ ដែល​ប្រមុខ​រដ្ឋាភិបាល​កម្ពុជា លោក ហ៊ុន សែន បាន​សម្ដែង​មោទនភាព​ចំពោះ​រដ្ឋាភិបាល​ឡាវ ដែល​លក់​អគ្គិសនី​ឲ្យ​កម្ពុជា ក្នុង​តម្លៃ​ថោក។

នៅ​ព្រឹក​ថ្ងៃ​ទី​១០ មករា លោក ហ៊ុន សែន បាន​ថ្លែង​ចំពោះ​មុខ​លោក​នាយក​រដ្ឋមន្ត្រី​ឡាវ លោក ថងលួង ស៊ីស៊ូលីត (Thongloun Sisoulith) ថា​បាន​លក់​អគ្គិសនី​ឲ្យ​ពលរដ្ឋ​ខែត្រ​ស្ទឹងត្រែង និង​ខែត្រ​ព្រះវិហារ ក្នុង​តម្លៃ​ទាប ក៏ប៉ុន្តែ​លោក ហ៊ុន សែន ពុំ​បាន​បញ្ជាក់​លម្អិត​ទេ​ថា រដ្ឋាភិបាល​ឡាវ លក់​អគ្គិសនី​ចំនួន​ប៉ុន្មាន​មេហ្គា​វ៉ាត់ និង​បញ្ចប់​កិច្ចព្រមព្រៀង​ទិញ​ពី​ឡាវ ឬ​យ៉ាង​ណា ប្រសិន​បើ​ទំនប់​វារីអគ្គិសនី​សេសាន​ក្រោម​ពីរ បើក​ឲ្យ​ដំណើរ​ការ​នៅ​ចុង​ឆ្នាំ​២០១៧ ខាង​មុខ​នេះ៖ «ខ្ញុំ​សូម​អរគុណ​ចំពោះ​រដ្ឋាភិបាល​ឡាវ ប្រជាធិបតេយ្យ​ប្រជាមានិត​ឡាវ ដែល​បាន​លក់​អគ្គិសនី​ក្នុង​តម្លៃ​ថោក​ជូន​មក​កម្ពុជា ដែល​ភាគច្រើន​ប្រើប្រាស់​នៅ​ខែត្រ​ស្ទឹងត្រែង និង​ខែត្រ​ព្រះវិហារ»

ទោះ​ជា​យ៉ាង​ណា ពលរដ្ឋ​រស់នៅ​ខែត្រ​ស្ទឹងត្រែង នៅ​តែ​ត្អូញត្អែរ​ថា ពួក​គេ​កំពុង​ប្រើប្រាស់​អគ្គិសនី​ដែល​រដ្ឋាភិបាល​កម្ពុជា ទិញ​ពី​ឡាវ ក្នុង​តម្លៃ​ថ្លៃ គឺ ១​គីឡូវ៉ាត់​ម៉ោង (1KW/H) តម្លៃ ៩៥០​រៀល។ តម្លៃ​នេះ​ថ្លៃ​ជាង​នៅ​ប្រទេស​ឡាវ ទ្វេ​ដង ពោល​គឺ​នៅ​ប្រទេស​ឡាវ មាន​តម្លៃ​ប្រមាណ ២០០​រៀល​ក្នុង ១​គីឡូវ៉ាត់​ម៉ោង។

ពលរដ្ឋ​រស់នៅ​ក្រុង​ស្ទឹងត្រែង លោកស្រី តឹម ស្រីម៉ុម ចាត់​ទុក​អគ្គិសនី​ដែល​គាត់​កំពុង​ប្រើប្រាស់​សព្វថ្ងៃ ថា​នៅ​មាន​តម្លៃ​ថ្លៃ​នៅ​ឡើយ ដែល​មិន​អាច​ធ្វើ​ឲ្យ​ជីវភាព​រស់នៅ​របស់​គាត់​ប្រសើរ​ឡើយ។ លោកស្រី​ស្វាគមន៍​ចំពោះ​រដ្ឋាភិបាល​កម្ពុជា ដែល​បាន​ទិញ​អគ្គិសនី​ពី​ឡាវ ក៏ប៉ុន្តែ​លោកស្រី​ទាមទារ​ឲ្យ​រដ្ឋាភិបាល​ខ្មែរ​បញ្ចុះ​តម្លៃ​អគ្គិសនី​ដូច​នៅ​ប្រទេស​ឡាវ។ លោកស្រី​ក៏​សម្ដែង​ការ​មិន​សប្បាយ​ចិត្ត ប្រសិន​បើ​ការ​ទាញ​យក​ថាមពល​អគ្គិសនី​បង្ក​ការ​ប៉ះពាល់​ដល់​ជីវភាព​រស់នៅ​របស់​ពលរដ្ឋ និង​បរិស្ថាន​ធ្ងន់ធ្ងរ៖ «ខ្ញុំ​ចង់​ឲ្យ​ថោក​ជាង​ហ្នឹង​តិច​ទៀត ព្រោះ​អី​អគ្គិសនី​ឥឡូវ​មាន​តម្លៃ ៩៥០​រៀល។ ខ្ញុំ​ចង់​ថោក​ដូច​នៅ​ប្រទេស​ឡាវ ព្រោះ​អី​នៅ​ផ្ទះ​ខ្ញុំ​អស់ ៧​ទៅ ៨​ម៉ឺន​ដែរ»

មន្ត្រី​សម្របសម្រួល​អង្គការ​សម្ព័ន្ធ​ភាព​ដើម្បី​អភិរក្ស​ធនធាន​ជលផល (Fact) លោក ឯក ចំរើន ចាត់​ទុក​ការ​ទាញ​យក​ថាមពល​អគ្គិសនី​ជា​រឿង​សំខាន់ ក៏ប៉ុន្តែ​លោក​ចង់​ឲ្យ​មាន​តម្លាភាព​ចំពោះ​ការ​វាយ​តម្លៃ​ផល​ប៉ះពាល់​បរិស្ថាន និង​សង្គម​ឲ្យ​បាន​ត្រឹមត្រូវ និង​មាន​ការ​ទទួល​ខុស​ត្រូវ ប្រសិន​បើ​មាន​ផល​ប៉ះពាល់​ជាក់ស្តែង​ដល់​ពលរដ្ឋ និង​បរិស្ថាន។ លោក​ចាត់​ទុក​ការ​ទាញ​យក​ផល​ប្រយោជន៍​ពី​ធនធាន​ធម្មជាតិ ឬ​ទន្លេ​មេគង្គ​របស់​ប្រទេស​ឡាវ មាន​ប្រៀប​ជាង​កម្ពុជា ឆ្ងាយ ហើយ​ពលរដ្ឋ​ដែល​រងគ្រោះ​ច្រើន​ជាង​គេ គឺ​ពលរដ្ឋ​កម្ពុជា ដែល​រស់នៅ​ប៉ែក​ខាង​ក្រោម​នៃ​ទន្លេ​មេគង្គ ជាពិសេស​ពលរដ្ឋ​មាន​ជីវភាព​ផ្អែក​លើ​ផល​នេសាទ៖ «ស្នើសុំ​ប្រមុខ​រដ្ឋាភិបាល​មេត្តា​បញ្ចេញ​សារ​រួម​គ្នា និង​ចេញ​សេចក្តី​ថ្លែងការណ៍​រួម​គ្នា​មួយ​មក ដើម្បី​ឲ្យ​ប្រជាពលរដ្ឋ​បាន​ច្បាស់​អំពី​ផល​ប៉ះពាល់​អំពី​ទំនប់​វារីអគ្គិសនី​ដន​សាហុង»

អតីត​អ្នក​សម្របសម្រួល​អង្គការ​បណ្ដាញ​ការពារ​ទន្លេ​បី លោក មៀច មាន សន្និដ្ឋាន​ថា លោក​នាយក​រដ្ឋមន្ត្រី​រំពឹង​ថា នៅ​គ្រា​ដែល​ទំនប់​វារីអគ្គិសនី​ដន​សាហុង ដែល​ឡាវ សាងសង់​រួច ឡាវ នឹង​លក់​អគ្គិសនី​មក​ឲ្យ​កម្ពុជា ក៏ប៉ុន្តែ​លោក​ពុំ​ទាន់​ឃើញ​កិច្ចព្រមព្រៀង​ដែល​រដ្ឋាភិបាល​ឡាវ ព្រមព្រៀង​ទិញ​លក់​អគ្គិសនី​មក​ឲ្យ​កម្ពុជា នោះ​ទេ។ លោក​ថា កន្លង​ទៅ ក្រុមហ៊ុន មេហ្គា​ហ្វើស (Mega First Corporation Berhad) ដែល​កំពុង​សាងសង់​ទំនប់​វារីអគ្គិសនី​ដន​សាហុង បាន​ចុះ​កិច្ចព្រមព្រៀង​ជាមួយ​រដ្ឋាភិបាល​ថៃ រួច​ហើយ ថា​បើ​គេ​សាងសង់​ទំនប់​រួច នឹង​លក់​អគ្គិសនី​ទាំង​ស្រុង​ឲ្យ​ប្រទេស​ថៃ។

លោក​ពុំ​មាន​សង្ឃឹម​ថា រដ្ឋាភិបាល​កម្ពុជា នឹង​បន្ត​កិច្ចព្រមព្រៀង​ទិញ​អគ្គិសនី​ពី​ឡាវ បន្ត​ទៀត ឬ​យ៉ាង​ណា ខណៈ​ទំនប់​វារីអគ្គិសនី​សេសាន​ក្រោម​ពីរ ដែល​កំពុង​សាងសង់​នៅ​ជិត​ទី​រួម​ខែត្រ​ស្ទឹងត្រែង នឹង​បើក​ឲ្យ​ដំណើរ​ការ​នៅ​ដំណាច់​ឆ្នាំ​២០១៧៖ «ទំនប់​សេសាន​ក្រោម​ពីរ​ដែល​សាងសង់​ហើយ​ហ្នឹង គឺ​វា​នៅ​ជិត​ទី​រួម​ខែត្រ​ស្ទឹងត្រែង ហ្នឹង។ ចឹង​ហេតុ​អី​បាន​យើង​ចាំបាច់​ត្រូវ​ទិញ​ភ្លើង​មក​ពី​ឡាវ។ ជាទូទៅ ប្រទេស​ឡាវ មាន​ទំនប់​ច្រើន​ដែល​បាន​ចុះ​កិច្ចព្រមព្រៀង និង​លក់​ទៅ​ថៃ ហើយ​ម្យ៉ាង​ទៀត គេ​ត្រូវ​មាន​កិច្ចព្រមព្រៀង​ទិញ​ភ្លើង​រួច​ហើយ បាន​គេ​សាងសង់»

រដ្ឋាភិបាល​កម្ពុជា បាន​ទិញ​អគ្គិសនី​ពី​ឡាវ នៅ​ខែត្រ​ស្ទឹងត្រែង តាំង​ពី​ឆ្នាំ​២០០៩ ចំនួន​ពី ៥ ទៅ ៧​មេហ្គា​វ៉ាត់ ហើយ ៧​មេហ្គា​វ៉ាត់​នេះ គឺ​ជា​ភ្លើង​ដែល​ឡាវ ទាញ​ពី​ទំនប់​វារីអគ្គិសនី​មួយ​ឈ្មោះ​ថា ហួយ ហួ ឋិត​នៅ​ដៃ​ទន្លេ​សេកុង ប្រទេស​ឡាវ។ រដ្ឋាភិបាល​ឡាវ គ្រោង​ធ្វើ​ឲ្យ​ប្រទេស​ឡាវ ក្លាយ​ជា​ធនាគារ​អគ្គិសនី​ធំ​ជាង​គេ​នៅ​អាស៊ាន តាម​រយៈ​ការ​កសាង​ទំនប់​វារីអគ្គិសនី​ចំនួន​ជាង ៣០០​ទំនប់​ទូទាំង​ប្រទេស ក្នុង​នោះ​មាន ២៨​ទំនប់​ឋិត​ក្នុង​ដៃ​ទន្លេ​សេកុង៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។


អត្ថបទ​ដែល​ទាក់ទង

What Next?

Recent Articles

One Response to "លោក ហ៊ុន សែន កោត​សរសើរ​ឡាវ​ថា​លក់​អគ្គិសនី​ឲ្យ​ខ្មែរ​ក្នុង​តម្លៃ​ថោក"

  1. people says:

    Laos country is the landlock country’ before the war laos is rely on cambodia’ even send students to study in uni in cambodia’ but now cambodia so poor because the leader so dumb ‘ like buffalo ‘no education and listen to veitcong germs only that why this country serve Youn only and treat khmer people like un-human .Veitcong dictator and veitcong germs will get punished soon.GOD bless all cambodian people’