ដោយ ទីន ហ្សាការីយ៉ា
2017-01-13
RFA
មន្ត្រីជាន់ខ្ពស់បក្សសង្គ្រោះជាតិ លោក អេង ឆៃអ៊ាង ថ្លែងក្នុងពិធីគម្រប់ខួប១២ឆ្នាំ នៃការស្លាប់របស់លោក ជា វិជ្ជា នៅជិតវត្តលង្កា នៅថ្ងៃទី២២ ខែមករា ឆ្នាំ២០១៦។ RFA/Brach Chev
មកទល់ពេលនេះ គណបក្សជាប់ឆ្នោតទាំងពីរមិនទាន់កំណត់ពេលជួបចរចាគ្នានៅឡើយ ទោះបីជាសន្យាថា នឹងជួបគ្នាក្រោយពីថ្ងៃទី១១ ខែមករា ក្ដី។ មន្ត្រីជាន់ខ្ពស់គណបក្សកាន់អំណាចលើកឡើងថា នៅពេលគណបក្សទាំងពីរកំពុងរកពេលជួបគ្នា បែរជាលោក សម រង្ស៊ី បានវាយប្រហារទៅលើរដ្ឋាភិបាលទៅវិញ។
អ្នកវិភាគលើកឡើងថា ការទម្លាក់កំហុសទៅលើលោក សម រង្ស៊ី នេះ គ្រាន់តែជាលេសដើម្បីចង់ពន្យារពេលរបស់គណបក្សប្រជាជនកម្ពុជា ទៅវិញទេ។
សមាជិកគណៈកម្មការអចិន្ត្រៃយ៍គណបក្សសង្គ្រោះជាតិ បានប្រជុំកំណត់របៀបវារៈចំនួនពីរសម្រាប់ត្រៀមយកទៅប្រជុំជាមួយតំណាងក្រុមភាគច្រើននៃគណបក្សប្រជាជនកម្ពុជា នៅក្នុងរដ្ឋសភា។
មន្ត្រីជាន់ខ្ពស់គណបក្សសង្គ្រោះជាតិ និងជាសមាជិកគណៈកម្មការអចិន្ត្រៃយ៍ លោក អេង ឆៃអ៊ាង ឲ្យដឹងក្រោយពីចប់កិច្ចប្រជុំនៅល្ងាចថ្ងៃទី១២ ខែមករា ថា តំណាងសំឡេងភាគតិចបានត្រៀមខ្លួនជាស្រេចក្នុងការជួបប្រជុំជាមួយក្រុមសំឡេងភាគច្រើន ដែលលោកឧបនាយករដ្ឋមន្ត្រី ស ខេង សន្យាថា នឹងឲ្យដឹងកាលបរិច្ឆេទជាក់លាក់ក្រោយពីថ្ងៃទី១១ ខែមករា។ តែមកទល់ពេលនេះ គណបក្សសង្គ្រោះជាតិ មិនទាន់ដឹងដំណឹងពីខាងគណបក្សប្រជាជនកម្ពុជា អំពីថ្ងៃកំណត់ជួបគ្នានៅឡើយ។
លោក អេង ឆៃអ៊ាង លើកពីរបៀបវារៈចំនួនពីរនោះ គឺទី១ និយាយពីបរិយាកាសល្អមុនថ្ងៃបោះឆ្នោត ទី២ សិទ្ធិពលករនៅក្រៅប្រទេសជាង ១លាននាក់ ធ្វើយ៉ាងណាសម្របសម្រួលជូនពួកគាត់ឲ្យមានសិទ្ធិបោះឆ្នោតបាន៖ «នឹកយកប្រធានបទហ្នឹងទៅពិភាក្សាជាមួយគណបក្សប្រជាជនកម្ពុជា ដើម្បីរកវិធីណាឲ្យពលករធ្វើការនៅក្រៅប្រទេសហ្នឹង ដើម្បីឲ្យពួកគាត់មានលទ្ធភាពចូលរួមបោះឆ្នោតឆ្នាំ២០១៨»។
ការផ្លាស់ប្ដូររបៀបវារៈនេះ មិនបាននិយាយពីការដោះលែងសកម្មជនសិទ្ធិមនុស្សអាដហុក (ADHOC) ៤នាក់ និងអគ្គលេខាធិការរង គ.ជ.ប នោះឡើយ ក្រោយពីខាងគណបក្សប្រជាជនកម្ពុជា បដិសេធមិនជជែកពីរឿងការដោះលែងអ្នកទាំងនេះ ហើយថា ទុកនីតិវិធីឲ្យតុលាការចាត់ការនោះ។
អគ្គលេខាធិការរដ្ឋសភា លោក ឡេង ប៉េងឡុង បញ្ជាក់ថា មកទល់ពេលនេះ មិនទាន់មានការកំណត់ពេលជួបគ្នារវាងតំណាងក្រុមភាគច្រើន និងក្រុមភាគតិចនៅក្នុងរដ្ឋសភានៅឡើយ។ លោកបន្ថែមថា មូលហេតុមិនទាន់បានជួបគ្នានេះ ដោយសារតែប្រធានក្រុមភាគច្រើននៅក្នុងរដ្ឋសភា លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ជាប់រវល់។
អ្នកនាំពាក្យគណបក្សប្រជាជនកម្ពុជា លោក សុខ ឥសាន អះអាងថា ការដែលមិនទាន់ជួបប្រជុំរវាងគណបក្សទាំងពីរនេះ មិនមែនមានន័យថា គណបក្សទាំងពីរមិនចុះសម្រុងនឹងគ្នានោះទេ។ ផ្ទុយទៅវិញ លោក សម រង្ស៊ី ដែលចោទប្រកាន់ពីបញ្ហាផ្សេងៗមកលើរដ្ឋាភិបាល ដែលអាចប៉ះពាល់ដល់ទំនាក់ទំនងបក្សទាំងពីរ៖ «ដូចខ្ញុំនិយាយអ៊ីចឹង ឥឡូវគាត់ទៅជាមនុស្សមានរោគចិត្ត អស់តួនាទីពីក្នុងដៃ ចេះតែនិយាយទៅ កែអផ្សុក ចេះតែនិយាយទៅដើម្បីឲ្យគេចាប់អារម្មណ៍លើគាត់»។
អ្នកឃ្លាំមើលផ្នែកអភិវឌ្ឍន៍សង្គម លោកបណ្ឌិត មាស នី មានប្រសាសន៍ថា ការលើកពីមូលហេតុ លោក ស ខេង ជាប់រវល់ និងករណីថា លោក សម រង្ស៊ី និយាយរិះគន់ផ្សេងៗទៅលើគណបក្សកាន់អំណាចនេះ អាចជាលេសច្រើនជាង៖ «គណបក្សប្រជាជនហ្នឹងយកអាហ្នឹងធ្វើជាលេសមួយដើម្បីពន្យារពេលក្នុងការឃុំឃាំង មន្ត្រីបក្សសង្គ្រោះជាតិ និងមន្ត្រីសិទ្ធិមនុស្សទាំងអស់»។
រីឯអ្នកស្រាវជ្រាវផ្នែកអភិវឌ្ឍន៍ និងសន្តិភាពវិញ លោក ឆាំ ប៊ុនថេត ពន្យល់ថា ការជួបគ្នាមិនជួបរវាងគណបក្សសង្គ្រោះជាតិ និងគណបក្សប្រជាជនកម្ពុជា មិនមែនជារឿងសំខាន់នោះទេ សំខាន់គឺការទាមទារឲ្យមានការផ្លាស់ប្ដូរ និងការដោះលែងជារឿងប្រសើរជាង៖ «រឿងដោះលែងមន្ត្រីសិទ្ធិមនុស្ស មិនមែនកើតចេញពីការចរចាទេ កើតចេញពីការទាមទារ ព្រោះថា ជារឿងអយុត្តិធម៌ ហេតុអីត្រូវចាប់ខ្លួនពួកគាត់? ពួកគាត់ធ្វើអីខុស? គឺត្រូវមានការទាមទារ»។
តំណាងក្រុមភាគច្រើន និងភាគតិចនៅក្នុងរដ្ឋសភា បានខកខានជួបចរចាគ្នាម្ដងរួចមកហើយ កាលពីចុងខែធ្នូ ក្រោយពីលោកឧបនាយករដ្ឋមន្ត្រី ស ខេង ជាតំណាងសំឡេងភាគច្រើនបង្ហើបឲ្យដឹងថា មន្ត្រីអង្គការសិទ្ធិមនុស្សទាំង ៤នាក់ និងអគ្គលេខាធិការរង គ.ជ.ប អាចនឹងត្រូវបានដោះលែងនៅចុងខែធ្នូ ឆ្នាំ២០១៦ នោះ។ កាលពីដើមខែមករា នេះ តំណាងគណបក្សប្រជាជនកម្ពុជា បានសន្យាជាថ្មីថា នឹងកំណត់ពេលជួបគ្នានៅក្រោយថ្ងៃទី១១ ខែមករា។
អ្នកវិភាគលើកឡើងថា បើសិនជាគណបក្សប្រជាជនកម្ពុជា មានឆន្ទៈក្នុងការជួបគ្នាមែននោះ ទោះបីជារវល់យ៉ាងណា គណបក្សទាំងពីរនៅតែអាចឆ្លៀតពេលជួបគ្នាបាន គឺមិនពន្យារពេលម្ដងជាពីរដងនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
-
សកម្មជនបក្សប្រឆាំងដែលជាប់ឃុំស្នើមេដឹកនាំរក្សាជំហរក្នុងពេលចរចាជាមួយបក្សកាន់អំណាច
-
គណៈកម្មការទី៧នៃរដ្ឋសភាស្នើក្រសួងធម្មការឲ្យផ្ដល់អត្តសញ្ញាណប័ណ្ណដល់ព្រះសង្ឃ
-
លោក សម រង្ស៊ី ថាអ្នកចង់បំបែកលោកពីលោក កឹម សុខា គឺកំពុងយល់សប្តិ
-
សម្ភាសអ្នកស្រី មូរ សុខហួរ អំពីផែនការផ្លាស់ប្ដូរទីតាំងទីលានប្រជាធិបតេយ្យ
-
បក្សសង្គ្រោះជាតិថ្កោលទោសអ្នកដែលថាលោក ហ៊ុន ម៉ាណែត មិនមែនកូនលោក ហ៊ុន សែន
-
បក្សប្រជាជនស្វាគមន៍លោក កឹម សុខា ដែលទទួលតំណែងក្នុងសភាជំនួសលោក សម រង្ស៊ី
-
បក្សប្រឆាំងដាក់លោក កឹម សុខា ជំនួសលោក សម រង្ស៊ី ជាប្រធានដឹកនាំតំណាងរាស្ត្រ
-
ចលនាយុវជនបក្សប្រឆាំងចង់ឱ្យអាជ្ញាធរអនុវត្តស្តង់ដារតែមួយលើករណីបែកធ្លាយកិច្ចសន្ទនា