ដោយ រដ្ឋា វិសាល
2017-01-13
RFA
ផែនទីខេត្តមណ្ឌលគិរី (Photo: RFA)
ក្រុមមន្ត្រីបក្សសង្គ្រោះជាតិ ខេត្តមណ្ឌលគិរី រកឃើញជនជាតិវៀតណាម ពីរករណីដែលមានលិខិតសំគាល់អត្តសញ្ញាណពលរដ្ឋខ្មែរហើយបានចុះឈ្មោះក្នុងបញ្ជីឈ្មោះបោះឆ្នោតដំបូង ដែលគណៈកម្មការជាតិរៀបចំការបោះឆ្នោតបិទផ្សាយដើម្បីឲ្យមជ្ឈដ្ឋានពាក់ព័ន្ធប្ដឹងតវ៉ា ប្រសិនឃើញមានភាពមិនប្រក្រតីណាមួយ។
ជនជាតិវៀតណាម ដែលមានឈ្មោះក្នុងបញ្ជីឈ្មោះបោះឆ្នោតដំបូង ដែលបិតផ្សាយដោយគណៈកម្មាធិការជាតិរៀបចំការបោះឆ្នោត (គ.ជ.ប) នៅខេត្តមណ្ឌលគិរី ជាង ២០នាក់ ត្រូវបានមន្ត្រីគណបក្សប្រឆាំងតវ៉ាសុំឲ្យអាជ្ញាធរមូលដ្ឋានលុបឈ្មោះពួកគេចេញបញ្ជីឈ្មោះ។
ប្រធានគណៈកម្មការប្រតិបត្តិគណបក្សសង្គ្រោះជាតិ ខេត្តមណ្ឌលគិរី លោក សូ កេត បញ្ជាក់នៅថ្ងៃទី១៣ ខែមករា ថា ជនជាតិវៀតណាម ដែលមានឈ្មោះក្នុងបញ្ជីឈ្មោះបោះឆ្នោតនេះ ត្រូវបានមន្ត្រីបក្សប្រចាំឃុំចំនួនពីរ គឺឃុំស្រែខ្ទុំ ស្រុកកែវសីមា រកឃើញចំនួន ១៩នាក់ និងនៅឃុំស្រែអំពូម ស្រុកពេជ្រាដា រកឃើញចំនួនពីរនាក់។ លោកបន្តថា ជនជាតិវៀតណាម ទាំង ២១នាក់នេះសុទ្ធសឹងតែមានលិខិតសំគាល់សិទ្ធិចុះឈ្មោះបោះឆ្នោត ហើយបានចុះឈ្មោះក្នុងបញ្ជីបោះឆ្នោតសម្រាប់ការបោះឆ្នោតក្រុមប្រឹក្សាឃុំសង្កាត់អាណត្តិទី៤ នៅថ្ងៃទី៤ ខែមិថុនា ខាងមុខនេះ៖ «តាមសេចក្ដីណែនាំយើងសោកស្ដាយដែរ ដោយសារក្នុងច្បាប់ថា អត់ឲ្យជនជាតិបរទេសចុះឈ្មោះ ឥឡូវយើងរកឃើញអ្នកកាន់អត្តសញ្ញាណប័ណ្ណជាតិខ្មែរហ្នឹង យើងប្ដឹង ហើយគាត់ថាអត់លុប ឲ្យប្ដឹងដល់ណាដល់ទៅ»។
ការរកឃើញជនជាតិវៀតណាម មានឈ្មោះក្នុងបញ្ជីបោះឆ្នោតទាំងពីរករណីនេះ មួយករណីនៅឃុំស្រែអំពូម ត្រូវបានមន្ត្រីមូលដ្ឋានគណបក្សសង្គ្រោះជាតិ ដាក់ពាក្យប្ដឹងទៅក្រុមប្រឹក្សាឃុំសុំលុបឈ្មោះជនជាតិវៀតណាម នោះចេញពីបញ្ជីឈ្មោះកាលពីថ្ងៃទី៩ ខែមករា។ ដោយឡែកនៅឃុំស្រែខ្ទុំ មន្ត្រីបក្សសង្គ្រោះជាតិ មិនទាន់បានដាក់ពាក្យប្ដឹងនោះទេ។
ប្រធានគណៈកម្មការប្រតិបត្តិគណបក្សសង្គ្រោះជាតិ ស្រុកពេជ្រាដា លោក ផែន សំអុល កត់សំគាល់ថា ក្រុមប្រឹក្សាឃុំស្រែអំពូម បានបើកសវនាការសម្របសម្រួលរវាងភាគីដើមបណ្ដឹង និងចុងចោទកាលពីថ្ងៃទី១១ ខែមករា ក៏ប៉ុន្តែក្រុមប្រឹក្សាឃុំបានសម្រេចបដិសេធបណ្ដឹងសុំលុបឈ្មោះជនជាតិវៀតណាម ដោយសំអាងថាជនជាតិវៀតណាម ទាំងនោះមានលិខិតសំគាល់សិទ្ធិបោះឆ្នោត។ លោកកត់សំគាល់ទៀតថា ការសួរដេញដោលផ្ទាល់មាត់រវាងភាគីដើមចោទ និងចុងចោទជនជាតិវៀតណាម នេះ មិនបានបញ្ជាក់ជាក់លាក់ពីហេតុផលដែលនាំឲ្យពួកគេទទួលបានលិខិតសំគាល់សិទ្ធិចុះឈ្មោះបោះឆ្នោតនោះទេ ក៏ប៉ុន្តែពួកគេបានយល់ព្រមឲ្យលុបឈ្មោះចេញពីបញ្ជីឈ្មោះ ក៏ប៉ុន្តែក្រុមប្រឹក្សាឃុំមិនយល់ព្រម៖ «ម្ចាស់សាមីខ្លួនទាំងម៉ែទាំងកូនព្រមឲ្យលុបកុំឲ្យមានបញ្ហា ប៉ុន្តែប៉ូលិស និងមេឃុំអត់ឲ្យលុប គេឈរលើថា ឃុំអត់សិទ្ធិលុប»។
អាជ្ញាធរឃុំស្រែអំពូម ឲ្យដឹងថា ជនជាតិវៀតណាម មួយគ្រួសារបានផ្លាស់ទីលំនៅជាបន្តបន្ទាប់ពីខេត្តបាត់ដំបង និងពោធិ៍សាត់ មករស់នៅភូមិពូក្រូច កាលពីអំឡុងឆ្នាំ២០១៥។ ពួកគេមានលិខិតអត្រានុកូលដ្ឋាន សៀវភៅគ្រួសារ និងអត្តសញ្ញាណប័ណ្ណពលរដ្ឋខ្មែរ។
មេឃុំស្រែអំពូម លោក ធុយ ប៊ុនលឿន បញ្ជាក់ថា អាជ្ញាធរឃុំមិនមានសិទ្ធិលុបឈ្មោះជនជាតិវៀតណាម មួយគ្រួសារ ដែលមានឈ្មោះក្នុងបញ្ជីឈ្មោះបោះឆ្នោតថ្មីនេះបានទេ ពីព្រោះពួកគេបានបង្ហាញលិខិតសំគាល់សិទ្ធិចុះឈ្មោះបោះឆ្នោតត្រឹមត្រូវ។ លោកបន្តថា បានចេញលិខិតទម្រង់ ១២០៣ ដើម្បីឲ្យភាគីដើមបណ្ដឹងប្រើប្រាស់សម្រាប់ប្ដឹងទាស់ការសម្រេចនេះទៅ គ.ជ.ប បន្តទៀត៖ «ពិនិត្យឃើញឯកសារគាត់គ្រប់គ្រាន់ត្រង់ថា អ្នកណាចេញមេឃុំអត់ដឹងកាលណាលុបឈ្មោះគាត់ទៅយើងខុស។ វាវត្តមានបីលើបួន សម្រេចអ៊ីចឹងយើងយកអាហ្នឹងជាផ្លូវការ»។
មន្ត្រីផ្នែកអង្កេតជាន់ខ្ពស់របស់អង្គការខុមហ្វ្រែល (COMFREL) លោក កន សាវាង្ស បញ្ជាក់ថា នៅក្នុងនីតិវិធីនៃការចុះឈ្មោះ និងពិនិត្យឈ្មោះបោះឆ្នោតមិនមានចែងថា តម្រូវឲ្យអាជ្ញាធរឃុំស៊ើបអង្កេតស៊ីជម្រៅទៅលើបុគ្គលដែលបានចុះឈ្មោះ ហើយគេសង្ស័យថា ជាជនបរទេសមកនោះទេ។ ប៉ុន្តែពេលមានពាក្យបណ្ដឹងគួរតែកោះហៅអ្នកទាំងនោះមកបញ្ជាក់ថា តើជនបរទេសទាំងនោះមានប្រើប្រាស់លិខិតសំគាល់អត្តសញ្ញាណពលរដ្ឋខ្មែរស្របច្បាប់ ឬយ៉ាងណាដើម្បីធ្វើរបាយការណ៍ក្នុងទម្រង់ ១២០៣ ប្រសិនភាគីដើមចោទប្ដឹងជំទាស់ការសម្រេចរបស់មន្ត្រីក្រុមប្រឹក្សាឃុំ។
ប្រធានលេខាធិការដ្ឋានរៀបចំការបោះឆ្នោតខេត្តមណ្ឌលគិរី លោក គឹន ចៀន បញ្ជាក់ដែរថា ក្រុមប្រឹក្សាឃុំមានសិទ្ធិសម្រេចលើបណ្ដឹងនានាក្នុងអំឡុងពេលបិតផ្សាយបញ្ជីឈ្មោះបោះឆ្នោតដំបូង។ លោកថា ប្រសិនភាគីណាមិនសុខចិត្តអាចប្ដឹងទាស់ទៅ គ.ជ.ប ដើម្បីដោះស្រាយបន្ត៖ «ក្រុមប្រឹក្សាឃុំសម្រេចបដិសេធពាក្យបណ្ដឹង ហើយដោយសារគេមានឯកសារត្រឹមត្រូវរបស់គេ។អ៊ីចឹងសង្គ្រោះជាតិ គាត់មិនសុខចិត្តគាត់យក ១២០២ គាត់បំពេញទៅគាត់ប្ដឹងទៅ គ.ជ.ប»។
ស្នងការរងប៉ូលិសខេត្តរតនគិរី លោក ជា ប៊ុនធឿន បានបញ្ជាក់ថា ជនអន្តោប្រវេសន៍ដែលរស់នៅស្របច្បាប់ ឬមិនស្របច្បាប់ មិនមានសិទ្ធិប្រើប្រាស់អត្តសញ្ញាប័ណ្ណពលរដ្ឋខ្មែរបានឡើយ។ លោកថា លើកលែងជនអន្តោប្រវេសន៍នោះបានបំពេញលក្ខខណ្ឌសុំចូលសញ្ជាតិតាមការកំណត់ក្នុងច្បាប់សញ្ជាតិ។ ដូច្នេះប្រសិនមានករណីប្ដឹងតវ៉ានេះ គ.ជ.ប អាចស្នើសុំមកក្រសួងមហាផ្ទៃ ដើម្បីត្រួតពិនិត្យលក្ខណៈសម្បត្តិជនបរទេសដែលប្រើអត្តសញ្ញាណប័ណ្ណពលរដ្ឋខ្មែរនេះ៖ «ប្ដឹងទៅថ្នាក់ជាតិមានតែក្រសួងមហាផ្ទៃ ហើយក្រសួងមហាផ្ទៃ បញ្ជាមកអគ្គស្នងការ ហើយអគ្គស្នងការបញ្ជាមកតាមបណ្ដាស្នងការដ្ឋានដើម្បីពិនិត្យរឿងហ្នឹង។ បើគាត់ជាជនបរទេសទាល់តែមានព្រះរាជក្រឹត្យប្រទានសញ្ជាតិឲ្យគាត់សិន»។
គ.ជ.ប បានបិតប្រកាសឲ្យប្រជាពលរដ្ឋដែលបានចុះឈ្មោះក្នុងបញ្ជីឈ្មោះបោះឆ្នោតចាប់ពីថ្ងៃទី៣ ដល់ថ្ងៃទី១៤ ខែមករា ដើម្បីពិនិត្យមើលបញ្ជីឈ្មោះដំបូង នឹងប្ដឹងតវ៉ាទៅក្រុមប្រឹក្សាឃុំសង្កាត់ ប្រសិនរកឃើញមានភាពមិនប្រក្រតីណាមួយ។ ក្នុងករណីក្រុមប្រឹក្សាឃុំសង្កាត់បដិសេធការប្ដឹងតវ៉ាណាមួយភាគីដើមបណ្ដឹងអាចប្ដឹងជំទាស់សេចក្ដីសម្រេចនោះទៅ គ.ជ.ប ក្នុងរយៈពេល ៥ថ្ងៃ បន្ទាប់ពីក្រុមប្រឹក្សាឃុំចេញលិខិតទម្រង់ ១២០៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
-
មន្ត្រីបក្សប្រឆាំងនៅខេត្តកំពង់ធំបញ្ជូនពាក្យបណ្ដឹងសុំលុបឈ្មោះជនបរទេសទៅ គ.ជ.ប
-
ក្រុមប្រឹក្សាសង្កាត់ព្រែកព្នៅបដិសេធបណ្ដឹងទាស់បក្សប្រឆាំងលើបញ្ជីឈ្មោះបោះឆ្នោត
-
សកម្មជនបក្សប្រឆាំងនៅខេត្តកំពង់ឆ្នាំងប្ដឹងលុបឈ្មោះមនុស្ស២៥នាក់ចេញពីបញ្ជីបោះឆ្នោត
-
មន្ត្រីបក្សប្រឆាំងថាឈ្មោះបោះឆ្នោតនៅខេត្តបន្ទាយមានជ័យរាប់រយនាក់ខុសអក្ខរាវិរុទ្ធ
-
មន្ត្រីបក្សប្រឆាំងថាបញ្ហាបាត់ឈ្មោះពលរដ្ឋពីបញ្ជីឈ្មោះបោះឆ្នោតត្រូវបានដោះស្រាយបណ្ដើរៗ
-
បក្សប្រឆាំងខេត្តរតនគិរីប្ដឹងអាជ្ញាធរឲ្យលុបឈ្មោះវៀតណាម១១នាក់ពីបញ្ជីឈ្មោះបោះឆ្នោត
-
ពលរដ្ឋខេត្តត្បូងឃ្មុំមួយចំនួនមិនមានឈ្មោះក្នុងបញ្ជីឈ្មោះបោះឆ្នោតថ្មី
-
ក្រុមប្រឹក្សាសង្កាត់ចោមចៅបដិសេធបណ្ដឹងរឿងជនជាតិវៀតណាមមានឈ្មោះបោះឆ្នោត
-
អ្នកឃ្លាំមើលថាពលរដ្ឋខែត្រស្ទឹងត្រែងតិចតួចទៅពិនិត្យឈ្មោះបោះឆ្នោត
-
មន្ត្រីបក្សប្រឆាំងនៅកំពង់ធំប្ដឹងអាជ្ញាធរឲ្យលុបឈ្មោះជនបរទេសក្នុងបញ្ជីបោះឆ្នោត