Mon, 23 January 2017
មាស សុខជា
ភ្នំពេញប៉ុស្តិ៍
ភ្នំពេញៈ បន្ទាប់ពីខកចិត្តនឹងមេដឹកនាំគណបក្សប្រជាជនដែលបានព្រមព្រៀងចរចាតែភ្លាមៗបានច្រានចោលវិញមេដឹកនាំគណបក្សប្រឆាំងបានបង្វែរទៅជួបជាមួយអ្នកគាំទ្រ និងសមាជិករបស់ខ្លួននៅថ្នាក់មូលដ្ឋានវិញដោយប្រាប់ពួកគេឲ្យរៀបចំខ្លួនសម្រាប់ការផ្លាស់ប្តូរវិជ្ជមាននៅក្នុងការបោះឆ្នោតជាបន្តបន្ទាប់នាពេលខាងមុខ។
អ្នកវិភាគយល់ថាការមិនជួបចរចារបស់គណបក្សជាប់ឆ្នោតទាំងពីរ វានឹងមិនធ្វើឲ្យគណបក្សប្រឆាំងបាត់បង់ប្រជាប្រិយភាពនោះទេ ប៉ុន្តែគណបក្សកាន់អំណាចទៅវិញទេដែលនឹងបាត់បង់ប្រជាប្រិយភាពនោះ។
ប្រធានស្តីទីនៃគណបក្សសង្គ្រោះជាតិលោក កឹម សុខា ដែលខកចិត្តនឹងមេដឹកនាំគណបក្សប្រជាជនលុបចោលការជួបចរចាដើម្បីស្វែងរកដំណោះស្រាយនយោបាយ កាលពីម្សិលមិញ បានចាប់ផ្តើមជាលើកទីមួយចុះទៅខេត្ត ព្រះសីហនុ និងខេត្តកោះកុង ដើម្បីជួបជាមួយសកម្មជន និងសមាជិកដោយប្រាប់ពួកគេឲ្យទទួលយកការផ្លាស់ប្តូរវិជ្ជមានមួយទៅតាមបំណងប្រាថ្នារបស់ពលរដ្ឋ បន្ទាប់ពីលោកត្រូវបានលើកលែងទោសដោយព្រះមហាក្សត្រនរោត្តម សីហមុនី។
លោក កឹម សុខា បានថ្លែងខណៈជួបជាមួយសមាជិកនៅទីស្នាក់ការគណបក្សសង្គ្រោះជាតិកាលពីថ្ងៃអាទិត្យម្សិលមិញថា៖ «ប្រសិនបើគណបក្សកាន់អំណាចពួកគេមិនត្រូវការជួបចរចាជាមួយយើង យើងត្រូវទៅជជែកជាមួយប្រជាពលរដ្ឋនៅថ្នាក់មូលដ្ឋាន»។
លោក កឹម សុខា បានប្រាប់សមាជិកនៅខេត្តព្រះសីហនុថា៖ «តាមការវាស់ស្ទង់មតិទូទៅប្រជាពលរដ្ឋខ្មែរភាគច្រើនបំផុតចង់ឲ្យមានការផ្លាស់ប្តូរវិជ្ជមាន។ ដូច្នេះយើងជាគណបក្សសង្គ្រោះជាតិត្រូវត្រៀមទទួលយកបំណងប្រាថ្នារបស់ប្រជាពលរដ្ឋខ្មែរដោយសារប្រជាពលរដ្ឋខ្មែរភាគច្រើនបំផុតសង្ឃឹមលើ [គណបក្សសង្គ្រោះជាតិ]»។
ប្រាប់ភ្នំពេញប៉ុស្តិ៍កាលពីម្សិលមិញលោក សូ សុវ៉ាត ប្រធានប្រតិបត្តិគណបក្សសង្គ្រោះជាតិនៅខេត្តព្រះសីហនុថ្លែងថាលោក កឹម សុខា បានជួបមេដឹកនាំគណបក្សសង្គ្រោះជាតិគ្រប់ស្រុក ក្រុងក្នុងខេត្តព្រះសីហនុ និងមេដឹកនាំខេត្តហើយបានលើកពីរចំណុចប្រាប់មេដឹកនាំគណបក្សនៅថ្នាក់មូលដ្ឋាន។
លោក សូ សុវ៉ាត ថ្លែងថា៖ «អ្នកដទៃៗចង់ដឹងតែពីរចំណុច [ពីគណបក្សសង្គ្រោះជាតិរបស់យើង] ទីមួយថាតើ [មេដឹកនាំទាំងពីរ] បែកបាក់គ្នាឬអត់? ទីពីរនៅពេល [គណបក្សសង្គ្រោះជាតិ] ឈ្នះ [គណបក្សប្រជាជន] ប្រគល់អំណាចឲ្យ [គណបក្សសង្គ្រោះជាតិ] ឬអត់? ដូចនេះឆ្លើយឲ្យខ្លី [យើង] មិនបែកបាក់ហើយជាធម្មតានៅពេល [យើង] ឈ្នះបញ្ហាដែល [គណបក្សប្រជាជនកម្ពុជា] មិនប្រគល់អំណាចគឺគ្មាន»។
លោកបន្ថែមថាលោក កឹម សុខា និយាយថាគណបក្សសង្គ្រោះជាតិគឺជាគណបក្សចាស់ទុំហើយគណបក្សសង្គ្រោះជាតិដឹងកន្លែងត្រូវទៅដូច្នេះវាមិនចាំបាច់នរណាម្នាក់ចង្អុលផ្លូវឲ្យគណបក្សសង្គ្រោះជាតិទៅនោះទេ។ ចំពោះការចរចានយោបាយលោក សូ សុវ៉ាត បានបដិសេធធ្វើអត្ថាធិប្បាយដោយថ្លែងថាវាជាសេចក្តីសម្រេចរបស់មេដឹកនាំ ប៉ុន្តែបានធ្វើអត្ថាធិប្បាយជាទស្សនៈបុគ្គលរបស់លោកថាវាមិនចាំបាច់ចរចាទេសំខាន់មេដឹកនាំត្រូវចុះទៅជួបពលរដ្ឋដែលជាម្ចាស់អំណាចគឺប្រសើរជាង។
«[ការចរចា] គឺមិនសំខាន់។ សំខាន់បំផុតការជឿពីពលរដ្ឋផ្តល់ទៅ [គណបក្សសង្គ្រោះជាតិ]»។
អ្នកនាំពាក្យគណបក្សប្រជាជនលោក ឈឹម ផលវរុន បានបដិសេធធ្វើអត្ថាធិប្បាយ និងជំរុញឲ្យអ្នកយកព័ត៌មានទៅសួរនាយកកាសែតភ្នំពេញប៉ុស្តិ៍ដែលជាជនបរទេសសិនពីមុនពេលសម្ភាសលោកដោយថ្លែងថាភ្នំពេញប៉ុស្តិ៍មិនសហការជាមួយលោកនៅពេលលោកសុំឲ្យកែតម្រូវកាលពីមួយឆ្នាំមុន។
អ្នកវិភាគនយោបាយលោក គឹម សុខ ថ្លែងថាបើទោះបីជាការជជែកនយោបាយរវាងគណបក្សប្រជាជន និងគណបក្សសង្គ្រោះជាតិមិនអាចទៅមុខបានក៏ដោយ ក៏គណបក្សសង្គ្រោះជាតិមិនបាត់បង់ប្រជាប្រិយទេ ប៉ុន្តែគណបក្សប្រជាជនគឺជាអ្នកបាត់បង់ប្រជាប្រិយ។
លោក សុខ ថ្លែងថា៖ «ជាការពិតវាចាំបាច់ណាស់សម្រាប់ [គណបក្សសង្គ្រោះជាតិ] នៅក្នុងកាលៈទេសៈបច្ចុប្បន្នដើម្បីពន្យល់ប្រជាពលរដ្ឋឲ្យយល់អំពីព័ត៌មានផ្សេងៗដែលកើតឡើងដែលជាហេតុធ្វើឲ្យគណបក្សទាំងពីរមិនអាចជជែកចរចា។ បញ្ហាដែលមិនអាចជជែកដោះស្រាយគឺការទទួលខុសត្រូវរបស់រដ្ឋាភិបាលគណបក្សប្រឆាំងមិនមែនជាអ្នកទទួលខុសត្រូវទេ»។
គណបក្សប្រជាជន និងគណបក្សសង្គ្រោះជាតិបានព្រមព្រៀងជួបជជែកស្វែងរកដំណោះស្រាយនយោបាយនៅថ្ងៃទី ២៥ ខែ មករា នេះ ប៉ុន្តែ គណបក្សប្រជាជនបានប្រកាសផ្អាកប៉ុន្មានម៉ោង បន្ទាប់ពីលោកនាយករដ្ឋមន្រ្តី ហ៊ុន សែន បានគំរាមពីប្រទេសស្វ៊ីសលុបចោលតំណែងរបស់លោក កឹម សុខា ពីប្រធានក្រុមតំណាងរាស្រ្តសំឡេងភាគតិចដែលមានឋានៈស្មើនាយករដ្ឋមន្រ្តីក្នុងការជជែកនយោបាយប្រសិនបើការជជែកនយោបាយមិនអាចទៅមុខដោយសារពាក់ព័ន្ធនឹងសំណើរបស់គណបក្សសង្គ្រោះជាតិដែលសុំឲ្យដោះលែងអ្នកទោសនយោបាយដែលរួមមានមន្រ្តីសិទ្ធិមនុស្ស ៥ រូប និងមន្រ្តីគណៈកម្មាធិការជាតិរៀបចំការបោះឆ្នោត និងសមាជិកគណបក្សសង្គ្រោះជាតិជាង ១០ នាក់ផ្សេងទៀត៕ PS