ដោយ លោក ហ៊ុន សិរីវឌ្ឍន៍ | ថ្ងៃអង្គារ ទី២១ ខែកុម្ភៈ ឆ្នាំ២០១៧ | ម៉ោង 5:57 PM
http://vodhotnews.com
តំណាងរាស្ត្រគណបក្សសង្គ្រោះជាតិ លោកស្រី មូ សុខហួរ
មន្ត្រីគណបក្សប្រឆាំងលើកឡើងថា ការប្រើវប្បធម៌សន្ទនាជាមួយបក្សកាន់អំណាច មានការពិបាកដោយសារតែឥទ្ធិពលរបស់លោកនាយករដ្ឋមន្ត្រី ហ៊ុន សែន។
ការលើកឡើងនេះ គឺបន្ទាប់ពីអ្នកនាំពាក្យរដ្ឋសភាលោក ឡេង ប៉េងឡុង កាលពីម្សិលមិញ មានប្រសាសន៍ថា គណបក្សសង្គ្រោះជាតិហាក់ដូចជាមិនចង់បន្តវប្បធម៌សន្ទនាជាមួយបក្សកាន់អំណាចដោយសារបក្សនេះមិនចូលរួមប្រជុំសភាពេញអង្គ ដើម្បីកែច្បាប់គណបក្សនយោបាយ។
លោកថា៖ «គាត់ធ្វើឲ្យគេឃើញថាគាត់លេចធ្លោគាត់មិនគោរពតាមមតិភាគច្រើនទេ ការធ្វើពហិការរបស់គាត់ហ្នឹងបានន័យថាគាត់មិនមានចេតនាក្នុងការសន្ទនាអីទេ ហើយគណបក្សកាន់អំណាចថាបើចង់មានវប្បធម៌សន្ទនាសុំឲ្យអញ្ចើញមកក្នុងរដ្ឋសភា គាត់មិនព្រមចូលមកសភាទេ គាត់មិនព្រមចូលមកធ្វើការជាធម្មតាទេ គាត់ធ្វើដើម្បីលេចធ្លោដើម្បីចំណេញនយោបាយ ដូច្នេះហើយនេះជាចរិតធម្មតារបស់គាត់អញ្ចឹងហើយ យើគិតថាគាត់គួរតែចូលមកក្នុងរដ្ឋសភាធ្វើការធម្មតា និងសន្ទនាធម្មតា អាហ្នឹងជាការល្អ »។
ប៉ុន្តែនៅរសៀលថ្ងៃទី២១កុម្ភៈនេះ មន្ត្រីគណបក្សសង្គ្រោះជាតិ លោកស្រី មូ សុខហួរ បានឲ្យដឹងថាការសម្រេចមិនចូលប្រជុំសភានេះក៏ព្រោះច្បាប់ស្តីពីបក្សនយោបាយថ្មីនេះគឺមិនមែនជាអ្វីដែលប្រជាពលរដ្ឋចង់បាន ហើយការចរចារក្នុងគណកម្មាធិការអចិន្ត្រៃយ៍ទាក់ទងនឹងការធ្វើវិសោធនកម្មច្បាប់នេះកាលពីកន្លងទៅ គណបក្សកាន់អំណាចពុំបានទទួលយកសំណើរបស់ខ្លួនដើម្បីពិភាក្សានោះទេ ដោយសារឥទ្ធិពលរបស់លោក ហ៊ុន សែន។
លោកស្រីថា៖ «យើងចូលទៅជជែកនៅក្នុងអចិន្ត្រៃយ៍ហើយ ទោះបីមួយឃ្លាក៏មិនយកដែរ! យើងជជែកមិនមែនដើម្បីការពារយើងទេ យើងជជែកសុំឲ្យមុននឹងដាក់ចូលការប្រជុំសភា សូមឲ្យអង្គការសង្គមស៊ីវិលសុំឲ្យគណបក្សដទៃទៀត សុំឲ្យគេមានយោបល់ផង។ ជជែកមិច! បើសម្តេចនាយកនិយាយមិនដល់២សប្តាហ៍ផងចេញមក តាមអ្វីដែលជាប្រសាសន៍សម្តេចហើយមិនទាន់ទៅអ្វីដែលគណកម្មាធិការអចិន្ត្រៃយ៍ គណៈកម្មាពិសេសគ្រាន់តែមើលមិនទាន់បានពីរថ្ងៃផង ចេញមកកោះប្រជុំទៅហើយ យើងយល់ថាមិនមែនជាឆន្ទះរបស់ប្រជារាស្ត្រខ្មែរទេ»។
ក្រោយពីសភាបានអនុម័តច្បាប់ថ្មីនេះរួចបានធ្វើឲ្យមានប្រតិកម្មជាបន្តបន្ទាប់ពីមជ្ឈដ្ឋាននានាទាំង ក្នុងនិងក្រៅស្រុក ក្នុងនោះស្ថានទូតសហរដ្ឋអាមេរិកក៏បានរិះគន់ទៅលើច្បាប់ដែលអនុម័តថ្មីនោះដែរ ដោយថាច្បាប់នេះបានផ្តល់អំណាចយ៉ាងធំដល់រដ្ឋាភិបាលកម្ពុជា ក្នុងការរំលាយ គណបក្សនយោបាយណាមួយ៕
ពិតជាពិបាកមែន!!!។ វប្បធម៌សន្ទនា អាស្រ័យលើសម្មាទិដ្ឋិ និង សុឆន្ទៈ ដើម្បីសំរេចបំណងរួមគ្នា ជាប្រយោជន៏ប្រទេសជាតិ។ បើប្រើវប្បធម៌ជជែកគ្នា ក្រែងលោ រកកន្លែងចប់មិនឃើញ ហើយ អាចបែកភ្នែក????។
បើប្រើវប្បធម៌ ជេរគ្នា ក្រែងលោ ខឹម វាសនា ប្តឹងពីបទរក្សាសិទ្ធិ????។
បើវប្បធម៌ ខ្សឹបខ្សៀវ កាន់តែពិបាក ចង់ឬមិនចង់ ជាប់លើបទបរិហាកេរ្ត៏???។
សូមមេត្តា អស់លោក និងជំទាវ ទាំងពីរបក្ស ស្វែងរកអ្វីប្រសើរជាងផង!!!
ជាជាងអង្គុយលើកដៃ។ ដល់ពេលពឹងលើបណ្ឌិត សម្តេច ឪបណ្ឌិតថា គ្មាននរណា ត្រូវជាងអញ!!!!!។ វង្វេងស៊ុងហើយកម្ពុជា!!!!!។សំនៀង