សកលវិទ្យាល័យ​មួយ​រង​ការ​ចោទ​ថា​មិន​ឲ្យ​និស្សិត​ចូល​ក្នុង​​​ពិធី​​ចែក​​សញ្ញាប័ត្រ​ព្រោះ​ខ្លាច​ស្កាត់​ជួប​លោក ហ៊ុន សែន

ដោយ យាង សុជាមេត្តា
2017-04-20
RFA

ស្ដាប់ ឬ ទាញ​យក​សំឡេង
ស្តាប់សំឡេងថតសំឡេង

យុវជន ឃឹម ប្រខួច ផ្ដល់​បទសម្ភាសន៍​ដល់​អាស៊ីសេរី នៅ​ថ្ងៃ​ទី​២០ ខែ​មេសា ឆ្នាំ​២០១៧។ RFA/Yeang Socheametta
យុវជន ឃឹម ប្រខួច ផ្ដល់​បទសម្ភាសន៍​ដល់​អាស៊ីសេរី នៅ​ថ្ងៃ​ទី​២០ ខែ​មេសា ឆ្នាំ​២០១៧។ RFA/Yeang Socheametta

និស្សិត​បញ្ចប់​ការ​សិក្សា​នៅ​សកលវិទ្យាល័យ​អាស៊ី​អឺរ៉ុប ចោទ​សាលា​នេះ​ថា​មិន​អនុញ្ញាត​ឲ្យ​ខ្លួន​ចូលរួម​ក្នុង​ពិធី​ចែក​សញ្ញាប័ត្រ​នៅ​ថ្ងៃ​ទី​២០ ខែ​មេសា ព្រោះ​ខ្លាច​និស្សិត​ពួកគេ​ស្កាត់​ជួប​លោក​នាយករដ្ឋមន្ត្រី ហ៊ុន សែន ដែល​ចូល​រួម​ជា​អធិបតី​ក្នុង​ពិធី​ចែក​សញ្ញាប័ត្រ​នោះ។ និស្សិត​ដែល​មិន​បាន​ចូលរួម​ចាត់​ទុក​ការ​ហាមប្រាម​របស់​សាកលវិទ្យាល័យ ថា​ជា​ការ​រើសអើង និង​ជា​រឿង​អយុត្តិធម៌​សម្រាប់​ពួកគេ។

និស្សិត​ដែល​បាន​បញ្ចប់​ការ​សិក្សា​ផ្នែក​អក្សរសាស្ត្រ​អង់គ្លេស​នៅ​សាកលវិទ្យាល័យ​អាស៊ី​អឺរ៉ុប ឈ្មោះ ឃឹម ប្រខួច ដែល​កើត​ទុក្ខ​មិន​សុខចិត្ត​ដោយសារ​តែ​រូបគេ និង​ប្អូនប្រុស​បង្កើត​មួយ​រូប​ទៀត​ឈ្មោះ ឃឹម ប្រុសលាភ បញ្ចប់​ការ​សិក្សា​ផ្នែក​គ្រប់គ្រង​នៅ​សាកលវិទ្យាល័យ​ដូច​គ្នា ឲ្យ​អាស៊ីសេរី​ដឹង​នៅ​ថ្ងៃ​ទី​២០ ខែ​មេសា ថា រូបគេ​សោកស្ដាយ​ដែល​សាកលវិទ្យាល័យ​ខ្លួន​មិន​អនុញ្ញាត​ឲ្យ​ចូលរួម​កម្មវិធី​ចែក​សញ្ញាប័ត្រ​ដូច​និស្សិត​ដទៃ​ទៀត។

និស្សិត ឃឹម ប្រខួច រំលឹក​ថា កាល​ពី​ឆ្នាំ​២០១៦ រូបគេ​និង​ម្ដាយ​ធ្លាប់​ព្យាយាម​ស្កាត់​ជួប​លោក​នាយករដ្ឋមន្ត្រី ហ៊ុន សែន ជា​ច្រើន​លើក​ដើម្បី​ស្នើ​ឲ្យ​លោក ហ៊ុន សែន ជួយ​រក​យុត្តិធម៌​ឲ្យ​គ្រួសារ​ក្នុង​ករណី​ដែល​រូបគេ​ទទួល​រង​ការ​វាយដំ​របួស​ធ្ងន់ធ្ងរ​ដោយ​កូន​ចៅ​អ្នក​ជំពាក់​លុយ​ម្ដាយ តែ​ត្រូវ​បាន​សមត្ថកិច្ច​ចាប់​ខ្លួន​រូបគេ ហើយ​ប្ដឹងផ្ដល់​ទៅ​តុលាការ រួច​ត្រូវ​បាន​តុលាការ​ដាក់​ឲ្យ​ស្ថិត​ក្រោម​ការ​ឃ្លាំមើល​ទៅ​វិញ។

យុវជន ឃឹម ប្រខួច ឲ្យ​ដឹង​បន្ថែម​ថា ក្នុង​ពេល​ព្យាយាម​ស្កាត់​ជួប​លោក ហ៊ុន សែន នៅ​ក្រុង​តាខ្មៅ ក្នុង​ពេល​កន្លង​ទៅ រូបគេ​និង​ម្ដាយ​ត្រូវ​បាន​កង​ការពារ​របស់​លោក ហ៊ុន សែន ចាប់​ឃាត់​មិន​ឲ្យ​ជួប​លោក ហ៊ុន សែន ឡើយ ហើយ​ថែម​ទាំង​ចោទ​ប្រកាន់​ពួកគេ​ថា ប៉ុនប៉ង​ធ្វើឃាត​លោក ហ៊ុន សែន ទៀត​ផង។ លើស​ពី​នេះ រូបគេ​ក៏​ធ្លាប់​ត្រូវ​បាន​អាជ្ញាធរ​ខណ្ឌ​ដូនពេញ ឃាត់​ខ្លួន ហើយ​ថែម​ទាំង​បង្ខំ​ឲ្យ​ផ្ដិត​មេដៃ​លើ​លិខិត​ដែល​បញ្ជាក់​ថា ទី​ណា​មាន​វត្តមាន​លោក ហ៊ុន សែន ពួកគេ​មិន​អាច​មាន​មុខ​ឡើយ។

​យុវជន ឃឹម ប្រខួច អះអាង​ថា ព្រោះ​តែ​មូលហេតុ​នេះ​ហើយ​ទើប​សាកលវិទ្យាល័យ​អាស៊ី​អឺរ៉ុប មិន​អនុញ្ញាត​ឲ្យ​រូប​គេ និង​ប្អូនប្រុស​ចូល​រួម​ក្នុង​ពិធី​ចែក​សញ្ញាប័ត្រ។ បើ​ទោះ​ជា​សាកលវិទ្យាល័យ​សន្យា​ថា នឹង​ផ្ដល់​សញ្ញាប័ត្រ​ឲ្យ​ពួកគេ​នៅ​ក្រោយ​ពេល​ពិធី​ចែក​សញ្ញាប័ត្រ​ក្ដី ប៉ុន្តែ​និស្សិត​រូប​នេះ​ថា គេ​ពិបាក​ទទួល​យក​បាន និង​ចាត់​ទុក​ការ​សម្រេច​ចិត្ត​របស់​សាកល​វិទ្យាល័យ​ថា ជា​ការ​រើសអើង​ហួសហេតុ៖ «ខ្ញុំ​ចង់​ទាមទារ​ឲ្យ​សាកលវិទ្យាល័យ​អាស៊ី​អឺរ៉ុប ឲ្យ​សញ្ញាប័ត្រ​ខ្ញុំ​ឲ្យ​ឆាប់ៗ​ពីរ​នាក់​បង​ប្អូន ហើយ​ខ្ញុំ​ក៏​សំណូមពរ​ថា ឲ្យ​មាន​ច្បាប់​យុត្តិធម៌​ឡើង​ចំពោះ​ប្រទេស​ខ្មែរ បើ​ថា​ខុស​ដឹង​ខុស ត្រូវ​ដឹង​ត្រូវ ពីព្រោះ​ខ្ញុំ​រស់​នៅ​ក្នុង​ប្រទេស​កម្ពុជា សម្បូរ​ដោយ​ភាព​ឈឺ​ចាប់​ជា​ច្រើន​ខែ​ច្រើន​ឆ្នាំ​មក​ហើយ ដែល​ខ្ញុំ​មិន​ទទួល​បាន​ភាព​យុត្តិធម៌»

ម្ដាយ​របស់​យុវជន ឃឹម ប្រខួច អ្នកស្រី ឃឹម ពៅ ថ្លែង​ថា អ្នកស្រី​ឈឺ​ចិត្ត​យ៉ាង​ខ្លាំង​ដែល​មិន​បាន​ឃើញ​កូន​ទាំង​២ ទៅ​ចូលរួម​ទទួល​សញ្ញាប័ត្រ​នឹង​គេ។ អ្នកស្រី​ថា អ្នកស្រី​បាន​ប្រឹងប្រែង​រក​ប្រាក់​បង់​ថ្លៃ​សាលា​ឲ្យ​កូន តែ​ទីបំផុត​ដោយសារ​តែ​រឿង​អ្នកស្រី​ស្វែង​រក​អន្តរាគមន៍​ពី​លោក ហ៊ុន សែន ឲ្យ​ជួយ​រក​យុត្តិធម៌​បែរ​ជា​សាលា​មិន​អនុញ្ញាត​ឲ្យ​កូន​អ្នកស្រី​ចូល​រួម​ក្នុង​ពិធី​ចែក​សញ្ញាប័ត្រ​ទៅ​វិញ៖ «​ពេល​ខ្ញុំ​ទៅ​រក​សម្ដេច​នាយករដ្ឋមន្ត្រី​នៅ​វត្ត​ក្រពើហារ ម្ដង​រក​យុត្តិធម៌​ត្រូវ​គេ​ឃាត់​ខ្លួន ហើយ​ពេល​ទៅ​វិទ្យាស្ថាន​អប់រំ កាល​ពី​ឆ្នាំ​២០១៦ ត្រូវ​គេ​ឃាត់​ខ្លួន​ទៀត ប៉ុន្តែ​ឃាត់​ខ្លួន​លើក​ហ្នឹង​ឃាត់​ខ្លួន​ធ្ងន់ គេ​ឃាត់​ខ្លួន​ខ្ញុំ ២​នាក់​ម៉ែ​កូន​ឲ្យ​ផ្ដិត​មេដៃ ហើយ​ប្រាប់​ខ្ញុំ​ថា ឈប់​ឲ្យ​មីង​ឯង និង​កូន​មីង​ឯង​ទៅ​កម្មវិធី​ណាៗ​ដែល​មាន​សម្ដេច​នាយករដ្ឋមន្ត្រី ហ៊ុន សែន នោះ​ទេ»

ទោះ​ជា​យ៉ាង​ណា សកលវិទ្យាធិការ​នៃ​សាកលវិទ្យាល័យ​អាស៊ី​អឺរ៉ុប លោក ជា សុភាព បាន​បដិសេធ​ចំពោះ​ការ​ចោទ​ប្រកាន់​នេះ។ លោក ជា សុភាព ថា សាលា​មិន​បាន​ហាម​ឃាត់​និស្សិត​ណា​ម្នាក់​ចូល​រួម​ទទួល​សញ្ញាប័ត្រ​ឡើយ។ លោក​អះអាង​ថា យុវជន ឃឹម ប្រខួច មិន​បាន​មក​ចុះឈ្មោះ និង​ជួល​អាវ​ដើម្បី​ចូលរួម​នោះ​ទេ។

លោក ជា សុភាព ថ្លែង​ដែរ​ថា ក្នុង​កម្មវិធី​ចែក​សញ្ញាប័ត្រ​កាល​ពី​ឆ្នាំ​២០១៦ យុវជន ឃឹម ប្រខួច បាន​ទៅ​ចូលរួម​ដែរ ហើយ​ព្យាយាម​ស្កាត់​ជួប​លោក ហ៊ុន សែន តែ​ត្រូវ​ក្រុម​រៀបចំ​ការពារ​សុវត្ថិភាព​លោក ហ៊ុន សែន ឃាត់។ ទោះ​ជា​​យ៉ាង​ណា​លោក​ថា នេះ​មិន​មែន​ជា​មូលហេតុ​ដែល​សាកលវិទ្យាល័យ​លោក​ហាម​មិន​ឲ្យ​យុវជន ឃឹម ប្រខួច ចូល​ទទួល​សញ្ញាប័ត្រ​ដូច​ការ​ចោទ​ប្រកាន់​នោះ​ទេ។ ចំពោះ​សញ្ញាប័ត្រ​វិញ​លោក​ថា យុវជន ឃឹម ប្រខួច មក​ទទួល​ពី​សាលា​ពេល​ណា​ក៏​បាន៖ «ជា​ធម្មតា​ចែក​សញ្ញាប័ត្រ​និស្សិត​ទាំង​អស់​ត្រូវ​មក​ជួល​អាវ​នៅ​សាលា មាន​ស៊ីង (Sign) សម្រាប់​ចូល​ថ្ងៃ​ចែក​សញ្ញាប័ត្រ តែ​ឆ្នាំ​នេះ​ប្រហែលជា​គាត់​អត់​មក​ជួល​មក​អី​អ៊ីចឹង​ក៏​អត់​មាន​ឈ្មោះ»

កន្លង​ទៅ​មាន​ពលរដ្ឋ​មួយ​ចំនួន​ព្យាយាម​ស្កាត់​ជួប​ថ្នាក់ដឹកនាំ​កំពូលៗ​ដើម្បី​ស្វែង​រក​អន្តរាគមន៍​ជួយ​នៅ​ពេល​ពួកគេ​មាន​បញ្ហា​អ្វី​មួយ​ដែល​ពួកគេ​យល់​ថា អាជ្ញាធរ​ថ្នាក់​ក្រោម​មិន​បាន​ដោះស្រាយ​ដោយ​យុត្តិធម៌។ អ្នក​ខ្លះ​ស្កាត់​ជួប​បាន​សម្រេច​តែ​អ្នក​ខ្លះ​ទៀត ក៏​ត្រូវ​បាន​កង​ការពារ​ហាមឃាត់។

ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុជា (ANSA) លោក សន ជ័យ យល់​ថា បើ​សិន​ជា​សាលា​ហាមឃាត់​និស្សិត​ខ្លួន​មិន​ឲ្យ​ចូល​ទទួល​សញ្ញាប័ត្រ​មែន​វា​បង្ហាញ​ពី​ការ​រើសអើង និង​ជា​រឿង​អយុត្តិធម៌​សម្រាប់​និស្សិត។ លោក​ថា សាលា​គួរ​ដើរ​តួនាទី​ជា​ស្ថាប័ន​ឯករាជ្យ និង​ផ្ដល់​ឱកាស ឬ​លើក​ទឹក​ចិត្ត​ដល់​និស្សិត​ឲ្យ​បាន​ស្មើៗ​គ្នា។ លើស​ពី​នេះ​លោក​ថា លោក​នាយករដ្ឋមន្ត្រី ហ៊ុន សែន ជា​ថ្នាក់ដឹកនាំ​ប្រទេស ដូច្នេះ​ពលរដ្ឋ​គ្រប់​រូប​មាន​សិទ្ធិ​ស្វែង​រក​អន្តរាគមន៍​ពី​លោក ពេល​ពលរដ្ឋ​មាន​ទុក្ខ​លំបាក ហើយ​ពលរដ្ឋ​មិន​គួរ​ត្រូវ​បាន​គេ​ហាមឃាត់​នោះ​ទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។


អត្ថបទ​ដែល​ទាក់ទង

What Next?

Recent Articles

2 Responses to "សកលវិទ្យាល័យ​មួយ​រង​ការ​ចោទ​ថា​មិន​ឲ្យ​និស្សិត​ចូល​ក្នុង​​​ពិធី​​ចែក​​សញ្ញាប័ត្រ​ព្រោះ​ខ្លាច​ស្កាត់​ជួប​លោក ហ៊ុន សែន"

  1. people says:

    This beast regime never give justice &the right to ordinary people ‘ All system are the communist system who listen to ANGKA LOUR or Thnak lour but they tell people or international everything are democracy’ what a lie” they are the former killer khmer rough veitcong so they do anything only ANGKA LOUR told them ‘. When their criminals beat M-P ‘the beast regime promoted the criminals’ but when khmer talk about the border ‘this veitcong dogs jail them’ so this is veitcong puppet beast regime, No way this government fair or justice to khmer ordinary people because they are all veitcong dogs. GOD bless all cambodian people’

  2. Rasmei says:

    Meet him for what??????????????????????Your land, your job or what?????????????

Leave a Reply

Submit Comment