រូបភាពតំណាង៖ សកម្មភាពបង្រ្កាបបទល្មើសព្រៃឈើ (©វណ្ណារ៉ា)
ទីភ្នាក់ងារស៊ើបអង្កេតបរិស្ថាន (EIA) កាលពីថ្ងៃទី ១៦ ឧសភា បានចុះផ្សាយឯកសារថ្មី ដើម្បីគាំទ្ររបាយការណ៍របស់ខ្លួនស្តីពី “ជនល្មើសដដែលៗ” ទាក់ទងនឹងការជួញដូរឈើពីខេត្តរតនគីរី ទៅវៀតណាម។ ឯកសារដែលទើបចុះផ្សាយក្នុងគេហទំព័ររបស់ EIA រួមមានបញ្ជីបញ្ជាក់ពីការវេចខ្ចប់ វិក័យប័ត្រ កំណត់ត្រាគយវៀតណាម និងឯកសារមួយចំនួនទៀត។
ឯកសារដែលត្រូវបានផ្សព្វផ្សាយនោះរួមមានរូបភាព ដែលចាប់បានពីផ្កាយរណប បង្ហាញពីទីតាំងដាក់ឈើស្ថិតនៅក្នុងដែនអធិបតេយ្យរបស់យោធាវៀតណាមស្ថិតក្នុងព្រំដែនវៀតណាម, ឯកសារគយ និងពន្ធដែលបំរើឲ្យការដឹកជញ្ជូនឈើរាប់ពាន់ម៉ែត្រគីប, ឯកសារច្បាប់ដែលរដ្ឋាភិបាលវៀតណាមផ្តល់ឲ្យក្រុមហ៊ុន និងឯកសារអនុញ្ញាតឲ្យក្រុមហ៊ុនចំនួន ១៦កាន់កាប់ឈើកម្ពុជាប្រមាណ ២៣០,០០០ម៉ែត្រគីប។
ក៏មានឯកសារមួយចំនួនទៀតដែរ ដូចជាវិក័យប័ត្រ, ឯកសារបញ្ជាក់ពីការវេចខ្ចប់ , កំណត់ត្រាផ្លូវការរបស់គយវៀតណាម ដែលលម្អិតអំពីការនាំចូលឈើពីប្រទេសកម្ពុជា ដែលមានតម្លៃប្រហែល ៣០០លានដុល្លារអាមេរិក រួមទាំងឯកសារបញ្ជាក់ពីការនាំចូលឈើពីកម្ពុជាចាប់ពីខែមករា ឆ្នាំ ២០១៦មក។
ការផ្សព្វផ្សាយឯកសារទាំងនេះធ្វើឡើង បន្ទាប់ពីទីភ្នាក់ងារស៊ើបអង្កេតបរិស្ថាន EIA ដែលមានមូលដ្ឋាននៅសហរដ្ឋអាមេរិក និងអង់គ្លេស បានផ្សព្វផ្សាយរបាយការណ៍មួយកាលពីថ្ងៃទី៨ ឧសភា ស្តីពីការជួញដូរឈើខុសច្បាប់របស់ឈ្មួញឈើវៀតណាមក្នុងទឹកដីខេត្តរតនគីរី។
របាយការណ៍ការក្រោមចំណងជើងថា “ជនល្មើសដដែលៗ” បានឲ្យដឹងថាចាប់ពីខែធ្នូ ឆ្នាំ២០១៦ ដល់ខែកុម្ភៈ ឆ្នាំ២០១៧ ឈើប្រមាណ៣សែនម៉ែត្រគីប ត្រូវបានលួចនាំក្នុងប្រទេសវៀតណាម។ ការស៊ើបអង្កេតរបស់អង្គការអន្តរជាតិមួយនេះ បានឲ្យដឹងថាការជួញដូរឈើខុសច្បាប់ ដោយក្រុមហ៊ុនវៀតណាម បន្តកើតមាននៅក្នុងតំបន់ឧទ្យានជាតិពីរ និងតំបន់ដែនជម្រកសត្វព្រៃក្នុងខេត្តរតនគីរី។
លោកសៅ សុភាពទីប្រឹក្សាអមក្រសួងបរិស្ថាន និងជាអ្នកនាំពាក្យបានថ្លែងប្រាប់វិទ្យុបារាំងអន្តរជាតិនៅថ្ងៃទី១៨ ខែឧសភាថា ការចេញផ្សាយរបាយការណ៍របស់ទីភ្នាក់ងារស៊ើបអង្កេតបរិស្ថានលើកទី១ មិនសូវលំអិតទេ ប៉ុន្តែក្រសួងបានព្យាយាមរកព័ត៌មានបន្ថែម។ ដោយឡែកចំពោះការចេញផ្សាយឯកសារបន្ថែមដែលលំអិតជាងមុននេះ ក្រសួងនឹងស្វែងរកឯកសារដែលចេញផ្សាយថ្មីនេះ។
លោកបញ្ជាក់ថាពេលនេះក្រសួងបរិស្ថានមិនអាចឆ្លើយតបបែបណាទេ ចំពោះការចេញផ្សាយឯកសារនេះ។ អ្នកនាំពាក្យក្រសួងបរិស្ថានរូបនេះបន្ថែមថាក្រសួងបរិស្ថានបានធ្វើសកម្មភាពទប់ស្កាត់ជាបន្តបន្ទាប់ចំពោះករណីកាប់ឈើខុសច្បាប់យ៉ាងតឹងរឹងបំផុត ចំណែកករណីតូចតាចខ្លះនៅតែមាន ក៏ក្រសួងនៅតែបន្តបង្រ្កាបដែរ៕