ដោយ លោក សូរ្យ ជ័យឧត្ដម | ថ្ងៃអាទិត្យ ទី១៨ ខែមិថុនា ឆ្នាំ២០១៧ | ម៉ោង 10:23 PM
http://vodhotnews.com
អតីតមេបក្សប្រឆាំង លោក សម រង្ស៊ី នៅថ្ងៃនេះបានចែកចាយលទ្ធផលនៃការស្ទង់មតិមួយ ដែលនាំឲ្យលោកសន្និដ្ឋានថា គណបក្សកាន់អំណាចនឹងចាញ់គណបក្សប្រឆាំង នៅក្នុងការបោះឆ្នោតជាតិនៅឆ្នាំក្រោយនេះ។
នៅលើទំព័រហ្វេសប៊ុកផ្លូវការរបស់លោកនៅថ្ងៃនេះ លោក សម រង្ស៊ី អតីតប្រធានគណបក្សសង្គ្រោះជាតិ បានលាតត្រដាងថា គណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន បានជួលក្រុមហ៊ុនអន្តរជាតិមួយ ឲ្យធ្វើការស្ទង់មតិដោយសម្ងាត់កាលពីខែឧសភាម្ដង និងខែកញ្ញាម្ដងទៀត នៅក្នុងឆ្នាំ២០១៦កន្លងមក។
អមទៅដោយក្រាហ្វិកមួយទំព័រផងនោះ លោក សម រង្ស៊ី ដែលកំពុងរស់នៅនិរទេសខ្លួនឯងនៅឯក្រៅប្រទេសនោះ ក៏បានភ្ជាប់មកជាមួយនូវរបាយការណ៍ស្ទង់មតិមួយកម្រាស់ ៥០ទំព័រ ដែលឯកសារនោះ បានភ្ជាប់នៅខាងក្រោមទំព័រនូវឈ្មោះក្រុមហ៊ុន SHAVIV STRATEGY & CAMPAIGNS។
យោងតាមបណ្ដាញសង្គម LinkedIn បានបង្ហាញថា SHAVIV STRATEGY & CAMPAIGNS គឺជាស្ថាប័នផ្ដល់ប្រឹក្សាយោបល់ខាងនយោបាយលំដាប់ពិភពលោក ដោយមានជំនាញខាងរៀបចំយុទ្ធនាការបោះឆ្នោតឲ្យទទួលបានជោគជ័យ។
ការស្ទង់មតិដែលត្រូវបានទម្លាយដោយអតីតមេបក្សប្រឆាំងរូបនេះ ត្រូវបានគេសាកសួរទៅកាន់មនុស្សដែលជាសំណាកចំនួន ៥៣៧៩នាក់ តាមរយៈវិធីសាស្ត្រសម្ភាសទល់មុខគ្នា នៅចន្លោះថ្ងៃទី២២ ខែកញ្ញា រហូតដល់ថ្ងៃទី១៩ ខែតុលា ឆ្នាំ២០១៦។
លទ្ធផលនៃការស្ទង់មតិ ដែលដាក់ចំណងជើងថា “ការស្រាវជ្រាវពីទស្សនៈសាធារណជន នៅកម្ពុជា” នោះ បានបង្ហាញថា អ្នកឆ្លើយតប ៤៤ភាគរយឆ្លើយថា ពួកគេនឹងបោះឆ្នោតឲ្យគណបក្សសង្គ្រោះជាតិ នៅក្នុងការបោះឆ្នោតជ្រើសរើសតំណាងរាស្ត្រនៅឆ្នាំ២០១៨ខាងមុខ ខណៈអ្នកឆ្លើយតប ៣៥ភាគរយប៉ុណ្ណោះ ឆ្លើយថា ពួកគេនឹងបោះឆ្នោតឲ្យគណបក្សប្រជាជនកម្ពុជា។ ចំណែកឯអ្នកឆ្លើយតប ១៧ភាគរយទៀត បានប្រាប់ថា ពួកគេនៅពុំទាន់សម្រេចចិត្តនៅឡើយទេ។
ការស្ទង់មតិនេះ ត្រូវបានអ្នកនាំពាក្យគណបក្សប្រជាជនកម្ពុជា លោក ឈឹម ផលវរុណ ទទួលស្គាល់ ហើយចាត់ទុកថា ជាសិទ្ធិសេរីភាពរបស់គណបក្សនីមួយៗ សម្រាប់រៀបចំយុទ្ធសាស្ត្រ។
លោក ឈឹម ផលវរុណ ប្រាប់វីអូឌីនៅថ្ងៃនេះថា៖ “រឿងការស្ទង់មតិ វាជាសិទ្ធិសេរីភាពរបស់គណបក្សនីមួយៗទេ វាមិនសំខាន់ទៅលើអ្វីទេ គ្រាន់តែសម្រាប់ការរៀបចំយុទ្ធសាស្ត្រ”។
បើទោះបីលោក សម រង្ស៊ី សន្និដ្ឋានថា គណបក្សប្រឆាំងនឹងឈ្នះការបោះឆ្នោតក៏ដោយ ប៉ុន្តែ អ្នកនាំពាក្យបក្សកាន់អំណាចរូបនេះ មិនភ្ញាក់ផ្អើលនោះឡើយ ដោយថា វាជាការរវើរវាយរបស់អតីតមេបក្សប្រឆាំងរូបនេះតែប៉ុណ្ណោះ។
ការស្ទង់មតិដដែលនេះ ក៏បានបង្ហាញផងដែរថា អ្នកឆ្លើយតប ៤៣ភាគរយ យល់ឃើញថា ប្រទេសកម្ពុជាក្រោមការដឹកនាំដោយគណបក្សកាន់អំណាច បានដើរលើផ្លូវត្រូវ ខណៈដែលអ្នកឆ្លើយតប ៣៨ភាគរយ យល់ថា រដ្ឋាភិបាលដើរលើផ្លូវខុស។ ចំណែកអ្នកឆ្លើយតប ១៦ភាគរយទៀត យល់ថា រដ្ឋាភិបាលកម្ពុជាដើរទាំងលើផ្លូវត្រង់ និងផ្លូវខុស។
ការស្ទង់មតិនេះ បានបង្ហាញក្ដីកង្វល់របស់ពលរដ្ឋទៅលើបញ្ហានានា ដូចជាបញ្ហាឧក្រិដ្ឋកម្ម និងគ្រឿងញៀន បញ្ហាតម្លៃផលិតផលកសិកម្ម អំពើពុករលួយ បញ្ហាបរិស្ថាន និងបញ្ហាទីផ្សារការងារ។
ផ្អែកតាមលទ្ធផលនៃការស្ទង់មតិដដែលនេះ គណបក្សប្រជាជនកម្ពុជាមានចំណុចខ្លាំងខាងការកសាងហេដ្ឋារចនាសម្ព័ន្ធ និងអភិវឌ្ឍវិស័យអប់រំ ប៉ុន្តែ គណបក្សនេះប្រឈមមុខនឹងចំណុចខ្សោយក្នុងការដោះស្រាយបញ្ហាឧក្រិដ្ឋកម្ម និងគ្រឿងញៀន អំពើពុករលួយ និងការគ្រប់គ្រងធនធានធម្មជាតិ៕
What is the point of stipulate this. Just work towards to winning election is much better.
In the economic point of view, Cambodia’s excellent leader Sam Rainsy. He brings good democracy, good governance and good prosperity, good justice and good income distribution in Cambodia’s society as a whole. 1993-2018 all Cambodian people 101% of total population love our leader Sam Rainsy so this significant driving force for the CNRP wins the national election 2018.
In this regards, all Cambodian people love Sam Rainsy. Sam Rainsy builds the strong nation by using the economic reforms, good governance, and good public responsibility to ensure the sustainable social development and prosperity.