សង្គម​ស៊ីវិល​ថា​ការ​ស៊ើបអង្កេត​លើ​ឃាតកម្ម​បណ្ឌិត កែម ឡី មាន​ភាព​ខ្វះ​ចន្លោះ​ច្រើន

ដោយ តាំង សារ៉ាដា
2017-07-08
RFA

ស្ដាប់ ឬ ទាញ​យក​សំឡេង
ស្តាប់សំឡេងថតសំឡេង

រូប​គំនូរ​សាកសព​បណ្ឌិត កែម ឡី ដែល​ត្រូវ​ឃាតក​បាញ់​សម្លាប់​នៅ​ក្នុង​ហាង​លក់​ទំនិញ​ស្ដារ​ម៉ាត (Star Mart) ក្នុង​ស្ថានីយ​ប្រេង​ឥន្ធនៈ​កាល់តិច (Caltex) ក្បែរ​ស្ដុប​បូកគោ។ Photo: RFA
រូប​គំនូរ​សាកសព​បណ្ឌិត កែម ឡី ដែល​ត្រូវ​ឃាតក​បាញ់​សម្លាប់​នៅ​ក្នុង​ហាង​លក់​ទំនិញ​ស្ដារ​ម៉ាត (Star Mart) ក្នុង​ស្ថានីយ​ប្រេង​ឥន្ធនៈ​កាល់តិច (Caltex) ក្បែរ​ស្ដុប​បូកគោ។ Photo: RFA


ក្រុម​អ្នក​ឃ្លាំមើល​ការ​ស៊ើបអង្កេត​ករណី​ឃាតកម្ម​លោក​បណ្ឌិត កែម ឡី អះអាង​ថា ការ​ស៊ើបអង្កេត​របស់​សមត្ថកិច្ច​នៅ​មាន​ភាព​ចន្លោះប្រហោង​ជា​ច្រើន និង​គ្មាន​ការ​ជឿជាក់​ពី​មហាជន។ ទោះ​ជា​​យ៉ាង​ណា​ក៏ដោយ មន្ត្រី​ជាន់​ខ្ពស់​នៃ​ក្រសួង​មហាផ្ទៃ បញ្ជាក់​ថា អាជ្ញាធរ​នៅ​តែ​បន្ត​តាមដាន​ករណី​នេះ​បន្ត​ទៀត បើ​ទោះ​បី​ជន​ដៃដល់​ត្រូវ​បាន​តុលាការ​ផ្ដន្ទាទោស​ដាក់​គុក​អស់​មួយ​ជីវិត​ក៏ដោយ។

បើ​ទោះ​បី​ជា​តុលាការ​ក្រុង​ភ្នំពេញ កាល​ពី​ថ្ងៃ​ទី​២៣ ខែ​មីនា ឆ្នាំ​២០១៧ បាន​ផ្ដន្ទាទោស​ឈ្មោះ អឿត អាង ហៅ ជួប សម្លាប់ ឲ្យ​ជាប់​ពន្ធនាគារ​អស់​មួយ​ជីវិត​ក្នុង​ករណី​សម្លាប់​លោក​បណ្ឌិត កែម ឡី អ្នក​វិភាគ​នយោបាយ និង​បញ្ហា​សង្គម​ដ៏​ល្បីល្បាញ​រូប​នេះ​ក៏ដោយ ប៉ុន្តែ​ការ​ផ្ដន្ទាទោស​ត្រូវ​បាន​មជ្ឈដ្ឋាន​ជា​ច្រើន​ចាត់​ទុក​ថា គ្រាន់តែ​ជា​ការ​ព្យាយាម​បញ្ចប់​សំណុំ​រឿង​ឃាតកម្ម​នេះ ផ្នែក​នយោបាយ ហើយ​បាន​បន្សល់​នូវ​ដាន​ជា​ច្រើន​ដែល​សមត្ថកិច្ច​មិន​ទាន់​បាន​ស៊ើបអង្កេត​ឲ្យ​ស៊ី​ជម្រៅ។

អ្នកឃ្លាំមើល​ដំណើរការ​នីតិវិធី​ស៊ើបអង្កេត​របស់​សមត្ថកិច្ច​ទីក្រុង​ភ្នំពេញ លោក​បណ្ឌិត ឡៅ ម៉ុងហៃ បាន​ហៅ​ដំណើរការ​ស៊ើបអង្កេត​លើ​ឃាតកម្ម​លោក​បណ្ឌិត កែម ឡី ថា​ជា​ការ​ស៊ើបអង្កេត​ខ្យល់ ឬ​ការ​ស៊ើប​អង្កេត​មាន​លក្ខណ​ចន្លោះប្រហោង៖ «ជួប សម្លាប់ មក​បាញ់​សម្លាប់ កែម ឡី ដោយសារ កែម ឡី ជំពាក់​លុយ​គាត់​បី​ពាន់​ដុល្លារ។ នេះ​ធ្វើ​អោយ​យើង​មើល​ទៅ​ម្ចាស់​បំណុល​ហ្នឹង​មិន​ដែល​ទៅ​បាញ់​សម្លាប់​គេ​ដើម្បី​ទា​លុយ​ទេ។ ឃើញ​រូប​ដែល​បង្ហោះ​មក​ហ្នឹង​ជា​សាធារណៈ ជួប សម្លាប់ ចូល​ទៅ​ស្តារម៉ាត ហើយ​ចាប់​រើស​អីវ៉ាន់​អី​បន្តិចបន្តួច​ហើយ​ក៏​ចូល​ទៅ​បាញ់​ទៅ។ តើ​ម្ចាស់​បំណុល​ណា​គេ​ធ្វើ​ដូច្នេះ? តាម​ធម្មតា​គេ​ចូល​ទៅ​ទារ​លុយ​ពី​មុខ​ អា​ហ្នឹង​បាន​លុយ ហើយ​អា​នេះ​ទៅ​សម្លាប់​គេ​ពី​ក្រោយ​អ៊ីចឹង​តើ​បាន​លុយ​ពី​ណា?»

លោក​បណ្ឌិត ឡៅ ម៉ុងហៃ បន្ត​ថា ចំណុច​ដែល​ខ្វះខាត​ក្នុង​ការ​ស៊ើបអង្កេត​លម្អិត​នោះ រួម​មាន​សមត្ថកិច្ច​មិន​បាន​ធ្វើ​កោសលវិច័យ​ទីកន្លែង​កើតហេតុ គឺ​នៅ​ស្តារម៉ាត ក្នុង​ស្ថានីយ​សាំង​កាល់តិច បូកគោ ឲ្យ​បាន​ដិតដល់​ដូចជា​ការ​សាកសួរ​សាក្សី​ថា តើ​លោក​បណ្ឌិត កែម ឡី ស្លាប់​មក​ពី​ហេតុ​អ្វី? ស្លាប់​បែប​ណា? ហើយ​តើ​មាន​អ្នក​ជំនាញ​មាន​ប៉ុន្មាន​នាក់​ចុះ​អង្កេត​ករណី​នេះ ពួកគេ​មកពី​ស្ថាប័ន​ណា? ពេល​ណា​បាន​ដឹង​អំពី​ការ​សម្លាប់ ហើយ​នៅ​កន្លែង​កើត​ហេតុ​នោះ តើ​នរណា​ជា​អ្នក​បញ្ជា​ឲ្យ​ធ្វើ​កោសលវិច័យ​ដល់​ទី​កន្លែង​កើត​ហេតុ? ធ្វើ​នៅ​ពេល​ណា? ប៉ុន្មាន​នាទី​ក្រោយ​ការ​កើត​ហេតុ? ហើយ​ជនរងគ្រោះ​ស្លាប់​រយៈពេល​ប៉ុន្មាន​នាទី​ទើប​សមត្ថកិច្ច​ទៅ​ដល់​ទីកន្លែង​កើតហេតុ? កាំភ្លើង​បាញ់​ចូល​ត្រង់​ណា ចេញ​ត្រង់​ណា កម្ពស់​ប៉ុន្មាន តម្រង់​ទៅ​ចំណុច​ណា ហើយ​អ្នក​បាញ់​ឈរ​ត្រង់​ណា និង​ស្ថិត​នៅ​ចម្ងាយ​ប៉ុន្មាន​ពី​ជន​រង​គ្រោះ​ជាដើម។ ជនរងគ្រោះ​នៅ​ពេល​គេ​បាញ់ តើ​គាត់​អង្គុយ ឬ​ឈរ ហើយ​បែរ​មុខ​ទៅ​ណា ដួល​ទៅ​ទិស​ណា ហើយ​នៅ​អង្គុយ​ហើយ​ឈាម​ហូរ​ទៅ​កន្លែង​ណា​ខ្លះ? នៅ​ពេល​ណា​ជនរងគ្រោះ​ដួល​ដេក​លើ​ឥដ្ឋការ៉ូ?

លោក​បណ្ឌិត ឡៅ ម៉ុងហៅ អះអាង​ថា សមត្ថកិច្ច​មិន​បាន​បញ្ជាក់​ពី​កាមេរ៉ា​សុវត្ថិភាព​ក្នុង​ស្តារម៉ាត (Star Mart) ថា​តើ​មាន​វត្ថុតាង និង​សាក្សី ឬ​បុគ្គលិក​ទទួល​បន្ទុក និង​គ្រប់គ្រង​មាន​ប៉ុន្មាន​គ្រឿង ហើយ​ដាក់​នៅ​ចំណុច​ណា​ខ្លះ? មាន​កាមេរ៉ា​ប៉ុន្មាន​គ្រឿង​ដែល​បាន​ថត​ចំណុច​នៃ​ការ​សម្លាប់​ទាំង​មូល? តើ​ការ​ថត​ទុក​ក្នុង​អង្គ​ចងចាំ​មាន​រយៈពេល​ប៉ុន្មាន? តើ​មាន​ប្រព័ន្ធ​ថត​ទុក​បន្ថែម ឬ​ហៅ​ថា back up រក្សា​ទុក​នៅ​ទី​ណា​ក្រោយ​ពេល​នៃ​ការ​សម្លាប់​នោះ?

លោក​បណ្ឌិត​បន្ត​ថា ការ​ដក​អង្គ​ចងចាំ​គេ​នៅ​មិន​ទាន់​ដឹង​ថា នរណា​ជា​អ្នក​ដក ហើយ​ប្រគល់​ទៅ​ឲ្យ​នរណា នរណា​ជា​អ្នក​រក្សាទុក ហើយ​នរណា​ជា​អ្នក​ចាក់​មើល​វីដេអូ​ថត​រយៈពេល​មួយ​សប្ដាហ៍​មុន​អ្នក​ជំនាញ​បញ្ចប់​ការងារ​ធ្វើ​កោសលវិច័យ​របស់​ខ្លួន។

បញ្ចុះ​សព កែម ឡី តាកែវ ២០១៦ ៨៥៥
លោក​បណ្ឌិត ឡៅ ម៉ុងហៃ ចូលរួម​ពិធី​បញ្ចុះ​សព​លោក​បណ្ឌិត កែម ឡី នៅ​ភូមិ​អង្គតាកុប ឃុំ​លាយបូរ ស្រុក​ត្រាំកក់ ខេត្ត​តាកែវ នៅ​ថ្ងៃ​ទី​២៥ ខែ​កក្កដា ឆ្នាំ​២០១៦។ RFA/Brach Chev

​ចំណែក​អ្នក​គ្រប់គ្រង និង​បុគ្គលិក​បម្រើការ​នៅ​ក្នុង​ហាង​កើត​ហេតុ សាក្សី​នៅ​ទី​នោះ​មាន​ប៉ុន្មាន​នាក់ អាយុ ភេទ រយៈពេល​បម្រើការ​នៅ​ទីនោះ​តាំង​ពី​ពេល​ណា? តើ​ពួកគេ​ស្គាល់​ភ្ញៀវ​ដែល​ធ្លាប់​ចេញ​ចូល​ឬ​ទេ? ស្គាល់​ជនរងគ្រោះ​ដែល​ធ្លាប់​ចេញ​ចូល​ឬ​ទេ? ពេល​ឮ​ស្នូរ​កាំភ្លើង​ឮ​ផ្ទុះ​ប៉ុន្មាន​គ្រាប់? ​នៅ​ពេល​ណា? ហើយ​ពេល​នោះ​ខ្លួន​កំពុង​ធ្វើ​អ្វី​ជាដើម។ តើ​បុគ្គលិក​ស្គាល់​គាត់​ត្រឹម​កម្រិត​ណា? តើ​ជនរងគ្រោះ កែម ឡី មាន​គ្នា​ប៉ុន្មាន​នាក់ នរណា​អង្គុយ​ជិត​គាត់​ខ្លះ? ហើយ​អ្នក​អង្គុយ​ជិត​គាត់​មាន​ភិនភាគ​យ៉ាង​ម៉េច ជា​ប្រុស ឬ​ស្រី និង​មាន​សម្លៀក​បំពាក់​យ៉ាង​ម៉េច? ចំណែក​៧​ថ្ងៃ​មុន​ថ្ងៃ​កើត​ហេតុ តើ​ជនរងគ្រោះ កែម ឡី មក​រាល់​ថ្ងៃ​ជា​ធម្មតា​ទេ គាត់​អង្គុយ​នៅ​កៅអី​ត្រង់​ណា គាត់​ទិញ​អ្វី​ហូប មាន​ភ្ញៀវ​អង្គុយ​ជិត​គាត់​ដែរ ឬ​ទេ? តើ​ពួកគេ​ជា​មនុស្ស​ដដែលៗ ឬ​ជា​មនុស្ស​ថ្មី? សកម្មភាព​ភ្ញៀវ​ដូច​ប្រក្រតី ឬ​ប្លែក​នៅ​ពេល​នោះ?

អ្នកឃ្លាំមើល​ដំណើរការ​នីតិវិធី​ស៊ើបអង្កេត​រូប​នេះ​បាន​សង្ស័យ​ថា តើ​រូបភាព​របស់​លោក​បណ្ឌិត កែម ឡី ដែល​អង្គុយ​ស្លាប់​នៅ​លើ​កៅអី​ដែល​គេ​ថត​ក្រោយ​ការ​បាញ់​សម្លាប់​ហើយ​នោះ ហាក់​គ្មាន​ឃើញ​មាន​មនុស្ស​នៅ​ក្នុង​ហាង​សោះ។ ដូច្នេះ​តើ​នរណា​ជា​អ្នក​ថត តើ​ថត​នៅ​ពេល​ណា ហើយ​នរណា​ជា​អ្នក​បង្ហោះ​រូប​នោះ​តាម​បណ្ដាញ​សង្គម​ហ្វេសប៊ុក (Facebook)។ តើ​បុគ្គល​រូប​នោះ​បង្ហោះ​រូប​ក្នុង​បំណង​អ្វី? តើ​សមត្ថកិច្ច​មាន​សុំ​សហការ​ពី​អ្នក​ថត និង​អ្នក​បង្ហោះ​រូប​ដែរ​ទេ?

ចំណែក​វីដេអូ ដែល​ជន​ដៃដល់ ជួប សម្លាប់ រត់​តាម​ផ្លូវ​ម៉ៅសេទុង វិញ តើ​នរណា​ជា​អ្នក​ថត? តើ​នរណា​ជា​អ្នក​បង្ហោះ​រូប​នោះ? រី​ឯ​អ្នក​ដេញ​តាម​ចាប់​វាយ​ទាត់​ធាក់ ជួប សម្លាប់ វិញ តើ​សមត្ថកិច្ច​បាន​សួរ​ពួកគេ​ដែរ​ទេ ថា​ពួកគេ​វ៉ៃ ជួប សម្លាប់ ដោយសារ​ឮ​គេ​ស្រែក ឬ​ឃើញ​គេ​ដេញ​ចាប់​ពី​កន្លែង​ណា? ពួកគេ​ឃើញ ជួប សម្លាប់ រត់​ពី​ណា​ទៅ​ណា ហើយ​ឃើញ​សកម្មភាព​នគរបាល​ពី​កន្លែង​ណា​ទៅ​កន្លែង​ណា​ជាដើម។ អ្នក​តាមដាន​រូប​នេះ​បន្ត​ថា ទង្វើ​និង​សកម្មភាព​អ្នក​ជិះ​ម៉ូតូ​អែប ជួប សម្លាប់ ដែល​រត់​តាម​ចិញ្ចើម​ថ្នល់​ហើយ​ឌុប ជួប សម្លាប់។ តើ​បុរស​រូប​នោះ​ឌុប​ជន​ដៃដល់​យក​ទៅ​ឯ​ណា ហើយ​ដើម្បី​អ្វី?

លោក​បណ្ឌិត ឡៅ ម៉ុងហៃ បាន​ផ្ដល់​អនុសាសន៍​ដល់​សមត្ថកិច្ច​ឲ្យ​ស៊ើប​អង្កេត​បន្ថែម​ថា ជួប សម្លាប់ ជា​នរណា​មាន​ប្រវត្តិរូប​យ៉ាង​ម៉េច​មុន​ពេល​បួស​ជា​សង្ឃ ហើយ​មាន​ទំនាក់ទំនង​ជាមួយ​អ្នក​ណា​ខ្លះ? ពេល​ដែល​បួស​តើ​បួស​ដើម្បី​អ្វី ហើយ​សឹក​វិញ​ពេល​ណា ហេតុ​អ្វី​បាន​ជា​សឹក? មាន​ប្រពន្ធ​នៅ​ពេល​ណា ហើយ​ក្រោយ​មក​មាន​មុខ​របរ​អ្វី? មាន​ទំនាក់ទំនង​ជាមួយ​អ្នក​ណា​ខ្លះ មាន​ទំនាក់​ទំនង​ជាមួយ​មន្ត្រី​រាជការ ឬ​អ្នក​ដែល​ធ្លាប់​ធ្វើការ​ជាមួយ​មន្ត្រី​ណា​ខ្លះ។ តើ ជួប សម្លាប់ ច្រើន​ជួប​គ្នា​នៅ​ទី​ណា? និយាយ​គ្នា​អំពី​អ្វី​ខ្លះ ហើយ​ធ្វើ​ដំណើរ​ទៅ​ណា​ខ្លះ?

ចំណែក​សកម្មភាព​មក​ទល់​នឹង​ពេល បាញ់ សម្លាប់ លោក​បណ្ឌិត កែម ឡី កាល​ពី​ថ្ងៃ​ទី​១០ ខែ​កក្កដា ឆ្នាំ​២០១៦។ តើ ជួប សម្លាប់ ចេញ​ពី​ផ្ទះ​នៅ​ពេល​ណា ទៅ​ទី​ឯ​ណា? ដើម្បី​អ្វី? តើ​គាត់​ធ្លាប់​ធ្វើ​ដំណើរ​ទៅ​ភ្នំពេញ ប៉ុន្មាន​ដង ហើយ​ក្នុង​ម្តងៗ​គាត់​បាន​ធ្វើ​អ្វី​ខ្លះ? ហើយ​ភាគ​ច្រើន​ស្នាក់នៅ​កន្លែង​ណា? ពេល​គាត់​ទៅ​ភ្នំពេញ ចុង​ក្រោយ​គឺ​ដើម្បី​ធ្វើ​អ្វី ស្នាក់​នៅ​ទី​ណា​ខ្លះ? ជា​ផ្ទះ បន្ទប់​ជួល ឬ​ស្នាក់​នៅ​ជាមួយ​គេ ហើយ​ក្រោយ​មក​ទៀត គាត់​ជួប​នរណា​ខ្លះ ហើយ​នៅ​ថ្ងៃ​បាញ់​លោក​បណ្ឌិត កែម ឡី តើ​គាត់​ស្នាក់​នៅ​ទី​ណា? ហើយ​មាន​សម្លៀក​បំពាក់ ស្បែកជើង ឬ​មួក​ប៉ុន្មាន​សម្រាប់ ហើយ​មាន​លុយ​ប៉ុន្មាន​មក​ដល់​ភ្នំពេញ។

ចំណែក​ការ​ប្រើប្រាស់​ទូរស័ព្ទ​សម្រាប់​ទំនាក់ទំនង តើ​បាន​ទូរស័ព្ទ​ទៅ​អ្នក​ណា​ខ្លះ ហើយ​អ្នក​នោះ​ត្រូវ​ជា​អ្វី ពួកគេ​នៅ​កន្លែង​ណា​ខ្លះ នៅ​ថ្ងៃ​ណា​ខ្លះ និង​បាន​និយាយ​គ្នា​អំពី​អ្វី​ខ្លះ? តើ ជួប សម្លាប់ ចាយ​លុយ​អស់​ប៉ុន្មាន​មួយ​ថ្ងៃៗ ហើយ​នៅ​ពេល​បាញ់​សម្លាប់​លោក កែម ឡី តើ ជួប សម្លាប់ នៅ​សល់​លុយ​ប៉ុន្មាន​នៅ​ជាប់​នឹង​ខ្លួន។

លោក​បណ្ឌិត ឡៅ ម៉ុងហៃ បាន​ផ្តល់​អនុសាសន៍​ថា សមត្ថកិច្ច​គួរ​ចោទ​សួរ​ថា តើ ជួប សម្លាប់ កាន់កាប់ និង​ការ​ប្រើប្រាស់​អាវុធ​លើក​​ដំបូង​នៅ​ពេល​ណា ប្រភេទ​អ្វី ម៉ាក​អ្វី? តើ​អាវុធ​ដែល​ខ្លួន​កាន់កាប់​នៅ​ជាប់​នឹង​ខ្លួន​មុន​អាវុធ​ដែល​ប្រើប្រាស់​បាញ់​សម្លាប់ កែម ឡី មាន​ប័ណ្ណ​កាន់​កាំភ្លើង​ដែរ​ទេ? តើ​កាំភ្លើង​ដែល​ប្រើប្រាស់​សម្រាប់​បាញ់​សម្លាប់​លោក កែម ឡី ស្គាល់​ប្រភេទ​កាំភ្លើង​នោះ​នៅ​ពេល​ណា ស្គាល់​នៅ​ទី​កន្លែង​ណា? ហើយ​នរណា​ជា​អ្នក​បង្ហាញ ហើយ​តើ​បាន​បាញ់​សាកល្បង​ទេ​មុន​សម្រេច​ចិត្ត​ទិញ? តើ​ហេតុ​អ្វី​បាន​ជា​ជ្រើស​ទិញ​កាំភ្លើង​នោះ នរណា​នាំ​ទៅ​ទិញ ហើយ​ទិញ​នៅ​កន្លែង​ណា? នរណា​ជា​អ្នក​លក់​ឲ្យ ហើយ​ក្នុង​តម្លៃ​ប៉ុន្មាន បាន​គ្រាប់​ប៉ុន្មាន ហើយ​ទិញ​ដើម្បី​អ្វី? តើ​កាំភ្លើង​នោះ​មាន​ប័ណ្ណ​កាន់កាប់ ឬ​ទេ?

លោក​បណ្ឌិត ឡៅ ម៉ុងហៃ៖ «ហើយ​មួយ​ទៀត គឺ​កាំភ្លើង។ រឿង​អី​គេ​ជំពាក់​លុយ​បី​ពាន់​ហើយ​ខំ​ទៅ​ទិញ​កាំភ្លើង​ពី​ថៃ ពី​អី​ណា​មក (តាម​ចម្លើយ​របស់ ជួប សម្លាប់)។ កាំភ្លើង​ហ្នឹង​មិន​មែន​ថោក​ទេ គឺ​ដល់​ទៅ​ជាង ១​ពាន់​ដុល្លារ​ឯណោះ។ កាំភ្លើង​ជាង ១​ពាន់​ដុល្លារ រួច​មក​ទារ​លុយ​បី​ពាន់​វា​អត់​សម​ហេតុផល ហើយ​មក​បាញ់​សម្លាប់​គេ​អ៊ីចឹង»

ហ្វីល រ៉ូប៊ឺតសុន (Phil Robertson) ៦២០
លោក ហ្វីល រ៉ូប៊ឺតសុន (Phil Robertson) នាយក​រង​នៃ​អង្គការ​ឃ្លាំ​មើល​សិទ្ធិ​មនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) ប្រចាំ​អាស៊ី ផ្ដល់​បទសម្ភាសន៍​ដល់​វិទ្យុ​អាស៊ីសេរី ស្ដីពី​កម្ពុជា បញ្ជូន​ជនជាតិ​ម៉ុងតាញ៉ា ទៅ​ឲ្យ​ប្រទេស​វៀតណាម។ រូបថត​ខែ​មីនា ឆ្នាំ​២០១៥ (Photo: RFA)

​ចំណែក​នាយក​រង​ទទួល​បន្ទុក​កិច្ចការ​តំបន់​អាស៊ី​របស់​អង្គការ​ឃ្លាំមើល​សិទ្ធិមនុស្ស​អន្តរជាតិ យូមែន រ៉ៃត៍ វ៉ច្ឆ (Human Rights Watch) លោក ហ្វីល រ៉ូប៊ឺតសុន (Phil Robertson) បាន​ប្រាប់​អាស៊ីសេរី​តាម​ទូរស័ព្ទ​ថា លោក​គ្មាន​ជំនឿ​លើ​សមត្ថកិច្ច​កម្ពុជា ក្នុង​វែកមុខ​ជន​ដៃដល់​ក្នុង​ឃាតកម្ម​ផ្នែក​នយោបាយ​នោះ​ទេ។ លោក​បន្ត​ថា ការ​ស៊ើប​អង្កេត​របស់​សមត្ថកិច្ច​កម្ពុជា ជា​ការ​ស៊ើបអង្កេត​បែប​បិទ​បាំង​ការពិត ជា​ជាង​ការ​ស៊ើបអង្កេត​បែប​វិជ្ជាជីវៈ​ក្នុង​ការ​ស្វែងរក​កា​ពិត​ឲ្យ​ប្រាកដ។

លោក​បន្ត​ថា រដ្ឋាភិបាល​បាន​ប្រើ​ល្បិច​ស្វា​ស៊ី​បាយ​លាប​មាត់​ពពែ ដោយសារ​ភស្តុតាង​មួយ​ចំនួន​ដែល​ចោទ​ប្រកាន់​លើ អឿត អាង មិន​បាន​ពេញលេញ។ សូម្បី​ក្រុម​គ្រួសារ​របស់ អឿត អាង ក៏​បាន​បដិសេធ​ដែរ​ថា អ្វី​ដែល​តុលាការ​ចោទ​ប្រកាន់​គាត់​គឺ​មិន​មែន​ជា​ការ​ពិត​ទាំង​អស់ ហើយ​ថា អឿត អាង មិន​ដែល​បាន​ជួប​លោក​បណ្ឌិត កែម ឡី ហើយ​ក៏​មិន​ដែល​មាន​លុយ ៣​ពាន់​ដុល្លារ​ឲ្យ​លោក​បណ្ឌិត កែម ឡី ខ្ចី​នោះ​ដែរ។

លោក ហ្វីល រ៉ូប៊ឺតសុន បន្ត​ថា សមត្ថកិច្ច​គួរ​ពិនិត្យ​មើល​ករណី​នេះ​ឡើង​វិញ ខណៈ​ការ​ស៊ើបអង្កេត​នេះ​មាន​ការ​ចន្លោះប្រហោង​ជា​ខ្លាំង ដូច​ករណី​មិន​បង្ហាញ​កាមេរ៉ា​សុវត្ថិភាព​ពី​ស្ថានីយ​សាំង​កាល់តិច មិន​បង្ហាញ​ចម្លើយ​របស់​សាក្សី និង​បុរស​ម្នាក់​ឈ្មោះ ពូលីស ដែល អឿត អាង ឆ្លើយ​ថា បុរស​រូប​នេះ​ហើយ​ដែល​គាត់​បាន​ណែនាំ​ឲ្យ​ជួប​ជាមួយ​លោក កែម ឡី និង​បុរស​ម្នាក់​ទៀត​ដែល​លក់​កាំភ្លើង​ឲ្យ អឿត អាង ជាដើម៖ «ខ្ញុំ​គិត​ថា ករណី​នយោបាយ​បែប​នេះ ខណៈ​មាន​មនុស្ស​ដ៏​ល្បីល្បាញ​ម្នាក់​តែង​រិះគន់​ការ​ដឹក​នាំ​របស់​លោក ហ៊ុន សែន និង​ក្រុម​គ្រួសារ​របស់​លោក​ត្រូវ​បាន​គេ​បាញ់​សម្លាប់​នោះ យើង​ប្រាកដ​ជា​មិន​អាច​ទន្ទឹង​រង់ចាំ​យុត្តិធម៌​ដែល​កាត់​សេចក្ដី​ដោយ​តុលាការ​កម្ពុជា បាន​ទេ។ យើង​ដឹង​ហើយ​ថា តុលាការ​កម្ពុជា មិន​ខុស​ពី​​តុលាការ​នៃ​ប្រទេស​ឡាវ ឬ​តុលាការ​នៃ​ប្រទេស​វៀតណាម នោះ​ទេ។ ដោយសារ​តុលាការ​នៃ​ប្រទេស​ទាំង​នេះ​ស្ថិត​ក្រោម​ការ​គ្រប់គ្រង​របស់​គណបក្ស​កាន់​អំណាច​ប៉ុណ្ណោះ ហើយ​ចៅក្រម​នៃ​តុលាការ​ប្រទេស​កម្ពុជា តែង​រង​ការ​បញ្ជា​ពី​គ្រូ​ធំ​នៃ​គណបក្ស​ប្រជាជន​កម្ពុជា ប៉ុណ្ណោះ»

​អ្នក​នាំ​ពាក្យ​ក្រសួង​មហាផ្ទៃ លោក​ឧត្ដមសេនីយ៍ ខៀវ សុភ័គ អះអាង​ថា សមត្ថកិច្ច​កំពុង​បន្ត​ការ​ស៊ើបអង្កេត ស្វែង​រក​មនុស្ស​ឈ្មោះ ពូលីស និង​អ្នក​លក់​កាំភ្លើង​នេះ ខណៈ​អ្នក​ទាំង​ពីរ​ស្ថិត​នៅ​ក្នុង​ប្រទេស​ថៃ ឯ​ណោះ។ ទោះបីជា​យ៉ាង​ណា​ក៏ដោយ លោក​អះអាង​ថា ករណី​ឃាតកម្ម​មួយ​នេះ​ស្ថិត​នៅ​ក្រោម​ការ​ស៊ើប​អង្កេត​នៅ​ឡើយ៖ «អ្វី​ដែល អឿត អាង និយាយ​ប្រាប់​សមត្ថកិច្ច​យើង និង​តុលាការ គឺ​សុទ្ធសឹងតែ​ជា​ចម្លើយ​មិន​អាច​យក​ជា​ការ​បាន។ មិន​មែន​ត្រឹមតែ​កាត់​ទោស​ប៉ុណ្ណឹង​ហើយ​ចប់​ទេ គឺ​ត្រូវ​នៅ​បន្ត​ការ​ស៊ើប​អង្កេត​ទៀត ពាក់ព័ន្ធ​នឹង​ករណី​ផ្សេងៗ​ទៀត»

ទោះ​ជា​យ៉ាង​ណា​ក៏ដោយ លោក​បណ្ឌិត ឡៅ ម៉ុងហៃ រិះគន់​ពាក្យ «បន្ត​ការ​ស៊ើប​អង្កេត» របស់​សមត្ថកិច្ច​ថា ជា​ការ​យក​លេស​ដោះសា មិន​ទទួល​ខុសត្រូវ​ក្នុង​ការ​បំពេញ​មុខ​នាទី​របស់​ខ្លួន​ជា​អាជ្ញាធរ​មាន​សមត្ថកិច្ច​ក្នុង​ការ​រក​យុត្តិធម៌​ពិត​ប្រាកដ​ជូន​ជនរងគ្រោះ​នោះ​ឡើយ។ លោក​បន្ត​ថា សមត្ថកិច្ច​តែងតែ​ប្រើ​ពាក្យ «បន្ត​ការ​ស៊ើប​អង្កេត» នេះ​ទៅ​លើ​ករណី​ឃាតកម្ម​ខ្នាត​ធំៗ​ជា​ច្រើន​រាប់​មិន​អស់​ទៅ​ហើយ ចាប់​តាំង​ពី​ករណី​អ្នកស្រី ពិសិដ្ឋ ពិលីការ លោក ជា វិជ្ជា លោក ឈុត វុទ្ធី និង​មនុស្ស​ជា​ច្រើន​ទៀត​ដែល​រហូត​មក​ទល់​ពេល​នេះ​សមត្ថកិច្ច​នៅ​មិន​ទាន់​អាច​ស្វែង​រក​យុត្តិធម៌​ពិតប្រាកដ​ជូន​ពួកគេ​នៅ​ឡើយ៖ «ចម្លើយ​មក​ហ្នឹង​ដូច​គេ​ថា​ក្លាសិក (classic) គឺ​វា​ដដែលៗ គឺ​ករណី​និទណ្ឌភាព​នោះ។ ចម្លើយ​ដដែល​មក​ស៊ើបអង្កេត​បន្តៗ​អ៊ីចឹង​ទៅ។ ប៉ុន្តែ​យើង​ចោទ​សួរ​ថា ​ចុះ​ប្រសិនបើ​ការ​ស៊ើប​អង្កេត​ហ្នឹង​រក​ឃើញ​ថា ជា​រឿង​ផ្សេង​ទៅ​វិញ»

លោក ហ្វីល រ៉ូប៊ឺតសុន សម្ដែង​ការ​សោកស្ដាយ​ថា គ្រួសារ​របស់​លោក​បណ្ឌិត កែម ឡី នឹង​មិន​អាច​ទទួល​បាន​យុត្តិធម៌​នោះ​ឡើយ ហើយ​លោក កែម ឡី គ្រាន់​តែ​ស្ថិត​នៅ​ក្នុង​ការ​ចងចាំ​របស់​មហាជន​ថា លោក​ជា​គំរូ​នៃ​ការ​ហ៊ាន​បញ្ចេញ​មតិ និង​ការ​រិះគន់ ហើយ​ការ​ស្លាប់​របស់​លោក​មិន​ត្រូវ​បាន​ដោះស្រាយ មិន​ត្រូវ​បាន​គេ​ស្វែង​រក​ការ​ទទួល​ខុស​ត្រូវ។ លោក​បន្ត​ថា ភរិយា​របស់​លោក​បណ្ឌិត កែម ឡី មាន​តែ​ពន្យល់​កូនៗ​របស់​គាត់​ថា ឪពុក​របស់​ពួកគេ​ត្រូវ​បាន​សម្លាប់​ដោយ​ហេតុផល​នយោបាយ ហើយ​គ្មាន​នរណា​ដឹង​ថា អ្នក​សម្លាប់​ជា​នរណា​ពិត​ប្រាកដ​នោះ​ទេ ប៉ុន្តែ​មនុស្ស​ជា​ច្រើន​សង្ស័យ​ថា រដ្ឋាភិបាល​ជា​អ្នក​នៅ​ពី​ក្រោយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

2 Responses to "សង្គម​ស៊ីវិល​ថា​ការ​ស៊ើបអង្កេត​លើ​ឃាតកម្ម​បណ្ឌិត កែម ឡី មាន​ភាព​ខ្វះ​ចន្លោះ​ច្រើន"

  1. people says:

    King dom of veitcong slave’ king dom of corruption’ ‘No way talking about justice in cambodia ‘everything are fake’ ‘fake democracy ‘. Evrything under control of veitcong mafia dictator’ Don’t expect to get justice in this dark king dom unless CNRP lead the country and rescue the country ‘.GOD bless all cambodian people’

  2. ?? says:

    this is a sad pitcher and story among million cases that have been commit by HUN SEN leadership. I fell so sad to our nation the evil man using law and constitution for the nation as his political game. I understood the law and constitution is the main subject to keep peace for every nation. in the whole world there are many people from many back ground living in the same country white peace because they are obey constitution by not using constitution as their political game. after all those country every one obey the law that cam from their constitution. so sad I’m seeing Cambodian leader is using constitution by translate the law deference just to suit their ambition to stay in powers for ever. the question is how can Cambodian depending on this kind of leader to make the country safe. in the past thirty five years all I see was HUN SEN leadership using constitution to eliminated his opponent . I’m seeing Cambodia future is in danger if it’s own people can not protecting that will be end in the near future. peace for Cambodia and GOD bless all Cambodian