ពលរដ្ឋ​ខ្មែរ​ភាគ​ច្រើន​នៅ​តែ​ចងចាំ​គំរូ​វីរភាព​បណ្ឌិត កែម ឡី

ដោយ ថា កិត្យា
2017-07-12
RFA

ស្ដាប់ ឬ ទាញ​យក​សំឡេង
ស្តាប់សំឡេងថតសំឡេង

ពលរដ្ឋ​តម្រង់​ជួរ​ចូល​គោរព​វិញ្ញាណក្ខន្ធ​បណ្ឌិត កែម ឡី ក្នុង​ពិធី​បុណ្យ​ខួប ១​ឆ្នាំ​នា​ភូមិ​អង្គតាកុប ឃុំ​លាយបូរ ស្រុក​ត្រាំកក់ ខេត្ត​តាកែវ ថ្ងៃ​ទី​៩ ខែ​កក្កដា ឆ្នាំ​២០១៧។ RFA/Rann Samnang
ពលរដ្ឋ​តម្រង់​ជួរ​ចូល​គោរព​វិញ្ញាណក្ខន្ធ​បណ្ឌិត កែម ឡី ក្នុង​ពិធី​បុណ្យ​ខួប ១​ឆ្នាំ​នា​ភូមិ​អង្គតាកុប ឃុំ​លាយបូរ ស្រុក​ត្រាំកក់ ខេត្ត​តាកែវ ថ្ងៃ​ទី​៩ ខែ​កក្កដា ឆ្នាំ​២០១៧។ RFA/Rann Samnang


ថ្វី​ត្បិត​លោក​បណ្ឌិត កែម ឡី ត្រូវ​បាន​ឃាតក​បាញ់​សម្លាប់ ១​ឆ្នាំ​ទៅ​ហើយ​ក្ដី ប៉ុន្តែ​ប្រជាពលរដ្ឋ សកម្មជន​ដីធ្លី ព្រះសង្ឃ សិស្ស និស្សិត និង​មន្ត្រី​សិទ្ធិមនុស្ស នៅ​តែ​មាន​ភក្ដីភាព និង​នឹក​ស្ដាយស្រណោះ​រូប​លោក​ដដែល។ ទន្ទឹម​គ្នា​នេះ ពួកគេ​ក៏​ប្ដេជ្ញា​ខិតខំ​រក្សា​គុណ​តម្លៃ ទស្សនវិស័យ និង​វីរភាព​របស់​លោក​បណ្ឌិត កែម ឡី អោយ​នៅ​រស់ និង​គង់វង្ស​យូរអង្វែង​ត​ទៅ​មុខ​ទៀត​សម្រាប់​ជា​ប្រយោជន៍​ជាតិ។

ពលរដ្ឋ​ខ្មែរ​ជា​ច្រើន​នៅ​គ្រប់​ទិស​ទី ហាក់​មិន​ទាន់​រសាយ​បន្តិច​ណា​សោះ​ចំពោះ​លោក​បណ្ឌិត កែម ឡី អ្នក​វិភាគ​នយោបាយ និង​សង្គម​ដ៏​ល្បី​ដែល​ត្រូវ​បាន​ឃាតក​បាញ់​ប្រហារ​ទាំង​កណ្ដាល​​ថ្ងៃ​ក្នុង​ទី​ក្រុង​ភ្នំពេញ កាល​ពី ១​ឆ្នាំ​មុន។

មាន​របរ​ជា​អ្នក​លក់​ត្រី​នៅ​ផ្សារ​អូរឫស្សី អ្នកស្រី ប៉ុច និយាយ​ថា ទោះ​បី​ពេល​វេលា​ចេះ​តែ​កន្លង​ផុត​ទៅ​ក្តី ប៉ុន្តែ​អ្នកស្រី​នៅ​តែ​នឹក​សោកស្ដាយ​ចំពោះ​លោក​បណ្ឌិត កែម ឡី ដែល​អ្នកស្រី​ចាត់​ទុក​ថា ជា​បុរស​សម្ដី​មាស។ ទឹក​មុខ​ប្រែ​ក្រៀមក្រំ អ្នកស្រី ប៉ុច បន្ថែម​ថា ការ​បាត់បង់​លោក​បណ្ឌិត កែម ឡី នេះ គឺ​ប្រៀប​ដូច​ជា​បាត់បង់​សាច់ញាតិ​របស់​ខ្លួន​ផ្ទាល់ ដែល​មិន​អាច​បំភ្លេច​បាន៖ «»។

ទន្ទឹម​គ្នា​នេះ អ្នក​រត់​រ៉ឺម៉ក​ម៉ូតូ​កង់​បី លោក ឡន សុគន្ធ រៀបរាប់​ថា ការ​បាត់បង់​លោក​បណ្ឌិត កែម ឡី ដែល​ជា​អ្នក​បញ្ចេញមតិ​អប់រំ​ពន្យល់​ពលរដ្ឋ​នោះ គឺ​ប្រៀប​ដូចជា​បាត់បង់​អ្នក​ប្រជាធិបតេយ្យ បាត់បង់​អក្សរសាស្ត្រ​ជាតិ​សម្រាប់​ផ្ដល់​ចំណេះដឹង​ដល់​ពលរដ្ឋ។ លោក ឡន សុគន្ធ អះអាង​ថា លោក​នៅ​តែ​គោរព​ស្រលាញ់​ចំណេះ​ដឹង និង​វីរភាព​របស់​លោក កែម ឡី គ្មាន​ថ្ងៃ​កែប្រែ​ឡើយ៖ «»។

ព្រះតេជព្រះគុណ​ព្រះនាម ហួង សាយណ្ហ វិញ មាន​ថេរដីកា​ថា រហូត​មក​ដល់​ពេល​នេះ នៅ​មិន​ទាន់​រក​ឃើញ​នរណា​ម្នាក់​ដែល​មាន​ចំណេះដឹង​ខ្ពស់ ហើយ​មាន​ភាព​ក្លាហាន​ហ៊ាន​និយាយ​ការពិត និង​ហ៊ាន​លះបង់​ក្តី​សុខ​ខ្លួន​ឯង​ដើម្បី​សង្គម​ជាតិ​ដូច​លោក កែម ឡី ឡើយ។ ទង្វើ​ស្នេហា​ជាតិ​ជ្រាលជ្រៅ​បែប​នេះ​ហើយ ដែល​ព្រះតេជព្រះគុណ​នៅ​តែ​មាន​ព្រះទ័យ​អាឡោះអាល័យ​ស្ដាយ​ស្រណោះ៖ «»។

ព្រះតេជព្រះគុណ​ក៏​អំពាវនាវ​ឲ្យ​រដ្ឋាភិបាល​ជួយ​រក​យុត្តិធម៌​ពិតប្រាកដ​ជូន​លោក កែម ឡី និង​ទប់ស្កាត់​កុំ​ឲ្យ​មាន​ករណី​បាញ់​សម្លាប់​កើត​ឡើង​ជា​បន្តបន្ទាប់​ទៀត ជាពិសេស​អ្នក​ដែល​ហ៊ាន​និយាយ​ការពិត។

រី​ឯ​និស្សិត​ស្រី​នៃ​សាកលវិទ្យាល័យ​ភូមិន្ទ​ភ្នំពេញ និយាយ​ថា នាង​នៅតែ​មិន​អស់​ចិត្ត​សោះ​ថា លោក​បណ្ឌិត កែម ឡី ត្រូវ​គេ​ឆក់​យក​ជីវិត​ទៅ​ទាំង​ស្រស់ៗ​បែប​នេះ។ ទោះ​យ៉ាង​ណា និស្សិត​ស្រី​រូប​នេះ​ថា អំពើ​ល្អ និង​គុណ​តម្លៃ​របស់​លោក​បណ្ឌិត កែម ឡី គឺ​មិន​សាប​សូន្យ​ឡើយ ដោយ​នៅ​តែ​ដក​ជាប់​ដួង​ចិត្ត​ជានិច្ច៖ «»។

​ចំពោះ​សកម្មជន​ដីធ្លី​តំបន់​បឹងកក់ អ្នកស្រី បូវ សោភា វិញ និយាយ​ថា លោក កែម ឡី គឺ​បុគ្គល​គំរូ​ល្អ​មួយ​ដែល​តែង​លើកទឹកចិត្ត​ដល់​ប្រជាពលរដ្ឋ​រងគ្រោះ និង​ទន់ខ្សោយ៖ «»។

​ដោយ​ឡែក ប្រធាន​ផ្នែក​ស៊ើបអង្កេត​សមាគម​សិទ្ធិមនុស្ស​អាដហុក (ADHOC) លោក នី សុខា ដែល​ទើប​ត្រូវ​បាន​តុលាការ​ដោះលែង​ឲ្យ​មាន​សេរីភាព​នោះ អះអាង​ថា គ្មាន​ថ្ងៃ​ណា​ដែល​លោក​អាច​បំភ្លេច​លោក​បណ្ឌិត កែម ឡី បាន​ទេ ហើយ​ប្រសិនបើ​មាន​វិធី​ដ៏​អស្ចារ្យ​ណា​មួយ​ដែល​អាច​នឹង​ធ្វើ​អោយ​លោក​បាន​រស់​ជីវិត​ឡើង​វិញ លោក​នឹង​ធ្វើ​វា​ភ្លាម ដើម្បី​ឲ្យ​លោក​បណ្ឌិត​បាន​ចូលរួម​ចំណែក​ធ្វើ​កិច្ច​ការងារ​ជួយ​សង្គម​ជាមួយ​គ្នា​ម្ដង​ទៀត ព្រោះ​មុន​ពេល​បែក​គ្នា​នោះ លោក​ទាំង​ពីរ​ធ្លាប់​មាន​អនុស្សាវរីយ៍​ធ្វើ​ជា​វាគ្មិន និង​ជួបពិភាក្សា​កិច្ច​ការងារ​សង្គម​ជា​ច្រើន​ជាមួយគ្នា៖ «»។

ស្រប​គ្នា​នេះ ពួកគេ​ក៏​មិន​ទាន់​ពេញចិត្ត​ចំពោះ​ការ​រក​យុត្តិធម៌​ជូន​លោក​បណ្ឌិត កែម ឡី ដោយ​តុលាការ​កម្ពុជា​ទេ។ ពួកគេ​មើល​ឃើញ​ថា នៅ​មាន​មន្ទិលសង្ស័យ​ច្រើន ហើយ​ស្នើ​ឲ្យ​សហគមន៍​អន្តរជាតិ​ជួយ​តាមដាន​ករណី​នេះ​​ដោយ​យក​ចិត្ត​ទុក​ដាក់​ដើម្បី​ឲ្យ​រដ្ឋាភិបាល​កម្ពុជា ជួយ​រក​យុត្តិធម៌​ដោយ​ពិត​ប្រាកដ។

ទោះ​យ៉ាង​ណា​ក្តី ក្នុង​ឱកាស​បុណ្យខួប​មួយ​ឆ្នាំ​នៃ​មរណភាព​របស់​លោក​បណ្ឌិត កែម ឡី នេះ ពួកគេ​ក៏​សូម​ឧទ្ទិស​បុណ្យ​កុសល​ទាំង​ឡាយ​ដែល​បាន​សាង​ជូន​ទៅ​ដល់​លោក​បណ្ឌិត និង​សូម​អោយ​លោក​បណ្ឌិត​បាន​ដល់​ឋាន​សុគតិភព៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles