សង្គម​ស៊ីវិល​ផ្នែក​បោះឆ្នោត​ថា​ការងារ​របស់ ​គ.ជ.ប ប្រសើរ​ឡើង​តែ​ត្រូវ​ពង្រឹង​ចំណុច​ខ្លះ

ដោយ សាន សែល
2017-07-16
RFA

សន្និបាត​បូក​សរុប​ការងារ​របស់​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) នៅ​ខេត្ត​ព្រះសីហនុ ថ្ងៃ​ទី​១៦ ខែ​កក្កដា ឆ្នាំ​២០១៧។ Photo courtesy of NEC
សន្និបាត​បូក​សរុប​ការងារ​របស់​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) នៅ​ខេត្ត​ព្រះសីហនុ ថ្ងៃ​ទី​១៦ ខែ​កក្កដា ឆ្នាំ​២០១៧។ Photo courtesy of NEC


ការ​រៀបចំ​ការ​បោះឆ្នោត​នៅ​ឆ្នាំ​២០១៧ របស់ គ..ប ត្រូវ​បាន​អ្នក​សង្កេតការណ៍ និង គ..ប ខ្លួន​ឯង​វាយ​តម្លៃ​ថា​មាន​ភាព​ល្អ​ប្រសើរ​ឡើង ពិសេស​គឺ​សុក្រឹតភាព​នៃ​បញ្ជី​អ្នក​ចុះ​ឈ្មោះ​បោះឆ្នោត និង​ភាព​អហិង្សា​នៅ​ក្នុង​អំឡុង​ពេល​ឃោសនា និង​ថ្ងៃ​បោះឆ្នោត។ ទោះ​បី​ជា​យ៉ាង​ណា ទាំង គ..ប និង​សង្គម​ស៊ីវិល​យល់​ថា គ..ប នៅ​មាន​ចំណុច​ត្រូវ​ពង្រឹង​ដើម្បី​បង្កើន​ប្រសិទ្ធភាព​ការងារ និង​ភាព​ជឿ​ទុក​ចិត្ត។

ខណៈ​ក្រុម​ប្រឹក្សា​ឃុំសង្កាត់​អាណត្តិ​ទី​៤ ដែល​ត្រូវ​បាន​ជ្រើសរើស​ដោយ​ការ​បោះឆ្នោត​កាល​ពី​ថ្ងៃ​ទី​៤ មិថុនា រៀបចំ​ដោយ គ..ប កំពុង​ចាប់​ផ្ដើម​ការងារ​របស់​ខ្លួន​នៅ​ចុង​សប្ដាហ៍​នេះ គ..ប និង​អ្នក​ពាក់ព័ន្ធ កំពុង​សិក្សា និង​ពិនិត្យ​មើល​លទ្ធផល​ការងារ​របស់​ខ្លួន​ក្នុង​សន្និបាត​បូក​សរុប​ការងារ។

ពី​ខេត្ត​ព្រះសីហនុ អនុប្រធាន​គណៈកម្មាធិការ​ជាតិ​រៀបចំ​ការ​បោះឆ្នោត ឬ​ហៅ​កាត់​ថា គ..ប លោក គួយ ប៊ុនរឿន នៅ​ថ្ងៃ​ទី​១៦ កក្កដា ថ្លែង​ថា ការ​បោះឆ្នោត​ឃុំសង្កាត់​បាន​ប្រព្រឹត្ត​ទៅ​ដោយ​បរិយាកាស​សន្តិភាព ស្ងប់ស្ងាត់​ល្អ គ្មាន​អំពើ​ហិង្សា ប្រកប​ដោយ​ភាព​រលូន តម្លាភាព សេរី ត្រឹមត្រូវ យុត្តិធម៌ ស្រប​តាម​គោលការណ៍​លទ្ធិប្រជាធិបតេយ្យ សេរី ពហុបក្ស ហើយ​បើ​ប្រៀបធៀប​ទៅ​នឹង​ការ​បោះឆ្នោត​រាល់​ដង ការ​បោះឆ្នោត​ឆ្នាំ​២០១៧ មាន​ភាព​កាន់​តែ​ប្រសើរ​ឡើង​ទាំង​លើ​ទិដ្ឋភាព​ច្បាប់ ទាំង​លើ​ទិដ្ឋភាព​បច្ចេកទេស។

លោក គួយ ប៊ុនរឿន មាន​ប្រសាសន៍​ពេល​បើក​សន្និបាត​ថា មាន​កត្តា​សំខាន់​ចំនួន​៦ ដែល​ធ្វើ​ឲ្យ​ការ​រៀបចំ​ការ​បោះឆ្នោត​លើក​នេះ​លេចធ្លោ។ លោក​លើក​ឡើង​ថា សេចក្តី​ព្រាង​បទបញ្ជា និង​នីតិវិធី​សម្រាប់​ការ​បោះឆ្នោត​ជ្រើសរើស​ក្រុម​ប្រឹក្សា​ឃុំសង្កាត់​អាណត្តិ​ទី​៤ ត្រូវ​បាន​កែលំអ​ដោយ​ទទួល​យក​ការ​ផ្តល់​អនុសាសន៍ និង​ជជែក​វែកញែក​ពី​ភាគី​ពាក់ព័ន្ធ។ មួយ​ទៀត​នោះ មន្ត្រី​បម្រើ​ការងារ​រៀបចំ​ការ​បោះឆ្នោត ត្រូវ​បាន​ជ្រើសរើស​ដោយ​ប្រឡង​ប្រជែង និង​ត្រូវ​បាន​ផ្តល់​វគ្គ​បណ្តុះបណ្តាល ហើយ​ពួក​គេ​បាន​ផ្តល់​ការ​អប់រំ​ដល់​អ្នក​បោះឆ្នោត និង​សាធារណជន​បាន​ទូលំទូលាយ​តាម​មធ្យោបាយ​ចម្រុះ ព្រម​ទាំង​ផ្តល់​ពេល​ស្មើ​គ្នា​សម្រាប់​គណបក្ស​នយោបាយ​ដើម្បី​ផ្សព្វផ្សាយ​លើ​ប្រព័ន្ធ​ផ្សព្វផ្សាយ​របស់​រដ្ឋ។

ដោយ​មិន​លើក​ឡើង​ពី​ការ​ពន្យារ​ពេល​ម្តង​ហើយ​ម្តង​ទៀត​នៃ​ការ​ប្រកាស​លទ្ធផល​បឋម​នៃ​ការ​បោះឆ្នោត លោក ប៊ុនរឿន ពិនិត្យ​ឃើញ​ថា ការ​ផ្សព្វផ្សាយ​លទ្ធផល​បឋម​នេះ​មាន​តម្លាភាព​តាម​រយៈ​ការ​បញ្ជូន​លទ្ធផល​បឋម​បោះឆ្នោត និង​កំណត់​ហេតុ​នៃ​ការ​រាប់​សន្លឹកឆ្នោត​ពី​ថ្នាក់​មូលដ្ឋាន មក​កាន់ គ..ប ផ្ទាល់​តែ​ម្តង ហើយ​បាន​ផ្សព្វផ្សាយ​ទាំង​លើ​វិទ្យុ ទូរទស្សន៍ វែបសាយ៍ (website) និង​លើ​ហ្វេសប៊ុក (Facebook)

លោក គួយ ប៊ុនរឿន អះអាង​ថា ការ​ដោះស្រាយ​បណ្ដឹង​ត្រូវ​បាន​អនុវត្ត​យន្តការ​ដោះស្រាយ​តាម​សមត្ថកិច្ច​នៃ​ថ្នាក់​នីមួយៗ និង​មន្ត្រី​ដោះស្រាយ​បណ្ដឹង​មាន​ជំនាញ​ធ្វើ​ការ​រឿង​នេះ។

ការ​បោះឆ្នោត​ជ្រើសរើស​ក្រុម​ប្រឹក្សា​ឃុំសង្កាត់​អាណត្តិ​ទី​៤ កាល​ពី​ថ្ងៃ​ទី​៤ មិថុនា មាន​គណបក្ស​នយោបាយ​ចំនួន​១២ ចូលរួម​ប្រកួត​ប្រជែង​យក​តំណែង​មេ​ឃុំសង្កាត់​ចំនួន ១.៦៤៦ ហើយ​អត្រា​អ្នក​ចេញ​ទៅ​បោះឆ្នោត​មាន​ជាង ៩០% (៩០,៣៧%) ឬ​ជាង ៧​លាន ១​សែន​នាក់ (.១០៧.៣៩៥​នាក់) ក្នុង​ចំណោម​អ្នក​បាន​ចុះ​ឈ្មោះ​បោះឆ្នោត​ចំនួន​ប្រមាណ ៧​លាន ៨​សែន​នាក់ (.៨៦៥.០៣៣​នាក់)

សង្គម​ស៊ីវិល​ឃ្លាំ​មើល​ការ​បោះឆ្នោត​ក្នុង​ស្រុក​មួយ​ក្រុម​ដែល​ដាក់​ឈ្មោះ​ថា «បន្ទប់​ស្ថានការណ៍» បាន​វាយ​តម្លៃ​ថា បើ​ទោះ​ជា​ក្នុង​រយៈពេល​នៃ​ការ​ឃោសនា​រហូត​ដល់​ការ​ប្ដឹង​រាប់​សន្លឹកឆ្នោត​ឡើង​វិញ មាន​ភាព​ប្រសើរ​ឡើង តែ​មិន​ទាន់​ចាត់​ទុក​ថា​មាន​ភាព​ត្រឹមត្រូវ និង​យុត្តិធម៌​ពេញលេញ​នៅ​ឡើយ ដោយសារ​នៅ​ខ្វះ​យុត្តិធម៌ និង​មាន​ការ​រឹតត្បិត​សេរីភាព​បញ្ចេញ​មតិ។

នាយក​ប្រតិបត្តិ​គណៈកម្មាធិការ​អព្យាក្រឹត និង​យុត្តិធម៌​ដើម្បី​ការ​បោះឆ្នោត​ដោយ​សេរី និង​ត្រឹមត្រូវ​នៅ​កម្ពុជា ហៅ​កាត់​ថា និកហ្វិច (NICFEC) លោក សំ គន្ធាមី ដែល​ជា​អតីត​សមាជិក «បន្ទប់​ស្ថានការណ៍» ផ្តល់​អនុសាសន៍​ថា ការ​រៀបចំ​ការ​បោះឆ្នោត​របស់ គ..ប នៅ​លើក​ក្រោយ នឹង​កាន់​តែ​ប្រសើរ ប្រសិន​បើ គ..ប ពង្រឹង​ការ​ផ្សព្វផ្សាយ​ព័ត៌មាន​ឲ្យ​មាន​ប្រសិទ្ធភាព​ស្ដីពី​ការ​បោះឆ្នោត ពិសេស​នៅ​តាម​តំបន់​ដាច់ស្រយាល សម្របសម្រួល​ការ​សហការ​របស់​អាជ្ញាធរ​ក្នុង​កិច្ច​ការងារ​អប់រំ​ផ្សព្វផ្សាយ ពង្រឹង​ភាព​ស្មើ​គ្នា​របស់​គណបក្ស​នយោបាយ​លើ​ប្រព័ន្ធ​ផ្សព្វផ្សាយ​ឯកជន និង​ពង្រឹង​សមត្ថភាព​មន្ត្រី​នៅ​ថ្នាក់​មូលដ្ឋាន​របស់​ខ្លួន៖ «អាណត្តិ​ក្រោយ​នេះ (សូម) ..ប បើក​ចំហ​កិច្ច​សហប្រតិបត្តិការ​ជាមួយ​អ្នក​ពាក់ព័ន្ធ ពិសេស​ជាមួយ​អង្គការ​មិន​មែន​រដ្ឋាភិបាល អង្គការ​អន្តរជាតិ​ក្តី សូម​បើក​ចំហ​ឲ្យ​បាន​ទូលាយ​ជាង​នេះ​ទៀត ដើម្បី​ទទួល​យក​អនុសាសន៍ ឬ​យោបល់​ពី​មជ្ឈដ្ឋាន​នេះ។ ហើយ (..​ប គួរ) ធ្វើ​ទំនាក់ទំនង​ឲ្យ​បាន​ជិតស្និទ្ធ​ជាមួយ​អ្នក​បោះឆ្នោត»

សន្និបាត​បូក​សរុប​ការងារ​របស់ គ..ប នឹង​ត្រូវ​បន្ត​រហូត​ដល់​ថ្ងៃ​ទី​១៧ ខែ​កក្កដា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles