អ្នក​រាយការណ៍​ពិសេស​អ.ស.ប ពិភាក្សា​ជាមួយ​រដ្ឋមន្ត្រី​ក្រសួង​យុត្តិធម៌​រឿង​កំណែ​ទម្រង់

ដោយ សាន សែល
2017-08-10
RFA

ស្ដាប់ ឬ ទាញ​យក​សំឡេង
ស្តាប់សំឡេងថតសំឡេង

អ្នក​រាយការណ៍​ពិសេស​របស់​អង្គការ​សហប្រជាជាតិ ស្ដីពី​ស្ថានភាព​សិទ្ធិ​មនុស្ស​ប្រទេស​កម្ពុជា អ្នកស្រី រ៉ូណា ស្មីត (រូប​ខាង​ឆ្វេង​កណ្ដាល) ជួប​ពិភាក្សា​ជាមួយ​រដ្ឋមន្ត្រី​ក្រសួង​យុត្តិធម៌ លោក អង្គវង្ស វឌ្ឍានា (រូប​ទី​ពីរ​ខាង​ស្ដាំ) នៅ​ថ្ងៃ​ទី​១០ ខែ​សីហា ឆ្នាំ​២០១៧ នៅ​រាជធានី​ភ្នំពេញ។ RFA/Rann Samnang
អ្នក​រាយការណ៍​ពិសេស​របស់​អង្គការ​សហប្រជាជាតិ ស្ដីពី​ស្ថានភាព​សិទ្ធិ​មនុស្ស​ប្រទេស​កម្ពុជា អ្នកស្រី រ៉ូណា ស្មីត (រូប​ខាង​ឆ្វេង​កណ្ដាល) ជួប​ពិភាក្សា​ជាមួយ​រដ្ឋមន្ត្រី​ក្រសួង​យុត្តិធម៌ លោក អង្គវង្ស វឌ្ឍានា (រូប​ទី​ពីរ​ខាង​ស្ដាំ) នៅ​ថ្ងៃ​ទី​១០ ខែ​សីហា ឆ្នាំ​២០១៧ នៅ​រាជធានី​ភ្នំពេញ។ RFA/Rann Samnang



អ្នក​រាយការណ៍​ពិសេស​របស់​អង្គការ​សហប្រជាជាតិ (អ.ស.ប) ស្ដីពី​ស្ថានភាព​សិទ្ធិ​មនុស្ស​ប្រទេស​កម្ពុជា បាន​ជួប​ពិភាក្សា​ជាមួយ​រដ្ឋមន្ត្រី​ក្រសួង​យុត្តិធម៌ នៅ​ថ្ងៃ​ទី​១០ ខែ​សីហា នៅ​រាជធានី​ភ្នំពេញ។ ជា​ថ្មី​ទៀត អ្នកស្រី រ៉ូណា ស្មីត លើក​ឡើង​ថា ជំនួប​នោះ​បន្ត​ពិភាក្សា​ពី​ការ​កែ​ទម្រង់ លើក​កម្ពស់​ការ​កែលំអ​ប្រព័ន្ធ​យុត្តិធម៌​នៅ​ប្រទេស​កម្ពុជា។

នេះ​ជា​ជំនួប​លើក​ទី​៤ រវាង​ភាគី​ទាំង​ពីរ​ចាប់​តាំង​ពី​អ្នកស្រី រ៉ូណា ស្មីត (Rhona Smith) កាន់​តួនាទី​ជា​អ្នក​រាយការណ៍​ពិសេស​សម្រាប់​ប្រទេស​កម្ពុជា។ ជំនួប​របស់​អ្នកស្រី​លើក​ទី​៣ ត្រូវ​បាន​ធ្វើ​ឡើង​កាល​ពី​ខែ​តុលា ឆ្នាំ​២០១៦។

អ្នកស្រី រ៉ូណា ស្មីត បាន​ថ្លែង​ប្រាប់​អ្នក​សារព័ត៌មាន​យ៉ាង​ខ្លី​មុន​ពេល​ដើរ​ចូល​ឡាន​ថា ភាគី​ទាំង​ពីរ​បាន​ជជែក​ពី​អ្វី​ដែល​បាន​ព្រមព្រៀង​គ្នា​កាល​ពី​លើក​មុន ដើម្បី​ស្វែងរក​កិច្ច​សហការ​លើក​កម្ពស់​ការ​កែលំអ​ប្រព័ន្ធ​យុត្តិធម៌​នៅ​ប្រទេស​កម្ពុជា។

អ្នក​នាំ​ពាក្យ​ក្រសួង​យុត្តិធម៌ លោក ជិន ម៉ាលីន បាន​ថ្លែង​ប្រាប់​ក្រុម​អ្នក​សារព័ត៌មាន​ក្រោយ​កិច្ចប្រជុំ​បិទ​ទ្វារ​រយៈពេល​ជាង ១​ម៉ោង នៅ​ក្រសួង​យុត្តិធម៌ ថា ជំនួប​លើក​នេះ​មាន​ភាព​វិជ្ជមាន៖ «ជា​ជំនួប​បច្ចេកទេស​សុទ្ធ មិន​មែន​រឿង​នយោបាយ របៀបវារៈ​នយោបាយ​នៅ​ពី​ក្រោយ។ គាត់​មក​នេះ​ក្នុង​នាម​ជា​អ្នក​បច្ចេកទេស​សុទ្ធសាធ។ គាត់​ជា​អ្នក​ជំនាញ​ផ្នែក​ច្បាប់។ គាត់​មក​នេះ​អាច​ជួយ​យើង​បាន​ច្រើន ក្នុង​នាម​អ្នក​បច្ចេកទេស​កំណែ​ទម្រង់​ប្រព័ន្ធ​យុត្តិធម៌​នេះ»

លោក​ឲ្យ​ដឹង​ថា ប្រធានបទ​ចំនួន​បី​ត្រូវ​បាន​លើក​យក​មក​ពិភាក្សា។

ប្រធានបទ​ទី​មួយ គឺ​ការ​រៀបចំ​អង្គភាព​រដ្ឋបាល​តុលាការ ពិសេស​ការ​ធ្វើ​ទំនើបកម្ម​ផ្នែក​បច្ចេកវិទ្យា និង​ប្រព័ន្ធ​ទិន្នន័យ ដើម្បី​ឲ្យ​មន្ត្រី​យុត្តិធម៌​ងាយស្រួល​គ្រប់គ្រង​សំណុំ​រឿង​ក្តី។ លោក​ថា ក្រសួង​អនុវត្ត​គម្រោង​សាកល្បង​នៅ​តុលាការ​ចំនួន​១២។ មួយ​ទៀត​នោះ ការ​រៀបចំ​បង្កើត​បណ្ណាល័យ​អេឡិចត្រូនិក​ដោយ​ដាក់​ផ្សាយ​សាលក្រម សេចក្តី​សម្រេច​ផ្សេងៗ​ជា​សាធារណៈ។

ប្រធានបទ​ទី​ពីរ គឺ​ការ​អនុវត្ត​យុត្តិធម៌​ព្រហ្មទណ្ឌ។ បើ​តាម​អ្នក​នាំ​ពាក្យ​ក្រសួង​យុត្តិធម៌ អ្នកស្រី រ៉ូណា ស្មីត បាន​ស្នើ​ឲ្យ​មាន​ការ​កាត់​បន្ថយ​ការ​ឃុំ​ខ្លួន​បណ្ដោះអាសន្ន និង​ការ​អនុវត្ត​ទោស​នៅ​ក្រៅ​ពន្ធនាគារ ដោយ​សម្រាល​ទៅ​ជា​ទោស​សហគមន៍ ដោយ​ឲ្យ​ជន​ជាប់​ចោទ​ជួយ​ធ្វើ​ការងារ​សហគមន៍ ជាជាង​ដាក់​ឃុំ​ខ្លួន​ក្នុង​ពន្ធនាគារ។ អ្នកស្រី​បាន​លើក​យក​ករណី​ការ​ចង្អៀត​ណែន​នៅ​តាម​ពន្ធនាគារ​ពេល​មាន​យុទ្ធនាការ​បង្ក្រាប​គ្រឿង​ញៀន​រយៈពេល ៦​ខែ និង​ការ​ឃុំ​ខ្លួន​សកម្មជន​សិទ្ធិ​មនុស្ស និង​អ្នក​នយោបាយ។

ក៏ប៉ុន្តែ​សំណើ​នេះ ត្រូវ​បាន​ក្រសួង​យុត្តិធម៌ ឆ្លើយតប​ថា ពិបាក​អនុវត្ត​នៅ​ប្រទេស​កម្ពុជា ដោយសារ​ប្រជាជន​មិន​ទាន់​យល់​ដឹង​ពី​ច្បាប់៖ «ទស្សនៈ​នេះ​វា​ទំនើប។ អ្វី​ដែល​យើង​ចង់​ធ្វើ​រួម​គ្នា​នោះ គឺ​ធ្វើ​គម្រោង​សាកល្បង​នៅ​កន្លែង​ណា​មួយ ហើយ​សម្រេច​យក​ខេត្ត​បាត់ដំបង ដើម្បី​សាកល្បង​អនុវត្ត​ទោស​សហគមន៍។ មិន​ឲ្យ​គាត់​នៅ​ពន្ធនាគារ​ទេ តែ​ឲ្យ​ធ្វើ​ការ​នៅ​សហគមន៍ ស្ថិត​ក្រោម​ការ​ត្រួត​ពិនិត្យ​មើល​ដោយ​មាន​យន្តការ​ច្បាស់លាស់ ហើយ​ធ្វើ​ការ​ផ្សព្វផ្សាយ​ឲ្យ​សាធារណជន​បាន​យល់»

បន្ថែម​ពី​លើ​នេះ អ្នកស្រី រ៉ូណា ស្មីត ក៏​បាន​លើក​យក​ការ​ព្រួត​គ្នា​វាយ​សម្លាប់​ជន​សង្ស័យ​ជា​ក្រុម​ក្រៅ​ប្រព័ន្ធ​តុលាការ (mob killing)

ប្រធានបទ​ទី​បី គឺ​ការ​រៀបចំ​ច្បាប់​ស្ដីពី​ការ​ពពោះ​ជំនួស។

លោក ជិន ម៉ាលីន បាន​ឲ្យ​ដឹង​ថា អ្នកស្រី រ៉ូណា ស្មីត មាន​ជំនាញ​ផ្នែក​នេះ ហើយ​ផ្តល់​គំនិត​យោបល់ និង​ការ​ប្រឹក្សា​ដល់​ក្រសួង​យុត្តិធម៌។

អ្នកស្រី រ៉ូណា ស្មីត អ្នក​រាយការណ៍​ពិសេស​របស់​អង្គការ​សហប្រជាជាតិ ស្ដីពី​ស្ថានភាព​សិទ្ធិ​មនុស្ស​ប្រទេស​កម្ពុជា កំពុង​ស្ថិត​ក្នុង​ដំណើរ​ទស្សនកិច្ច​រយៈពេល ១០​ថ្ងៃ នៅ​កម្ពុជា ចាប់​ពី​ថ្ងៃ​ទី​៨ ដល់​ទី​១៨ សីហា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

One Response to "អ្នក​រាយការណ៍​ពិសេស​អ.ស.ប ពិភាក្សា​ជាមួយ​រដ្ឋមន្ត្រី​ក្រសួង​យុត្តិធម៌​រឿង​កំណែ​ទម្រង់"

  1. people says:

    Dear ms smith ‘ Cambodia is the fake democracy’ ‘ This system is under control of veitcong mafia dictator’ cambodian people never have justice since 1975 till now’ . Cambodian people living in hell on earth ‘ because of veitcong mafia dictator and veitcong germs who control this country in iron fist ‘dictator ‘ communist way and they hiding the truth ‘ they twist the story from white to black ‘from black to white followed what ever dictator veitcong mafia ‘s mouth ‘ so this justice minister and his group serve their mafia group only not serve cambodian people.This government under veitcong mafia dictator can threat people with bamboo root’ and kick or hit people ‘and they are still wright’ but when people or opposition talking the truth story ‘this veitcong government jail them or killed them so It no justice at all for cambodian people ‘.Cambodian people need U N troops or ASEAN troops to help when national election come ‘ . GOD bless all cambodian people ‘