បុរស​ជេរប្រមាថ​លោក ហ៊ុន សែន ​ត្រូវ​តុលាការ​ចោទប្រកាន់

លោក ហ៊ុយ ឧត្តម ដែល​ត្រូវ​បាន​សមត្ថកិច្ច​ខេត្ត​ក្រចេះ​ចាប់​ឃាត់​ខ្លួន​កាលពី​ថ្ងៃ​សុក្រ​។ រូបថត ហ្វេសប៊ុក



ភ្នំពេញប៉ុស្តិ៍

ក្រចេះ: បុរស​អាយុ ២៩ ឆ្នាំ​ម្នាក់​រស់នៅ​ខេត្ត​កំពង់ស្ពឺ​ដែល​ត្រូវ​បាន​សមត្ថកិច្ច​ចាប់​ខ្លួន​នៅ​ខេត្ត​ក្រចេះ​ត្រូវ​បាន​តុលាការ​ចោទប្រកាន់​ពី​បទ​ញុះញង់​ឲ្យ​ប្រព្រឹត្ត​បទឧក្រិដ្ឋ​ជា​អាទិ៍​ហើយ​ត្រូវ​បាន​បញ្ជូន​ទៅ​ឃុំ​ខ្លួន​នៅ​ពន្ធនាគារ​កាល​ពី​ថ្ងៃ​សៅរ៍ ពាក់ព័ន្ធ​នឹង​ការ​បង្ហោះ​វីដេអូ​នៅ​លើ​ហ្វេសប៊ុក​កាលពី​ឆ្នាំ​ ២០១៣ ​ដែល​គាត់​ច្រៀង​ខ្លួន​ឯង​ដោយ​ជេរប្រមាថ​លោក​នាយក​រដ្ឋមន្ត្រី ហ៊ុន សែន​។

ចៅក្រម​ស៊ើបសួរ​សាលា​ដំបូង​ខេត្ត​ក្រចេះ​ លោក ថាន់ ឃុង បាន​សរសេរ​នៅ​ក្នុង​ដីកា​បង្គាប់​ឲ្យ​ឃុំ​ខ្លួន ​កាលពី​ម្សិលមិញ​ថា ​ចៅក្រម​ស៊ើបអង្កេត​បាន​សម្រេច​ឃុំ​ខ្លួន​លោក​ ហ៊ុយ ឧត្តម អាយុ ២៩ ឆ្នាំ​ដែល​ជា​មេការ​រោងចក្រ​ទឹក​សុទ្ធ​រស់នៅ​ខេត្ត​កំពង់ស្ពឺ​ដោយ​ជន​នេះ​ត្រូវ​បាន​ដាក់​ឲ្យ​ស្ថិត​នៅ​ក្រោម​ការ​ត្រួតពិនិត្យ​ពី​បទ​ញុះញង់​ឲ្យ​ប្រព្រឹត្ត​បទឧក្រិដ្ឋ​ជាអាទិ៍​ដែល​ប្រព្រឹត្ត​នៅ​ក្នុង​បណ្តាញ​សង្គម​ហ្វេសប៊ុក​ កាលពី​ខែ​កញ្ញា​ឆ្នាំ​ ២០១៣​។

ដីកា​បង្គាប់​ឲ្យ​ឃុំ​ខ្លួន​នោះ​បាន​បញ្ជាក់​ថា​៖ «​យើង ថាន់ ឃុន ចៅក្រម​ស៊ើបសួរ​នៃ​សាលា​ដំបូង​ខេត្ត​ក្រចេះ​បង្គាប់​ឲ្យ​ភ្នាក់ងារ​មាន​សមត្ថកិច្ច​នៃ​កងកម្លាំង​សាធារណៈ​ធ្វើការ​នាំ​ខ្លួន​ជន​ត្រូវ​ចោទ​ដែល​មាន​ឈ្មោះ ហ៊ុយ ឧត្តម ទៅ​ពន្ធនាគារ ខេត្ត​ក្រចេះ​ដោយ​អនុវត្ត​ឲ្យ​បាន​ត្រឹមត្រូវ​តាម​ច្បាប់​។ ប្រធាន​ពន្ធនាគារ​ខេត្ត​ក្រចេះ​ទទួល​នឹង​ឃុំ​ជន​នេះ​រហូត​ដល់​មាន​បទបញ្ជា​ថ្មី​សម្រេច​ផ្សេង​ពី​នេះ​»​។

លោក​ ហ៊ុយ ឧត្តម បាន​ច្រៀង​ខ្លួនឯង​ហើយ​បង្ហោះ​នៅ​ក្នុង​ហ្វេសប៊ុក​ថា​៖ «​បើក​ភ្នែកៗ​ឃើញ​រាស្ត្រ​ឈឺផ្សារ រាស្ត្រ​ខ្មែរ​រស់​រង​ទុក្ខា ព្រោះ​ដោយសារ​ស្នាដៃ ហ៊ុន សែន អស់​ដីធ្លី​ឲ្យ​យួន​កាន់កាប់​ឈឺចាប់​ក្រៃលែង ឱស​ឱ​ ហ៊ុន សែន ឯង​នេះ​មិនមែន​ជា​មនុស្ស​ទេ​។ កាប់​ឈើ​គ្មាន​សល់ ឈប់​ខ្វល់​អស់​រ៉ែ​ត្បូង​ទៀត បំផ្លាញ​មច្ឆាតិណ​ជាតិ​នេះ​ហើយ​មារយាទ​របស់​ ហ៊ុន សែន សម្បទាន​ដីធ្លី​ឲ្យ​យួន​កាន់កាប់​ជា​រឿង​មែនទែន​…»​។

លោក​ឧត្តម​ច្រៀង​បន្ត​ថា​៖ «​ល្មោភ​អំណាច​តែ​ម្នាក់​ឯង មិន​ដែល​កោតក្រែង​ចិត្ត​ប្រជាជន​…​ជ្រុល​ហួសហេតុ​ពេក​ហើយ​…​គួរ​ណា​ឡើយ​ឯង​កុំ​កន្តើយ​ធ្វើ​ដូចនេះ​ទៀត ឯង​កើត​ជា​ខ្មែរ​ចរិត​ជា​ឆ្កែ ឆ្កែ​ដ៏​ចោលម្សៀត​…​ពេល​បាន​ជ្រួតជ្រាប​លែង​ជឿ​ឯង​ទៀត ឯង​ត្រូវ​ចប់​ហើយ​…​សែន​អើយ​សែន​ឯង​ឆាប់​ចុះ​ចេញ​ទៅ​បើ​សិន​ឯង​នៅ​រាស្ត្រ​ខ្មែរ​វេទនា​រង​ឈឺចាប់​អស់​ដី​អស់​ធ្លី​…​ដូច្នេះ​ខ្មែរ​យើង​ចូរ​ក្រោក​ឈរ​ឡើង​ធ្វើ​ខ្លួន​តម្កើង​តតាំង​ឲ្យ​បាន កម្ចាត់ ហ៊ុន សែន ពួក​យួន​ក្ស័យ​ប្រាណ​…»​។

ការ​ចោទប្រកាន់​នេះ​អាច​នឹង​ត្រូវ​ផ្តន្ទាទោស​ដាក់​ពន្ធនាគារ​ពី ៦ ខែ​ដល់ ២ ឆ្នាំ និង​ពិន័យ​ជា​ប្រាក់​ចន្លោះ​ពី ១ លាន​ដល់ ៤ ​លាន​រៀល​។

ស្នងការរង​ខេត្ត​ក្រចេះ​លោក អ៊ុំ ភី ថ្លែង​ថា​អាជ្ញាធរ​របស់​លោក​បាន​ចាប់​ខ្លួន​បុរស​នោះ នៅ​ពេល​គាត់​ទៅ​លេង​ប្រពន្ធ​របស់​គាត់​នៅ​ខេត្ត​ក្រចេះ បន្ទាប់ពី​អាជ្ញាធរ​បាន​ឃើញ​ឃ្លីប​វីដេអូ​ដែល​បាន​បង្ហោះ​ជេរប្រមាថ​លោក​នាយក​រដ្ឋមន្ត្រី ហើយ​គាត់​បាន​សារភាព​ថា​គាត់​បាន​ច្រៀង​ចម្រៀង​នោះ ហើយ​គាត់​បាន​សម្តែង​ការ​សោកស្តាយ​ចំពោះ​រឿង​នេះ​។

លោក​ថ្លែង​ថា​៖ «​យើង​បាន​ចាប់​ខ្លួន​គាត់ បន្ទាប់ពី​ទទួល​បាន​ព័ត៌មាន​តាមរយៈ​ហ្វេសប៊ុក …​គាត់​បាន​សារភាព​អំពី​បទល្មើស​របស់​គាត់​…​គាត់​បាន​ច្រៀង​ចម្រៀង​សុំទោស​លោក​នាយក​រដ្ឋមន្ត្រី នៅ​ស្នងការដ្ឋាន​នគរបាល​ខេត្ត​ហើយ​គាត់​បាន​សម្តែង​ការ​សោកស្ដាយ​ដោយ​នៅ​ពេល​នោះ​គាត់​នៅ​ឈាមរាវ ហើយ​គាត់​ថា​មិន​គួរ​ប្រព្រឹត្ត​វា​នោះ​ទេ ដោយ​ជឿ​ និង​ធ្វើ​តាម​អ្នក​ញុះញង់​»​។

លោក ឧត្តម បាន​ច្រៀង​នៅ​ស្នងការដ្ឋាន​នគរបាល​ខេត្ត​ក្រចេះ​ថា​លោក​ពិត​ជា​មាន​ការ​សោកស្តាយ​យ៉ាង​ខ្លាំង​ចំពោះ​កំហុស​របស់​លោក​ដែល​បាន​ជេរប្រមាថ​លោក​នាយក​រដ្ឋមន្ត្រី​ដោយសារ​តែ​ជឿ​លើ​ការ​ញុះញង់​របស់​គណបក្ស​ប្រឆាំង ហើយ​ឥឡូវ​នេះ​លោក​បាន​ដឹង​ច្បាស់​ហើយ​។

លោក​ថា​៖ «​ខ្ញុំ​ពិត​ជា​អាម៉ាស់​ខ្លាំង​ណាស់​ដែល​បាន​ជេរ​ពូ ហើយ​គណបក្ស​ប្រឆាំង​តែងតែ​ជេរប្រមាថ​លោក​ពូ​ជានិច្ច​…​សម្តេច​ឲ្យ​ក្មួយ​សូម​ទោស​»​។

ជន​នេះ​បន្ត​ថា​ «​ប្រទេស​ជាតិ​មាន​សន្តិភាព ប៉ុន្តែ​ក្រុម​ប្រឆាំង​បាន​លាប​ពណ៌​ប្រទេស​របស់​យើង​ដូច្នេះ​ហើយ​ប្រជាជន​កម្ពុជា​ត្រូវ​តែ​រួម​កម្លាំង​គ្នា​ដើម្បី​កម្ចាត់​ក្រុម​ប្រឆាំង​ហើយ​នឹង​មាន​សន្តិភាព​។ ខ្ញុំ​នៅ​ក្មេង​ និង​ល្ងីល្ងើ​មិន​ដឹង​អី​ដោយ​បាន​ជឿ​លើ​ការ​ញុះញង់​របស់​គណបក្ស​ប្រឆាំង​»​។

លោក យឹម សុវណ្ណ និង​លោក យ៉ែម បុញ្ញឫទ្ធិ អ្នក​នាំ​ពាក្យ​គណបក្ស​សង្គ្រោះ​ជាតិ​មិន​អាច​ទាក់ទង​សុំ​ការ​អធិប្បាយ​បាន​ទេ​កាលពី​ម្សិលមិញ​៕ NS


Contact author: ម៉ិច ដារ៉ា

What Next?

Recent Articles

Leave a Reply

Submit Comment