ក្រសួង​យុត្តិធម៌​ប្រាប់​ប្រធាន​រដ្ឋសភា​ថា ខ្លួន​អនុវត្ត​ច្បាប់​បាន​ត្រឹម​ត្រូវក្នុង​ករណី​បទល្មើស​ជាក់ស្ដែង

ដោយ អ៊ឹម រចនា
11/10/2017
RFI

media
លោករដ្ឋមន្ត្រីក្រសួងយុត្តិធម៌ អង្គ វង្ស វឌ្ឍានា ។ @Facebook


នៅ​ក្នុង​លិខិត​ចុះ​ថ្ងៃ​ទី​១០​តុលា ផ្ញើ​ទៅ​កាន់​លោក​ហេង សំរិន ប្រធាន​រដ្ឋសភា, រដ្ឋ​មន្ដ្រី​ក្រសួង​យុត្តិធម៌ បាន​គូស​បញ្ជាក់​ថា ក្នុង​ករណី​ចាប់​ខ្លួន​និង​ចោទ​ប្រកាន់​តំណាង​រាស្ត្រ​បក្ស​ប្រឆាំង​កន្លង​មក​ពាក់ព័ន្ធនឹង​បទល្មើស​ជាក់​ស្ដែង គឺ​ស្ថាប័ន​អនុវត្ត​ច្បាប់ បាន​អនុវត្ត​ត្រឹម​ត្រូវ​នូវ​សមត្ថកិច្ច​របស់​ខ្លួន ស្រប​តាម​ច្បាប់​និង​នីតិវិធី​ជា​ធរមាន​។ ការ​គូស​បញ្ជាក់​របស់​រដ្ឋ​មន្ដ្រី​ក្រសួង​យុត្តិធម៌​ដូច្នេះ ធ្វើ​ឡើង​ដើម្បី​ឆ្លើយ​តប​ទៅ​នឹង​សំណើ​សុំ​ការ​បំភ្លឺ​របស់​លោក សុន ឆ័យ តំណាងរាស្ត្រ​គណបក្ស​សង្គ្រោះ​ជាតិ​ ចុះ​ថ្ងៃ​ទី​១៣​កញ្ញា​។ ក្នុង​ករណី​បទ​ល្មើស​ជាក់ស្ដែង​នេះ លោក សុន ឆ័យ យល់​ឃើញ​ថា ការ​អនុវត្ត​ច្បាប់ ចាប់​ខ្លួន​តំណាង​រាស្ត្រ​បក្ស​ប្រឆាំង​កន្លង​មក​នោះ ជា​ទង្វើផ្ទុយ​ពី​ច្បាប់។

សម្រាប់​តំណាង​រាស្ត្របក្ស​ប្រឆាំង លោក សុន ឆ័យ បទល្មើស​ជាក់​ស្ដែង បើ​តាម​មាត្រា​៨៦​នៃ​ក្រម​នីតិវិធី​ព្រហ្មទណ្ឌ គឺ​ជា​បទ​ល្មើស​ដែល​កំពុង​តែ​ប្រព្រឹត្ត និង​បទល្មើស​ដែល​ទើប​ប្រព្រឹត្ត​រួច​ភ្លាម​ៗ​។ ត្រូវ​ចាត់​ជា​បទល្មើស​ជាក់​ស្ដែង​ដែរ កាល​ណា​នៅ​ក្រោយ​ពេល​មាន​បទល្មើស​បន្តិច​រួច​មក មាន​ការ​​ស្រែក​ដេញ​ប្រផាប់​ចាប់​ប្រភីង​។ តាម​រយៈ​និយម​ន័យ​នេះ លោក សុន ឆ័យ ជា​តំណាង​រាស្ត្រ បាន​ចាត់​ទុក​ការ​ចាប់​ខ្លួន​សមាជិក​ព្រឹទ្ធសភា​និង​សមាជិក​រដ្ឋសភា ដោយ​យក​ហេតុផល​បទល្មើស​ជាក់​ស្ដែង​នោះ ថា​ជា​ទង្វើ​ផ្ទុយ​ពី​ច្បាប់​។ និង​ថា ការ​ចោទ​ប្រកាន់​កន្លង​មក​នោះ មិន​មាន​មូលដ្ឋាន​គ្រប់​គ្រាន់ និង​ពុំ​មែន​ជា​ទង្វើ​ឬ​សកម្មភាព​ដែល​ទើប​តែ​ប្រព្រឹត្ត​រួច ហើយ​ក៏​មិន​មែន​ជា​ការ​ប្រព្រឹត្ត​រួច​ក្នុង​រយៈ​ពេល​តែ​បន្តិច​មក​នោះ​ដែរ​។

ការ​លើក​ឡើង​របស់​លោក សុន ឆ័យ ដូច្នេះ ធ្វើ​ឡើង​បន្ទាប់​ពី​​តំណាង​រាស្ត្រ​និង​សមាជិក​ព្រឹទ្ធសភា​បក្ស​ប្រឆាំង​ចំនួន​៣​រូប​ ត្រូវ​បាន​តុលាការ​ចោទ​ប្រកាន់​ ចាប់​ខ្លួន និង​ឃុំ​ខ្លួន​ ដោយ​សារ​បទ​ល្មើស​ជាក់​ស្ដែង​។ អ្នក​ទាំង​៣​រូប​នោះ​រួម​មាន៖ លោក ហុង សុខហួរ សមាជិក​ព្រឹទ្ធសភា​បក្ស​សម រង្ស៊ី, ​លោក អ៊ុំ សំអាន តំណាង​រាស្ត្រ​បក្ស​សង្គ្រោះជាតិ, និង​លោក កឹម សុខា តំណាង​រាស្ត្រ និង​ជា​ប្រធាន​គណបក្ស​សង្គ្រោះ​ជាតិ​។ សមត្ថកិច្ច​ចោទ​ប្រកាន់​អ្នក​ទាំង​៣ពី​​បទ​ល្មើស​ជាក់​ស្ដែង បន្ទាប់​ពី​ពួក​គាត់​បង្ហោះ​ឯកសារ​ និង​វីដេអូ នៅ​លើ​បណ្ដាញ​សង្គម​ហ្វេសប៊ុក​​។

ជិត​មួយ​ខែ​ក្រោយ​ពី​ទទួល​បាន​លិខិត​របស់តំណាង​រាស្ត្រ​​រដ្ឋសភា រដ្ឋមន្ដ្រី​ក្រសួង​យុត្តិធម៌ លោក អង្គ វង្ស វឌ្ឍានា បាន​ឆ្លើយ​តប នៅ​ថ្ងៃ​ទី​១០​តុលា ដោយ​ពន្យល់​បក​ស្រាយ​ពី​បទល្មើស​ជាក់​ស្ដែង​ តាម​មាត្រា​៨៦​នៃ​ក្រម​ព្រហ្មទណ្ឌ​ថា ជា​បទល្មើស​ដែលកំពុង​តែ​ប្រព្រឹត្ត និង​បទ​ល្មើស​ដែល​ទើប​តែ​ប្រព្រឹត្ត​រួច​ភ្លាម​ៗ​ ដែល​ត្រូវ​គេ​ស្រែក​ដេញ​ប្រផាប់​ចាប់​ប្រភីង​។ បន្ថែម​ពី​លើ​នេះ បើ​តាម​លោក​រដ្ឋ​មន្ដ្រី អង្គ វង្ស វឌ្ឍនា សកម្មភាព​បទ​ល្មើស​ដែល​​​បាន​ប្រព្រឹត្ត​ជា​បន្តបន្ទាប់​រហូត​មក​ដល់​បច្ចុប្បន្នកាល ក៏​ត្រូវ​ចាត់​ទុក​ជា​បទល្មើស​ជាក់​ស្ដែង​ដែរ​​។ ក្នុង​ន័យ​នេះ គឺ​រាប់​បញ្ចូល​ទាំង​សកម្មភាព​នៃ​បទ​ល្មើស​ដែល​បាន​ប្រព្រឹត្ត​រួច​ហើយ តែ​សកម្មភាព​នោះ​ត្រូវ​បាន​បង្ហោះ និង​បន្ត​ផ្សព្វផ្សាយ​លើ​គេហទំព័រ រហូត​ដល់​ថ្ងៃ​នៃ​ការ​ចាប់​ខ្លួន​​។ នេះ​បើ​តាម​លោក​រដ្ឋ​មន្ដ្រី​។

ចំពោះ​ការ​ចាប់​ខ្លួន និង​ចោទ​ប្រកាន់​តំណាង​រាស្ត្រ​និង​សមាជិក​ព្រឹទ្ធសភា​បក្ស​ប្រឆាំង​នា​ពេល​កន្លង​មក​ពាក់ព័ន្ធ នឹង​បទ​ល្មើស​ជាក់​ស្ដែង​នោះ​ទៀត​សោត លោក អង្គ វង្ស វឌ្ឍានា បាន​លើក​ឡើង​ពី​មាត្រា​៨០​ និង​មាត្រា​១០៤​នៃ​រដ្ឋធម្មនុញ្ញ ក៏​ដូច​ជា​​មាត្រា​១២​នៃ​ច្បាប់​ស្ដី​ពី​លក្ខន្តិកៈ​តំណាងរាស្ត្រ ព្រម​ទាំង​មាត្រា​១២​នៃ​ច្បាប់​ស្ដី​ពី​លក្ខន្តិកៈ​សមាជិក​ព្រឹទ្ធសភា​។ ​លោក​រដ្ឋ​មន្ដ្រី​ពន្យល់​ថា ខ្លឹមសារ​នៃ​មាត្រាច្បាប់​​នោះ បើក​ដៃ​ឲ្យ​សមត្ថកិច្ច​​ចោទ​ប្រកាន់ ​​ចាប់​ខ្លួន​ ​ឃាត់​ខ្លួន ឬ​ឃុំ​ខ្លួន តំណាង​រាស្ត្រ​និង​សមាជិក​ព្រឹទ្ធសភា​បាន ក្នុង​ករណី​បទល្មើស​ជាក់​ស្ដែង​ ដោយ​មិន​ចាំ​បាច់​ឲ្យ​មាន​ការ​អនុម័ត​យល់​ព្រម​ពី​រដ្ឋសភា ឬ​ព្រឹទ្ធសភា​ជា​មុន​ឡើយ​។

ដូច្នេះ ផ្អែក​តាម​សេចក្ដី​ពន្យល់​នេះ លោក​រដ្ឋ​មន្ដ្រី​ក្រសួង​យុត្តិធម៌ សរុប​​ច្បាស់​ៗ​ថា ​ករណី​ចាប់​ខ្លួន​និង​ចោទ​ប្រកាន់​តំណាង​រាស្ត្រ​បក្ស​ប្រឆាំង​កន្លង​មក​ពាក់ព័ន្ធនឹង​បទល្មើស​ជាក់​ស្ដែង គឺ​ស្ថាប័ន​អនុវត្ត​ច្បាប់ បាន​អនុវត្ត​ត្រឹម​ត្រូវ​នូវ​សមត្ថកិច្ច​របស់​ខ្លួន ស្រប​តាម​ច្បាប់​និង​នីតិវិធី​ជា​ធរមាន​៕

What Next?

Recent Articles

2 Responses to "ក្រសួង​យុត្តិធម៌​ប្រាប់​ប្រធាន​រដ្ឋសភា​ថា ខ្លួន​អនុវត្ត​ច្បាប់​បាន​ត្រឹម​ត្រូវក្នុង​ករណី​បទល្មើស​ជាក់ស្ដែង"

  1. ?? says:

    what the F you talking about did you employer caught his enemy red hand . your look like a smart guy to me but so sad you are cheaper then a sick chicken . HUN SEN going hell and you too will going he white him . my question to you is ??? are you a real Cambodian if not who the fuck are you . you are going to hell soon you dumb ass. GOD bless Cambodia

  2. people says:

    This bloody guy is so crook” he is the worse corrupted man in cambodia ‘and this guy is the veitcong mafia dictator’s dog’ what ever veitcong mafia said he followed and we wait and see ‘ if veitcong mafia dictator go to hell ‘we must send him to hell too ‘ to accompany him ‘.This dirty veitcong germ will be punished by GOD ‘.GOD bless all cambodian people’

Leave a Reply

Submit Comment