លោក លឺ ឡាយស្រេង ប្រកាស​សុំ​ព្រះរាជទាន​លើក​លែង​ទោស​ពី​ព្រះមហាក្សត្រ

ដោយ ទីន ហ្សាការីយ៉ា
2017-10-21
អាស៊ីសេរី

ស្ដាប់ ឬ​ទាញ​យក​សំឡេង
ស្តាប់សំឡេងថតសំឡេង

លោក លឺ ឡាយស្រេង អតីត​ឧបនាយករដ្ឋមន្ត្រី​ពី​ខាង​គណបក្ស​ហ្វ៊ុនស៊ិនប៉ិច និង​ជា​អ្នក​នយោបាយ​ជើង​ចាស់​មួយ​រួប ក្នុង​បន្ទប់​ផ្សាយ​អាស៊ីសេរី នៅ​ថ្ងៃ​ទី១៥ ខែ​កញ្ញា ឆ្នាំ​២០១៦។ RFA/Cheu Sideth
លោក លឺ ឡាយស្រេង អតីត​ឧបនាយករដ្ឋមន្ត្រី​ពី​ខាង​គណបក្ស​ហ្វ៊ុនស៊ិនប៉ិច និង​ជា​អ្នក​នយោបាយ​ជើង​ចាស់​មួយ​រួប ក្នុង​បន្ទប់​ផ្សាយ​អាស៊ីសេរី នៅ​ថ្ងៃ​ទី១៥ ខែ​កញ្ញា ឆ្នាំ​២០១៦។ RFA/Cheu Sideth


អតីតមន្ត្រី​ជាន់ខ្ពស់​គណបក្ស​ហ៊្វុនស៊ិនប៉ិច​លោក លឺ ឡាយស្រេង បាន​ប្រកាស​បន្ទន់​ឥរិយាបថ និង​សូម​ព្រះរាជទាន​លើកលែងទោស​ពី​ព្រះមហាក្សត្រ ចំពោះ​សារ​បែក​ធ្លាយ​សន្ទនា ជុំវិញ​វិបត្តិ​នយោបាយ។ ប៉ុន្តែ អ្នកនាំពាក្យ​គណបក្ស​ហ៊្វុនស៊ិនប៉ិច ប្រកាស​ជំហរ​ថា អ្វី​ដែល​បាន​កើត​ឡើង​វា​ហួស​ពេល​រួច​ទៅ​ហើយ ហើយ​កិច្ចការ​បន្ទាប់​នេះ គឺ​ទុក​ភារកិច្ច​ឲ្យ​តុលាការ​ជា​អ្នកចាត់ការ​បន្ត។

លោក លឺ ឡាយស្រេង ពេលនេះ​ហាក់​បង្ហាញ​ការភ័យខ្លាច ក្រោយ​ទទួល​បាន​ដំណឹង​ថា លោក​កំពុង​រង​បណ្ដឹង​តាម​ផ្លូវ​តុលាការ បន្ទាប់ពី​មាន​សារ​បែក​ធ្លាយ​ដែល​ទម្លាយ​ដោយ​គណនី​ហ្វេសប៊ុក (Facebook) ឈ្មោះ​សីហា ជា​គណនី​ស្និត​នឹង​រដ្ឋាភិបាល ហើយ​ចោទប្រកាន់​លោក​ថា ប្រមាថ​ព្រះមហាក្សត្រ​តាមរយៈ​ការសន្ទនា​ជា​លក្ខណៈ​ឯកជន​របស់​លោក ជុំវិញ​វិបត្តិ​នយោបាយ​ចុងក្រោយ​នេះ។

ស្រប​ពេល​គណបក្ស ហ៊្វុនស៊ិនប៉ិច រង​ការ​រិះគន់​ថា ជា​គណបក្ស​ដែល​មាន​យីអ៊ុន​ឡើង​ខ្ពស់ ក្រោយពី​ចូល​ដៃ​ជាមួយ​លោក ហ៊ុន សែន ហើយ​ដាក់​ពាក្យបណ្ដឹង​ទៅ​ក្រសួង​មហាផ្ទៃ ដើម្បី​រំលាយ​គណបក្សប្រឆាំង ក្រសួងមហាផ្ទៃ​ក៏​ចាត់ការ​បណ្ដឹង​ទៅ​តុលាការ​កំពូល​ភ្លាមៗ​នោះ។ ព្រះអង្គម្ចាស់​នរោត្តម រណឫទ្ធិ ហាក់​លែង​ខ្វល់​អំពី​អ្វី​ក្រៅពី​ចង់​បាន​អំណាច​ទាំង​បំពាន ទោះបី​អតីត​អ្នក​នយោបាយ​រួម​អាជីព​ក៏​ព្រះអង្គ​នឹង​ប្ដឹង​ដែរ។

លោក លឺ ឡាយស្រេង អតីត​រដ្ឋមន្ត្រី​ក្រសួង​ព័ត៌មាន បាន​ទទួល​ស្គាល់​កំហុស​របស់​ខ្លួន តាមរយៈ​សារ​សន្ទនា ដែល​ត្រូវ​បាន​គណនី​ហ្វេសប៊ុក​ឈ្មោះ សីហា ទម្លាយ​ចេញ ហើយ​ទន្ទឹម​នឹង​នេះ​លោក​ក៏​អំពាវនាវ​សូម​ព្រះរាជទាន​លើកលែងទោស​ពី​ព្រះមហាក្សត្រ​ដែរ។ លោក​បន្ត​ថា អ្វី​ដែល​បាន​កើត​ឡើង ក្នុង​សារ​សន្ទនា​នោះ គឺ​រូបលោក​ពុំ​មាន​ចេតនា​មើលងាយ​អង្គ​ព្រះមហាក្សត្រ​នោះ​ឡើយ។ជាង​នេះ​ទៀត​លោក លឺ ឡាយ ស្រេង រំពឹង​ថា ព្រះមហាក្សត្រ​ទ្រង់​នឹង​អនុគ្រោះ​តាម​ការ​ស្នើ​សុំ​ព្រះរាជទាន​លើកលែងទោស​នេះ។ បើ​ទោះ​ជា​បែប​ណា អ្នកនយោបាយ​ចាស់​វស្សា​រូប​នេះ អះអាង​ថា លោក​បាន​បង្ហោះ​សារ​សូមទោស​រួចហើយ​ដែរ ក្រោយពី​មាន​សារ​លេច​ធ្លាយ​នេះ។

គណនី​ហ្វេសប៊ុក​ឈ្មោះ សីហាដែល​តែង​លួច​ថត​សារ​សន្ទនា​ឯកជន​តាម​ទូរស័ព្ទ​របស់​គណបក្ស​ប្រឆាំង លើក​នេះ​គណនី​ហ្វេសប៊ុក ដែល​រង​ការ​រិះគន់​ថា អាច​ជា​មនុស្ស​ដែល​ស្និត​នឹង​រដ្ឋាភិបាល បាន​លួច​បញ្ចេញ​សារ​សន្ទនា​លោក លឺ ឡាយស្រេង វិញ​ម្ដង នៅ​ថ្ងៃទី២១ ខែ​តុលា។

ការ​ប្រើ​ពេល​សន្ទនា​ប្រមាណ​ជាង ៤​នាទី ជាមួយ​និង​អតីតមន្ត្រី​គណបក្ស​ហ៊្វុនស៊ិនប៉ិច​ដូចគ្នា គឺ​អ្នកស្រី គី លំអង នោះ​លោក លឺ ឡាយស្រេង អះអាង​ថា ប្រសិនបើ​ព្រះមហាក្សត្រ ទ្រង់​មិន​អាច​អន្តរាគមន៍ ដោះស្រាយ​វិបត្តិ​នយោបាយ​នេះ​បានទេ ទ្រង់​គួរ​ដាក់រាជ្យ​វិញ​ទៅ។ ក្រៅ​ពី​នេះ លោក លឺ ឡាយស្រេង បាន​រិះគន់​សម្ដេចក្រុមព្រះ​ថា​ជា​អ្នកនយោបាយ ដែល​អង្គុយ​ចាំ​ទទួល​យក​តែ​ផល ដោយ​មិន​ចេះ​អៀន​ខ្មាស និង​ធ្វើ​ឲ្យ​បាត់​ព្រះ​កិត្តិនាម​ព្រះរាជវង្សានុវង្ស។

ជុំវិញ​នឹង​ការ​ថយ​វិញ​មួយ​ជំហាន​របស់​លោក លឺ ឡាយស្រេង នេះ​មិន​ត្រូវ​បាន​ស្វាគមន៍​ពី​ម្ចាស់​បណ្ដឹង គឺ​គណបក្ស​ហ៊្វុនស៊ិនប៉ិច​ឡើយ។ អ្នកនាំពាក្យ​គណបក្ស​នេះ​គឺ​លោក ញ៉េប ប៊ុនឈិន អះអាង​ថា ពេលនេះ​លោក​កំពុង​ពិគ្រោះ​យោបល់​ជាមួយ​មេធាវី ក្នុង​ការ​ដាក់​បណ្ដឹង​ទៅ​តុលាការ។ លោក​បន្ត​ថា ពេលនេះ​អ្វីៗ​វា​បាន​ហួសពេល​អស់​ទៅ​ហើយ។

តាមរយៈ​សារ​បែក​ធ្លាយ ដែល​ពុំបាន​បញ្ជាក់​ពី​ពេលវេលា​នៃ​ការសន្ទនា​នេះ លោក លឺ ឡាយស្រេង ឆ្លើយតប​និង​អ្នកស្រី គី លំអង ថា​លោក​នឹង​ចូល​គាល់​ព្រះមហាក្សត្រ​ជាមួយ​និង​បណ្ឌិត ឡៅ ម៉ុងហៃ ដើម្បី​ស្នើសុំ​អង្គ​ព្រះមហាក្សត្រ កុំ​ឲ្យ​ព្រះអង្គ​ឡាយ​ព្រះ​ហត្ថលេខា លើ​វិសោធនកម្ម​ច្បាប់​ចំនួន ៤ ដែល​ព្រឹទ្ធសភា​បាន​អនុម័ត ពាក់ព័ន្ធ​នឹង​ការបោះឆ្នោត។

អ្នកវិភាគ​នយោបាយ​ចាស់​វស្សា​លោក បណ្ឌិត ឡៅ ម៉ុងហៃ ធ្លាប់​អះអាង​ថា លោក​នឹង​ចូល​គាល់​ព្រះមហាក្សត្រ​ដោយ​ផ្ទាល់ ជុំវិញ​វិបត្តិ​នយោបាយ​នេះ។ ទាក់ទិន​នឹង​គម្រោង​ចូល​គាល់​ព្រះមហាក្សត្រ ដើម្បី​ស្នើសុំ​ព្រះរាជ​អន្តរាគមន៍ សុំ​ឲ្យ​ព្រះអង្គ​កុំ​ឡាយ​ព្រះ​ហត្ថលេខា​នេះ​ដែរ លោក លឺ ឡាយស្រេង ហាក់​នៅ​ស្ទាក់​ស្ទើរ​ចិត្ត​នៅ​ឡើយ មក​ដល់​ពេល​នេះ។

លោក បណ្ឌិត ឡៅ ម៉ុងហៃ បញ្ជាក់​ថា អ្នក​ដែល ត្រូវ​គេ​លួច​ថត​សំឡេង​សន្ទនា​ឯកជន​នេះ ត្រូវ​ប្ដឹង​បក​ទៅ​តុលាការ​វិញ ឲ្យ​តុលាការ​វែក​មក​មុខ ម្ចាស់​គណនី​ហ្វេសប៊ុក ឈ្មោះ​សីហា ថា​តើ​អ្នកណា​ជា​ម្ចាស់​ពិត ដើម្បី​ឲ្យ​ទទួលទោស​តាមច្បាប់ ដែល​លួច​ថត​សំឡេង​ការសន្ទនា​ឯកជន​បែបនេះ ជា​រឿង​ខុស​នឹង​រដ្ឋធម្មនុញ្ញ ក្រម​ព្រហ្មទណ្ឌ និង​ច្បាប់​មួយ​ចំនួន​ទៀត ដែល​ធានា​សិទ្ធិ​ឯកជន។

ចំពោះ​លោក មេធាវី សេក សោភ័ណ វិញ ពន្យល់​ថា កម្ពុជា​កំពុងតែ​ជា​ប្រទេស​អសន្តិសុខ លោក​បាន​ឲ្យ​និយមន័យ​ថា អសន្តិសុខ​ពុំ​មែន​មានន័យថា​ប្រទេស​នោះ មាន​សង្គ្រាម ទើប​អសន្តិសុខ​នោះ​ទេ។ អសន្តិសុខ​នៅ​កម្ពុជា​នៅ​ពេល​នេះ គឺ​ពលរដ្ឋ​មានការ​ភ័យខ្លាច ការ​សន្ទនា​ឯកជន​លែង​ជា​ការ​សម្ងាត់​ជាដើម។

លោក សេក សោភ័ណ បន្ថែម​ថា រដ្ឋាភិបាល​ត្រូវ​ចាប់​ជន​លួច​ថត​សំឡេង​គេ​នេះ យក​មក​ផ្ដន្ទាទោស​តាមច្បាប់។ អ្នក​ដែល​តំណាង​ឲ្យ​រដ្ឋាភិបាល​នោះ គឺ​ព្រះរាជអាជ្ញា ដែល​ជា​អ្នកមាន​សិទ្ធិ​តំណាង​ឲ្យ​រដ្ឋាភិបាល​ក្នុង​ការ​ចាត់ការ​រឿង​នេះ។

លោក​បណ្ឌិត មាស នី អ្នកវិភាគ​នយោបាយ យល់​ឃើញ​ថា ប្រសិនបើ​ការ​លើក​ឡើង​របស់​លោក លឺ ឡាយស្រេង ដោយ​គ្រាន់តែ​បង្ហាញ​ពី​ព្រះ​រាជកិច្ច​របស់​ព្រះមហាក្សត្រ​ឡើងវិញ វា​មិន​ល្មើស​នឹង​ច្បាប់​នោះ​ទេ។ ប៉ុន្តែ​អ្នកវិភាគ​រូប​នេះ យល់​ឃើញ​ថា រឿង​ដែល​ពិបាក​បំផុត​នោះ នៅត្រង់​ការ​បកស្រាយ​អំពី​ខ្លឹមសារ​នៃ​ច្បាប់​នៅ​កម្ពុជា​សព្វថ្ងៃ​នេះ បាន​ក្លាយ​ជា​រឿង​ដែល​ស្មុគស្មាញ​ទៅ​ហើយ។

អ្នកវិភាគ​នយោបាយ​យល់​ឃើញ​ថា ការរិះគន់​គណបក្ស​ហ៊្វុនស៊ិនប៉ិច បើ​គិត​នៅ​លើ​បណ្ដាញ​សង្គម​ហ្វេសប៊ុក​សព្វ​ថ្ងៃ​នេះ​វិញ គឺ​ភាសា​គ្រោតគ្រាត​ជាង​នេះ​ទៅ​ទៀត។ ប៉ុន្តែ ដោយសារ​នេះ​ជា​ទិដ្ឋភាព​នយោបាយ ទោះ​រឿង​នោះ មាន​ទំហំ​ល្មម​អាច​បញ្ចប់​បាន ក៏​ប្រឹង​រុញ​សភាពការណ៍​បន្ថែម​ឲ្យ​ក្លាយ​ជា​បញ្ហា​ចាក់ស្រេះ​ដោះ​មិន​ចេញ​ដែរ ប្រយោជន៍​ដើម្បី​អំណាច។

អ្នកវិភាគ​ពន្យល់​ថា រដ្ឋាភិបាល​បើក​ឲ្យ​មាន​អំពើ​បែបនេះ គឺ​រដ្ឋាភិបាល​កំពុងតែ​ខ្លាច ស្រមោល​ខ្លួនឯង ហើយ​លែង​ទុកចិត្ត​គេឯង ក៏​បង្កើត​ឲ្យ​មាន​ប្រព័ន្ធ​តាមដាន​បែបនេះ ទោះបីជា​ការសន្ទនា​ឯកជន​ក្ដី ទង្វើ​ទាំងនេះ អ្នកវិភាគ​ចាត់​ទុក​ថា រដ្ឋាភិបាល​កំពុងតែ​ដឹកនាំ​ប្រទេស​ផ្ដាច់ការ ដែល​ធ្វើ​ឲ្យ​ប្រទេស​លែង​មាន​សន្តិសុខ និង​ប៉ះពាល់​ដល់​អ្នក​វិនិយោគ លែង​ហ៊ាន​មក​វិនិយោគ​នៅ​កម្ពុជា ដោយសារ​តែ​រដ្ឋាភិបាល​គ្រប់គ្រង​ប្រទេស បែប​អានាធិបតេយ្យ ប្រព័ន្ធ​អនុវត្ត​ច្បាប់​ស្ថិត​នៅ​ក្រោម​បញ្ជា​រដ្ឋាភិបាល បែបនេះ។

អតីត​តំណាងរាស្ត្រ​គណបក្ស​ហ៊្វុនស៊ិនប៉ិច អ្នកស្រី គឺ លំអង ត្រូវ​បាន​ហ្វេសប៊ុក ឈ្មោះ សីហា បញ្ចេញ​សារ​សន្ទនា ជាមួយ​លោក លឺ ឡាយស្រេង ជា​លើក​ទី​២​ទៀត កាលពី​ថ្ងៃ​ទី​២១ តុលា ក្រោយពេល​សារ​សន្ទនា​លើក​ទី​១ ត្រូវ​បាន​ប្រភព​ដែល​ស្និទ្ធ​នឹង​រដ្ឋាភិបាល​ទម្លាយ​ចេញ ហើយ​ចោទ លោក លឺ ឡាយស្រេង ថា ប្រមាថ​ព្រះមហាក្សត្រ។

ខ្សែ​អាត់​សំឡេង​សន្ទនា​តាម​ទូរស័ព្ទ​លើក​ទី​២​នេះ អ្នកស្រី គី លំអង សម្ដែង​ការភ័យខ្លាច ក្រោយ​ពី​គណនី​ហ្វេសប៊ុក​ឈ្មោះ សីហា លួច​ថត​សំឡេង ហើយ​យក​មក​ផ្សព្វផ្សាយ​ជាសាធារណៈ​ឥត​ក្រែង​រអា​ច្បាប់​អ្វី​ឡើយ។ អ្នកស្រី​ស្នើ​ឲ្យ​អតីត​សហការី ដែល​ជា​រៀមច្បង​របស់​ខ្លួន គឺ​លោក លឺ ឡាយស្រេង ចេញ​ឃ្លីប​វីដេអូ សុំទោស​ជា​សាធារណៈ ហើយ​ជួយ​ប្រាប់​ថា អ្នកស្រី​មិនបាន​ពាក់ព័ន្ធ​អ្វី​ទេ ផ្ទុយទៅវិញ អ្នកស្រី​បាន​កោត​សរសើរ​លោក ហ៊ុន សែន អំពី​ការ​អភិវឌ្ឍ គ្រាន់​តែ​លោក ហ៊ុន សែន ស្ដាប់​ពួក​អាម៉ីអាថោង តែប៉ុណ្ណោះ។

អាស៊ីសេរី​មិន​អាច​ទាក់ទង អ្នកស្រី គី លំអង ដើម្បី​សុំ​ការ​អត្ថាធិប្បាយ​ពី​ករណី​នេះ​បន្ថែម​បានទេ នៅ​ពី​ថ្ងៃ​ទី​២១ តុលា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

2 Responses to "លោក លឺ ឡាយស្រេង ប្រកាស​សុំ​ព្រះរាជទាន​លើក​លែង​ទោស​ពី​ព្រះមហាក្សត្រ"

  1. 😈omen😈 says:

    យើងនិងរកក្រុមមេធាវីដើម្បីប្ដឹង Facebook សីហា ទៅតុលាការក្រុងភ្នំពេញក្នុងពេលឆាប់ៗខាងមុខនេះពីបទរំលោភនិងការលួចស្ដាប់ភាពជាឯកជនរបស់អ្នកដ៏ទៃ។យើងស្គាល់ច្បាស់ថានរណាជាក្រុម សីហា គឺក្រុមរបស់ ហ៊ុន ម៉ាណែត ១០០%។

  2. ?? says:

    LY LAI SRENG has done nothing wrong he just worry about the major situation that can harm to his own nation. we Cambodian are also worry because this HUN SEN leadership is going to push this sad nation in a bloody situation. LY LAI SRENG and all Cambodian is having last solution is to ask the king to help solve this major problem that has happen. I also upset about the king that he was so quiet. in our constitution said the king is having his rule in any major problem when the country is in danger situation. what a point to be the king if he is not care about his own people . and also how can he be king if he have no country to live . I knew the party that leaded by RANARITH was not strong and also mistrust by Cambodian . too bad too late this royal family RANARITH was not strong enough to leaded the nation. instated he made his leadership broken a part and most of his supporter Khmer nationalist was murder by HUN SEN evil leader of this sad nation. after all Cambodian seem to be lost their trust to this royal family in peace maker for his own people. GOD bless Cambodia and it’s people

Leave a Reply

Submit Comment