ព្រះរាជពិធីបុណ្យអ៉ុំទូកចាប់ផ្តើមនៅថ្ងៃនេះ

ដោយ VOD Admin​​ | ថ្ងៃព្រហស្បតិ៍ ទី២ ខែវិច្ឆិកា ឆ្នាំ២០១៧​ | ម៉ោង 2:52 PM
http://vodhotnews.com

វប្បធម៌ | សង្គម


ព្រះរាជពិធីបុណ្យអ៉ុំទូក បណ្តែតប្រទីប អកអំបុក និងសំពះព្រះខែ ចាប់ផ្តើម​នៅ​ថ្ងៃ​ទី​២ ​ខែ​វិច្ឆិកា​នេះ រហូតដល់ថ្ងៃទី៤ ខែវិច្ឆិកា ឆ្នាំ២០១៧ ខណៈ​អាជ្ញាធរ​រាជធានីភ្នំពេញ រំពឹងថា នឹង​មាន​អ្នកចូលរួមជិត២លាននាក់។

ការចុះផ្សាយរបស់ទីភ្ងាក់ងារសារព័ត៌មានកម្ពុជា AKP កាលពីម្សិលមិញ ដែល​បាន​ស្រង់​សម្តី​គណៈកម្មាធិការជាតិរៀបចំបុណ្យជាតិ ឲ្យដឹងថា នៅក្នុងឆ្នាំ២០១៧ ចំនួនទូក «ង» ចូលរួម​ប្រណាំង កើនឡើងដល់២៧០ ខណៈនៅក្នុងឆ្នាំ២០១៦ មានតែ ២៥៧ទូក។

បើតាមគណៈកម្មាធិការជាតិរៀបចំបុណ្យជាតិអន្តរជាតិ នៅក្នុងចំណោមទូក «ង» ចំនួន២៧០ ទូក​អុំ​ផ្នែក​បុរសមានចំនួន១៦១ ទូកចែវបុរស២៦ ទូកខ្នាតអន្តរជាតិបុរសមានចំនួន៧៧ ទូកអុំនារី១ ទូកចែវនារី២ ទូកខ្នាតអន្តរជាតិនារី៣ និងអ្នកអុំទូកសរុប មានចំនួនជិត១៨ ០០០នាក់។ ហើយ ប្រទីបចំនួន១៣ និងត្រូវបង្ហាញនៅពេលយប់ អមជាមួយការបាញ់កាំជ្រួច។

រដ្ឋាភិបាល បានរៀបចំឲ្យមានពិធីបុណ្យអុំទូកនេះ ឡើងវិញនៅឆ្នាំ២០១៤ បន្ទាប់ពី​ខកខាន៣ឆ្នាំជាប់ៗគ្នា ក្រោយមានព្រឹត្តិការណ៍ស្លាប់ជាន់គ្នាកាលពីឆ្នាំ២០១០។ ដោយឡែក ក្នុងឆ្នាំ២០១៥ លោកនាយករដ្ឋមន្ដ្រី ហ៊ុន សែន បាន​ប្រកាស​​ផ្អាកបុណ្យនេះម្ដងទៀត ដោយលើកហេតុផលថា ​ទឹកទន្លេមានកម្ពស់ទាបពេក ខណៈអ្នកតាមដានសង្គមយល់ថា អាជ្ញាធរមានការភ័យខ្លាច ក្រែងមានក្បួនបាតុកម្មប្រឆាំងរដ្ឋាភិបាលណាមួយ។

យ៉ាងណាមិញ រដ្ឋាភិបាលបានអនុញ្ញាតឲ្យមានពិធីបុណ្យជាតិនេះឡើងវិញ នៅក្នុង​ឆ្នាំ​២០១៦ និងឆ្នាំ២០១៧នេះ។

ពលរដ្ឋខ្មែរ តែងរៀបចំពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅតាមតំបន់ ឬភូមិឋាន ដែលខ្លួនរស់នៅ ខណៈពិធីបុណ្យនេះ គឺជាបុណ្យប្រពៃណីជាតិ ដែល​​មាន​តាំង​ពី​បរមបុរាណ ហើយក៏មានចែងផងដែរ នៅក្នុងឯកសាររបស់ប្រវត្តិវិទូបរទេស ក៏ដូច​ជាតាមសិលា ចារឹកនៃប្រាសាទអង្គរ៕

សរសេរមកកាន់ VOD Admin តាមរយៈ vodadmin@vodhotnews.com

What Next?

Recent Articles

One Response to "ព្រះរាជពិធីបុណ្យអ៉ុំទូកចាប់ផ្តើមនៅថ្ងៃនេះ"

  1. 😈omen😈 says:

    មហាជនខ្មែរលោកខ្ពើមនិងការចូលរួមជាមួយពួកអាតិរិច្ឆានដឹងនាំប្រទេសនេះខ្លាំងណាស់ទុកអោយក្រុមវាធ្វើតែវាចុះ។មហាជនលោកទុកកម្លាំងធ្វើបាតុកម្មពេលក្រោយពេលពួកអាតិរិច្ឆានវារំលាយបក្សប្រឆាំង។

Leave a Reply

Submit Comment