“ការ​ធ្វើទុក្ខបុកម្នេញ​ផ្នែក​នយោបាយ​លើ​បក្ស​ប្រឆាំង​ជា​ធាតុ​ផ្សំ​បទល្មើស​នៅ​តុលាការ ICC”

ដោយ មួង ណារ៉េត
2017-11-03
អាស៊ីសេរី

ស្ដាប់ ឬ​ទាញ​យក​សំឡេង
ស្តាប់សំឡេងថតសំឡេង

មេធាវី​អង់គ្លេស លោក រីឆាត រ៉ូជើរ (Richard Rogers) នៃ​ក្រុមហ៊ុន​មេធាវី គ្លបល ឌីលីជេនស៍ (Global Diligence) ផ្ដល់​បទសម្ភាសន៍​ដល់​វិទ្យុ​អាស៊ីសេរី នា​បន្ទប់​ផ្សាយ​រដ្ឋធានី​វ៉ាស៊ីនតោន សហរដ្ឋ​អាមេរិក កាល​ពី​ថ្ងៃ​ទី​១៨ ខែ​មករា ឆ្នាំ​២០១៥។ RFA/Yun Samean
មេធាវី​អង់គ្លេស លោក រីឆាត រ៉ូជើរ (Richard Rogers) នៃ​ក្រុមហ៊ុន​មេធាវី គ្លបល ឌីលីជេនស៍ (Global Diligence) ផ្ដល់​បទសម្ភាសន៍​ដល់​វិទ្យុ​អាស៊ីសេរី នា​បន្ទប់​ផ្សាយ​រដ្ឋធានី​វ៉ាស៊ីនតោន សហរដ្ឋ​អាមេរិក កាល​ពី​ថ្ងៃ​ទី​១៨ ខែ​មករា ឆ្នាំ​២០១៥។ RFA/Yun Samean


អ្នក​ច្បាប់​អន្តរជាតិ ចាត់​ទុក​អំពើ​នៃ​ការ​ធ្វើទុក្ខបុកម្នេញ​ផ្នែក​នយោបាយ​មក​លើ​បក្ស​សង្គ្រោះ​ជាតិ ពី​សំណាក់​រដ្ឋាភិបាល​លោក ហ៊ុន សែន ថា​គឺ​ជា​ធាតុ​ផ្សំ​គ្រប់គ្រាន់​នៃ​បទល្មើស​ប្រឆាំង​មនុស្ស​ជាតិ ដែល​តុលាការ​ព្រហ្មទណ្ឌ​អន្តរជាតិ (ICC) មាន​ដែន​សមត្ថកិច្ច​ដើម្បី​ចាត់ការ​បាន។ ប៉ុន្តែ មន្ត្រី​នាំ​ពាក្យ​រដ្ឋាភិបាល​ថា តុលាការ​អន្តរជាតិ គ្មាន​សិទ្ធិ​អំណាច​លើ​តុលាការ​កម្ពុជា បាន​នោះ​ទេ។

មេធាវី​ជនជាតិ​អង់គ្លេស លោក រីឆាត រ៉ូជើរ (Richard Rogers) ដែល​ទើប​តែ​ជួប​ព្រះរាជអាជ្ញា​រង​នៃ​តុលាការ​ព្រហ្មទណ្ឌ​អន្តរជាតិ កាល​ពី​ខែ​មុន ប្រាប់​អាស៊ីសេរី កាល​ពី​ថ្ងៃ​ទី​២ ខែ​វិច្ឆិកា ថា​ភស្តុតាង​នៃ​ការ​ប្រព្រឹត្តិ​រំលោភសិទ្ធិ​មនុស្ស និង​ប្រជាធិបតេយ្យ​នៅ​កម្ពុជា ពី​សំណាក់​មន្ត្រី​បក្ស​កាន់​អំណាច​មក​លើ​សំឡេង​ប្រឆាំង កាន់​តែ​បង្ហាញ​ឲ្យ​ឃើញ​ច្បាស់ និង​កើន​ឡើង​ច្រើន​ជាង​មុន សម្រាប់​ជា​មូលដ្ឋាន​ពិចារណា​របស់​តុលាការ​អន្តរជាតិ៖ «បទឧក្រិដ្ឋ​ជា​ច្រើន​ពាក់ព័ន្ធ​នឹង​ការ​បង្ក្រាប​បក្ស​ប្រឆាំង​ក្នុង​ពេល​ថ្មីៗ​នេះ គឺ​ជា​ធាតុ​ផ្សំ​នៃ​បទល្មើស​ក្នុង​ចំណាត់​ថ្នាក់​ឧក្រិដ្ឋកម្ម​ប្រឆាំង​មនុស្ស​ជាតិ។ បើ​យើង​ពិនិត្យ​មើល​បទឧក្រិដ្ឋ​ដែល​ផ្សំ​បញ្ចូល​គ្នា​តាំង​ពី​ការ​បណ្ដេញ​ពលរដ្ឋ​ពី​លំនៅឋាន ការ​ធ្វើ​ទុក្ខបុកម្នេញ​លើ​អ្នក​ប្រឆាំង ការ​ធ្វើ​ឃាត​អ្នក​ដែល​ហ៊ាន​និយាយ​រិះគន់​រដ្ឋាភិបាល និង​ការ​ចាប់​ខ្លួន និង​ដាក់​ពន្ធនាគារ​សកម្មជន​បក្ស​ប្រឆាំង ដែល​ទាំង​អស់​ជា​ឧក្រិដ្ឋកម្ម​ធ្ងន់ធ្ងរ​ដែល​ស្ថិត​ក្នុង​ប្រភេទ​នៃ​ឧក្រិដ្ឋកម្ម​ប្រឆាំង​មនុស្ស​ជាតិ។ ទាំង​នេះ​ឯង​ហើយ ដែល​តុលាការ​ព្រហ្មទណ្ឌ​អន្តរជាតិ ICC មាន​យុត្តាធិការ​លើ​អ្វី​ដែល​កំពុង​កើត​ឡើង​នៅ​ប្រទេស​កម្ពុជា»

លោក រីឆាត រ៉ូជើរ លើក​ឡើង​បន្ថែម​ថា រឿង​ក្ដី​ដែល​តុលាការ​ព្រហ្មទណ្ឌ​អន្តរជាតិ អាច​ពិចារណា គឺ​រួម​មាន​ករណី​ដូច​អ្វី​ដែល​កំពុង​កើត​មាន​នៅ​កម្ពុជា ដែល​ក្រុម​អ្នក​មាន​អំណាច​ជិះជាន់​សង្កត់​សង្កិន និង​ធ្វើ​បាប​អ្នក​ប្រឆាំង​ទោះ​ក្នុងតម្លៃ​ណា​ក៏ដោយ ដើម្បី​បន្ត​ក្រាញ​អំណាច។ លោក​អះអាង​ថា ការ​ធ្វើ​ទុក្ខបុកម្នេញ​នេះ កំពុង​តែ​បង្កើន​សន្ទុះ​យ៉ាង​ខ្លាំង​រហូត​ដល់​រដ្ឋាភិបាល​បណ្ដេញ​អង្គការ​សង្គម​ស៊ីវិល បិទ​ប្រព័ន្ធ​ផ្សព្វផ្សាយ​ឯករាជ្យ និង​ប៉ុនប៉ង​រម្លាយ​គណបក្ស​ប្រឆាំង​ចោល​ទាំង​ស្រុង ដែល​ស្ដែង​ឲ្យ​ឃើញ​អំពី​គោលបំណង​របស់​គណបក្ស​ប្រជាជន​កម្ពុជា ក្នុង​ការ​ដឹកនាំ​ប្រទេស​កម្ពុជា តាម​បែប​ឯកបក្ស និង​ផ្តាច់ការ​ដ៏​សាហាវ​បំផុត។

រឿង​ដែល​សំខាន់​មួយ​ទៀត​ដែល​លោក រីឆាត រ៉ូជើរ មើល​ឃើញ​ថា តម្រូវ​ឲ្យ​តុលាការ​ព្រហ្មទណ្ឌ​អន្តរជាតិ ធ្វើ​អន្តរាគមន៍​ដែរ​នោះ គឺ​ដោយសារ​សហគមន៍​អន្តរជាតិ និង​ពលរដ្ឋ​ខ្មែរ​នៅ​ក្រៅ​ប្រទេស​បាន​បន្ត​ថ្កោលទោស​ទង្វើ​របស់​រដ្ឋាភិបាល​កម្ពុជា ពាក់ព័ន្ធ​នឹង​ការ​យក​ប្រព័ន្ធ​តុលាការ​មក​ធ្វើ​ជា​ឧបករណ៍​បម្រើ​នយោបាយ​បក្ស​កាន់​អំណាច។

លោក​បញ្ជាក់​ថា នៅ​ពេល​ប្រព័ន្ធយុត្តិធម៌​ជាតិ មិន​អាច​បំពេញមុខ​ងារ​ក្នុង​ការ​ថែរក្សា និង​ការពារ​យុត្តិធម៌​ជូន​ប្រជាពលរដ្ឋ​ខ្លួន​ឯង​បាន គឺ​ទាល់​តែ​អន្តរជាតិ​ជួយ៖ «នៅ​ក្នុង​ប្រទេស​កម្ពុជា សព្វ​ថ្ងៃ​នេះ កុំ​សង្ឃឹម​សូម្បី​តែ​ប៉ុន​សរសៃ​សក់ ថា​នឹង​មាន​យុត្តិធម៌​ចំពោះ​ឧក្រិដ្ឋកម្ម​នៃ​ការ​ធ្វើទុក្ខបុកម្នេញ​មក​លើ​សំឡេង​ប្រឆាំង​ឲ្យ​សោះ ព្រោះ​អី​រដ្ឋាភិបាល​មាន​ឥទ្ធិពល​បញ្ជា​លើ​ប្រព័ន្ធ​តុលាការ។ តុលាការ​កម្ពុជា លែង​មាន​មុខងារ​បម្រើ​ប្រជាពលរដ្ឋ​ខ្មែរ​ទូទៅ​បាន។ តុលាការ​កម្ពុជា ជា​តុលាការ​បម្រើ​បក្ស​កាន់​អំណាច ហើយ​ចៅក្រម និង​ព្រះរាជអាជ្ញា​សុទ្ធតែ​ជា​តួអង្គ​ដែល​ជាប់​ពាក់ព័ន្ធ​នៅ​ក្នុង​ការ​ប្រព្រឹត្ត​ឧក្រិដ្ឋ​រួម​នេះ»

​តុលាការ​ព្រហ្មទណ្ឌ​អន្តរជាតិ ជា​តុលាការ​អចិន្ត្រៃយ៍​អន្តរជាតិ ដែល​មាន​សមត្ថកិច្ច​ស៊ើប​អង្កេត និង​ផ្ដន្ទាទោស​អ្នក​ដែល​ជាប់​ចោទ​ពី​បទ​ប្រព្រឹត្ត​ឧក្រិដ្ឋកម្ម​ធ្ងន់ធ្ងរ រួមមាន​ឧក្រិដ្ឋកម្ម​ប្រឆាំង​មនុស្ស​ជាតិ។ ធាតុ​ផ្សំ​មួយ​ក្នុង​បទឧក្រិដ្ឋ​ប្រឆាំង​មនុស្សជាតិ គឺ​ការ​ធ្វើ​ទុក្ខបុកម្នេញ​ផ្នែក​នយោបាយ ដូចជា​ការ​ធ្វើ​បាប​បក្ស​ប្រឆាំង​នេះ​ជាដើម។

ទោះ​ជា​យ៉ាង​នេះ​ក្តី មន្ត្រី​រដ្ឋាភិបាល​យល់​ឃើញ​ថា អ្វី​ដែល​ជា​ចំណាត់ការ​របស់​រដ្ឋាភិបាល​កម្ពុជា មក​លើ​សំឡេង​ប្រឆាំង គឺ​ជា​កិច្ចការ​ផ្ទៃក្នុង​របស់​កម្ពុជា។ មន្ត្រី​នាំពាក្យ​រដ្ឋាភិបាល លោក ផៃ ស៊ីផាន អះអាង​ការពារ​ចំណាត់ការ​ទាំង​នេះ ថា​ជា​ការ​ត្រឹមត្រូវ និង​មិន​អាច​ឲ្យ​អន្តរជាតិ​មក​ជ្រៀត​ជ្រែក​បាន​ឡើយ៖ «ករណី​របស់​ផ្ទៃក្នុង​របស់​កម្ពុជា​ទេ មិន​មែន​ជា​រឿង​ស្ថិត​នៅ​ក្នុង​ដែន​យុត្តាធិការ​របស់​អន្តរជាតិ​ទេ។ កម្ពុជា តុលាការ​គឺ​វិនិច្ឆ័យ​ក្នុង​ផលប្រយោជន៍​កម្ពុជា។ កម្ពុជា​នៅ​តែ​គោរព និង​ឲ្យ​តម្លៃ​តុលាការ ជា​តុលាការ​របស់​កម្ពុជា អនុវត្ត វិនិច្ឆ័យ​ក្ដី​ទៅ​តាម​ច្បាប់ និង​អង្គ​សេចក្ដី​នៅ​ក្នុង​កម្ពុជា»

ចំណែក​ឯ​ក្រុម​​មេធាវី​ការពារ​ក្ដី​លោក កឹម សុខា គឺ​លោក ហែម សុជាតិ ក៏​សម្លឹង​មើល​ឃើញ​​តុលាការ​ព្រហ្មទណ្ឌ​អន្តរជាតិ ដែល​អាច​​ជួយ​អន្តរាគមន៍​ផង​ដែរ ប្រសិនបើ​កូន​ក្ដី​របស់​ពួកគាត់​នៅ​តែ​រង​ភាព​អយុត្តិធម៌​ដោយ​ប្រព័ន្ធតុលាការ​ជាតិ និង​បក្ស​កាន់​អំណាច​ដូច​សព្វថ្ងៃ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

3 Responses to "“ការ​ធ្វើទុក្ខបុកម្នេញ​ផ្នែក​នយោបាយ​លើ​បក្ស​ប្រឆាំង​ជា​ធាតុ​ផ្សំ​បទល្មើស​នៅ​តុលាការ ICC”"

  1. people says:

    Mr veitcong mafia dictator(hun-sen) is the real criminal’ and we can’t count of his criminals’.Since he went to marky forest and become a veitcong dog ‘he start to killed khmer since then ‘even in pol-pot ‘ he killed alot of cham people in kampong cham ‘ after he run to enemy he bring veitcong to invade cambodia and the veitcong rob everything from cambodia so veitcong and his government take cambodian people as hostage then ask the aid from international but cambodian people still victim till now his crimes so much we can’t count them .At the moment no body or even international can do anything because veitcong spy protect him only international or U s pressure veitcname and china ‘then probably cambodian people have hope. GOD bless all cambodian people’

  2. xxx says:

    បានត្រឹមតែថា បានត្រឹមតែនិយាយ​ បានត្រឹមតែព្រមាន និងបានត្រឹមតែថ្កោលទោសតែប៉ុណ្ណោះ អត់ឃើញបានជាការអីផង

  3. ?? says:

    it time for international community showing their powers to this ugly evil HUN SEN. international action should start any day in this month should not let it go too late. please do it right now in order to have Cambodian gain their respecting to world community. if not all these people will never believing in DEMOCRACY any more. GOD bless Cambodian

Leave a Reply

Submit Comment