តំណាង​រាស្ត្រ​បក្ស​ប្រឆាំង ប្ដេជ្ញា​រក្សា​និង​ការពារ​រចនាសម្ព័ន្ធ​បក្ស

ដោយ អ៊ឹម រចនា
08/11/2017
RFI

media
អ្នក​គាំទ្រ​គណបក្ស​សង្គ្រោះ​ជាតិ លើក​ទង់​គណបក្ស​បក្ស​និង​ទង់​ជាតិ​ខ្មែរ នៅ​ក្នុង​ការ​ឃោសនា​បោះ​ឆ្នោត​ក្រុម​ប្រឹក្សា​ឃុំ​សង្កាត់​នា​ពេល​កន្លង​មក (REUTERS)


តំណាង​រាស្ត្រ​បក្ស​ប្រឆាំង​ចំនួន​៤៣​រូប បាន​ចេញ​សេចក្ដី​ថ្លែងការណ៍​មួយ នៅ​ថ្ងៃ​ពុធ​នេះ ប្ដេជ្ញា​រក្សា​និង​ការពារ​រចនាសម្ព័ន្ធ​បក្ស បើ​ទោះ​បី​ជា​សព្វ​ថ្ងៃ​នេះ គណបក្ស​សង្គ្រោះ​ជាតិ​ត្រូវ​រងការ​ គម្រាមជា​រៀងរាល់​ថ្ងៃ ថា​នឹងត្រូវ​​រំលាយ​ចោល​ក៏​ដោយ​។ នៅ​ក្នុង​សេចក្ដី​ថ្លែងការណ៍​ដដែល​នេះ តំណាង​រាស្ត្រ​បក្ស​ប្រឆាំង ក៏​ទាមទារ​ឲ្យ​រដ្ឋ​អំណាច​ដោះ​លែង​លោក កឹម សុខា ដែល​ជា​ប្រធាន​បក្ស ព្រម​ទាំង​អ្នក​នយោបាយ​ដទៃ​ទៀត​ផង​ដែរ​។

សេចក្ដី​ថ្លែងការណ៍​កម្រាស់​៤​ទំព័រ​របស់​អ្នក​តំណាង​រាស្ត្រ​បក្ស​សង្គ្រោះ​ជាតិ ចាប់​ផ្ដើម​ដោយ​ការ​ប្ដេជ្ញា​ចិត្ត​រក្សា​ខ្ជាប់​នូវ​ឧត្តម​គតិ​គណបក្ស​សង្គ្រោះ​ជាតិ មិន​ក្បត់​ឆន្ទៈ​រាស្ត្រ។ ប្ដេជ្ញា​រក្សា​ការពារ​រចនាសម្ព័ន្ធ​ថ្នាក់​ដឹក​នាំ​គណបក្ស​សង្គ្រោះ​ជាតិ ដែល​មាន​លោក កឹម សុខា ជា​ប្រធាន​បក្ស អម​ដោយ​អនុ​ប្រធាន​៣​រូប គឺ​លោក ប៉ុល ហំម, លោក​ស្រី មួរ សុខហួរ, និង​លោក អេង ឆៃអ៊ាង ខណៈ​លោក សុន ឆ័យ នៅ​តែ​រក្សា​តំណែង​ជា​ប្រធាន​ក្រុម​តំណាង​រាស្ត្រ​បក្ស​ប្រឆាំង​ដដែល​។

ក្រៅ​ពី​នោះ ក៏​មាន​ផង​ដែរ ការ​​ទាមទារ​ឲ្យ​រដ្ឋ​អំណាច​ដោះលែង​លោក កឹម សុខា និង​អ្នក​ទោស​នយោបាយ​ដទៃ​ទៀត ហើយ​បញ្ឈប់​ការ​គំរាម​កំហែង​បំភិត​បំភ័យលើ​ថ្នាក់​ដឹក​នាំ​បក្ស​ប្រឆាំង ព្រម​ទាំង​សកម្មជន​សិទ្ធិ​មនុស្ស​និង​សកម្មជន​ដីធ្លី បរិស្ថាន​ដទៃ​ទៀត​។ លើស​ពីនេះ ក្រុម​អ្នក​តំណាង​រាស្ត្រ​ក៏​ទាមទារ ​ឲ្យ​រដ្ឋ​អំណាច​ផ្ដល់​សិទ្ធិ​សេរីភាព​ពេញលេញ​ជូន​ប្រជារាស្ត្រ ដូច​មាន​ចែង​ក្នុង​រដ្ឋធម្មនុញ្ញ ព្រម​ទាំង​ច្បាប់​ជាតិ​និង​អន្ដរជាតិ ដែល​កម្ពុជា​បាន​ចុះ​ហត្ថលេខា​។ អ្នក​តំណាង​រាស្ត្រ​បក្ស​ប្រឆាំង បញ្ជាក់​ពី​ជំហរ​របស់​ខ្លួនទៀត​ថា សង្គ្រោះ​ជាតិ​នៅ​តែ​ជំរុញ​ឲ្យ​មាន​ការ​ផ្លាស់​ប្ដូរ​ដោយ​សន្តិវិធី​តាម​បែប​ប្រជាធិបតេយ្យ ហើយ​ទាមទារ​ឲ្យ​មាន​ការ​បោះ​ឆ្នោត​ដោយ​សេរី​និង​យុត្តិធម៌ នៅ​ខែ​កក្កដា ឆ្នាំ​២០១៨​ខាង​មុខ​។

នៅ​ក្នុង​សេចក្ដី​ថ្លែងការណ៍​ដដែល តំណាង​រាស្ត្រ​៤៣​រូប​របស់​បក្ស​ប្រឆាំង​រួម​មាន​ទាំង​លោក ម៉ៅ មុនីវណ្ណ ដែល​ធ្លាប់​រង​ការ​ចោទ​ប្រកាន់​ថា​ក្បត់​បក្ស​ផង បានបន្ត​អំពាវនាវ​ឲ្យ​អ្នក​គាំទ្រ​​និង​សមាជិក​របស់​ខ្លួន​គ្រប់​ជាន់​ថ្នាក់​ទូទាំង​ប្រទេស រក្សា​ជំហរ​របស់​ខ្លួន។ ពោល​គឺ​ បក្ស​ប្រឆាំង ចង់​ឲ្យ​ម្នាក់​ៗ​ត្រូវ​ស្មោះ​ត្រង់ កុំ​ជឿ​តាម​ការ​ឃោសនា​របស់​បក្ស​ផ្សេង ឲ្យ​ក្បត់​ឧត្តម​គតិ និង​ក្បត់​ឆន្ទៈ​រាស្ត្រ​ដែល​បោះ​ឆ្នោតឲ្យ​។

សម្រាប់​តំណាងរាស្ត្រ​គណបក្ស​សង្គ្រោះ​ជាតិ ដរាប​ណា​សមាជិក​បក្ស​ទាំង​អស់​នៅ​តែ​រក្សា​ជំហរ​រឹង​មាំ នោះ​ស្ថានការណ៍​នយោបាយ​នឹង​ធូរ​ស្រាល​ឡើង​វិញ បន្ទាប់​ពីមាន​អន្តរាគមន៍​ដ៏​ខ្លាំងក្លា​ពី​សហគមន៍​អន្ដរជាតិ។ ការ​អន្តរាគមន៍​ពី​សហគមន៍​អន្ដរជាតិ ដែល​អ្នក​តំណាង​រាស្ត្រ​បក្ស​ប្រឆាំង​យល់​ឃើញ​ថា នឹង​ធ្វើ​ឲ្យ​ការ​ទាមទារ​ទាំង​អម្បាលម៉ាន​របស់​ខ្លួន បាន​សម្រេច​នៅ​ក្នុង​រយៈ​ពេល​ដ៏​ខ្លី​ខាង​មុខ​៕

What Next?

Related Articles

One Response to "តំណាង​រាស្ត្រ​បក្ស​ប្រឆាំង ប្ដេជ្ញា​រក្សា​និង​ការពារ​រចនាសម្ព័ន្ធ​បក្ស"

  1. people says:

    Bravo’ all brothers&sisters’we must fight with the communist ‘ . The communist or dictator never good to people ‘and we have been through already ‘ we lost 3 million and lost land,sea area and now we lost our right’ and living in the un-justice ‘like we living in the cage of veitcong mafia dictator .Cambodian people must get out from thid beast regime and slave of mafia group. GOD bless all cambodian people’