គ.ជ.ប​​ ប្រាប់​​បក្ស​នយោបាយ​៦ឲ្យ​​ផ្តល់​ព័ត៌មាន​​ចាំបាច់​​ដើម្បី​​យក​ទៅ​​បែងចែក​​អាសនៈ​​បក្ស​​សង្គ្រោះ​ជាតិ​

ដោយ វណ្ណ សុគន្ធា
19/11/2017
RFI

media
​គ.ជ.ប.


គណៈកម្មាធិការ​ជាតិ​រៀបចំ​ការបោះឆ្នោត(គ.ជ.ប) កាលពី​ថ្ងៃទី១៨ វិ​ចិ្ឆ​កា​ម្សិលមិញ បានចេញ​សេចក្តីជូនដំណឹង​ដល់​គណបក្ស​ក្រៅ​រដ្ឋសភា​ចំនួន៦ ឲ្យ​ផ្តល់ព័ត៌មាន​ចាំបាច់​មួយចំនួន ដើម្បី​ខ្លួន​យកទៅ​ចាត់ចែង​អនុវត្ត​បែងចែក​អាសនៈ​គណបក្ស​សង្គ្រោះ​ជាតិ ដែល​ទើបតែ​ត្រូវបាន​រំលាយចោល។ ចំណាត់ការ​របស់​គ.ជ.ប​នេះ ធ្វើឡើង​រំលង​តែ​ពីរ​ថ្ងៃ​ប៉ុណ្ណោះ​ក្រោយពី​តុលាការ​កំពូល​កម្ពុជា​បានសម្រេច​រំលាយចោល​គ​ណ​បក្សប្រឆាំង​កាលពី​ថ្ងៃ​ព្រហស្បតិ៍។

គណបក្សនយោបាយ​ទាំង៦ដែលមាន​សិទ្ធិ​ទទួលបាន​កៅអី​សភា​របស់​គណបក្ស​សង្គ្រោះ​ជាតិ​នោះ រួមមាន​គណបក្ស​ហ្វ៊ុនស៊ិនប៉ិច គណបក្ស​សម្ព័ន្ធ​ដើម្បី​ប្រជាធិបតេយ្យ គណបក្ស​ខ្មែរ​អភិវឌ្ឍ​សេដ្ឋកិច្ច គណបក្ស​ខ្មែរ​ឈប់​ក្រ គណបក្ស​សញ្ជាតិ​កម្ពុជា និង​គណបក្ស​សាធារណរដ្ឋ​ប្រជាធិបតេយ្យ។ គណបក្សនយោបាយ​ទាំងនេះ សុទ្ធតែ​បាន​ចូលរួម​ការប្រកួតប្រជែង​ការបោះឆ្នោត​ជ្រើសរើស​តំណាងរាស្ត្រ​នៅក្នុង​ឆ្នាំ២០១៣ តែ​មិនបាន​ជាប់​សូម្បី​តែមួយ​កៅអី​ឡើយ។

ក្នុងចំណោម​គណបក្ស​ទាំង៦នេះ គណបក្ស​យ៉ាងហោចណាស់​ចំនួន៣ សុទ្ធតែ​ធ្លាប់បាន​ប្រកាស​ទទួលយក​អាសនៈ​របស់​គណបក្ស​ស​ង្គ្រោះ​ជាត​តាំងតែ​ពីមុន​គណបក្សប្រឆាំង​ដ៏​ធំជាងគេ​នៅ​កម្ពុ​ជាមួយនេះ​ត្រូវបាន​តុលាការ​កំពូល​សម្រេច​រំ​លាយ​ចោល។ គណបក្ស​ទាំងបី​នោះ​រួមមាន គណបក្ស​រាជានិយម​ហ្វ៊ុនស៊ិនប៉ិច​របស់​សម្តេច​ក្រុម​នរោត្តម រណឫទ្ធិ គណបក្ស​សញ្ជាតិ​កម្ពុជា និង គណបក្ស​ខ្មែរ​អភិ​វ​ឌ្ឈ​សេដ្ឋកិច្ច។

បើទោះបីជា​យ៉ាងណាក៏ដោយ ក៏មាន​គណបក្សនយោបាយ​យ៉ាងហោចណាស់​ចំនួន​ពីរ​ដែរ គឺ​គណបក្ស​ខ្មែរ​ឈប់​ក្រ និង​គណបក្ស​សម្ព័ន្ធ ដើម្បី​ប្រជាធិបតេយ្យ​ដែល​ធ្លាប់​ប្រកាស​មិន​ទទួលយក​អាសនៈ​គណបក្ស​សង្គ្រោះ​ជាតិ ។ សម្រាប់​គណបក្ស​ខ្មែរ​ឈប់​ក្រ លោក​ក្រវ៉ា​ញ ដា​រ៉​ន ដែលជា​ប្រធាន​បក្ស​ធ្លាប់​អះអាងថា ការទទួលយក​អាសនៈ​បក្សប្រឆាំង​ជា​រឿង​គ្មាន​ន័យ និង​អយុត្តិធម៌​សម្រាប់​បក្សប្រឆាំង។ ចំណែក​គណបក្ស​សម្ព័ន្ធ ដើម្បី​ប្រជាធិបតេយ្យ​វិញ លោក​ខឹម វាសនា ដែលជា​ប្រមុខ​ធ្លាប់បាន​គូសបញ្ជាក់​ឲ្យ​ដឹង​ពី​ហេតុផល​ថា ដោយសារតែ​លោក​មិន​ឲ្យ​តម្លៃ​ទៅលើ​អាសនៈ​ទាំងនោះ។ លោក​ខឹម វាសនា លើកឡើងថា ពលរដ្ឋ​អ្នកបោះឆ្នោត​ទាំងនោះ​គ្មាន​តំលៃ​បន្តិច​ណា​សោះ​ដែល​សក្តិសម​នឹង​លោក​ធ្វើ​តំណាង​ឲ្យ​ពួកគាត់។

ដោយឡែក​គណបក្ស​សាធារណរដ្ឋ​ប្រជាធិបតេយ្យ​វិញ ហាក់​មិនទាន់​ច្បាស់លាស់​នៅឡើយ​ចំពោះ​ការទទួលយក​ឬ​មិន​ទទួលយក​អាសនៈ​គណបក្សប្រឆាំង។ លោក​ចាន់ យ៉េត ប្រធានស្តីទី​គណបក្ស​នេះ បានបញ្ជាក់​ប្រាប់​វិទ្យុ​បារាំង​អន្តរជាតិ​នៅ​ថ្ងៃអាទិត្យ​នេះ​ថា គណបក្ស​ត្រូវការ​ប្រជុំពិភាក្សា​ជាមួយ​គណៈកម្មាធិការ​នា​យក​សិន​មុននឹង​សម្រេច​បែបណា​នោះ។ បើតាម​លោក​ចាន់ យ៉េត ការសម្រេច​យ៉ាងណា​របស់​គណបក្ស​នឹង​ប្រកាស​ឲ្យ​ដឹង​នៅ​អំឡុង​សប្តាហ៍​ក្រោយនេះ។

សូមបញ្ជាក់ថា ការបែងចែក​អាសនៈ​គណបក្ស​សង្គ្រោះ​ជាតិ​ដែល​ទើប​ត្រូវបាន​រំលាយចោល​នេះ គឺ​អនុវត្ត​ទៅតាម​ច្បាប់​ស្តីពី​ការបោះឆ្នោត​ជ្រើសតាំង​តំណាងរាស្ត្រ​ដែល​ត្រូវបាន​រដ្ឋសភា​ខ្មែរ​មានតែ​តំណាងរាស្ត្រ​គណបក្ស​ប្រជាជន​កម្ពុជា​ធ្វើ​វិសោធនកម្ម មុន​ការរំលាយ​គណ​ក្ស​សង្គ្រោះ​ជាតិ​បន្តិច។ បើតាម​ច្បាប់​ថ្មី​នេះ គឺ គណៈកម្មាធិការ​ជាតិ​រៀបចំ​ការបោះឆ្នោត ត្រូវធ្វើ​ការបែងចែក​អាសនៈ​ដែល​នៅ​ទំនេរ​ក្នុង​រយៈពេល​យ៉ាងយូរ៧ថ្ងៃ​ទៅ​ឲ្យ​គណបក្ស​នានា​ដែល​បាន​ចូលរួម​ក្នុងការ​បោះឆ្នោត​ដោយ​មិន​គិត​បញ្ចូល​គណបក្សនយោបាយ​ដែល​បោះបង់ចោល​អាសនៈ ឬ​ដែល​ត្រូវ​លុបឈ្មោះ​ចេញពី​បញ្ជី​គណបក្សនយោបាយ ឬ​ដែល​ត្រូវ​រំលាយ​និង​គណបក្សនយោបាយ​មាន​អាសនៈ​ក្នុង​រដ្ឋសភា​ដែល​ដឹកនាំ​ដោយ​រាជរដ្ឋាភិបាល៕

What Next?

Recent Articles

One Response to "គ.ជ.ប​​ ប្រាប់​​បក្ស​នយោបាយ​៦ឲ្យ​​ផ្តល់​ព័ត៌មាន​​ចាំបាច់​​ដើម្បី​​យក​ទៅ​​បែងចែក​​អាសនៈ​​បក្ស​​សង្គ្រោះ​ជាតិ​"

  1. people says:

    We can’t understand why this NEC accepted all parties that get from the robber?? What kind of this NEC?? this NEC is just the tool of this beast regime ‘they should not accept this case because all seats are belong to CNRP so this NEC are the robber too followed their master haha’.What kind of this country??? All system are controlled by veitcong mafia dictator and his groups ‘strange country in the world’ after two P-M and two minister now rob all the opposition seats and distribute to all small party ‘What a shame ‘ .GOD will punish all bad people bad parties who rob the CNRP seats . GOD bless all cambodian people ‘

Leave a Reply

Submit Comment