ដោយ មួង ណារ៉េត
2017-12-06
RFA
ស្ដាប់ ឬទាញយកសំឡេង
គេហទំព័រក្រសួងការបរទេសសហរដ្ឋអាមេរិក។ Screenshot
ក្រសួងការបរទេសសហរដ្ឋអាមេរិក ប្រកាសបិទទិដ្ឋាការ ឬ វីសា ចំពោះមន្ត្រីរដ្ឋាភិបាលកម្ពុជា ទាំងឡាយណាដែលចូលដៃក្នុងការបំផ្លាញលទ្ធិប្រជាធិបតេយ្យ និងសិទ្ធិមនុស្សនៅកម្ពុជា។
មន្ត្រីនាំពាក្យក្រសួងការបរទេស អ្នកស្រី ហឹតឌើ ណៅអឹត (Heather Nauert) បញ្ជាក់នៅក្នុងសេចក្ដីថ្លែងការណ៍នៅថ្ងៃទី៦ ខែធ្នូ នេះថា ចំណាត់ការជាក់ស្តែង និងដ៏ម៉ឺងម៉ាត់នេះ គឺជាការឆ្លើយតបដោយផ្ទាល់ទៅនឹងចំណាត់ការរបស់រដ្ឋាភិបាលកម្ពុជា ដែលប្រព្រឹត្តផ្ទុយទៅនឹងគោលការណ៍ប្រជាធិបតេយ្យ និងគោលការណ៍សិទ្ធិមនុស្ស ដោយសារការធ្វើទុក្ខបុកម្នេញលើគណបក្សប្រឆាំងដូចជាការហាមឃាត់ថ្នាក់ដឹកនាំគណបក្សសង្គ្រោះជាតិ មិនឲ្យចូលរួមធ្វើនយោបាយ ការចាប់ប្រធានគណបក្សសង្គ្រោះជាតិ លោក កឹម សុខា ដាក់ពន្ធនាគារ ការធ្វើទុក្ខបុកម្នេញអង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យនៅកម្ពុជា។
ក្រសួងការបរទេសសូមប្រកាសថា រដ្ឋមន្ត្រីការបរទេសអាមេរិក នឹងបិទទិដ្ឋាការ ឬ វីសា ចូលមកកាន់ទឹកដីសហរដ្ឋអាមេរិក ចំពោះមន្ត្រីរដ្ឋាភិបាលទាំងអស់ខាងលើ។ អ្នកស្រីបន្តទៀតថា ក្រុមគ្រួសាររបស់មន្ត្រីទាំងនោះ ក៏នឹងត្រូវបិទទិដ្ឋាការ ឬ វីសា នេះដែរ ក្នុងកាលៈទេសៈជាក់លាក់។
ចំណាត់ការរបស់រដ្ឋាភិបាលសហរដ្ឋអាមេរិកនេះ គឺធ្វើឡើងនៅក្រោយពីសេតវិមានប្រធានាធិបតីអាមេរិក បានចេញសេចក្ដីថ្លែងការណ៍ថ្កោលទោស និងព្រមានរដ្ឋាភិបាលកម្ពុជា ជាមុនរួចទៅហើយកាលពីថ្ងៃទី១៦ ខែវិច្ឆិកា កន្លងទៅនេះ។ កាលណោះសេតវិមានបានបញ្ជាក់ថា នឹងចាត់វិធានការនេះ។
មន្ត្រីនាំពាក្យក្រសួងការបរទេសដដែលសង្កត់ធ្ងន់ថា សហរដ្ឋអាមេរិក អំពាវនាវឲ្យរដ្ឋាភិបាលកម្ពុជា ពិចារណាឡើងវិញលើចំណាត់ការរបស់ខ្លួនដោយត្រូវលុបចោលសេចក្ដីសម្រេចរម្លាយគណបក្សប្រឆាំង ដោះលែងលោក កឹម សុខា និង អនុញ្ញាតឲ្យអង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យ អាចបន្តសកម្មភាពស្របតាមរដ្ឋធម្មនុញ្ញរបស់ពួកគេឡើងវិញ។ បើរដ្ឋាភិបាលកម្ពុជា ចាត់ការតាមការអំពាវនាវខាងលើនេះ នោះសហរដ្ឋអាមេរិក នឹងដកបម្រាមក្នុងការធ្វើដំណើរនេះចេញវិញ ហើយការបោះឆ្នោតជាតិ នៅឆ្នាំ២០១៨ ខាងមុខ អាចនឹងត្រូវបានទទួលស្គាល់ថា មានភាពស្របច្បាប់។
អ្នកស្រី ហឹតឌើ ណៅអឹត បញ្ជាក់ជាចុងក្រោយថា សហរដ្ឋអាមេរិក នឹងនៅតែតាមដានស្ថានការណ៍នៅកម្ពុជា និងចាត់វិធានការនានាបន្ថែមទៀតទៅតាមការចាំបាច់។ ស្របពេលជាមួយគ្នានេះ សហរដ្ឋអាមេរិក នឹងនៅតែរក្សាទំនាក់ទំនងជិតស្និទ្ធ និងយូរអង្វែងជាមួយប្រជាពលរដ្ឋនៃប្រទេសកម្ពុជា៕
Congratulation USA has given lesson to Hun Sen regime which we considered doesn’t harm ordinary people, Long Live USA !
Hun Sen says,” me no problem, me no go to USA, me stay home. Me son no school in US.”
Welcome to the house of pain, soon it will spread around the world.
Hun Sen must go…, must go…..to where?
Most wanted,…..must go to people court??
the US’s action is still not fit to problems in Cambodia.