គ.ជ.ប.​ ទុកពេល​១០ថ្ងៃឲ្យពលរដ្ឋប្តឹង ក្រោយ​បិទ​បញ្ជី​ចុះ​ឈ្មោះ​បោះ​ឆ្នោត

ដោយ លោក ណាត សុភាព​​ | ថ្ងៃពុធ ទី១៣ ខែធ្នូ ឆ្នាំ២០១៧​ | ម៉ោង 4:58 PM
http://vodhotnews.com

បោះឆ្នោត


គណៈកម្មាធិការជាតិរៀប​ចំការបោះឆ្នោត ហៅកាត់ថា គ.ជ.ប. បាន​ទុក​ពេល ១០​ថ្ងៃ​ទៀត សម្រាប់​ពលរដ្ឋ​ប្ដឹង​ជំទាស់​ បន្ទាប់​ពី​ស្ថាប័ន​បោះ​ឆ្នោត​មួយ​នេះ បាន​បិទ​បញ្ចប់​ការ​ចុះ​បញ្ជី​ឈ្មោះ​បោះ​ឆ្នោត​ឆ្នាំ​នេះ។

សមាជិក គ.ជ.ប. លោក ហ៊ីង ធីឬទ្ធិ បានថ្លែងក្នុងកិច្ចប្រជុំផ្សព្វផ្សាយជាមួយភាគីពាក់ព័ន្ធនៅថ្ងៃនេះ​ថា​ គ.ជ.ប. បាន​បញ្ចប់ការ​ធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោតកាលពីថ្ងៃទី៩ ខែវិច្ឆិកា​កន្លង​មក​នេះ។

លោក​បន្ថែម​ថា គ.ជ.ប. បាន​បិទ​ផ្សាយ​បញ្ជី​ឈ្មោះ​ថ្មី​នៅ​តាម​ឃុំ-សង្កាត់​ និង​នៅ​តាម​ទីតាំង​ណា​មួយ​ក្នុង​ឃុំ-សង្កាត់ នៅ​ទូទាំង​ប្រទេស ចាប់​ពី​ថ្ងៃ​ទី​១៤ ដល់​ថ្ងៃ​ទី​២៤ ខែ​ធ្នូ។

បើ​តាម​មន្ត្រី​ គ.ជ.ប.​រូប​នេះ ពលរដ្ឋ​អាច​ពិនិត្យ​ផ្ទៀង​ផ្ទាត់​ឈ្មោះ​របស់​ពួកគេ​នៅ​ក្នុង​បញ្ជី​បោះ​ឆ្នោត​ដំបូង និង​អាច​ប្ដឹង​តវ៉ា​ទៅ​ស្ថាប័ន​ពាក់​ព័ន្ធ​ ប្រសិន​បើ​រក​ឃើញ​ភាព​មិន​ប្រក្រតី​ណាមួយ​នៅ​ក្នុង​បញ្ជីនោះ។

លោកថ្លែងថា៖ «ការប្តឹងតវ៉ា ការប្តឹងជំទាស់​ត្រូវ​ធ្វើនៅក្នុង​ឃុំសង្កាត់ក្នុង​រយៈពេល ១០ថ្ងៃយ៉ាងយូរ បន្ទាប់ពី​ថ្ងៃ​បិទ​ផ្សាយ​បញ្ជី បោះ​ឆ្នោតដំបូង​ ចាប់ពីថ្ងៃទី១៥ ដល់ថ្ងៃទី២៤ ខែធ្នូ ឆ្នាំ២០១៧។ ក្នុងករណីអ្នកប្តឹងតវ៉ា និងប្តឹងជំទាស់​មិនពេញចិត្តទៅនឹងសេចក្តីសម្រេច​របស់ក្រុមប្រឹក្សាឃុំសង្កាត់​ អាច​ប្តឹងទៅ គ.ជ.ប. និងក្រុម​ប្រឹក្សា​​ធម្មនុញ្ញ​តាមកំណត់ច្បាប់​»។

ក្នុង​វេទិកានោះ នាយកប្រតិបត្តិអង្គការ​និកហ្វិក លោក សំ គន្ធាមី បាន​ស្នើ​ទៅ​ស្ថាប័ន​រៀបចំ​ការ​បោះ​ឆ្នោត​មួយ​នេះ ឲ្យ​ជួយ​ពន្យល់​ពលរដ្ឋ​នៅ​អំឡុង​ពេល​នៃ​ការ​ពិនិត្យ​បញ្ជី​ឈ្មោះ​បោះ​ឆ្នោត​នេះ ដោយ​លោក​ថា ​​​ដើម្បី​បង្កលក្ខណៈ​ងាយ​ស្រួល​ដល់​​​ប្រជា​​ពល​រដ្ឋដែលមានបំណង​ចង់ប្តឹងជំទាស់ ក្រោយ​ពី​ឃើញ​​ឈ្មោះ​ខុស​ ឬឈ្មោះ​ស្ទួន​​ក្នុង​បញ្ជី​បោះ​ឆ្នោត​​នោះ។

លោកមានប្រសាសន៍ថា៖ «សូម គ.ជ.ប. ណែនាំប្រាប់គាត់ [ប្រជាពលរដ្ឋ] បើសិនជាគាត់ខុសទិន្នន័យរយៈ​ពេល​ប្តឹង ១០ថ្ងៃ​ កុំឲ្យហួស ហើយមានជំនួយការ[មន្ត្រី គជប] ជួយដល់គាត់ផង​ ចំពោះបងប្អូនណា ដែល​គាត់​​អត់​ចេះអក្សរ»។

ប្រធាននាយកដ្ឋានសេវាកម្មច្បាប់ និងវិវាទកម្ម នៅ គ.ជ.ប លោក កែវ ផល្លា បាន​ថ្លែង​ថា ដើម្បីដោះស្រាយបញ្ហាប្រឈមដូចដែលលោក សំ គន្ធាមី លើកឡើងនោះ លោកថា​ មាន​តែដៃ​គូពាក់​ព័ន្ធ​ទំាងអស់​ សហការគ្នាទើបទទួលបានផលវិជ្ជមាន​។

លោកថ្លែងថា៖ «ក្នុងករណីបែបនេះកើតឡើង​ ក៏យើងអត់មាននីតិវិធីណា ដែលថាជួយយ៉ាងម៉េច​ វាអត់​មាន​ មានតែម្យ៉ាងគត់​គឺថាយើងពឹងទៅលើភាគីពាក់ព័ន្ធ ជាពិសេសភ្នាក់ងារគណបក្ស​នយោបាយដែល​នៅ​តាម​មូល​ដ្ឋាន​ ក៏ដូចជាអង្គការសង្គមស៊ីវិល​ អ្នកសង្កេត​ការ​ គឺថា​មានការជួយ​គ្នាទៅវិញទៅមក​ យើង​សហការគ្នា​​»។

គ.ជ.ប. បាន​ចាប់​ផ្ដើមការ​​ចុះ​ឈ្មោះ​បោះឆ្នោត និង​ធ្វើ​បច្ចុប្បន្នភាព​បញ្ជី​បោះឆ្នោត ចាប់​ពី​ថ្ងៃ​ទី​០១ ខែ​កញ្ញា រហូត​ដល់​ថ្ងៃ​ទី​០៦ ខែ​វិច្ឆិកា​កន្លង​មក​នេះ។

របាយការណ៍ គ.ជ.ប. ឲ្យ​ដឹង​ថា ពលរដ្ឋ​ជាង ៥០​ម៉ឺន​នាក់ បាន​ទៅ​ចុះ​ឈ្មោះ​ក្នុង​បញ្ជី​បោះ​ឆ្នោត​ថ្មី​ឆ្នាំ​នេះ ខណៈ​ដែល​ពលរដ្ឋ​ជាង ១​លាន​នាក់​ទៀត ត្រូវ​បាន​គេ​ដឹង​ថា មិន​បាន​ចុះ​ឈ្មោះ​ក្នុង​បញ្ជី​បោះ​ឆ្នោត​កន្លង​មក​នោះ​ឡើយ៕

សរសេរមកកាន់ លោក ណាត សុភាព តាមរយៈ sopheap@vodhotnews.com

What Next?

Recent Articles

One Response to "គ.ជ.ប.​ ទុកពេល​១០ថ្ងៃឲ្យពលរដ្ឋប្តឹង ក្រោយ​បិទ​បញ្ជី​ចុះ​ឈ្មោះ​បោះ​ឆ្នោត"

  1. people says:

    It laughable about this department ” this department is under control of veitcong mafia dictator and these workers of this department are the germs of youn-veitcong hanoi .What kind of this NEC?? it mean nothing’ because people vote for their represent but this department distribute the seats to other parties ‘ is it democracy?? Is it law&order??Is it constitution of cambodia?? Theses people who distribute the seats to other parties are the robbers too’ because they betray people ‘swill and vote for what?? mean nothing ‘why need to vote ?? because this department is not independent ‘ this department is working for the robber so people must understand ‘ . We must demand to terminate all this people and must choose ordinary people or maybe other nation to be referee ‘better then theses robber . GOD bless all cambodian people’