ចិន​ឲ្យ​កម្ចី​ខ្មែរ​ជាង​១​ពាន់​លាន​ដុល្លារ​​សង់​ព្រលាន​យន្តហោះ​នៅ​ក្រុង​តាខ្មៅ

ដោយ សួង សុភារី
12/01/2018
RFI

media
​ចិន​ឲ្យ​កម្ចី​ខ្មែរ​ជាង​១​ពាន់​លាន​ដុល្លារ​​សង់​ព្រលាន​យន្តហោះ​នៅ​ក្រុង​តាខ្មៅ (@សហការី)


គម្រោង​សាង​សង់​ព្រលាន​យន្តហោះ​ថ្មី​មួយ នៅ​ក្រុង​តាខ្មៅ ស្រុក​កណ្តាល​ស្ទឹង​ ខេត្ត​កណ្តាល ត្រូវ​បាន​បង្ហើប​ឲ្យ​ដឹង​ពី​ព័ត៌មាន​លម្អិត នៅ​ព្រឹក​ថ្ងៃ​សុក្រ​នេះ បន្ទាប់​ពី​មាន​ការ​ចុះ​ហត្ថលេខា រវាង​ធនាគារ​ចិន និង​តំណាង​ក្រុមហ៊ុន​វិនិយោគ​កម្ពុជា កាល​ពី​ថ្ងៃ​ព្រហស្បតិ៍​ម្សិល​មិញ។ ព្រលាន​យន្តហោះ​អន្តរជាតិ​ថ្មី​នេះ នឹង​ធ្វើ​ឡើង​លើ​ទំហំ​ដី ២​ពាន់​៦​រយ​ហិកតា ដោយ​ប្រើ​ទុន​វិនិយោគ ១​ពាន់​៥​រយ​លាន​ដុល្លារ ក្នុង​នោះ​ទឹក​ប្រាក់​ ​១​ពាន់​១​រយ​លាន​ដុល្លារ ជា​កម្ចី​ពី​ធនាគារ​ចិន។

តាម​រយៈ​ដំណើរ​ទស្សនកិច្ច​របស់​លោក​នាយក​រដ្ឋមន្ត្រី​ចិន លី ខឺឈាង នៅ​កម្ពុជា មាន​កិច្ច​ព្រម​ព្រៀង​គម្រោង​ចំនួន ១៩​ឯកសារ​ឯណោះ ត្រូវ​បាន​ចុះ​ហត្ថលេខា។ ហើយ​នៅ​ក្នុង​នោះ ក៏​មាន​គម្រោង​ធំ​មួយ គឺ​កិច្ច​ព្រម​ព្រៀង​ក្រប​ខ័ណ្ឌ ​ស្តីពី​កិច្ច​សហ​ប្រតិបត្តិការ​ហិរញ្ញប្បទាន​សម្រាប់​គម្រោង​អាកាស​យានដ្ឋាន​ថ្មី​​ដែល​​ត្រូវ​បាន​ចុះ​ហត្ថលេខា​ដោយ​តំណាង​ធនាគារ​ចិន​ China Development Bank និង​លោក​ឧកញ៉ា ពុង ឃាវ​សែ ​ប្រធាន​ក្រុមហ៊ុន Overseas Cambodian Investment Corporation (OCIC)​។

​​លិខិត​ផ្លូវ​ការ​មួយ​ច្បាប់​របស់​ទីស្តីការ​គណៈរដ្ឋមន្ត្រី ផ្ញើ​ទៅ​ក្រសួង​សេដ្ឋកិច្ច និង​ហិរញ្ញវត្ថុ និង​លេខាធិការដ្ឋាន​អាកាសចរ​ស៊ីវិល ចុះ​ថ្ងៃ​ទី ២១​ធ្នូ ឆ្នាំ ២០១៧ តែ​ទើប​ត្រូវ​បាន​ផ្សព្វ​ផ្សាយ​ឲ្យ​ដឹង​នៅ​ថ្ងៃ​សុក្រ ទី ១២​មករា​នេះ បាន​បញ្ជាក់​ថា អាកាស​យានដ្ឋាន​អន្តរជាតិ​លំដាប់ 4F ដែល​គ្រោង​ធ្វើ​ឡើង​នៅ​ក្នុង​ភូមិសាស្ត្រ​ក្រុង​តាខ្មៅ ស្រុក​កណ្តាល​ស្ទឹង​ ខេត្ត​កណ្តាល​នោះ មាន​ទុន​វិនិយោគ​សុរប ១.៥០០​លាន​ដុល្លារ។
ក្នុ្ងង​នោះ មាន​កម្ចី​ពី​ធនាគារ​ចិន​ចំនួន ១​ពាន់​១​រយ​លាន​ដុល្លារ កម្ចី​ពី​ភាគ​ទុន​ក្រុមហ៊ុន OCIC ចំនួន ២៨០​លាន​ដុល្លារ និង​ដើម​ទុន​ចុះ​បញ្ចី​ចំនួន ១២០​លាន​ដុល្លារ។​ ជាមួយ​គ្នា​នេះ ក្រុមហ៊ុន OCIC មាន ៩០​ភាគ​រយ និង​រដ្ឋលេខាធិការដ្ឋាន​អាកាសចរ​ស៊ីវិល តំណាង​រាជរដ្ឋាភិបាល​កម្ពុជា​មាន ១០​ភាគ​រយ។ ​គម្រោង​អាកាស​យានដ្ឋាន​លើ​ផ្ទៃ​ដី ២.៦០០​ហិក​តា​នេះ នឹង​ដំណើរ​ការ​ក្រោម​ឈ្មោះ ក្រុមហ៊ុន ខេម​បូឌា អ៊ែរផត អ៊ិនវេសមិន ខូអិលធីឌី (Cambodia Airport Investment Co.,Ltd)។

លេខាធិការដ្ឋាន​អាកាសចរណ៍​ស៊ីវិល បាន​ប្រាប់​វិទ្យុ​បារាំង​ថា គិត​មក​ដល់​ឆ្នាំ ២០១៨​នេះ ប្រទេស​កម្ពុជា មាន​ព្រលាន​យន្តហោះ​អន្តរជាតិ​ធំៗ ចំនួន​៣ ដែល​មាន​ទីតាំង​នៅ​រាជធានី​ភ្នំពេញ ខេត្ត​សៀមរាប និង​ខេត្ត​ព្រះសីហនុ។ ព្រលាន​យន្តហោះ​អន្តរជាតិ​ទាំង ៣​នេះ បាន​ទទួល​អ្នក​ដំណើរ​ប្រមាណ​ជាង ២​លាន​នាក់ នៅ​ក្នុង​ឆ្នាំ ២០១៧។

​ចាប់​ពី​ឆ្នាំ ២០១៨​នេះ​ត​ទៅ រាជរដ្ឋាភិបាល​កម្ពុជា ​គ្រោង​នឹង​ពង្រីក​ទុន​វិនិយោគ​លើ​វិស័យ​ដឹក​ជញ្ជូន​តាម​ផ្លូវ​អាកាស​នេះ ឲ្យ​បាន​កាន់​តែ​ទូលំ​ទូលាយ ដើម្បី​ឆ្លើយ​តប​ទៅនឹង​កំណើន​ភ្ញៀវ​ទេសចរ​បរទេស ដែល​រដ្ឋាភិបាល​កម្ពុជា អះអាង​ថា មាន​ចំនួន​កើន​ឡើង​ជា​រៀង​រាល់​ឆ្នាំ។ ព្រលាន​យន្តហោះ​អន្តរជាតិ​ធំៗ ដែល​នឹង​ត្រូវ​ចាប់​ផ្តើម​សាង​សង់​បន្ថែម ចាប់​ពី​ឆ្នាំ ២០១៨​នេះ មាន​ចំនួន ២ គឺ​មួយ នៅ​ស្រុក​សូរ្យ​និគម ក្នុង​ខេត្ត​សៀមរាប និង​មួយ​ទៀត ស្ថិត​នៅ​ក្នុង​ក្រុង​តាខ្មៅ ជិត​រាជធានី​ភ្នំពេញ​នេះ៕

What Next?

Recent Articles

One Response to "ចិន​ឲ្យ​កម្ចី​ខ្មែរ​ជាង​១​ពាន់​លាន​ដុល្លារ​​សង់​ព្រលាន​យន្តហោះ​នៅ​ក្រុង​តាខ្មៅ"

  1. people says:

    Veitcong mafia dictator never learn about other countries ‘ look at Srey langka been accepted the aid from china ‘now give to china to look after because this country have nothing to pay back so cambodia will be the same ‘ in the future cambodia will become china slave’ after become veitcong slave since 1979 noe change the boss’ .GOD bless all cambodian people’