អង្គការ Freedom House ថាកម្ពុជា​មិន​​មាន​សេរីភាព តែ​រដ្ឋាភិបាល​ច្រាន​ចោល

ដោយ អ៊ឹម រចនា
17/01/2018
RFI

media
រូប​តំណាង​របាយការណ៍​សេរីភាព​ប្រចាំ​ឆ្នាំ​២០១៨ របស់​អង្គការ​អន្ដរជាតិ Freedom House (Freedom House)


នៅ​ក្នុង​របាយការណ៍​សេរីភាព​ក្នុង​ពិភពលោក​ឆ្នាំ​២០១៨ ចេញ​ផ្សាយ​នៅ​ថ្ងៃ​ទី​១៦​មករា​ម្សិលមិញ អង្គការ Freedom House បាន​ចាត់​ទុក​ប្រទេស​កម្ពុជា​ថា ជា​ប្រទេស​មិន​​មាន​សេរីភាព​។ ពោល បើ​តាម​របាយការណ៍ កម្ពុជា​​ទទួល​បាន​ពិន្ទុ​៣០​ពិន្ទុ​ប៉ុនណោះ នៅ​លើ​ពិន្ទុ​សរុប​១០០​ពិន្ទុ ថយ​ចុះ ១​ពិន្ទុ​បើ​ធៀប​ទៅ​នឹង​ចំណាត់​ថ្នាក់​ឆ្នាំ​មុន​។ យ៉ាង​ណា​ក៏​ដោយ ការ​ដាក់​ពិន្ទុ​និង​ចាត់​ចំណាត់​ថ្នាក់​របស់​អង្គការ​អន្ដរជាតិ​នេះ មិន​ត្រូវ​បាន​អ្នក​នាំ​ពាក្យ​រដ្ឋាភិបាល​កម្ពុជា​ផ្ដល់​តម្លៃ ឬ​យល់​ស្រប​ក៏​ទេ​ដែរ​។

ស្ថានភាព​សេរីភាព​នៅ​កម្ពុជា​ទទួល​មាន​ទំនោរ​ធ្លាក់​ចុះ ដោយ​សារ​តែ​ការ​បង្ក្រាប​ជា​បន្ត​បន្ទាប់​ទៅ​លើ​គណបក្ស​ប្រឆាំង រួម​មាន​ការ​រំលាយ​គណបក្ស និង​ការ​ចោទ​ប្រកាន់​លើ​ថ្នាក់​ដឹក​នាំ​នៃ​គណបក្ស​នោះ​ថា​ក្បត់​ជាតិ​ជា​ដើម​​។ ការ​បិទ​ទ្វារ​នៃ​កាសែត The Cambodia Daily និង​អវត្តមាន​វិទ្យុ​អន្ដរជាតិ​មួយ​ចំនួន​នៅ​លើ​ហ្វ្រេកង់​ផ្សាយ ក៏​រួម​ចំណែក​ធ្វើ​ឲ្យ​សេរីភាព​នៅ​កម្ពុជាធ្លាក់​ចុះ​ដែរ​។ នេះ​បើ​តាម​របាយការណ៍​របស់​អង្គការ Freedom House។

ផ្អែក​តាម​ស្ថានការណ៍​ទាំង​អស់​​នេះ Freedom House បានផ្ដល់​ពិន្ទុ​ឲ្យ​កម្ពុជា​ចំនួន​​ពិន្ទុ​៣០​ពិន្ទុ​ប៉ុនណោះ នៅ​លើ​ពិន្ទុ​សរុប​១០០​ពិន្ទុ​។ មាន​ន័យ​ថា កម្ពុជា​ជា​ប្រទេស​ដែល​មិន​​មាន​សេរីភាព​ឡើយ​។ ក្រៅ​ពី​ពិន្ទុ​សេរីភាព​ទូទៅ​ដោយ​រួម Freedom House ក៏​ផ្ដល់​ពិន្ទុ​ផង​ដែរ​ដល់​ផ្នែក​ពីរ​សំខាន់​ផ្សេង​ទៀត នោះ​គឺ​ពិន្ទុ​ស្ដី​ពី​សិទ្ធិ​សេរីភាព​ពលរដ្ឋ និង​ពិន្ទុ​ស្ដី​ពី​សេរីភាព​ខាង​នយោបាយ ដោយ​ផ្ដល់​ពិន្ទុ​១​ដល់​ប្រទេស​ណា​ដែល​មាន​សេរីភាព​បំផុត និង​ពិន្ទុ​៧ ដល់​ប្រទេស​ដែល​មាន​សេរីភាព​តិច​បំផុត​។ ចំពោះ​កម្ពុជា អង្គការ Freedom House ផ្ដល់​ពិន្ទុ​ចំនួន​៥ក្នុង​ផ្នែក​​សេរីភាព​ពលរដ្ឋ ខណៈ​សិទ្ធិសេរីភាព​ខាង​​នយោបាយ កម្ពុជា​ទទួល​បាន​៦​ពិន្ទុ​។

ថ្លែង​ប្រាប់​វិទ្យុ​បារាំង​អន្ដរជាតិ​នា​ថ្ងៃ​ពុធ ទី​១៧​មករា​នេះ លោក ផៃ ស៊ីផាន អ្នក​នាំ​ពាក្យ​រដ្ឋាភិបាល​កម្ពុជា បាន​លើក​ឡើង​ថា របាយការណ៍​របស់​អង្គការ Freedom House ដែល​ចាត់​ទុក​កម្ពុជា​ថាជា​ប្រទេស​​មិន​​មាន​សេរីភាព​នេះ មិន​ឆ្លុះ​បញ្ចាំង​ពី​ស្ថានភាព​ពិត​ប្រាកដ​នៅ​កម្ពុជា​ទេ​។ សម្រាប់​លោក ផៃ ស៊ីផាន អង្គការ​អន្ដរជាតិនេះ មិន​ដែល​មាន​ចេតនា​ល្អមក​លើ​រដ្ឋាភិបាល​កម្ពុជា ឬ​រដ្ឋាភិបាល​នៃ​បណ្ដា​ប្រទេស​នានា​នៅ​លើ​ពិភពលោក​ឡើយ​។ អ្នក​នាំ​ពាក្យ​រដ្ឋាភិបាល​កម្ពុជា​រូប​នេះអះអាង​ប្រាប់​វិទ្យុ​បារាំង​អន្ដរជាតិ​ថា កម្ពុជា​មាន​ជា​ប្រទេស​ដែល​មាន​សេរីភាព ហើយ​កំពុង​តែ​ពង្រឹង​សេរីភាព​បន្ថែម​ទៀត តាម​រយៈ​ការ​ធានា​ឲ្យ​បាន​នូវ​សន្តិភាព​និង​ស្ថិរភាព​របស់​ប្រទេស​។

គួរ​កត់​សម្គាល់​ថា ចាប់​តាំង​ពី​មាន​ការ​វាយ​តម្លៃ​លើ​សេរីភាព​ពី​សំណាក់​អង្គការ Freedom House នៅ​ឆ្នាំ​១៩៩៥​មក កម្ពុជា​មិន​ធ្លាប់​ទទួល​បាន​ពិន្ទុ​ល្អ​ទេ​។ នៅ​ក្នុង​របាយការណ៍​របស់​អង្គការ​អន្ដរជាតិ​ដែល​មាន​មូលដ្ឋាន​នៅ​សហរដ្ឋ​អាមេរិក​នេះ កម្ពុជា​តែង​តែ​ស្ថិត​នៅ​ក្នុង​ចំណោម​ប្រទេស​ដែល​មិន​សូវ​មាន​សេរីភាព​ជានិច្ច​​។

សម្រាប់​ឆ្នាំ​២០១៨​នេះ កម្ពុជា​ទទួល​បាន​ពិន្ទុ​៣០ លើ​១០០ ស្ថិត​ក្នុង​ចំណោម​ក្រុម​ប្រទេស​ដែល​មិន​​មាន​សេរីភាព ប្រដំ​ប្រសង​នឹង​ប្រទេស​មួយ​ចំនួន​ទៀត​ដូច​ជា​ហ្ស៊ីមបាវ៉េ និង​អ៊ីរ៉ាក់​ជា​ដើម​។ ដោយ​ឡែក ប្រទេស​ដែល​ទទួល​បាន​ពិន្ទុ​អាក្រក់​បំផុត​ផ្នែក​សេរីភាព​សម្រាប់​ឆ្នាំ​២០១៨​នេះ​គឺ​ប្រទេស​ស៊ីរី បាន​ពិន្ទុ ដក​១។ ចំណែក​ប្រទេស​ដែល​មាន​សេរីភាព​បំផុត​វិញ មាន​ជា​អាថិ៍ ប្រទេសស៊ុយអែត ប្រទេស​ន័រវ៉េស និង​ប្រទេសហ្វាំងឡង់ ដែល​ទទួល​បាន​ពិន្ទុ​ពេញ​១០០​៕

What Next?

Recent Articles

One Response to "អង្គការ Freedom House ថាកម្ពុជា​មិន​​មាន​សេរីភាព តែ​រដ្ឋាភិបាល​ច្រាន​ចោល"

  1. people says:

    Cambodia is the country call democracy” but it fake democracy’ ” this king dom is leaded by former veitcong khmer rough who used to killed a lot of khmer people and this veitcong mafia dictator never care about khmer people or nation’ he care only his power,his mafia groups and serve his boss youn-hanoi only . This veitcong mafia dictator can do everything he wanted to do never respect law&order or constitution ‘ . International must learn that since 1993 after Parish Accord ‘cambodian people so happy when they see U-N troops and U N people came to help restore democracy’ but after veitcong mafia dictator loose election he divide cambodia and work with veitcong king si hak nouk to keep him ‘then this veitcong mafia dictator did the coup killing more khmer people and took the power since then ‘ Now this mafia dictator dissolve big party because he knew he will lost election in future so International must isolate this beast government and not accept the result of vote in the future . GOD bless all cambodian people’