ដោយ អាស៊ីសេរី
2018-01-19
លោក កឹម សុខា (ដើរមុខ) ប្រធានគណបក្សសង្គ្រោះជាតិ នាស្នាក់ការកណ្ដាលគណបក្សសង្គ្រោះជាតិ បន្ទាប់ពីប្រជុំផ្ទៃក្នុងគណបក្ស កាលពីថ្ងៃទី៣ ខែមីនា ឆ្នាំ២០១៦។ Photo: RFA
ក្រុមមេធាវីការពារក្ដីឲ្យលោក កឹម សុខា បានដាក់ពាក្យបណ្ដឹងទៅសភាស៊ើបសួរសាលាឧទ្ធរណ៍រួចរាល់ហើយ ដើម្បីស្នើសុំឲ្យកូនក្ដីបាននៅក្រៅឃុំបណ្ដោះអាសន្ន។
លោកមេធាវី សំ សុគង់ ក្នុងចំណោមមេធាវីទាំង ៨រូប ការពារក្ដីឲ្យលោក កឹម សុខា បានពន្យល់ពីមូលហេតុដាក់ពាក្យស្នើសុំទៅសាលាឧទ្ធរណ៍យ៉ាងដូច្នេះ៖ «យើងបានដាក់សុំនៅក្រៅឃុំកាលពីក្នុងថ្ងៃទី១១ ហើយនៅថ្ងៃទី១៥ ហ្នឹងចៅក្រមស៊ើបសួរនៃសាលាដំបូង និងចេញដីកាមួយច្បាប់ដីកាហ្នឹងគឺដីកាមិនព្រមដោះលែង ហើយក្រុមមេធាវីបានសម្រេចចិត្តដាក់ពាក្យប្ដឹងឧទ្ធរណ៍ទៅនឹងដីកាមិនព្រមដោះលែង ដើម្បីឲ្យសភាស៊ើបសួរសម្រេចឡើងវិញចំពោះការស្នើសុំហ្នឹង»។
ចៅក្រមស៊ើបសួរសាលាដំបូងរាជធានីភ្នំពេញ លោក គី ឬទ្ធី កាលពីថ្ងៃទីច័ន្ទ ដើមសប្ដាហ៍នេះ បានចេញដីកាសម្រេចបដិសេធសំណើរបស់ក្រុមមេធាវីដោយសម្រេចមិនអនុញ្ញាតឱ្យលោក កឹម សុខា នៅក្រៅឃុំជាបណ្ដោះឡើយ។ សេចក្ដីសម្រេចរបស់ចៅក្រមស៊ើបសួរនេះ បានលើកមូលហេតុថា ផ្អែកតាមមាត្រា ២០៥ នៃក្រមនីតិវិធីព្រហ្មទណ្ឌគឺរក្សាជនត្រូវចោទទុកដើម្បីបន្តការសាកសួរតាមនីតិវិធីច្បាប់។
លោក កឹម សុខា ត្រូវបានសមត្ថកិច្ចចាប់ខ្លួនកាលពីយប់រលងអធ្រាត្រថ្ងៃទី២ កញ្ញា ឈានចូលថ្ងៃទី៣ ខែកញ្ញា ឆ្នាំ២០១៧ ដោយចោទពីបទក្បត់ជាតិ។ បើទោះជាមជ្ឈដ្ឋានជាតិ និងសហគមន៍អន្តរជាតិយល់ថា នេះគឺជាការចោទប្រកាន់ដោយគ្មានភស្តុតាងត្រឹមត្រូវក៏ចៅក្រមស៊ើបសួរបានព្យាយាមរកសាក្សីដើម្បីដាក់បន្ទុក ខណៈដែលរដ្ឋាភិបាលប្រកាសឲ្យអាជ្ញាធរគ្រប់ជាន់ថ្នាក់ ខិតខំប្រឹងប្រែងពន្យល់ពលរដ្ឋឲ្យជឿថា លោក កឹម សុខា គឺជាជនក្បត់ជាតិ។ ក៏ប៉ុន្តែការចោទប្រកាន់នេះត្រូវសហគមន៍អន្តរជាតិថ្កោលទោសថា ជារឿងនយោបាយ ពីព្រោះលោកនាយករដ្ឋមន្ត្រី ហ៊ុន សែន ខ្លាចចាញ់ឆ្នោតក្នុងការបោះឆ្នោតជាតិ នៅខែកក្កដា ខាងមុខ ទើបរកលេសចាប់មេបក្សប្រឆាំងដែលមានប្រជាប្រិយដាក់គុក។
អ្នកវិភាគនយោបាយឯករាជ្យ លោកបណ្ឌិត ឡៅ ម៉ុងហៃ លើកឡើងថា សំណើសុំនៅក្រៅឃុំរបស់មេធាវីលោក កឹម សុខា នឹងមិនទទួលបានជោគជ័យទេ។ លោកបណ្ឌិត ឡៅ ម៉ុងហៃ យល់ថា សំណើរបស់មេធាវីគ្រាន់តែបានជួយបន្ទរជួយរំលឹក និងជួយដាស់តឿនថា ការចាប់ខ្លួនលោក កឹម សុខា កន្លងមកគឺជាការចាប់ខ្លួនដោយខុសច្បាប់ខុសនីតិវិធីប៉ុណ្ណោះ៖ «ប៉ុន្តែខ្ញុំថា ឲ្យគេដោះលែងរឿងនយោបាយក្នុងកាលៈទេសៈអ៊ីចេះ គឺថាអត់ទេបាទ!»។
លោកបណ្ឌិត ឡៅ ម៉ុងហៃ យល់ថា ដរាបណានៅតែគ្មានសម្ពាធខ្លាំងដែលប៉ះពាល់ដល់ផលប្រយោជន៍របស់ថ្នាក់ដឹកនាំរដ្ឋាភិបាលធ្ងន់ធ្ងរទេ លោក កឹម សុខា នឹងមិនត្រូវបានដោះលែងនោះទេ។
ចៅក្រមសម្រេចមិនឲ្យក្រុមតំណាងរាស្ត្របក្សសង្គ្រោះជាតិ ជួប លោក កឹម សុខា នៅក្នុងពន្ធនាគារ
ចៅក្រមស៊ើបសួរសាលាដំបូងរាជធានីភ្នំពេញ លោក គី ឬទ្ធី បានចេញលិខិតបដិសេធមិនឲ្យក្រុមតំណាងរាស្ត្របក្សប្រឆាំងអាចចូលជួបលោក កឹម សុខា ប្រធានបក្សសង្គ្រោះជាតិ នៅក្នុងពន្ធនាគារត្រពាំងផ្លុង បានទេ។ ការសម្រេចចិត្តរបស់លោក គី ឬទ្ធី ធ្វើឡើងកាលពីថ្ងៃទី១៧ មករា ប៉ុន្តែទើបផ្សព្វផ្សាយនៅថ្ងៃទី១៩ មករា ដើម្បីតបនឹងសំណើរបស់តំណាងរាស្ត្រជាប់ឆ្នោតនៅមណ្ឌលខែត្រកំពង់ចាម លោក ម៉ៅ មុនីវណ្ណ។
លោក គី ឬទ្ធី បានប្រាប់ពីមូលហេតុថា សំណុំរឿងលោក កឹម សុខា កំពុងស្ថិតក្នុងចំណាត់ការស៊ើបសួរ និងស្រាវជ្រាវប្រមូលភស្តុតាង ហេតុនេះការជួប ឬសួរសុខទុក្ខអនុញ្ញាតឲ្យតែមេធាវី និងក្រុមគ្រួសារប៉ុណ្ណោះ។
កាលពីថ្ងៃទី១៦ ខែមករា តំណាងរាស្ត្រជាប់ឆ្នោតពីឆន្ទៈរាស្ត្រចំនួន ៥នាក់ មានលោក ម៉ៅ មុនីវណ្ណ លោក អ៊ូ ច័ន្ទរ័ត្ន លោក ជាម ចន្នី លោក កង គឹមហាក់ និងអ្នកស្រី តែ ច័ន្ទមុនី បានស្នើសុំចូលជួបលោក កឹម សុខា នៅថ្ងៃទី១៩ មករា នៅក្នុងពន្ធនាគារត្រពាំងផ្លុង ក្នុងខែត្រត្បូងឃ្មុំ ជិតព្រំដែនវៀតណាម។
អាស៊ីសេរី មិនអាចទំនាក់ទំនងលោក ម៉ៅ មុនីវណ្ណ និងលោក អ៊ូ ច័ន្ទរ័ត្ន ដើម្បីសុំយោបល់ជុំវិញការបដិសេធរបស់ចៅក្រមស៊ើបសួរក្រុងភ្នំពេញ បានទេ នៅថ្ងៃសុក្រនេះ។ ប៉ុន្តែលោក ម៉ៅ មុនីវណ្ណ បានប្រាប់សារព័ត៌មានក្នុងស្រុកថា ប្រសិនបើចៅក្រមស៊ើបសួរមិនឲ្យចូលជួបលោក កឹម សុខា ក្រុមរបស់លោកនឹងបន្តដាក់សំណើជារៀងរាល់សប្ដាហ៍រហូតទទួលបានការអនុញ្ញាត។
នេះមិនមែនជាលើកទី១ទេ ដែលចៅក្រមស៊ើបសួរបានបដិសេធសំណើរបស់តំណាងរាស្ត្របក្សប្រឆាំងក្នុងការស្នើសុំជួបលោក កឹម សុខា ក្នុងពន្ធនាគារត្រពាំងផ្លុង។ សង្គមស៊ីវិលរិះគន់ចំណាត់ការរបស់ចៅក្រមស៊ើបសួរសាលាដំបូងរាជធានីភ្នំពេញ ថា ជាការបំបិទសិទ្ធសេរីភាព៕