អ្នកនាំពាក្យ​របស់​បក្ស​កាន់​អំណាច​ថា​កម្ពុជា​មិន​ដែល​ដឹក​នាំ​ខុស​គន្លង​នីតិរដ្ឋ​នោះ​ទេ

ដោយ តាំង សារ៉ាដា
2018-02-05
RFA

ស្ដាប់ ឬ​ទាញ​យក​សំឡេង
ស្តាប់សំឡេងថតសំឡេង

អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន ថ្លែង​ទៅ​កាន់​​ក្រុម​អ្នក​សារព័ត៌មាន ​នៅខាង​មុខ​​សាលាដំបូង​រាជធានី​ភ្នំពេញ កាល​​ពី​​ថ្ងៃ​ទី​៦ ខែ​ឧសភា ឆ្នាំ​២០១៦។ Photo: RFA
អ្នកនាំពាក្យ​គណបក្ស​ប្រជាជន​កម្ពុជា លោក សុខ ឥសាន ថ្លែង​ទៅ​កាន់​​ក្រុម​អ្នក​សារព័ត៌មាន ​នៅខាង​មុខ​​សាលាដំបូង​រាជធានី​ភ្នំពេញ កាល​​ពី​​ថ្ងៃ​ទី​៦ ខែ​ឧសភា ឆ្នាំ​២០១៦។ Photo: RFA


មន្ត្រី​ជាន់​ខ្ពស់​បក្ស​កាន់​អំណាច​អះអាង​ថា ការ​ចាត់​វិធានការ​ទៅ​លើ​គណបក្ស​ប្រឆាំង សង្គម​ស៊ីវិល និង​ប្រព័ន្ធ​ផ្សព្វផ្សាយ​ឯករាជ្យ គឺ​ជា​ការ​អនុវត្ត​នីតិរដ្ឋ​របស់​ប្រទេស​ប៉ុណ្ណោះ។ ប៉ុន្តែ​ក្រុម​អ្នក​ច្បាប់​អន្តរជាតិ​ចាត់​ទុក​ការ​ធ្វើ​ទុក្ខបុកម្នេញ​របស់​រដ្ឋាភិបាល​កម្ពុជា លើ​ក្រុម​អ្នក​រិះគន់ ថា​ជា​ការ​រំលោភ​កិច្ច​ព្រមព្រៀង​សន្តិភាព​ទីក្រុង​ប៉ារីស និង​រំលោភ​រដ្ឋធម្មនុញ្ញ​របស់​ប្រទេស​នេះ។

​មន្ត្រី​ជាន់​ខ្ពស់​របស់​គណបក្ស​ប្រជាជន​ដែល​កាន់​អំណាច​បង្ហាញ​ថា កម្ពុជា​កំពុង​ដុសខាត់​នីតិរដ្ឋ និង​លទ្ធិប្រជាធិបតេយ្យ​របស់​ខ្លួន​តាម​រយៈ​ការ​ប្រើ​វិធានការ​ក្ដៅ​ទៅ​លើ​ជន​ទាំង​ឡាយ​ណា​ដែល​ល្មើស​ទៅ​នឹង​ច្បាប់​របស់​កម្ពុជា។

​អ្នកនាំពាក្យ​របស់​គណបក្ស​ប្រជាជន​កម្ពុជា លោក សុខ ឥសាន អះអាង​ថា រដ្ឋាភិបាល​កម្ពុជា កំពុង​ខិតខំ​ប្រឹងប្រែង​ធ្វើ​យ៉ាង​ណា​ឲ្យ​លទ្ធិប្រជាធិបតេយ្យ​របស់​ប្រទេស​ដំណើរ​ការ​ទៅ​ដោយ​រលូន​តាម​រយៈ​ការអនុវត្ត​ច្បាប់។ លោក​បន្ត​ការ​ចោទ​ប្រកាន់​ទាំង​ឡាយ​ណា​ដែល​ថា រដ្ឋាភិបាល​របស់​លោក​បាន​បំផ្លាញ​គណបក្ស​ប្រឆាំង ឬ​ក្រុម​សង្គម​ស៊ីវិល​គឺ​ជា​ការ​ចោទ​ប្រកាន់​ដែល​មិន​ឆ្លុះ​បញ្ចាំង​ពី​ការ​ពិត​អំពី​ការ​រីក​លូតលាស់​នៃ​ដំណើរ​ការ​នីតិរដ្ឋ៖ «យើង​មាន​ទៅ​ធ្វើ​ទុក្ខ​ទោស​អី​ដល់​គណបក្ស​ប្រឆាំង គាត់​បង្កើត​ទោស​ដោយ​ខ្លួន​ឯង។ អ៊ីចឹង​គាត់​ត្រូវ​ទទួល​ទោស​ដោយ​ខ្លួន​ឯង។ ដោយ​ឡែក ពួក​អង្គការ​សង្គម​ស៊ីវិល​មួយ​ចំនួន​តូច​មិន​បាន​ប៉ុន្មាន​ភាគ​រយ​ទេ ព្រោះ​អង្គការ​សង្គម​ស៊ីវិល ឥឡូវ​ជិត​ប្រាំ​ពាន់​អង្គការ ហើយ​មាន​តែ​អង្គការ​សង្គម​ស៊ីវិល​មួយ​ពីរ​ទេ​ដែល​ធ្វើ​ខុស​ច្បាប់ ដែល​ត្រូវ​បិទ ឬ​ត្រូវ​ដេញ​ចេញ អា​ហ្នឹង​ជា​ការ​អនុវត្ត​ច្បាប់។ អនុវត្តន៍​ច្បាប់​គឺ​ពង្រឹង​នីតិរដ្ឋ​ហ្នឹង​ហើយ។ បើ​ពង្រឹង​នីតិរដ្ឋ​អា​ហ្នឹង​វា​ជា​ការ​ពង្រឹង​លទ្ធិប្រជាធិបតេយ្យ​ដែរ»

​ការ​អះអាង​របស់​លោក សុខ ឥសាន គឺ​ជា​ការ​ឆ្លើយ​តប​ទៅ​នឹង​តំណាងរាស្ត្រ​ពី​ខាង​គណបក្ស​ពលករ​របស់​ប្រទេស​អូស្ត្រាលី លោក ម៉ាក បាត់លើរ (Mark Butler) កាល​ពី​ថ្ងៃ​ទី​៥ ខែ​កុម្ភៈ បាន​ដាក់​ញត្តិ​ស្នើ​ឲ្យ​រដ្ឋាភិបាល​អូស្ត្រាលី ដាក់​ទណ្ឌកម្ម​ការទូត​កម្រិត​ធ្ងន់​លើ​រដ្ឋាភិបាល​លោក ហ៊ុន សែន ដោយសារ​ការ​ធ្វើ​ទុក្ខបុកម្នេញ​លើ​គណបក្ស​ប្រឆាំង អង្គការ​សង្គម​ស៊ីវិល និង​ប្រព័ន្ធ​ផ្សព្វផ្សាយ​ឯករាជ្យ​នៅ​កម្ពុជា៖ «ការ​ធ្វើ​ទុក្ខបុកម្នេញ​ដ៏​ធ្ងន់ធ្ងរ​ក្នុង​ពេល​ថ្មីៗ​នេះ គឺ​បង្ហាញ​ឲ្យ​ឃើញ​អំពី​ភាព​រាលដាល​នៃ​ការ​ធ្វើ​បាប​សំឡេង​ប្រឆាំង ដែល​ទាមទារ​ឲ្យ​មាន​វិធានការ​ទណ្ឌកម្ម​ផ្នែក​ការទូត​ឲ្យ​បាន​ធ្ងន់ធ្ងរ​បំផុត​តាម​ដែល​អាច​ធ្វើ​ទៅ​បាន។ ប្រទេស​ដទៃ បាន​ដាក់​ទណ្ឌកម្ម​លើ​រដ្ឋាភិបាល​លោក ហ៊ុន សែន បណ្ដើរៗ​ហើយ។ សហរដ្ឋអាមេរិក បាន​បិទ​ទិដ្ឋាការ​ចំពោះ​មន្ត្រី​រដ្ឋាភិបាល ដែល​ពាក់ព័ន្ធ​ក្នុង​ការ​បំផ្លាញ​ប្រជាធិបតេយ្យ​នៅ​កម្ពុជា។ ទណ្ឌកម្ម​នេះ​ជា​ផ្នែក​មួយ​ក្នុង​ការ​ដាក់​សម្ពាធ​ឲ្យ​រដ្ឋាភិបាល​លុប​ចោល​ការ​រម្លាយ​គណបក្ស​សង្គ្រោះ​ជាតិ និង​ដោះលែង​លោក កឹម សុខា និង​បញ្ឈប់​ការ​រឹតត្បិត​សិទ្ធិ​សេរីភាព​លើ​ប្រព័ន្ធ​ផ្សព្វផ្សាយ​នៅ​កម្ពុជា។ ចំណែក​ឯ​សភា​អឺរ៉ុប ក៏​បាន​រៀបចំ​បញ្ជី​ឈ្មោះ​ជន​ទាំង​ឡាយ​ណា​ដែល​ពាក់ព័ន្ធ​នឹង​ការ​រម្លាយ​គណបក្ស​ប្រឆាំង និង​ការ​រំលោភ​សិទ្ធិមនុស្ស​ដើម្បី​ឈាន​ទៅ​បិទ​ទិដ្ឋាការ និង​បង្កក​ទ្រព្យសម្បត្តិ។ ខ្ញុំ​សូម​រម្លឹក​រដ្ឋ​សភា​យើង​ថា យើង​មាន​ភារកិច្ច​សំខាន់​ណាស់​ក្នុង​ការ​ជួយ​ឲ្យ​ប្រទេស​កម្ពុជា មាន​លទ្ធិប្រជាធិបតេយ្យ និង​ជួយ​ការពារ​កុំ​ឲ្យ​ប្រជាធិបតេយ្យ​បាត់​បង់​ទៅ​វិញ។ ប៉ុន្តែ ចំណាត់​ការ​របស់​របប​លោក ហ៊ុន សែន សព្វថ្ងៃ កំពុងតែ​បំផ្លាញ​លទ្ធិប្រជាធិបតេយ្យ​នេះ។ ប្រទេស​អូស្ត្រាលី ត្រូវ​តែ​បញ្ជាក់​ជំហរ​ឲ្យ​ដាច់​ណាត់​ថា ខ្លួន​គាំទ្រ​ប្រជាពលរដ្ឋ​កម្ពុជា ដើម្បី​ឲ្យ​មាន​ការ​គោរព​សិទ្ធិ​របស់​ពួកគាត់ និង​ឲ្យ​មាន​ការ​យក​ចិត្ត​ទុក​ដាក់​ពី​ពិភពលោក»

​លោក ម៉ាក បាត់លើរ ក៏​បាន​រម្លឹក​ដល់​រដ្ឋ​សភា​អូស្ត្រាលី ផង​ដែរ អំពី​ស្ថានការណ៍​នយោបាយ​នៅ​ប្រទេស​កម្ពុជា ដែល​កំពុង​ជួប​វិបត្តិ​ធ្ងន់ធ្ងរ។ លោក​បន្ត​ថា ប្រសិនបើ​គ្មាន​ដំណោះ​ឲ្យ​បាន​ឆាប់​ទេ នោះ​វា​នឹង​នាំ​ឲ្យ​ប៉ះទង្គិច​ដល់​ការ​បោះឆ្នោត​ជាតិ នា​ខែ​កក្កដា ខាង​មុខ។ ​លោក ម៉ាក បាត់លើរ រម្លឹក​ថា ប្រទេស​អូស្ត្រាលី មាន​ករណីយកិច្ច​ក្នុង​ការ​ជួយ​ធ្វើ​យ៉ាង​ណា​ឲ្យ​ប្រជាពលរដ្ឋ​កម្ពុជា ទទួល​បាន​សិទ្ធិ សេរីភាព និង​ប្រជាធិបតេយ្យ​ពិតប្រាកដ​តាម​ស្មារតី​នៃ​កិច្ច​ព្រមព្រៀង​ទីក្រុង​ប៉ារីស។ ​

ប៉ុន្តែ​លោក សុខ ឥសាន អះអាង​ថា ញត្តិ​របស់​តំណាងរាស្ត្រ​អូស្ត្រាលី រូប​នេះ​គ្រាន់​តែ​ជា​ញត្តិ​មួយ​ដែល​ធ្វើ​ឡើង​ក្នុង​ន័យ​លំអៀង​គណបក្ស​នយោបាយ​ប៉ុណ្ណោះ៖ «ឥឡូវ​យើង​អនុវត្ត​នីតិរដ្ឋ ហើយ​បើ​យើង​អនុវត្ត​នីតិរដ្ឋ​ហើយ វា​អត់​ខុស​អី​ទេ ពីព្រោះ​ស្រប​ទៅ​នឹង​កិច្ចព្រមព្រៀង​សន្តិភាព​ទីក្រុង​ប៉ារីស ហើយ​វា​ស្រប​ទៅ​តាម​ខ្លឹមសារ​នៃ​រដ្ឋធម្មនុញ្ញ។ ដូច្នេះ​មតិ​របស់​អស់​លោក​ទាំង​ហ្នុង​គ្រាន់តែ​ជា​ការ​លំអៀង​ផ្នែក​នយោបាយ»

​ទោះជា​យ៉ាង​ណា​ក៏ដោយ អ្នក​វិភាគ​ឯករាជ្យ​លោក​បណ្ឌិត ឡៅ ម៉ុងហៃ អះអាង​ថា នីតិរដ្ឋ​របស់​កម្ពុជា មិន​មែន​ជា​នីតិរដ្ឋ​តាម​ប្រទេស​លោក​សេរី​នោះ​ទេ ប៉ុន្តែ​វា​ជា​នីតិរដ្ឋ​របស់​ប្រទេស​កុំមុយនិស​ដែល​គេ​ហៅ​ថា ច្បាប់​សង្គម​និយម ហើយ​ច្បាប់​នេះ​ជា​ឧបករណ៍​អំណាច​មួយ​ក្នុង​ការ​ផ្ដួល​រំលំ​សត្រូវ​ទាំង​ឡាយ​ដែល​ជា​គណបក្ស​នយោបាយ​ជំទាស់​នឹង​ខ្លួន។ ​លោក​បញ្ជាក់​ថា ប្រព័ន្ធ​ច្បាប់​របស់​កម្ពុជា ជា​ប្រព័ន្ធ​ច្បាប់​មួយ​ដែល​មិន​គោរព​សិទ្ធិមនុស្ស ដោយសារ​ក្រុម​ចៅក្រម​ទាំង​នោះ​ជា​សមាជិក​នៃ​គណបក្ស​កាន់​អំណាច។ ដូច្នេះ​ពួកគេ​ត្រូវ​តែ​គោរព និង​ធ្វើ​តាម​គោលនយោបាយ​របស់​បក្ស និង​រដ្ឋាភិបាល។

​អ្នកឃ្លាំមើល​ដំណើរ​ការ​ប្រជាធិបតេយ្យ និង​នីតិរដ្ឋ​រូប​នេះ​អះអាង​ថា ការ​រំលាយ​គណបក្ស​សង្គ្រោះ​ជាតិ ការ​ចាប់​ខ្លួន​លោក កឹម សុខា ការ​ហាម​មន្ត្រី​គណបក្ស​សង្គ្រោះ​ជាតិ ១១៨​នាក់​មិន​ឲ្យ​ធ្វើ​នយោបាយ​រយៈពេល ៥​ឆ្នាំ គឺ​ជា​ភស្តុតាង​យ៉ាង​ច្បាស់​អំពី​ការ​ធ្វើ​ទុក្ខបុកម្នេញ​គណបក្ស​សង្គ្រោះ​ជាតិ ហើយ​ការ​គំរាមកំហែង ការ​បំភិតបំភ័យ​ទៅ​លើ​អ្នក​ការពារ​សិទ្ធិមនុស្ស និង​ក្រុម​អ្នក​រិះគន់​គឺ​ជា​ភស្តុតាង​នៃ​ការ​ធ្វើ​ទុក្ខបុកម្នេញ​ទៅ​លើ​ក្រុម​សង្គម​ស៊ីវិល។

​អង្គការ​គម្រោង​យុត្តិធម៌​ពិភពលោក (World Justice Project-WJP) ដែល​មាន​មូលដ្ឋាន​នៅ​រដ្ឋធានី​វ៉ាស៊ីនតុន កាល​ពី​ចុង​ខែ​មករា បាន​ដាក់​ចំណាត់ថ្នាក់​ប្រទេស​កម្ពុជា ជាប់​លេខ​១១២ ក្នុង​ចំណោម​ប្រទេស​ចំនួន​១១៣ នៅ​ទូទាំង​ពិភពលោក​ដែល​មាន​កេរ្តិ៍ឈ្មោះ​អាក្រក់​នៃ​ការ​មិន​គោរព​នីតិរដ្ឋ ហើយ​ដែល​នាំ​ឲ្យ​កម្ពុជា ធ្លាក់​ទៅ​ក្នុង​របប​ដឹកនាំ​បែប​ផ្ដាច់ការ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

6 Responses to "អ្នកនាំពាក្យ​របស់​បក្ស​កាន់​អំណាច​ថា​កម្ពុជា​មិន​ដែល​ដឹក​នាំ​ខុស​គន្លង​នីតិរដ្ឋ​នោះ​ទេ"

  1. Sam says:

    Sure, please tell first grade students they may believe.

  2. Phan Phan says:

    មន្ត្រីបក្សកាន់អំណាចអះអាងថា ការចាត់វិធានការទៅលើគណបក្សប្រឆាំង សង្គមស៊ីវិល និងប្រព័ន្ធផ្សព្វផ្សាយឯករាជ្យ គឺជាការអនុវត្តនីតិរដ្ឋ ត្រូវហើយគឺអ្នកដឹកនាំសព្វថ្ងៃដឹកនាំតាមគន្លងនិតិរដ្ឋរបស់ពួកផ្តាច់ការ។ ដោយសារប្រទេសយើងមានស្តង់ដាពីរ ទី១គឺស្តង់ដារបស់ក្រុមអ្នកគ្រប់គ្រងផ្តាច់ការ (ដូចជាស្តង់ដារប្រជាធិបតេយ្យរបស់ពួកប៉ុលពតអញ្ចឹង) និង ទី២ស្តង់ដាអន្តរជាតិ។ ចំពោះរបស់មតិមន្ត្រីបក្សកាន់អំណាចដែលថាកម្ពុជាកំពុងដុសខាត់នីតិរដ្ឋ និងលទ្ធិប្រជាធិបតេយ្យនោះ គឺត្រូវហើយគឺគេកំពុងដុសខាត់ឲ្យរលាយនីតិរដ្ឋ និងលទ្ធិប្រជាធិបតេយ្យពិតប្រាកដ ហើយលើកបន្តុបនីតិរដ្ឋ និងលទ្ធិប្រជាធិបតេយ្យក្លែងក្លាយ តាមរយៈគណបក្សទទួលផលចោរកម្មបួនប្រាំនៅក្នុងសភាសព្វថ្ងៃ។

  3. ដារា says:

    បុរសមុខគុជ

  4. miloss says:

    lui quand il récite ses leçons je l’adore .En guise de recompense je lui envoie ce youtube comprendra t il comme c’est un AVIYYA , peut etre la mélodie apaisera ses C…..
    https://www.youtube.com/watch?v=7IgyKa23IAg

  5. people says:

    Cambodia is the fake democracy and have a law of mafia ‘. Everything under veitcong mafia dictator law ‘ they can do anything they wanted and followed order from veitcong mafia dictator one eye.

  6. Anonymous says:

    Sok Ey San, Sok Touch, Sok Kong, Phay Sy Phan, Chheang Von are relative. Their minds are thinking of favor Eastern of Cambodia near Bavet village.
    Sok Touch has PHD in border measurement using measuring Tape.
    Sok Ey San has degree in exaggerating the fact.
    Phay Sy Phan has knowledge of not pay dentist fee of dirty teeth cleaning. One time his boss injects mental health medicine.
    Chheang Von has big mouth such an asshole has knowledge of terrorism accusations.
    Hun Sen has used of all High Education people, what a shame!!!!!!!