លោក ហ៊ុន សែន សម្តែង​ការ​ហួស​ចិត្ត​ដែល​លោក សម រង្ស៊ី ប្តឹង​រឿង​ចំនួន​ចុច “Like” លើ​ហ្វេសប៊ុក​របស់​លោក

ដោយ វណ្ណ សុគន្ធា
13/02/2018
RFI

media
លោក​នាយក​រដ្ឋមន្រ្តី​ ហ៊ុន សែន នៅ​ក្នុង​ពិធី​ប្រគល់​សញ្ញាបត្រ​ដល់​និស្សិត​សកលវិទ្យាល័យ​វេស្ទើន​នៅ​ព្រឹកថ្ងៃទិ ១២ កុម្ភៈ
@Samdech Hun Sen, Cambodian Prime Minister


នៅ​ក្នុង​ពិធី​ប្រគល់​សញ្ញាបត្រ​ដល់​និស្សិត​សកលវិទ្យាល័យ​វេស្ទើន​នៅ​ព្រឹក​នេះ លោក​នាយក​រដ្ឋមន្រ្តី​ហ៊ុន សែន បាន​សម្តែង​ការ​ហួស​ចិត្ត​ដែល​លោក​សម រង្ស៊ី បាន​ប្តឹង​ទៅ​តុលាការ​អាមេរិក​ ដើម្បី​តម្រូវ​ឲ្យ​ក្រុមហ៊ុន​ហ្វេសប៊ុក​បញ្ចេញ​នូវ​ព័ត៌មាន​ពិត​ជុំវិញ​ចំនួន​“Like”​លើ​ទំព័រ​ហ្វេសប៊ុក​របស់​លោក​។ ក្រៅ​ពី​ហួស​ចិត្ត លោកហ៊ុន សែន ថែម​ទាំង​ចាត់​ទុក​សកម្មភាព​របស់​លោក​សម រង្ស៊ី​នេះ​ថា ជា​ទង្វើ​មនុស្ស “ឆ្កួត” ទៀត​ផង។

ជា​ការ​ឆ្លើយ​តប​ទៅ​កាន់​លោក​សម រង្ស៊ី អតីត​ប្រធាន​បក្ស​ប្រឆាំង​វិញ លោក​នាយក​រដ្ឋមន្រ្តី​ហ៊ុន សែន បាន​លើក​ឡើង​បែប​ហួស​ចិត្ត​ថា លោក​មិន​ដឹង​ថា ចំនួន​ចុច “Like”​នៅ​លើ​ទំព័រ​ហ្វេសប៊ុក​របស់​លោក​មក​ពី​ណា​នោះ​ទេ។ លោក​ហ៊ុន សែន ថែម​ទាំង​បញ្ជាក់​ដែរ​ថា ការ​បង្វិល​ការ​ចុច​“Like”​ពី​ទំព័រ​ហ្វេសប៊ុក​លោក​សម រង្ស៊ី​មក​កាន់​ទំព័រ​ហ្វេសប៊ុក​របស់​លោក​នោះ គឺ​វា​មិន​អាច​ទៅ​រួច​នោះ​ទេ​ ហើយ​បើ​អាច​ទៅ​រួច​វិញ គឺ​ជា​ការ​ទទួល​ខុស​ត្រូវ​របស់​ម្ចាស់​ក្រុមហ៊ុន​ហ្វេសប៊ុក​ទេ​តើ មិន​មែន​លោក​ឯណា​ឡើយ។

អតីត​ប្រមុខ​បក្ស​ប្រឆាំង​លោក​សម រង្ស៊ី កាល​ពី​ថ្ងៃ​ទី​០៨ កុម្ភៈ តាម​រយៈ​មេធាវី​អាមេរិកាំង​បាន​ដាក់​ពាក្យ​បណ្តឹង​មួយ​ទៅ​កាន់​តុលាការ​ថ្នាក់​សង្កាត់​នៃ​ភាគ​ខាង​ជើង​រដ្ឋ California សហរដ្ឋ​អាមេរិក​ដោយ​ប្តឹង​ឲ្យ​ក្រុមហ៊ុន​ហ្វេសប៊ុក​បញ្ចេញ​នូវ​ព័ត៌មាន​ពិត​ជុំវិញ​ចំនួន​“Like”​លើ​ទំព័រ​ហ្វេសប៊ុក​របស់​លោក​ហ៊ុន សែន។ លោក​សម រង្ស៊ី បាន​ចោទ​លោក​នាយក​រដ្ឋមន្រ្តី​កម្ពុជា​ហ៊ុន សែន ថាបានបង្កើតចំនួន​“Like”​ក្លែង​ក្លាយ​រាប់​លានលើ​ទំព័រ​ហ្វេសប៊ុក​ ដើម្បី​បង្កើន​ប្រជាប្រិយ​ភាព​របស់​លោក។

ចំពោះ​បញ្ហា​នេះ លោក​នាយក​រដ្ឋមន្រ្តី​ហ៊ុន សែន​ បាន​សើច​ចំអក​ទៅ​លើ​លោក​សម រង្ស៊ី ដោយ​លើក​ឡើង​ថា លោក​សម រង្ស៊ី គ្រាន់​តែ​លេង​ហ្វេសប៊ុក​ចាញ់​លោក​សោះ​ក៏​មក​រក​រឿង​លោក​ដែរ។ មិន​តែ​ប៉ុណ្ណោះ លោក​ហ៊ុន សែន ក៏​បាន​ថែម​ទាំង​ប្រើ​ពាក្យ​ធ្ងន់ៗ​អសុរស​ហៅ​ទង្វើ​របស់​លោក​សម រង្ស៊ី​នេះ​ថា “ឆ្កួត​ឡប់” ទៀត។ ចំណែក​លោក​សម រង្ស៊ី​វិញ លោក​ថា​ប្រសិន​បើ​លោក​ហ៊ុន សែន គ្មាន​អ្វី​ត្រូវ​លាក់​បាំង​ទេនោះ គឺ​គួរ​តែ​គាំទ្រ​ការ​ស៊ើប​អង្កេត​លើ​បញ្ហា​នេះ។ លោក​​ថា ប្រជាពលរដ្ឋ​កម្ពុជា និង​សហគមន៍​អន្តរជាតិ​ត្រូវ​ការ​ដឹង​ពីការ​ពិត។

សូម​ជំរាប​ជូន​ថា​រឿង​ពាក់​ព័ន្ធ​នឹង​ហ្វេសប៊ុក​នេះ លោក​សម រង្ស៊ី ធ្លាប់​ចាញ់​ក្តី​លោក​សោម សឿន រដ្ឋមន្ត្រី​ប្រតិភូអម​នាយក​រដ្ឋមន្ត្រី​ម្តង​រួច​មក​ហើយ​នៅ​តុលាការ​កម្ពុជា។ កាល​ណោះ​លោក​សម រង្ស៊ី ត្រូវ​បាន​តុលាការ​តម្រូវ​ឲ្យ​បង់​ប្រាក់​ជំងឺ​ចិត្ត​ចំនួន​១៥​លាន​រៀល​ឲ្យ​ទៅ​ដើម​បណ្តឹង បន្ទាប់​ពី​លោក​បាន​ចោទ​ប្រកាន់​លោក​សោម សឿន ថា​បាន​រៀប​ចំ​បង្កើត​ឲ្យ​មាន​គណនី​ហ្វេស​ប៊ុក​ក្លែង​ក្លាយ ដើម្បី​យក​ទៅ​ចុច“like”លើ​ទំព័រ​ហ្វេស​ប៊ុក​របស់​លោក​នាយក​រដ្ឋមន្រ្តី​ហ៊ុន សែន។ ទំព័រ​ហ្វេស​ប៊ុក​របស់​លោក​នាយក​រដ្ឋមន្រ្តី​ហ៊ុន សែន គិត​មក​ដល់​ពេល​នេះ​មាន​ចំនួន​អ្នក​ចុច​“like” ជាង​៩​លាន​នាក់​ហើយ រី​ឯ​ទំព័រ​ហ៊្វេសប៊ុក​របស់​លោក​សម រង្ស៊ី​វិញ​មាន​ចំនួន​អ្នក​ចុច​“like”​ជាង​៤​លាន​នាក់​កន្លះ​តែ​ប៉ុណ្ណោះ៕

What Next?

Recent Articles

3 Responses to "លោក ហ៊ុន សែន សម្តែង​ការ​ហួស​ចិត្ត​ដែល​លោក សម រង្ស៊ី ប្តឹង​រឿង​ចំនួន​ចុច “Like” លើ​ហ្វេសប៊ុក​របស់​លោក"

  1. អ្នកប្រុសថាង says:

    ខ្ញុំមិនគាំទ្រខាងណាក៏មិនកាន់ជើងខាងណាដែរ! ប៉ុន្តែការចោទរបស់លោកសមរង្សីមកលើលោកនាយករដ្ឋមន្រ្តីទាក់ទងរឿងចំនួនLikeនៅក្នុងfacbookគឺជារឿងដែរឥតប្រយោជន៍ជាទីបំផុត។ បើគាត់ចោទរឿងផ្សេងៗពីហ្នឹងវិញដូចជារឿងព្រៃឈើ ព្រំដែន ការបាត់បង់ធនធានធម្មជាតិ ជនអន្តោប្រវេសខុសច្បាប់គឺវាល្អជាងទោះការចោទជារឿងពិតរឺក៏មិនពិតក៏ដោយក៏វាចំណេញដល់ជាតិដែរប្រសើរជាងមកឈ្លោះដោយសាររឿងLikeទៅវិញ។វាមិនខុសពីមនុស្សស្រីដែរខំប្រឹងស្លៀកលេចលើលេចក្រោមដើម្បីអៅយគេLikeនោះទេរ។

  2. Anonymous says:

    ព្រោះប្តឹងនេះត្រូវចំនុចខ្សោយទើបបានជាគាត់ខឹង។ ការប្តឹងនេះអាចឲ្យក្រុមហ៊ុនហ្វេសប៊ុកជាភាគីទី៣ដែលឯករាជ្យរកភស្តុតាងបង្ហាញការពិត ម្យ៉ាងដើម្បីដោះបន្ទុកការចោទនៅតុលាការផង។ ព្រោះពេលនេះមិនទាន់អាចយកភស្តុតាងផ្សេងនៃបទល្មើសរបស់គាត់ដែលមានច្រើនសន្ធឹកសន្ធាប់ក្នុងប្រទេសទៅប្តឹងនៅបរទេសដោយគ្មានភាគីទី៣ដែលឯករាជ្យដឹងលឺនោះឡើយ មិនអញ្ចឹងទេ ច្បាស់ជាភស្តុងតាងនោះគ្មានន័យ ព្រោះ គ្នីគ្នាគាត់ថាភស្តុតាងក្នុងប្រទេសមិនពិតទាំងអស់ហ្នឹង។ ចេះប្រឌិតពីខ្មៅទៅជាស សទៅជាខ្មៅ បានដូចចិត្ត។

  3. people says:

    Here we go again’ this case mr sen will ask the king for forgiveness ‘then mr sy come back to cvambodia and the vote for P M will be accepted by international’ and then mr sen still win because NEC is belong to cpp so this is is the KI_LOURNG of mr sen and mr sy’ . GOD bless all cambodian people’