ដោយ វណ្ណ សុគន្ធា
25/02/2018
RFI
ស្លាកសញ្ញារបស់អតីតគណបក្សសង្រ្គោះជាតិ។
@បណ្តាញសង្គម
នៅថ្ងៃបោះឆ្នោតជ្រើសតាំងសមាជិកព្រឹទ្ធសភានេះ ក្រុមថ្នាក់ដឹកនាំអតីតគណបក្សប្រឆាំងនៅក្រៅប្រទេស បានចេញសេចក្តីថ្លែងការណ៍មួយដោយបន្តប្រើប្រាស់ឡូហ្គោគណបក្សសង្គ្រោះជាតិប្រឆាំងនឹងការរៀបចំការបោះឆ្នោតនៅថ្ងៃអាទិត្យនេះ។ មិនតែប៉ុណ្ណោះ ពួកគេក៏បានប្រកាសបដិសេធទាំងស្រុងចំពោះលទ្ធផលនៃការបោះឆ្នោតនេះទៀតផង។
គឺនៅក្នុងសេចក្តីថ្លែងការណ៍មួយដែលប្រើប្រាស់បែបបទរដ្ឋបាលរបស់អតីតគណបក្សសង្គ្រោះជាតិ ក្រុមថ្នាក់ដឹកនាំអតីតបក្សប្រឆាំងនៅបរទេសបានលើកមូលហេតុបីដែលពួកគេប្រឆាំង និងបដិសេធលលទ្ធផលបោះឆ្នោតព្រឹទ្ធសភានេះ។ ទី១. គឺសមាសភាពគណៈកម្មាធិការជាតិរៀបចំការបោះឆ្នោតកើតឡើងដោយមិនស្របច្បាប់ និងផ្ទុយពីស្មារតីរដ្ឋធម្មនុញ្ញនៃប្រទេសកម្ពុជា។ ទី២. ពួកគេចាត់ទុកថា អង្គបោះឆ្នោតដែលជាតំណាងរាស្ត្រនិងក្រុមប្រឹក្សាឃុំ-សង្កាត់ចំនួន៥.០៦២រូប ពុំមែនជាតំណាងឆន្ទៈរបស់ប្រជាពលរដ្ឋដែលកើតចេញពីការបោះឆ្នោតជ្រើសតាំងដោយផ្ទាល់ពីប្រជាពលរដ្ឋឡើយ។ និងទី៣. ពួកគេអះអាងថា ដោយសារតែអវត្តមានគណបក្សសង្គ្រោះជាតិ។ គណបក្សសង្គ្រោះជាតិ ដែលត្រូវបានតុលាការកំពូលកម្ពុជារំលាយចោលបាត់ទៅហើយ កាលពីខែ វិច្ឆិកា ឆ្នាំ២០១៧ កន្លងទៅ។
ចំពោះសេចក្តីថ្លែងការណ៍នេះ គណបក្សនយោបាយពីរដែលបានចូលរួមក្នុងការបោះឆ្នោតព្រឹទ្ធសភាបានចេញមុខមកប្រតិកម្ម។ សម្រាប់គណបក្សហ្វ៊ុនស៊ិនប៉ិច លោកញ៉ែប ប៊ុនជិន ដែលជាអ្នកនាំពាក្យគណបក្សបានចាត់ទុកសេចក្តីថ្លែងការណ៍នេះថា ជារឿងខុសច្បាប់ និងព្យាយាមបំផ្លាញដល់បរិយាកាសនៃការបោះឆ្នោតជ្រើសតាំងសមាជិកព្រឹទ្ធសភា។ ចំណែកគណបក្សយុវជនកម្ពុជាវិញ លោកពេជ្រ ស្រស់ ដែលជាប្រធានគណបក្សបានអះអាងថា សេចក្តីថ្លែងការណ៍នេះបានឆ្លុះបញ្ចាំងថាក្រុមថ្នាក់ដឹកនាំអតីតបក្សសង្គ្រោះជាតិបានរំលោភបំពាននូវព្រះរាជកិច្ចរបស់ព្រះមហាក្សត្រខ្មែរនិងច្បាប់យ៉ាងធ្ងន់ធ្ងរបំផុត ដោយហេតុថាគណបក្សសង្គ្រោះជាតិបានស្លាប់ដោយច្បាប់ ហើយច្បាប់មានសុពលភាពគឺដោយសារតែអង្គព្រះមហាក្សត្រឡាយព្រហស្ថអនុញ្ញាតឲ្យប្រើប្រាស់។
បើទោះបីមានការប្រកាសប្រឆាំង និងបដិសេធលទ្ធផលបោះឆ្នោតព្រឹទ្ធសភាពីក្រុមថ្នាក់ដឹកនាំអតីតគណបក្សសង្គ្រោះជាតិនៅក្រៅប្រទេសក៏ដោយ ក៏ដំណើរការបោះឆ្នោតនេះនៅតែប្រព្រឹត្តទៅដោយរលូនដូចការគ្រោងទុក។ តែទោះយ៉ាងណា ក្រុមថ្នាក់ដឹកនាំអតីតគណបក្សសង្គ្រោះជាតិនៅក្រៅប្រទេសបានអំពាវនាវឲ្យប្រទេសជាមិត្តរបស់កម្ពុជា និងអង្គការសហប្រជាជាតិកុំទទួលស្គាល់លទ្ធលនៃការបោះឆ្នោតនេះ។ ក៏ប៉ុន្តែគណៈកម្មការធិការជាតិរៀបចំការបោះឆ្នោត ក៏ដូចរដ្ឋាភិបាលកម្ពុជា ធ្លាប់បានបញ្ជាក់ហើយថា លទ្ធផលនៃការបោះឆ្នោតនៅកម្ពុជា មិនសំខាន់ប្រទេសណាទទួលស្គាល់ឬក៏អត់នោះទេ តែសំខាន់ឲ្យតែមានពីការចូលរួម និងទទួលស្គាល់ពីពលរដ្ឋខ្មែរគឺគ្រប់គ្រាន់ហើយ៕