ចលនា​សង្រ្គោះ​ជាតិ​របស់​លោក​សម រង្ស៊ី​គ្រោង​ស្នើ​ឲ្យ​កង​ទ័ព​និង​មន្រ្តី​រាជការ​ឈប់​គាំទ្រ​បក្ស​កាន់​អំណាច

ដោយ វណ្ណ សុគន្ធា
20/03/2018
RFI

media
កិច្ចប្រជុំ​របស់​លោកសម រង្ស៊ី ស្តីពីការបង្កើត ចលនាសង្គ្រោះជាតិនា​ពេល​កន្ល​ង​មក (fb)
fb


តាំង​ពី​ថ្ងៃ​សុក្រ​សប្តាហ៍​មុន​មក ចលនា​សង្រ្គោះ​ជាតិ​របស់​លោក​សម រង្ស៊ី ដែល​រដ្ឋាភិបាល​កម្ពុជា​ហៅ​ថា​ជា​ "ចលនា​ខុស​ច្បាប់" ​នោះ បាន​អំពាវនាវ​​អោយ​ពលរដ្ឋ​ខ្មែរ​ឈប់​ចាក់​សាំង​តេលា។ យុទ្ធនាការ​ទី​២​នេះ​ធ្វើ​ឡើង​ក្រោយ​ពី​ចលនា​នេះ បាន​អំពាវនាវ​កុំ​ឲ្យ​ពលរដ្ឋ​បរិភោគ​ទឹក​បរិសុទ្ធ​ម៉ាក​វីតាល់។ ក៏​ប៉ុន្តែ​យុទ្ធនាការ​ទាំង​ពីរ​នេះ គេ​នៅ​មិន​ទាន់​ដឹង​ថា​ទទួល​បាន​ជោគ​ជ័យ​ឬ​យ៉ាង​ណា​នៅ​ឡើយ​ទេ។ ចំណែក​យុទ្ធនាការ​បន្ទាប់​ទៀត ចលនា​សង្រ្គោះ​ជាតិ​គ្រោង​នឹង​អំពាវនាវ​ឲ្យ​កង​ទ័ព និង​មន្ត្រី​រាជការ​ឈប់​គាំទ្រ​បក្ស​កាន់​អំណាច តែ​អ្នក​នាំ​ពាក្យ​បក្ស​នេះ​តប​វិញ​ថា ជា​ការ​អំពាវនាវ​អត់​ប្រយោជន៍។

អគ្គលេខាធិការ​ចលនា​សង្រ្គោះ​ជាតិ គឺ​លោក​រី គា បាន​ថ្លែង​ប្រាប់​វិទ្យុ​បារាំង​អន្តរជាតិ​នៅ​ថ្ងៃ​អង្គារ​នេះ​ថា ចលនា​សង្រ្គោះ​ជាតិ​គ្រោង​នឹង​អំពាវនាវ​ឲ្យ​ប្រជាពលរដ្ឋ​ខ្មែរ​ទាំង​អស់​រក្សា​នូវ​ភាព​ស្ងៀម​ស្ងាត់​ហើយ​នៅ​ជាមួយ​ប្រជាជន និង​អ្នក​ប្រជាធិបតេយ្យ ពោល គឺ​ឈប់​គាំទ្រ​គណបក្ស​ប្រជាជន​កម្ពុជា​ដែល​កំពុង​កាន់​អំណាច​បច្ចុប្បន្ន​​ត​ទៅ​ទៀត។ តាម​លោក​រី គា យុទ្ធនាការ​នេះ នឹង​ត្រូវ​អំពាវនាវ​ជា​ផ្លូវ​ការ​តាម​រយៈ​វីដេអូ​ខ្លីប​នៅ​តាម​បណ្តា​សង្គម​នៅ​ពេល​ប៉ុន្មាន​ថ្ងៃ​ខាង​មុខ​នេះ ខណៈ​ដែល​លោក​សម រង្ស៊ី ដែល​ជា​ប្រមុខ​ចលនា​សង្រ្គោះ​ជាតិ បាន​ចេញ​វីដេអូ​អំពាវនាវ​ដល់​កង​ទ័ព​រួច​ទៅ​ហើយ។ ទោះ​បី​ជា​យ៉ាង​ណា​ក៏​ដោយ លោក​រី គា បាន​គូស​បញ្ជាក់​ថា ការ​អំពាវនាវ​នេះ​មិន​មែន​ឲ្យ​កង​ទ័ព និង​មន្រ្តី​រាជការ​ក្រោក​បះ​បោរ​ប្រឆាំង​នឹង​រដ្ឋាភិបាល​កម្ពុជា​ឡើយ។

លោក​សុខ ឥសាន​ដែល​ជា​អ្នក​នាំ​ពាក្យ​គណបក្ស​ប្រជាជន​កម្ពុជា​បាន​ចាត់​ទុក​ការ​អំពាវនាវ​នេះ​ថា គ្មាន​ប្រយោជន៍ និង​គ្មាន​ប្រសិទ្ធភាព​នោះ​ទេ។ លោក​ថា គ្មាន​ប្រជាពលរដ្ឋ​កម្ពុជា​ណា​ទៅ​ស្តាប់​តាម​ការ​អំពាវនាវ​របស់​ចលនា​សង្រ្គោះ​ជាតិ​ដែល​មាន​លោក​សម រង្ស៊ី​ជា​ប្រមុខ​នោះ​ទេ។ នេះ​ក៏​ព្រោះ​ថា លោក​សម រង្ស៊ី ត្រូវ​បាន​រដ្ឋាភិបាល​កម្ពុជា​ចាត់​ទុក​ថា ជា​ជន​ក្បត់​ជាតិ ដែល​បើ​តាម​លោក​សុខ ឥសាន គឺ​អស់​តម្លៃ​ដើម្បី​ឲ្យ​ប្រជាពលរដ្ឋ​ស្តាប់​តាម​ទៅ​ហើយ។ សម្រាប់​លោក​សុខ ឥសាន នៅ​ពេល​នេះ ប្រជាពលរដ្ឋ​ខ្មែរ​កំពុង​រស់​នៅ​យ៉ាង​សុខ​សាន្ត​ក្រោម​ការ​ដឹក​នាំ​របស់​រដ្ឋាភិបាល​របស់​គណបក្ស​ប្រជាជន​កម្ពុជា។

គេ​នៅ​​ចាំ​បាន​ថា ដោយ​សារ​តែ​ការ​អំពាវនាវ​ឲ្យ​កង​ទ័ព​ឈប់​គាំទ្រ​បក្ស​កាន់​អំណាច និង​ប្រឆាំង​រដ្ឋាភិបាល​កម្ពុជា​នេះ​ហើយ លោក​សម រង្ស៊ី ធ្លាប់​ត្រូវ​បាន​ប្រមុខ​កង​ទ័ព​ខ្មែរ​ដាក់​ពាក្យ​ប្តឹង​ទៅ​កាន់​តុលាការ​សាលា​ដំបូង​រាជធានី​ភ្នំពេញ​ម្តង​រូច​ហើយ។ បន្ថែម​លើ​នេះ ប្រមុខ​កង​ទ័ព និង​មន្រ្តី​សំខាន់ៗ​ផ្សេង​ទៀត​នៅ​ក្នុង​ជួរ​ដ្ឋាភិបាល​កម្ពុជា ក៏​ចេញ​មុខ​ថ្កោល​ទោស​លោក​សម រង្ស៊ី​ជា​បន្ត​បន្ទាប់។ បន្ថែម​លើ​នេះ នៅ​ពេល​នេះ លោក​សម រង្ស៊ី ក៏​កំពុង​រង​នូវ​បណ្តឹង​ពី​បទ​ក្បត់​ជាតិ​នៅ​តុលាការ​ខ្មែរ​មួយ​ទៀត​ដែរ ដោយ​លោក​ត្រូវ​បាន​រដ្ឋាភិបាល​កម្ពុជា​ចោទ​ថា បាន​ចុះ​ហត្ថលេខា​កាត់​ខេត្ត​របស់​ខ្មែរ​ចំនួន​៤​ឲ្យ​ទៅ​ក្រុម​ជន​ជាតិ​ភាគ​តិច​វៀតណាម ប្រសិន​បើ​គណបក្ស​សង្រ្គោះ​ជាតិ​បាន​ដឹក​នាំ​រដ្ឋាភិបាល​នោះ។

យ៉ាង​ណា​ក៏​ដោយ លោក​សុខ ឥសាន បាន​ព្រមាន​ជា​មុន​ទៅ​កាន់​លោក​សម រង្ស៊ី​ថា ប្រសិន​បើ​លោក​សម រង្ស៊ី នៅ​តែ​បន្ត​ធ្វើ​សកម្មភាព​អំពាវនាវ​ឲ្យ​កង​ទ័ព​ប្រឆាំង​នឹង​រដ្ឋាភិបាល​កម្ពុជា​ត​ទៅ​ទៀត​ នោះ​មេ​ដឹក​អតីត​បក្ស​ប្រឆាំង​រូប​នេះ​នឹង​មាន​ពិរុទ្ធភាព​កាន់​តែ​ខ្លាំង​ឡើង​ថែម​ទៀត៕

What Next?

Recent Articles

One Response to "ចលនា​សង្រ្គោះ​ជាតិ​របស់​លោក​សម រង្ស៊ី​គ្រោង​ស្នើ​ឲ្យ​កង​ទ័ព​និង​មន្រ្តី​រាជការ​ឈប់​គាំទ្រ​បក្ស​កាន់​អំណាច"

  1. people says:

    It useless ‘ mr SY CNRM not work with iron first of veitcong mafia dictator’ and don’t expected all theses soldiers follow you mr sy’ specially most of top royal army are the veitcong agents and they only waiting to kill khmer from Angka lour hanoi ‘not from you mr sy .Veitcong mafia dictator and his group control all army and these army only listen to veitcong mafia dictator ‘. GOD bless all good people’