ដោយ លោក ណាត សុភាព | ថ្ងៃអង្គារ ទី២០ ខែមីនា ឆ្នាំ២០១៨
http://vodhotnews.com
ពលករខ្មែរធ្វើការនៅថៃ
អាជ្ញាធរថៃបានព្រមានចាត់វិធានការលើពលករកម្ពុជាទាំងអស់នៅចុងខែមីនានេះ ដោយថា បើបន្តស្នាក់នៅ និងធ្វើការដោយខុសច្បាប់ នៅក្នុងប្រទេសថៃ។
ក្នុងសេចក្តីប្រកាសព័ត៌មាន កាលពីថ្ងៃម្សិលមិញនេះ ស្ថានទូតកម្ពុជាប្រចាំប្រទេសថៃ បានប្រកាសថា អាជ្ញាធរថៃនឹងបិទដំណើរការបន្តសុភាពប័ណ្ណស្នាក់នៅ និងធ្វើការបណ្តោះអាសន្ន(ប័ណ្ណស៊ីជម្ពូ និងលិខិតបញ្ជាក់ទំនាក់ទំនងរវាងថៅកែ និងពលករ)នៅត្រឹមថ្ងៃទី៣១ ខែមីនានេះ។
ករណីនេះ ស្ថានទូតកម្ពុជា បានអំពាវនាវទៅកម្មករកម្ពុជាទាំងអស់ដែលកំពុងស្នាក់នៅ និងធ្វើការបណ្តោះអាសន្នក្នុងប្រទេសថៃ ត្រូវទៅបន្តសុពលភាពនៅការិយាល័យច្រកចេញចូលតែមួយរបស់ភាគីថៃតាមបណ្តាខេត្ត-ក្រុងដែលពួកគេស្នាក់នៅ និងធ្វើការ យ៉ាងយូរចុងខែមីនានេះ ដោយថា បើមិនទៅធ្វើទេ អាជ្ញាធរថៃនឹងចាត់វិធានការច្បាប់។
ក្រសួងការងារកម្ពុជា បានលើកឡើងក្នុងសេចក្តីប្រកាសព័ត៌មានកាលពីចុងឆ្នាំមុនថា បច្ចុប្បន្នពលករចំណាកស្រុកកម្ពុជាដែលទទួលបានភាពស្របច្បាប់ធ្វើការនៅថៃ មានចំនួនប្រមាណ ១៧ម៉ឺននាក់ប៉ុណ្ណោះ ខណៈនៅសល់ជាង ៤២ម៉ឺននាក់ទៀតពុំទាន់ទទួលបានភាពស្របច្បាប់នៅឡើយ៕