សមត្ថកិច្ច​ខេត្ត​កំពត​ចាប់ខ្លួន​បុរស​ចាស់​ម្នាក់​ក្រោយ​ការ​បញ្ជា​របស់​លោក ហ៊ុន សែន

ដោយ អាស៊ីសេរី
2018-03-21

បុរស​វ័យ​ចំណាស់​ឈ្មោះ ម៉ារី ត្រូវ​សមត្ថកិច្ច​​ចាប់ខ្លួន​​សាកសួរ​នៅ​ស្នងការដ្ឋាន​នគរបាល​ខេត្ត​កំពត បន្ទាប់​ពី​មាន​បទ​បញ្ជា​របស់​លោក ហ៊ុន សែន នៅ​ថ្ងៃ​ទី២១ ខែ​មីនា ឆ្នាំ​២០១៨។ Photo Facebook
បុរស​វ័យ​ចំណាស់​ឈ្មោះ ម៉ារី ត្រូវ​សមត្ថកិច្ច​​ចាប់ខ្លួន​​សាកសួរ​នៅ​ស្នងការដ្ឋាន​នគរបាល​ខេត្ត​កំពត បន្ទាប់​ពី​មាន​បទ​បញ្ជា​របស់​លោក ហ៊ុន សែន នៅ​ថ្ងៃ​ទី២១ ខែ​មីនា ឆ្នាំ​២០១៨។ Photo Facebook


សមត្ថកិច្ច​ខេត្ត​កំពត​បាន​ចាប់ខ្លួន​បុរស​វ័យ​ចំណាស់​ម្នាក់​ភ្លាមៗ ក្រោយ​ពី​មាន​ការ​បញ្ជា​របស់​លោក ហ៊ុន សែន ដែល​ចោទប្រកាន់​បុរស​នោះ​ថា ផ្សព្វផ្សាយ​ព័ត៌មាន​មិន​ពិត​ថា លោក ហ៊ុន សែន បរាជ័យ​ទាំងស្រុង​ក្នុង​កិច្ចប្រជុំ​កំពូល អាស៊ាន​អូស្ត្រាលី។

ស្នងការ​នគរបាល​ខេត្ត​កំពត លោក​ឧត្ដមសេនីយ៍​ទោ ម៉ៅ ច័ន្ទមធុរិទ្ធ ត្រូវ​កាសែត​ក្នុង​ស្រុក​ដកស្រង់​សម្ដី​ថា សមត្ថកិច្ច​បាន​ចាប់ខ្លួន​បុរស​ឈ្មោះ ម៉ារី អាយុ ៧២​ឆ្នាំនេះ នៅ ភូមិ​ព្រែកគ្រឹះ ឃុំ​ព្រែកគ្រឹះ ស្រុក​កំពង់ត្រាច ខេត្ត​កំពត ដើម្បី​មក​សាកសួរ​នៅ​ស្នងការដ្ឋាន​នគរបាល​ខេត្ត​កំពត ព្រោះ​ជនសង្ស័យ​នេះ​បាន​ដើរ​និយាយ​ភូត​កុហក​ថា ដំណើរ​ទស្សនកិច្ច​របស់​លោក ហ៊ុន សែន ទៅ​ប្រទេស​អូស្ត្រាលី​ទទួល​ភាព​បរាជ័យ​ទាំងស្រុង។

ចំណាត់ការ​របស់ លោក ហ៊ុន សែន នៅ​ពេល​នេះ​គឺ​ក្រោយពេល​លោក​បរាជ័យ​មិនបាន​តាម​វាយ​ពលរដ្ឋ​ខ្មែរ​នៅ​អូស្ត្រាលី ដែល​ដុត​រូប​ទីង​ម៉ោង​លោក​ដល់​ផ្ទះ ប៉ុន្តែ​មេដឹកនាំ​ក្រាញ​អំណាច​រូប​នេះ បែរ​បង្ហាញ​ការ​ខឹង​សម្បា​ទៅ​នឹង​បុរស​វ័យ​ចំណាស់​ម្នាក់​ដែល​និយាយ​ថា លោក​បរាជ័យ​ក្នុង​កិច្ចប្រជុំ​កំពូល​អាស៊ាន​-​អូស្ត្រាលី និង​ថែម​រត់គេច​ពី​អ្នកកាសែត។

លោក ហ៊ុន សែន និយាយ​ទាំង​ញ័រ​មាត់​ក្នុង​ពេល​ចុះ​ជួប​កម្មករ​ថ្ងៃ​ទី​២១ ខែ​មីនា ថា ការ​និយាយ របស់​បុរស​ម្នាក់​នេះ យក​ការងារ​ជាតិ​មក​ភូត​កុហក​ដែល​នេះ​មិនមែន​ជា​សិទ្ធិ​នៃ​ការ​ធ្វើ​ព័ត៌មាន​ទេ ប៉ុន្តែ​សកម្មភាព​នេះ​គឺ​ការ​ធ្វើ​ចារកម្ម៖ «យើង​បាន​ស្គាល់​លោក​ឯង​ហើយ អភិបាលខេត្ត​កែប តាម​អាណឹង​មួយថ្ងៃ​ហ្នឹង តាម​រក​អា​មួយ​ហ្នឹង»

លោក ហ៊ុន សែន ក៏​បាន​អួតអាង​ថា កិច្ចប្រជុំ​កំពូល​អាស៊ាន​-​អូស្ត្រាលី នៅ​ប្រទេស​អូស្ត្រាលី កាលពី​ចុង​សប្ដាហ៍​មុន​គឺ​មាន​ពលរដ្ឋ​ខ្មែរ​មក​គាំទ្រ និង​ស្កាត់​ជួប​លោក​ជាង​មួយ​ពាន់​នាក់ ប៉ុន្តែ អ្នកធ្វើ​បាតុកម្ម​ប្រឆាំង​រូប​មានតែ​ជាង​មួយ​រយ​នាក់​ប៉ុណ្ណោះ។

ប៉ុន្តែ​ផ្ទុយ​ពី​ការ​អះអាង​របស់​លោក ហ៊ុន សែន អ្នករាយការណ៍​ព័ត៌មាន​វិទ្យុ​អាស៊ីសេរី​ដែល​ចុះ ទៅ​យក​ព័ត៌មាន​នៅ​ប្រទេស​អូស្ត្រាលី​ដែរ​នោះ មើល​ឃើញ​ថា កិច្ចប្រជុំ​ដដែល​នោះ គឺ​ពិតជា​បាន​ញាំញី​ដោយ​បាតុកម្ម​ប្រឆាំង ក្រុម​មេដឹកនាំ​ផ្ដាច់ការ​មកពី​អាស៊ាន ពិសេស​កម្ពុជា។

ជាង​នេះ​ទៅ​ទៀត ក្រុម​បាតុករ​ប្រឆាំង​នឹង​វត្តមាន​លោក ហ៊ុន សែន គឺ​មាន​ច្រើនជាង​ក្រុម​បាតុករ​មកពី​ប្រទេស​ផ្សេងទៀត ដែល​អ្នក​ទាំងនោះ​មាន​ជាង​មួយ​ពាន់​នាក់ មិន​ដូច​ការ​និយាយ​របស់​លោក ហ៊ុន សែន ឡើយ។

មន្ត្រី​ស៊ើបអង្កេត​នៃ​សមាគម​ការពារ​សិទ្ធិមនុស្សអាដហុក (Adhoc) លោក ហេង ភារៈ ប្រាប់​ថា លោក​មិនទាន់​ដឹង​ពី​មូលហេតុ​ដែល​សមត្ថកិច្ច​ចាប់ខ្លួន​បុរស​ឈ្មោះ ម៉ារី នេះ​នៅឡើយ​ទេ។ លោក​ថា សមាគម​អាដហុក កំពុង​ឃ្លាំមើល​ករណី​នេះ និង​តាមដាន​ដំណើររឿង​ដោយ​យកចិត្តទុកដាក់​ព្រោះ​សំណុំរឿង​ប៉ះពាល់​និង​លោក ហ៊ុន សែន៖ «អាដហុក​កំពុង​តែ​បន្ត​ឃ្លាំ​មើល​ថា​តើ ជា​ករណី​អ្វី​ពិត​ប្រាកដ ថា​តើ​ការ​ឃាត់ខ្លួន​ជា​ករណី​អ្វី​ពិតប្រាកដ»

នេះ​មិនមែន​ជា​លើកទីមួយ​ទេ​ដែល​របប​លោក ហ៊ុន សែន ចាប់ខ្លួន​ពលរដ្ឋ​របស់​ខ្លួន​ដែល​ហ៊ាន​និយាយ​រិះគន់ និង​និយាយ​ពី​ចំណុច​អវិជ្ជមាន​របស់​របប​លោក។ កាល​ពី​ពេល​ថ្មី​នេះ ស្ត្រី​ម្នាក់ ឈ្មោះ សំ សុខា ដែល​បាន​រត់គេច​ខ្លួន​ទៅដល់​ប្រទេស​ថៃ ករណី​យក​ស្បែកជើង​គប់​រូបលោក ហ៊ុន សែន និង​រូបលោក ហេង សំរិន ត្រូវ​របប​លោក ហ៊ុន សែន សហការ​ជាមួយ​សមត្ថកិច្ច​ថៃ​ចាប់​បញ្ជូន​ខ្លួន​ទៅ​ដាក់​ពន្ធនាគារ​នៅ​ប្រទេស​កម្ពុជា​វិញ ទោះបី​លោកស្រី​ទទួល​បាន​សិទ្ធិ​ជា​ជនភៀសខ្លួន​ក៏​ដោយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles