ដោយ តាំង សារ៉ាដា
2018-04-25
RFA
រូបថតអត់មានកាលបរិច្ឆេទរបស់ប៉ូលិសកម្ពុជា បង្ហាញពីសមាជិករណសិរ្សរំដោះជាតិខ្មែរជាមួយ លោក សម សេរី (ឈរកណ្ដាល)។ Photo courtesy of Cambodian National Police
សមត្ថកិច្ចនៃរដ្ឋាភិបាលយោធាថៃ នៅថ្ងៃពុធទី២៥មេសានេះ បានឃាត់ខ្លួន ប្រធានចលនារណសិរ្សរំដោះជាតិខ្មែរ លោក សម សេរី ដែលកំពុងមានវត្តមាននៅប្រទេសថៃ ក្រោយពីមេដឹកនាំឯកបក្ស លោក ហ៊ុន សែន ប្រកាសចោទប្រកាន់មេដឹកនាំចលនា រណសិរ្សរំដោះជាតិខ្មែររូបនេះថា មានបំណងដាក់គ្រាប់បែកបំផ្ទុះ នៅម្ដុំវត្តភ្នំ និងក្នុងខេត្តសៀមរាប កាលពីអំឡុងពេលបុណ្យចូលឆ្នាំកន្លងទៅ។
លោក សម សេរី បានផ្ញើសារអ៊ីមែលមកកាន់អាស៊ីសេរីមុនការចាប់ខ្លួនថា សមត្ថកិច្ចថៃបានឃាត់ខ្លួនលោក នៅពេលលោក កំពុងបន្តទិដ្ឋាការស្នាក់នៅក្នុងប្រទេសថៃ។ មនុស្សជំនិតរបស់លោក សម សេរី ម្នាក់សុំមិនបញ្ចេញឈ្មោះដោយបារម្ភពីសុវត្ថិភាព បានប្រាប់អាស៊ីសេរី តាមទូរស័ព្ទថាលោក សម សេរី ត្រូវបានសមត្ថកិច្ចថៃបញ្ជូនទៅឃុំខ្លួន នៅមន្ទីរឃុំឃាំងមួយកន្លែងនៅក្នុងទីក្រុង បាងកកហើយ។
ទោះជាយ៉ាងណាក៏ ប្រភពដដែលនៅមិនទាន់អាចបញ្ជាក់បាននៅឡើយទេថា តើទិដ្ឋាការស្នាក់នៅក្នុងប្រទេសថៃរបស់លោក សម សេរី បានអស់សុពលភាព ឬមួយនៅមានសុពលភាព នោះទេ។
ប្រភពដដែលបញ្ជាក់ថា ពួកគេនឹងស្វែងរកកិច្ចអន្តរាគមន៍ពីស្ថានទូតរបស់ប្រទេសដាណាម៉ាក ក្នុងទីក្រុងបាងកក និងអង្គការពាក់ព័ន្ធដទៃទៀតដើម្បីដោះលែងលោក សម សេរី ឲ្យមានសេរីភាពឡើងវិញ។ ពួកគេសង្ឃឹមថាអាជ្ញាធរនឹងមិនបញ្ជូន លោក សម សេរី ទៅកាន់ប្រទេសកម្ពុជានោះឡើយ។ លោក សម សេរី ជាជនជាតិខ្មែរ ដាណាម៉ាក។
អាជ្ញាធរថៃ កាលពីខែកុម្ភៈ ក៏បានចាប់បញ្ជូនខ្លួនអ្នករិះគន់របបលោក ហ៊ុន សែន គឺលោកស្រី សំ សុខា មកកាន់ប្រទេសកម្ពុជាដែរ ទោះបីអ្នកស្រីទទួលបានឋានៈជាជនភៀសខ្លួនពី អង្គការសហប្រជាជាតិទទួលបន្ទុកជនភៀសខ្លួនក៏ដោយ។ លោកស្រី សំ សុខា ត្រូវបានតុលាការខេត្តកំពង់ស្ពឺ កាត់ទោសឱ្យជាប់ពន្ធនាគាររយៈពេល ២ឆ្នាំ និងពិន័យជាប្រាក់ ៥លានរៀល ពីបទជេរប្រមាថ និងញុះញង់ឱ្យមានការរើសអើងពាក់ព័ន្ធនឹងការយកស្បែកជើងគប់ទៅលើស្លាកគណបក្សប្រជាជនកម្ពុជា ដែលមានរូបលោកនាយករដ្ឋមន្ត្រី ហ៊ុន សែន និងលោក ហេង សំរិន៕