នៅ​ជប៉ុន កូន​ប្រុស​ច្បង​លោក ហ៊ុន សែន និយាយ​រឿង​បោះ​ឆ្នោត​ជាមួយ​លោក ស៊ីនហ្សូ អាបេ

ដោយ អ៊ឹម រចនា
26/04/2018
RFI

media
លោក ហ៊ុន ម៉ាណែត ក្នុង​ជំនួប​ជាមួយ​លោក​នាយករដ្ឋ​មន្ដ្រី​ជប៉ុន ស៊ីនហ្សូ អាបេ នៅ​ប្រទេស​ជប៉ុន ថ្ងៃ​ទី​២៦ មេសា ២០១៨
Hun Manet


លោក ហ៊ុន ម៉ាណែត កូន​ប្រុស​ច្បង​លោក​នាយករដ្ឋ​មន្ដ្រី ហ៊ុន សែន បាន​ជួប​ជាមួយ​លោក​នាយករដ្ឋ​មន្ដ្រី​ជប៉ុន ស៊ីនហ្សូ អាបេ នា​ថ្ងៃ​ព្រហស្បតិ៍​នេះ ខណៈ​ពេល​លោក​កំពុង​បំពេញ​ទស្សនកិច្ច​នៅ​ប្រទេស​ជប៉ុន​។ លោក ហ៊ុន ម៉ាណែត បាន​អះអាង​តាម​បណ្ដាញ​សង្គមហ្វេសប៊ុក​ថា លោក ស៊ីនហ្សូ អាបេ បាន​បង្ហាញ​ពី​ជំហរ​គាំទ្រ​ដំណើរ​ការ​បោះ​ឆ្នោតនៅ​កម្ពុជា​។ ការ​បោះ​ឆ្នោត​ថ្នាក់​ជាតិ​នៅ​កម្ពុជា ដែល​នឹង​ត្រូវ​រៀបចំ​ធ្វើ​នៅ​ចុង​ខែ​កក្កដា​ខាង​មុខ​។

តាម​រយៈ​សំណេរ​លើ​បណ្ដាញ​សង្គម​ហ្វេសប៊ុក លោក ហ៊ុន ម៉ាណែត បាន​គូស​បញ្ជាក់​ថា នាយករដ្ឋ​មន្ដ្រី​ជប៉ុន មាន​ជំហរ​បន្ត​គាំទ្រ​ដំណើរ​ការ​បោះ​ឆ្នោត​នៅ​កម្ពុជា​។ បន្ថែម​ពី​លើ​នោះ លោក​នាយករដ្ឋ​មន្ដ្រី ស៊ី​នហ្សូ អាបេ ក៏​បាន​ផ្ដល់​យោបល់​មួយ​ចំនួនដល់​កម្ពុជាសម្រាប់​ជា​ការ​ពិចារណា ធ្វើ​យ៉ាង​ណា​ធានា​ឲ្យ​ការ​បោះ​ឆ្នោតក្នុង​ខែ​កក្កដា ប្រព្រឹត្ត​ទៅ​ដោយ​សេរី យុត្តិធម៌ និង​ឆ្លុះ​បញ្ចាំង​អំពីឆ​ន្ទៈ​របស់​ប្រជាពលរដ្ឋ​។ នេះ​បើ​តាម​លោក ហ៊ុន ម៉ាណែត​។

សូម​ជម្រាប​ថា ជំនួប​រវាង​លោក ហ៊ុន ម៉ាណែត និង​លោក​នាយករដ្ឋ​មន្ដ្រី​ជប៉ុន​នេះ ធ្វើ​ឡើង​ខណៈ​ពេល​ដែល​លោក ហ៊ុន ម៉ាណែត កំពុង​បំពេញ​ទស្សនកិច្ច​នៅ​ប្រទេស​ជប៉ុន​។ រដ្ឋាភិបាល​ជប៉ុន បាន​អញ្ជើញ​កូន​ប្រុស​ច្បង​លោក​នាយករដ្ឋ​មន្ដ្រី ហ៊ុន សែន ទៅ​បំពេញ​ទស្សនកិច្ច​រយៈ​ពេល​៥​ថ្ងៃ​នៅ​ជប៉ុន ចាប់​ពី​ថ្ងៃ​ទី​២៤ ដល់​ថ្ងៃ​ទី​២៩​ខែ​មេសា ដើម្បី​ពង្រឹង​ទំនាក់ទំនង​ទ្វេ​ភាគី ក្រោម​កម្មវិធី​ផ្លាស់​ប្ដូរ​យុទ្ធសាស្ត្រ​កម្រិត​អ្នក​អនុវត្ត​។

ក្នុង​ពេល​ស្នាក់​នៅ​ប្រទេស​ជប៉ុន​នេះ​ដែរ លោក ហ៊ុន ម៉ាណែត បាន​ជួប​ពិភាក្សា​ការងារ​ជាមួយ​មន្ដ្រី​អ្នក​មុខ​អ្នក​ការ​ជា​ច្រើន​រូប រាប់​តាំង​ពី ​អនុ​រដ្ឋ​មន្ដ្រី​ការ​បរទេស​ជប៉ុន លោក Kazuyuki Nakane, អតីត​ប្រមុខ​ការទូត​អ៊ុនតាក់ លោក Yasushi Akashi, និង​ក្រុម​សមាជិក​អន្ដរសភា​មិត្តភាព​ជប៉ុនជា​ដើម​។

នៅ​ក្នុង​ជំនួប​ជាមួយ​ក្រុម​សមាជិក​អន្ដរសភា​មិត្តភាព​ជប៉ុន កូន​ប្រុស​ច្បង​លោក ហ៊ុន សែន បាន​លើក​ឡើង​អំពី​បញ្ហា​នានា​ដែល​កើត​មាន​កន្លង​មក​នៅ​ក្នុង​ប្រទេស​កម្ពុជា​។ បញ្ហា​ដែល​កើត​ឡើង​កន្លង​មកត្រូវ​បាន​លោក ហ៊ុន ម៉ាណែត ពន្យល់​ប្រាប់​​ថា វា​ជា​ការ​អនុវត្ត​ច្បាប់ ដើម្បី​ធានា​ស្ថិរភាព និង​សន្តិសុខសណ្ដាប់​ធ្នាប់ ដែល​ជា​គ្រឹះ​នៃ​សន្តិភាព​និង​ការ​អភិវឌ្ឍ ក៏​ដូច​ជា​លទ្ធិ​ប្រជាធិបតេយ្យ​នៅ​កម្ពុជា​។ លទ្ធិ​ប្រជាធិបតេយ្យ​ដែល​កម្ពុជា​ប្រកាន់​យក បើ​តាម​លោក ហ៊ុន ម៉ាណែត គឺ​ត្រូវ​ឈរ​លើ​គោលការណ៍​នីតិរដ្ឋ​។

ជា​ការកត់​សម្គាល់ ​បញ្ហា​លទ្ធិ​ប្រជាធិបតេយ្យ​នេះ​ក៏​ជាសំណុំ​រឿង​សំខាន់​របស់​លោក សម រង្ស៊ី ប្រធាន​ចលនា​សង្គ្រោះជាតិ នៅ​ក្នុង​ពេល​លោក​បំពេញ​ទស្សនកិច្ច​នៅ​ប្រទេស​ជប៉ុន​ដែរ​។ លោក សម រង្ស៊ី បាន​ធ្វើ​ដំណើរ​ទៅ​ប្រទេស​ជប៉ុន នៅ​មុន​ចូល​ឆ្នាំ​ខ្មែរ​ ហើយ​បាន​ជួប​សន្ទនា​ជាមួយ​សមាជិក​សភា​ជប៉ុន ក្នុង​បំណង​ស្នើ​សុំ​ឲ្យ​ពួក​គេធ្វើ​អន្តរាគមន៍​ឲ្យ​មាន​ការ​បោះ​ឆ្នោត​ដោយ​សេរី និង​យុត្តិធម៌ នៅ​កម្ពុជា​។ សម្រាប់​លោក សម រង្ស៊ី គឺ​មាន​តែ​ប្រទេស​ជប៉ុន​ទេ ​ដែល​អាច​បញ្ចុះបញ្ចូល​ឲ្យ​លោក​ហ៊ុន សែន ​រៀបចំ​ការបោះឆ្នោត​នា​ខាងមុខ តាម​បែប​ប្រជាធិបតេយ្យពិត​ប្រាកដ​បាន​៕

 

What Next?

Recent Articles

One Response to "នៅ​ជប៉ុន កូន​ប្រុស​ច្បង​លោក ហ៊ុន សែន និយាយ​រឿង​បោះ​ឆ្នោត​ជាមួយ​លោក ស៊ីនហ្សូ អាបេ"

  1. tearkvai says:

    utopia but probality tends towards the realizable
    apreva return adss election hun sen will turn the old white haired and her runt
    Instead the sour cucumber dynasty will return by the tiny door and what the Khmer will remember Sinahouk is a treacherous and deceitful king
    good game one-eyed man,