លោក សម រង្ស៊ី ថា ព្រះមហាក្សត្រ​ជា​ចំណាប់ខ្មាំង​របស់​លោក ហ៊ុន សែន

ដោយ មាន ឫទ្ធិ
2018-06-10
RFA

ស្ដាប់ ឬ​ទាញ​យ​ក​សំឡេង
ស្តាប់សំឡេងថតសំឡេង

អតីត​ប្រធាន​គណបក្ស​សង្គ្រោះ​ជាតិ លោក សម រង្ស៊ី ផ្ដល់​បទសម្ភាសន៍​ដល់​អាស៊ីសេរី នា​ការិយាល័យ​នៅ​រដ្ឋធានី​វ៉ាស៊ីនតោន សហរដ្ឋអាមេរិក កាល​ពី​ថ្ងៃ​ទី​៧ ខែ​តុលា ឆ្នាំ​២០១៦។ Photo: RFA
អតីត​ប្រធាន​គណបក្ស​សង្គ្រោះ​ជាតិ លោក សម រង្ស៊ី ផ្ដល់​បទសម្ភាសន៍​ដល់​អាស៊ីសេរី នា​ការិយាល័យ​នៅ​រដ្ឋធានី​វ៉ាស៊ីនតោន សហរដ្ឋអាមេរិក កាល​ពី​ថ្ងៃ​ទី​៧ ខែ​តុលា ឆ្នាំ​២០១៦។ Photo: RFA


លោក សម រង្ស៊ី ប្រធាន​ចលនាសង្គ្រោះជាតិ និង​ជា​អតីត​ប្រធានចលន​សង្គ្រោះ​ជាតិ បាន​សរសេរ​សារ​មួយ​នៅ​លើ​បណ្ដាញ​សង្គម​របស់​លោក កាលពី​ថ្ងៃ​អាទិត្យ ទី១០ មិថុនា ថា ព្រះមហាក្សត្រ ជា​ចំណាប់ខ្មាំង​របស់​លោក ហ៊ុន សែន។

សារ​ដដែល​នោះ​នោះ​បន្ត​ថា គ្មាន​នរណា​មើលងាយ​ព្រះមហាក្សត្រ ជាង​ជន​ផ្ដាច់ការ ហ៊ុន សែន ទេ ដែល​ជេរប្រមាថ និង​គំរាមកំហែង​ព្រះមហាក្សត្រ តាំងពី​យូរ​ឆ្នាំ​មក​ហើយ ព្រមទាំង​យក​ព្រះមហាក្សត្រ ប្រើ​ជា​ខែល ដើម្បី​បន្ត​អំណាច​ផ្ដាច់ការ​របស់​គាត់។ លោក សម រង្ស៊ី បន្ត​ថា របប​លោក ហ៊ុន សែន មិន​មាន​ការ​គាំទ្រ​ពី​ប្រជារាស្ត្រ ហើយក៏​មិន​មាន​ភាព​ស្របច្បាប់ ដែល​មាន​តម្លៃ​ពិត​ប្រាកដ ដូច្នេះ​គាត់​ក៏​យក​ព្រះមហាក្សត្រ ដែល​ស្ថិត​ក្នុង​កណ្ដាប់​ដៃ​គាត់ ទៅ​ប្រើ​ដើម្បី​បាន​ភាព​ស្របច្បាប់​ក្លែងក្លាយ​មួយ​ឲ្យ​ទៅ​របប​ផ្ដាច់ការ​របស់​គាត់។

លោក សម រង្ស៊ី បន្ត​ទៀត​ថា ចុងក្រោយ​នេះ ជន​ផ្ដាច់ការ ហ៊ុន សែន បាន​ឲ្យ​បក្ខពួក​គាត់​រៀបចំ « ច្បាប់​ប្រមាថ​ព្រះមហាក្សត្រ » គ្រាន់តែ​ដើម្បី​យក​មក​ធ្វើជា​លេស ក្នុង​គោលបំណង​បង្ក្រាប​ប្រជារាស្ត្រ ដែល​ទាមទារ​លទ្ធិប្រជាធិបតេយ្យ សេរីភាព និង​យុត្តិធម៌។

លោក សម រង្ស៊ី គឺជា​មនុស្ស​ទី៣ ហើយ ដែល​ត្រូវ​រដ្ឋអំណាច​ក្រុងភ្នំពេញ​ប្រើប្រាស់​ច្បាប់​ប្រមាថ​ព្រះមហាក្សត្រ​ដែល​ទើប​អនុម័ត ដើម្បី​ប្តឹង​ទៅ​តុលាការ។ អធិបញ្ជា​របស់​រដ្ឋមន្ត្រី​ក្រសួងយុត្តិធម៌ បង្គាប់​អោយ​ព្រះរាជអាជ្ញា​ចាត់ការ​លោក​សម រង្សី ធ្វើឡើង​បន្ទាប់ពី​អតីត​ប្រធាន​គណបក្សប្រឆាំង​រូប​នេះ​និយាយ​ថា របប​លោក​ហ៊ុន សែន បង្ខំ​ឲ្យ​ព្រះមហាក្សត្រ​ចេញ​ព្រះរាជសារ​អំពាវនាវ​ឲ្យ​ពលរដ្ឋ​ទៅ​បោះឆ្នោត​ថ្ងៃ​ទី​២៩ ខែ​កក្កដា​ខាងមុខ។ អ្នក​តាមដាន​ស្ថានការណ៍​នយោបាយ​នៅ​កម្ពុជា និង​សហគមន៍​សិទ្ធិមនុស្ស​បង្ហាញ​ក្តី​បារម្ភ​ថា វិសោធនកម្ម​ក្រមព្រហ្មទណ្ឌ​ដែល​ទើប​អនុម័ត​ដោយ​រដ្ឋសភា​ឯក​បក្ស ដើម្បី​ការពារ​ព្រះចេស្ដា​ព្រះមហាក្សត្រ​អាច​ក្លាយ​ជា​ឧបករណ៍​នយោបាយ​ដ៏​មុត​ស្រួច​របស់​គណបក្ស​ប្រជាជន​កម្ពុជា ដើម្បី​បង្ក្រាប​សំឡេង​ជំទាស់។

រដ្ឋមន្ត្រី​ក្រសួងយុត្តិធម៌​កម្ពុជា​លោក អង្ស វង្សវឌ្ឍានា បាន​ចេញ​អធិបញ្ជា​ឲ្យ​អយ្យការ​អម​សាលាដំបូង​រាជធានី​ភ្នំពេញ​ប្ដឹង​លោក សម រង្ស៊ី។ អ្នកនាំពាក្យ​ក្រសួង​យុត្តិធម៌ លោក គឹម សន្តិភាព​បាន​អះអាង​ថា ការ​ចាត់​វិធានការ​ផ្លូវច្បាប់​លើ​លោក សម រង្ស៊ី នៅ​ពេល​នេះ​ដើម្បី ការពារ​ព្រះ​ចេស្ដា​អង្គ​ព្រះមហាក្សត្រ។

ក្រោយពេល​របប​ក្រុងភ្នំពេញ​បាន​កែ​ក្រមព្រហ្មទណ្ឌ​ពាក់ព័ន្ធ​និង​អំពើ​ប្រមាថ​អង្គ​ព្រះមហាក្សត្រ អាជ្ញាធរ​នេះ​បាន​ចាប់​ឃុំខ្លួន​បុរស​ពីរ​នាក់​រួច​ទៅ​ហើយ​ពី​បទ​ប្រមាថ​ព្រះមហាក្សត្រ​។ កាលពី​ខែ​ឧសភា​កន្លង​ទៅ​នេះ សមត្ថកិច្ច​បាន​ចាប់ខ្លួន​នាយក​សាលាបឋមសិក្សា​ម្នាក់ ក្នុង​ខេត្ត​កំពង់ធំ ឈ្មោះ ឃាង ណាវី ក្រោយពី​នាយក​សាលា​រូប​នោះ​បាន​បង្ហោះ​សារ​នៅ​លើ​ហ្វេសប៊ុក​របស់​លោក​ក្នុង​ន័យ​ចោទប្រកាន់ ព្រះមហាក្សត្រ និង​សមាជិក​រាជវង្ស​ដទៃ​ទៀត​ថា បាន​ចូល​ដៃ​ចូល​ជើង​ជាមួយ​របប​លោក ហ៊ុន សែន ក្នុង​ការ​រំលាយ​គណបក្ស​សង្គ្រោះជាតិ។ មនុស្ស​ទី​២​ដែល​ត្រូវ​ចាប់ខ្លួន​ពី​បទ​ប្រមាថ​ព្រះមហាក្សត្រ​គឺ​ជាងកាត់សក់​នៅ​ខេត្ត​សៀមរាប ឈ្មោះ បាន សម្ភីរ ជា​មន្ត្រី​គណបក្ស​ង្គ្រោះជាតិ​ប្រចាំខេត្ត​សៀមរាប។ លោក​ត្រូវ​ចោទប្រកាន់ ក្រោយពេល​បាន​ចែកចាយ​បន្ត (Share) នូវ​រូបភាព​អង្គ​ព្រះមហាក្សត្រ​មាន​បង្កប់​ន័យ​រិះគន់​ព្រះមហាក្សត្រ​តាមរយៈ​គណនី​ហ្វេសប៊ុក។ ពេលនេះ លោក សម រង្ស៊ី គឺជា​បុគ្គល​ទី​៣​ដែល​ត្រូវ​អាជ្ញាធរ​ក្រុងភ្នំពេញ​ប្រើប្រាស់ ច្បាប់​ថ្មី​ដ៏​ចម្រូងចម្រាស​ដើម្បី​ចាត់​ការ។

ចំណាត់​ការ​ផ្លូវច្បាប់​មក​លើ​លោក សម រង្ស៊ី នៅ​ពេល​នេះ​ក្រោយ​លោក​បាន​និយាយ​ថា របប លោក ហ៊ុន សែន ជា​អ្នក​បង្ខំ​ឲ្យ​ព្រះមហាក្សត្រ​ចេញ​ព្រះរាជសារ​អំពាវនាវ​ឲ្យ​ពលរដ្ឋ​ទៅ​បោះ ឆ្នោត​។ លោក សម រង្ស៊ី បាន​ហៅ​ព្រះរាជសារ​របស់​ព្រះមហាក្សត្រ​ចេញផ្សាយ​នោះ​ថា​ជា លិខិត​ក្លែងក្លាយ ឬ​ត្រូវ​លោក ហ៊ុន សែន បង្ខំ​អោយ​ចេញ​សារ​អំពាវនាវ​នោះ។ ក្រោយពី​លោក សម រង្ស៊ី ចោទប្រកាន់​បែបនេះ មេដឹកនាំ​របប​ក្រុងភ្នំពេញ ដែល​រួមមាន​៖ លោក ហ៊ុន សែន លោក គង់ សំអុល តំណាង​គណបក្ស​កាន់​អំណាច និង​រដ្ឋមន្ត្រី​ក្រសួង​ព្រះ​រប​រាជវាំង អ្នកនាំពាក្យ​គណបក្ស​ប្រជាជន​កម្ពុជា រួម​ទាំង​គណបក្ស​តូចៗ​ពីរ​ដែល​ជា​កូនជឹង បក្ស​កាន់អំណាច ព្រមទាំង​រដ្ឋមន្ត្រី​ក្រសួងយុត្តិធម៌​បាន​នាំ​គ្នា​ប្រតិកម្ម​តប និង​ចោទ​ប្រកាន់​ថា លោក សម រង្ស៊ី ប្រមាថ​ព្រះមហាក្សត្រ។

លោក អង្ស វង្សវឌ្ឍានា រដ្ឋមន្ត្រី​ក្រសួងយុត្តិធម៌​កម្ពុជា​បាន​បញ្ជា​ឲ្យ​អយ្យការ​អម​សាលាដំបូង​រាជធានី​ភ្នំពេញ​ចោទប្រកាន់​លើ​លោក សម រង្ស៊ី តាំងតែ​ពី​ថ្ងៃ​សុក្រ ទី​៨ មិថុនា​មក​ម្ល៉ោះ ប៉ុន្តែ​ព័ត៌មាន​នេះ​ទើប​ត្រូវ​អ្នកនាំពាក្យ​របស់​លោក​ប្រាប់​អ្នកសារព័ត៌មាន​ថ្ងៃ​អាទិត្យ ទី​១០ ខែ​មិថុនា។

អ្នកវិភាគ​នយោបាយ​ជើងចាស់ និង​ជា​អតីត​ទីប្រឹក្សា លោក កឹម សុខា គឺ លោក បណ្ឌិត ឡៅ ម៉ុងហៃ ចោទ​សួរ​ថា ព្រះមហាក្សត្រ​មាន​ព្រះទ័យ​យ៉ាងណា​ចំពោះ​ការ​លើកឡើង​របស់​លោក សម រង្ស៊ី? ហេតុ​អី​បាន​ជា​របប​លោក ហ៊ុន សែន ចេញ មុខ​ប្តឹង​ជំនួស​ព្រះមហាក្សត្រ?

លោក​បណ្ឌិត​បន្ត​ថា ការដែល​របប​មន្ត្រី​រប​បលោក ហ៊ុន សែន ជា​អ្នក​ចេញមុខ​ប្តឹង​ជំនួស​ព្រះមហាក្សត្រ​ដូចនេះ​គឺ​គ្មាន​សមភាព​ចំពោះ​មុខ​ច្បាប់​នោះ​ទេ ព្រោះ​នៅ​ក្នុង​ស្ថាប័ន​នានា​ក៏​មាន ភាព​មិន​ប្រក្រតី​កើត​ឡើង​ច្រើន​ដែរ ចុះ​ហេតុអ្វី​ព្រះរាជអាជ្ញា​ទាំងនោះ​មិន​ចេញមុខ​ប្ដឹង​ផង៖ «មានការ​រំលោភច្បាប់​ច្រើន​ណាស់ណា​ម៉ិច​ក៏​មិន​ចេញមុខ​ប្ដឹង​ផង​ទៅ មួយ​ចេញមុខ​ប្តឹង មួយទៀត​អត់​ចេញ​មុខ​ប្តឹង ដូច្នេះ​នៅឯណា​សមភាព​ចំពោះ​មុខ​ច្បាប់»

យោង​តាម​ច្បាប់​ថ្មី​ស្ដីពី​ការប្រមាថ​ព្រះមហាក្សត្រ​នេះ លោក សម រង្ស៊ី អាច​ប្រឈម​ជាប់​ពន្ធ​ធនាគារ​ពី​១​ឆ្នាំទៅ​៥​ឆ្នាំ និង​ពិន័យ​ជា​ប្រាក់​ពី ២​លាន​រៀល ទៅ​១០​លាន​រៀល ឬ​ស្មើនឹង​ប្រាក់ ៥០០ ទៅ ២.៥០០​ដុល្លារ​អាមេរិក។ ច្បាប់​ដែល​របប​លោក ហ៊ុន សែន បាន​វិសោធនកម្ម​នេះ ត្រូវ​អង្គការ​សិទ្ធិមនុស្ស​អន្តរជាតិ រួម​និង​សមាជិកសភា​អាស៊ាន​ដើម្បី​សិទ្ធិមនុស្ស​បាន​ចេញ​សេចក្ដីថ្លែងការណ៍​ទាមទារ​ឱ្យ​លុបចោល​មាត្រា​ថ្មី​នេះ​វិញ ដោយ​ចាត់ទុកថា​ជា​ការ​ប៉ះពាល់​ដល់​សិទ្ធិ​នៃ​ការ​បញ្ចេញមតិ​ដែល​ត្រូវ​បាន​ធានា​ដោយ​រដ្ឋធម្មនុញ្ញ និង​អនុសញ្ញា​អន្តរជាតិ​ស្ដីពី​សិទ្ធិ​ស៊ីវិល​និង​នយោបាយ។

ប៉ុន្តែ​ការចោទប្រកាន់​មក​លើ​អតីត​ប្រធាន​គណបក្សប្រឆាំង​រូប​នេះ មិនមែន​ជា​រឿង​ថ្មី​ឡើយ ។ លោក​ត្រូវ​បាន​តុលាការ​ដែល​ពលរដ្ឋ​ហៅថា ជា​តុលាការ​តេឡេ ស្ថិត​ក្រោម​ការ​បញ្ជា​របស់​លោក ហ៊ុន សែន ចោទប្រកាន់ និង​ផ្ដន្ទាទោស ជាង​១០​ករណី៖ «តុលាការ​ស្រុក​ខ្មែរ​គ្នា​មិនសូវ​ដឹង​អី​ទេ គ្នា​ធ្វើតាម​ថ្នាក់លើ ហើយ​ថ្នាក់លើ​ហ្នឹង​ធ្វើ​អី​តាមតែ​អំពើ​ចិត្ត​។ ខ្ញុំ​សប្បាយចិត្ត​ទៅវិញ​ទេ ព្រោះ​ឱកាស​មួយ​លាតត្រដាង​ឲ្យ​កាន់តែ​ច្បាស់​ថែមទៀត​អ្វី​ដែល​អ្នកដឹកនាំ​និង​គូរ​កន​របស់​គេ​បាន​ធ្វើ»

កាលពី​ថ្ងៃ​ទី​២៣ ខែ​ឧសភា លោក សម រង្ស៊ី បាន​សរសេរ​លិខិត​មួយ​ច្បាប់ ថ្វាយ​ទៅ​ព្រះមហាក្សត្រ ស្នើសុំ​ព្រះអង្គ​កុំ​ធ្វើតាម​អ្វី ដែល​របប​លោក ហ៊ុន សែន និង​គណបក្ស​ប្រជាជន​កម្ពុជា ក្នុង​ការ​ជំរុញ​អោយ​ប្រជាពលរដ្ឋ​ឲ្យ​ទៅ​បោះឆ្នោត ថ្ងៃ​ទី​២៩ ខែ​កក្កដា​ខាងមុខនេះ។ ព្រះរាជ​សារលិខិត​របស់​ព្រះមហាក្សត្រ​ត្រូវ​បាន​ឡាយ​ព្រះហស្ថលេខា ថ្ងៃ​ទី​១៨ ខែ​ឧសភា ប៉ុន្តែ​ជាង​ម្ភៃ​ថ្ងៃ​ក្រោយមក ទើប​ត្រូវ​បាន​ប្រព័ន្ធ​ផ្សព្វផ្សាយ​របស់​លោក ហ៊ុន សែន ចេញផ្សាយ​ដែល​មាន​ខ្លឹមសារ អំពាវនាវ​ឲ្យ​ពលរដ្ឋ​ទៅ​បោះឆ្នោត។

លោក សម រង្ស៊ី អះអាង​ថា លិខិត​ណាមួយ​ពី​ព្រះមហាក្សត្រ​ពេលនេះ គឺ​ធ្វើ​ឡើង​ក្រោម​កា​គំរាមកំហែង ហើយ​លិខិត​បែបនេះ​អត់​មានតម្លៃ​អ្វី​ទេ តាម​ផ្លូវ​ច្បាប់។ លោក​ថែមទាំង​បាន​រម្លឹក​ថា លោក ហ៊ុន សែន ធ្លាប់​ប្រើ​អំណាច​គំរាម​រម្លាយ​របបរាជានិយម​ចោល ដោយសារតែ​អតីត​ព្រះមហាក្សត្រ ព្រះ​បរម​រតន​កោដ្ឋ ព្រះបាទ​សម្ដេច​ព្រះ​នរោត្តម សីហនុ មិន​ចង់​ចុះហត្ថលេខា​លើ​សន្ធិសញ្ញា​បំពេញ​បន្ថែម រឿង​ព្រំដែន​ជាមួយ​ប្រទេស​វៀតណាម កាលពី​ឆ្នាំ​២០០៥៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

2 Responses to "លោក សម រង្ស៊ី ថា ព្រះមហាក្សត្រ​ជា​ចំណាប់ខ្មាំង​របស់​លោក ហ៊ុន សែន"

  1. Free Cambodia says:

    Phnom Penh (FN), June 11 — Indian Defense Minister Nirmala Sitharaman thanked Cambodian Prime Minister Hun Sen for his recent visit to India and signed several agreements of cooperation involving private sector, which attracted Indian investors to invest in Cambodia.

    Rainsy should stop negativities and start to show us of what can he do to benefit our county and our people. We do not want to hear the story of chicken little, we want to see the positive result. Does not matter who will lead our country as long as he/she can restore and sustain peace and prosperity to our people. How many time do we have to keep reminding Rainsy.

  2. so socheath says:

    ហាស ! ហាស
    អាក្បត់ជាតិសមរង្សី ឲ្យតែស្អីដែលមិនសមបំណងវា សុទ្ធតែខុសទាំងអស់ សូម្បីព្រះមហាក្សត្រ
    ក៏ខុសដែរ !
    អាពូជក្បត់ជាតិ ! អាក្បត់សមរង្សី គឺបែបនេះ

Leave a Reply

Submit Comment