ខ្មែរ​នៅ​តូក្យូ​ ទាមទារ​ឲ្យ​ជប៉ុន​ ទាត់​ចោល​ការបោះឆ្នោត

ពលរដ្ឋ​ខ្មែរ​ក្នុង​ប្រទេស​ជប៉ុន​តវ៉ា​នៅក្នុង​ក្រុង​តូក្យូ​។ រូបថត សហការី




ភ្នំពេញប៉ុស្តិ៍

ភ្នំពេញៈ សកម្មជន និង​អ្នកគាំទ្រ​អតីត​គណបក្ស​សង្គ្រោះជាតិ​ដែល​កំពុង​រស់នៅ​ក្នុង​ប្រទេស​ជប៉ុន​ប្រមាណ​ជា​រាប់រយ​នាក់​បាន​ប្រមូល​ផ្ដុំគ្នា​នៅ​ក្នុង​សួន​​ហ៊ីប៊ីយ៉ា​កណ្តាល ទីក្រុង​តូក្យូ​ (Tokyo) ​ក្បែរ​ក្រសួង​ការបរទេស​ជប៉ុន​កាលពី​ម្សិលមិញ​ទាមទារ​ឲ្យ​រដ្ឋាភិបាល​ជប៉ុន​ទាត់​ចោល​លទ្ធផល​បោះឆ្នោត​ជ្រើស​តាំង​តំណាងរាស្ត្រ​ដែល​នឹង​ធ្វើ​ឡើង​នៅ​ថ្ងៃទី​ ២៩ ខែ​កក្កដា​ឆ្នាំ​ ២០១៨​។

លោក ហៃ វណ្ណា មេដឹកនាំ​ក្បួន​បាតុកម្ម​បាន​ឲ្យ​ដឹង​តាម​ការសន្ទនា​តាមរយៈ​ហ្វេសប៊ុក​ កាលពី​ម្សិលមិញ​ថា​៖ «​ពួកខ្ញុំ​ធ្វើ​បាតុកម្ម​នេះ​មិនទាន់​យក​ញត្តិ​ទៅ​ដាក់់​នៅ​កន្លែង​ណា​មួយ​នៅ​ឡើយ​ទេ ប៉ុន្ដែ​យើង​គ្រោង​យក​ញត្តិ​ទៅ​ដាក់​នៅ​ក្រសួង​ការបរទេស​ជប៉ុន​នៅក្នុង​អំឡុង​ខែ​មិថុនា​នេះ​។ យើង​មិន​ចង់​ឲ្យ​រដ្ឋាភិបាល​ជប៉ុន​ទទួល​ស្គាល់​លទ្ធផល​ពី​ការបោះឆ្នោត​ក្លែងក្លាយ​នេះ​ទេ ហើយ​បើ​អាច​យើង​ទាមទារ​ឲ្យ​ជប៉ុន​បិទ​ទិដ្ឋាការ​ដល់​មន្ត្រី​ពុករលួយ និង​មន្ត្រី​រំលោភ​សិទ្ធិមនុស្ស​របស់​កម្ពុជា​កុំ​ឲ្យ​ចូល​ក្នុង​ប្រទេស​ជប៉ុន​ទៀត​»​។

យោង​តាម​សេចក្ដី​ប្រកាស​ព័ត៌មាន​របស់​ក្រុម​អ្នក​តវ៉ា​ចេញ​ផ្សាយ​កាលពី​ថ្ងៃទី​ ១៧ មិថុនា បាន​ឲ្យ​ដឹង​ថា​ការទាមទារ​ទៅ​ជប៉ុន​នោះ​មាន ២ ​ចំណុច​ដោយ​បាតុកម្ម​ទាមទារ​ឲ្យ​រដ្ឋាភិបាល​ជប៉ុន​បញ្ឈប់​ជំនួយ​គាំទ្រ​ដំណើរការ​បោះឆ្នោត និង​ស្នើសុំ​ឲ្យ​ជប៉ុន​ប្រកាស​ជា​ផ្លូវ​ការមិន​គាំទ្រ​ការបោះឆ្នោត និង​លទ្ធផល​ការបោះឆ្នោត​នៅ​កម្ពុជា​។

លោក Yasushi Akashi មន្ត្រី​ជំនួយការ​ក្នុង​ស្ថានទូត​ជប៉ុន​ប្រចាំ​នៅ​កម្ពុជា មិន​ទាន់​មាន​ការឆ្លើយតប​ដល់​ភ្នំពេញ​ប៉ុស្តិ៍​តាមរយៈ​អ៊ីមែល​ទេ​ កាលពី​ម្សិលមិញ ​ក្នុង​ការសុំ​អត្ថាធិប្បាយ​ទាក់ទង​នឹង​ការទាមទារ​របស់​ក្រុម​អ្នក​តវ៉ា​នោះ​។

ប៉ុន្ដែ​លោក ហៃ វណ្ណា អះអាង​ថា​ញត្តិ​នោះ​មាន​មន្ត្រី​នៅក្នុង​ក្រសួង​ការបរទេស​ជប៉ុន​ក្នុង​ប្រទេស​ជប៉ុន​ម្នាក់​មក​ទទួល​ដោយ​ប្រាប់​ថា​គេ​នឹង​យក​ទៅ​ពិនិត្យ និង​បញ្ជូន​ទៅ​រដ្ឋាភិបាល​ជប៉ុន​នាពេល​ឆាប់ៗ​នេះ​។

លោក ហង្ស ពុទ្ធា អ្នក​នាំពាក្យ គ.ជ.ប កាលពី​ម្សិលមិញ​បាន​ឲ្យ​ដឹង​ថា ជំនួយ​របស់​រដ្ឋាភិបាល​ជប៉ុន​គឺជា​ជំនួយ​មិត្តភាព​យ៉ាង​ស្មោះត្រង់​ជាមួយ​កម្ពុជា រួមទាំង​ជួយ​ផ្នែក​សេដ្ឋកិច្ច និង​វិស័យ​ផ្សេងៗ​ផង​ដែរ​។ ដូច្នេះ​ប្រទេស​ជប៉ុន​នឹង​មិន​ធ្វើ​អ្វី​មួយ​តាម​ការ​ញុះញង់​របស់​ជន​មួយ​ក្ដាប់​តូច​នោះ​ទេ​។

លោក ពុទ្ធា ថ្លែង​ថា​៖ «​យើង​មិន​មាន​អ្វី​ព្រួយបារម្ភ​ទេ ព្រោះ​ប្រទេស​ជប៉ុន​ជា​ប្រទេស​ឯករាជ្យ ហើយ​ជប៉ុន​នឹង​មិន​អាច​ស្ដាប់​តាម​ការ​ញុះញង់​របស់​អ្នកនយោបាយ​មកពី​ប្រទេស​មួយ​ណា​ឡើយ​។ ការតវ៉ា​នេះ​វា​នឹង​មិន​មាន​ប្រសិទ្ធភាព​នោះ​ទេ​»​។

លោក សុខ ឥសាន អ្នក​នាំពាក្យ​គណបក្ស​ប្រជាជន​កម្ពុជា​កាលពី​ម្សិលមិញ​មិន​អាច​ទាក់ទង​សុំ​អត្ថាធិប្បាយ​ជុំវិញ​ករណី​នេះ​បាន​ទេ ប៉ុន្ដែ​ពេល​ថ្មីៗ​កន្លង​មក​នេះ​អះអាង​ថា​ការតវ៉ា​នេះ​គឺជា​សិទ្ធិ​របស់​ពួកគាត់ ប៉ុន្ដែ​ក៏​គ្មាន​ប្រយោជន៍​ដែរ​។

លោក​ថ្លែង​ថា​៖ «​ចំណែក​កម្ពុជា​មិន​មាន​អ្វី​ដែល​គួរ​ឲ្យ​ព្រួយបារម្ភ​ទេ ព្រោះ​សកម្មភាព​ពួកគេ​នឹង​មិន​មាន​ឥទ្ធិពល​អ្វី​ទេ ហើយ​ពលរដ្ឋ​កំពុង​ត្រៀម​ខ្លួន​នាំ​គ្នា​ទៅ​បោះឆ្នោត​ដែរ​គឺ​មិនមែន​អត់​បក្ស​មួយ​ហើយ ស្រែក​ថា​គ្មាន​ប្រជាធិបតេយ្យ​ទេ​»៕


Contact author: សុទ្ធ គឹមសឿន

What Next?

Recent Articles

One Response to "ខ្មែរ​នៅ​តូក្យូ​ ទាមទារ​ឲ្យ​ជប៉ុន​ ទាត់​ចោល​ការបោះឆ្នោត"

  1. Free Cambodia says:

    After reading the information below, you need to ask yourself how can Japan listen to these protester? Are they barking at the wrong tree? You don’t have to be the expert by knowing that Japan cannot change their relationship with Cambodia, we know it but why these protesters don’t know?

    Phnom Penh (FN), June 18 – The Embassy of Japan in Cambodia, Japan Foundation Asia Center, and Cambodia-Japan Cooperation Centre (CJCC) will celebrate Tanabata Festival for the purpose of introducing culture exchange between the two nations, to be held from 5 July to 6 July 2018 at CJCC.