គណបក្ស​ប្រជាធិប​តេយ្យ​មូលដ្ឋាន​ពិចារណា​ឃោសនា​បោះឆ្នោត​ដោយ​ភា្ជប់​ឃាតកម្ម​លោក កែម ឡី​ ប៉ុន្តែ​បារម្ភ​អំពី​ផ្លូវ​ច្បាប់

នយោបាយ


រូបឯកសារ៖ សកម្មភាព​លោក​ យ៉េង វីរៈ ​និង​លោក ​យ៉ង ​សាំង​កុមារ ​សហ​ស្ថាបនិក ​គណបក្ស​ប្រជាធិបតេយ្យ​មូលដ្ឋាន​ ក្នុង​យុទ្ធនាការ​ឃោសនា​ការ​បោះ​ឆ្នោត​ឃុំ​សង្កាត់​ឆ្នាំ​២០១៧​កន្លង​ទៅ។ ​(រូបថត​ផ្ដល់​ឱ្យ)​


18 មិថុនា 2018
ហ៊ុល រស្មី
វីអូអេខ្មែរ

ខណៈ​គណបក្ស​នានា​​កំពុង​រក​យុទ្ធសាស្ត្រ​ឃោសនា​ដើម្បី​ទាក់​ទាញ​អ្នក​គាំទ្រ​ ក្នុង​ការ​បោះឆ្នោត​សភា​ពី​ថ្ងៃ​ទី​៧​ទៅ​ដល់​ថ្ងៃទី​២៧​ ខែ​កក្កដា​ ឆ្នាំ​២០១៨នោះ​​ គណបក្ស​ប្រជាធិបតេយ្យ​មូលដ្ឋាន​កំពុង​ពិចារណា​ភ្ជាប់​ការ​ឃោសនា​បោះឆ្នោត​របស់​ខ្លួន​ជាមួយ​នឹង​ព្រឹត្តិការណ៍​​សម្លាប់​លោក​ កែម ឡី​ ដែល​ធ្លាប់​ធ្វើ​ការ​ជាមួយ​ក្រុម​អ្នក​បង្កើត​គណបក្ស​ថ្មី​នេះ។

គណបក្ស​ប្រជា​ធិបតេយ្យ​មូលដ្ឋាន​របស់​ក្រុម​បញ្ញវន្ត​មួយ​ក្រុម​ដែល​ធ្លាប់​មាន​ទំនាក់​ទំនង​ជិត​ស្និទ្ធ​នឹង​លោក​ ​កែម ឡី​ ​កំពុង​ពិចារណា​ថា ​ខ្លួន​នឹង​ធ្វើ​យុទ្ធនាការ​ឃោសនា​រក​សំឡេង​ឆ្នោត​ដោយ​មាន​ការ​រំឭក​ដល់​ការ​បាញ់​សម្លាប់​លោក​ ​កែម ឡី​ ​អ្នក​វិភាគ​នយោបាយ​កម្ពុជា ​កាលពី​ថ្ងៃ​ទី​១០​ ​ខែ​កក្កដា​ ឆ្នាំ២០១៦។​

លោក​ សាម អ៊ីន ​អគ្គលេខាធិការ​គណបក្ស​ប្រជាធិបតេយ្យ​មូលដ្ឋាន​ ​បាន​ប្រាប់​ ​VOA​ ​អំពី​ការ​ពិចារណា​នេះ៖​

«យើង​នឹង​រិះរក​ពេល​វេលា​ណា​សម​ស្រប​ដើម្បី​ពិគ្រោះ​យោបល់ ​ជជែក​នៅ​ក្នុង​ក្រុម​ការងារ​យើង​ ពីព្រោះ​យើង​ចង់​ស្តាប់​គំនិត​យោបល់​អ្នក​ដែល​គាត់​យល់​ដឹង​ពី​ផ្លូវ​ច្បាប់​ផ្សេងៗ​ ក្នុង​ការ​ឃោសនា​ហ្នឹង​ ហើយ​យើង​ក៏​ចង់​ពិចារណា​កុំ​ឲ្យ​វា​មាន​ផល​ប៉ះពាល់​ទៅ​លើ​ក្រុម​គ្រួសារ​គាត់​អី​ចឹង​ជា​ដើម។​ អីចឹង​យើង​ព្យាយាម​នឹង​រក​ពេល​វេលា​ណាមួយ​សម​ស្រប​ នៅ​ក្នុង​ក្រុម​ការងារ​យើង​ដើម្បី​ជជែក​រឿង​ហ្នឹង»។​

លោក​ ​កែម ឡី​ ​ត្រូវ​បាន​គេ​បាញ់​សម្លាប់​ក្នុង​ស្ថានីយ៍​ប្រេង​មួយ​នៅ​ក្នុងទី​ក្រុង​ភ្នំពេញ​ ក្រោយ​ពីអ្នក​វិភាគ​រូប​នេះ​បាន​ផ្តល់​ការ​អធិប្បាយ​ដល់​ប្រព័ន្ធ​ផ្សព្វផ្សាយ​ជា​បន្តបន្ទាប់​ ទៅលើ​របាយ​ការណ៍​មួយ​របស់​អង្គការ​ Global Witness​ ដែល​បាន​ទម្លាយ​ឲ្យ​ដឹង​ពី​ទ្រព្យ​សម្បតិ្ត​រាប់​រយ​លាន​ដុល្លារ​របស់​ក្រុម​គ្រួសារ​លោក​នាយក​រដ្ឋមន្ត្រី​ហ៊ុន សែន ​ដែល​កាន់​អំណាច​ជាង​៣០​ឆ្នាំ។​

លោក ​សាម អ៊ីន​ ​ថ្លែង​បន្ថែម​ថា​ គណបក្ស​កំពុង​ថ្លឹង​ថ្លែង​ថា ​តើ​ដំណើរ​នៃ​ការ​ឃោសនា​ដោយ​មាន​ភ្ជាប់​នឹង​ការ​សម្លាប់​លោក​ កែម ឡី​ នេះ​ នឹង​មានការ​ឆ្លើយតប​ពី​រដ្ឋាភិបាល​ ឬ​ស្ថាប័ន​រៀបចំ​ការ​បោះ​ឆ្នោត​យ៉ាងណា។​ តែ​លោក​ថា​ គណបក្ស​ប្រជា​ធិបតេយ្យ​មូលដ្ឋាន​ នឹង​ព្យាយាម​រំឭក​ពី​ទស្សនៈ​របស់​លោក​ កែម ឡី ​ប្រសិន​បើ​ក្រុម​មេ​ដឹកនាំ​គណបក្ស​សម្រេច​ថា​ នឹង​បើក​ការ​ឃោសនា​រក​សំឡេង​ឆ្នោត​ ដោយ​ភ្ជាប់​នឹង​ឃាតកម្ម​លើ​លោក​ កែម ឡី​ នោះ។​

«ជារួម​យើង​តែងតែ​បង្ហាញ​ ហើយ​យើង​នឹង​បង្ហាញ​បន្ត​អំពី​ការ​ចូលរួម​របស់​លោក​បណ្ឌិត ​កែម ឡី​ ជាមួយ​នឹង​ក្រុម​ការងារ​របស់​យើង ​តាំងពី​ការ​រៀបចំ​បណ្តាញ​សង្គម​ខ្មែរ​ដើម្បី​ខ្មែរ​ រហូត​ទៅ​ដល់​ការ​ផ្តួច​ផ្តើម​ការ​បង្កើត​គណបក្ស​ប្រជា​ធិបតេយ្យ​មូលដ្ឋាន។​ ហើយ​ក្រោយ​ការ​បាញ់​សម្លាប់​រូប​លោក​ ក្រោយ​ដែល​លោក​បាន​លាចាក​លោក​ទៅ យើង​បាន​ផ្តល់​កិត្តិយស​ជូន​លោក ​ដោយ​ចាត់​ទុក​រូប​លោក​ជា​បិតា​ស្ថាបនិក​ គណបក្ស​ប្រជា​ធិបតេយ្យ​មូលដ្ឋាន។​ អីចឹង​ យើង​នឹង​បន្ត​ប្រាប់​ យើង​នឹង​បន្ត​បង្ហាញ​អំពី​រឿង​ពិត​ជាក់​ស្តែង​ ដែល​បាន​កើត​ឡើង​ជាមួយ​នឹង​លោក​បណ្ឌិត​ ​កែម ឡី។​ ​យើង​មិនធ្វើ​កិច្ចការ​ណាមួយ​ដែល​ដើរ​ឆ្ងាយ​ ដើរ​ហួស​ចេញ​ពី​ការណ៍​ពិត​ទេ។​ ​យើង​ប្រាប់​ ​យើង​នឹង​បង្ហាញ​ពី​ការ​ចូល​រួម​របស់​លោក​ តាម​រឿង​ពិត​ជាក់​ស្តែង​ដែល​បាន​កើត​ឡើង»។​

រូបឯកសារ៖ ប្រជាពលរដ្ឋ​អុជធូប​គោរព​វិញ្ញាណក្ខន្ធ​លោក​បណ្ឌិត​ កែម ឡី​ អ្នកវិភាគ​កិច្ច​អភិវឌ្ឍន៍​សង្គមនៅស្រុក​ត្រាំកក់ ខេត្ត​តាកែវ នៅ​ថ្ងៃ​សៅរ៍ ទី​១៣ ខែសីហា ឆ្នាំ​២០១៦​។​ (ឡេង ឡែន/VOA)

រូបឯកសារ៖ ប្រជាពលរដ្ឋ​អុជធូប​គោរព​វិញ្ញាណក្ខន្ធ​លោក​បណ្ឌិត​ កែម ឡី​ អ្នកវិភាគ​កិច្ច​អភិវឌ្ឍន៍​សង្គមនៅស្រុក​ត្រាំកក់ ខេត្ត​តាកែវ នៅ​ថ្ងៃ​សៅរ៍ ទី​១៣ ខែសីហា ឆ្នាំ​២០១៦​។​ (ឡេង ឡែន/VOA)


លោក​ សុខ ឥសាន​ អ្នក​នាំពាក្យ​គណបក្ស​ប្រជាជន​កម្ពុជា​ ​មាន​ប្រសាសន៍​ប្រាប់​ ​VOA​ ថា​ គណបក្ស​នយោបាយ​នីមួយៗ​មាន​សិទ្ធិ​ឃោសនា​ដើម្បី​ស្វែង​រក​សំឡេង​គាំទ្រ។​ ​លោក​មិន​ធ្វើការអធិប្បាយ​ទៅ​លើ​សំណួរ​ថា​ តើ​អាច​នឹង​មាន​បញ្ហា​មិន​ប្រក្រតី​ណា​កើត​ឡើង​ឬ​ទេ ​ក្នុង​ករណី​គណបក្ស​ប្រជា​ធិបតេយ្យ​មូលដ្ឋាន​ ឃោសនា​រក​សំឡេង​ឆ្នោត​ ដោយ​ប្រើប្រាស់​ឃាតកម្ម​លោក​ កែម ឡី​ មក​ធ្វើ​ជា​សារ​ទាក់​យក​ចិត្ត​ម្ចាស់​ឆ្នោត​នោះ។​

«ទី​មួយ​ពាក់​ព័ន្ធ​នឹង​ករណី​ឃាតកម្ម​លោក​បណ្ឌិត ​កែម ឡី ​យើង​មាន​ការ​សោក​ស្តាយ​ តែ​យើង​ចាត់​ទុក​ថា ​នេះ​វាជា​បាតុភាព​អសកម្ម​នៅ​ក្នុង​សង្គម​ ដែល​សង្គម​ណា​ក៏​មាន​ដែរ​ មិនមែន​ត្រឹម​តែ​កម្ពុជា​ទេ​ នៅ​អាមេរិក​ហ្នឹង​ គឺ​បាញ់​ញឹក​ជាង​ស្រុក​ខ្មែរ​ទៅ​ទៀត។ ​បាទ​ នៅ​បារំាង ​នៅ​អាល្លឺម៉ង់​អីក៏​មានដែរ​ ក៏ប៉ុន្តែ​អ្នក​ដែល​អគតិ​ហ្នឹង​ មិន​បាន​និយាយ​ដល់​អាមេរិក​ ដល់​អាល្លឺម៉ង់​ទេ​ និយាយ​តែ​ពី​រឿង​កម្ពុជា។ហើយ​ចំណុច​ទីពីរ​ ចំពោះ​ការណ៍​ដែល​បងប្អូន​សម្រេច​ឆន្ទៈ​ នៅ​ក្នុង​ការ​បំពេញ​ករណី​កិច្ច​របស់​ខ្លួន​ជា​ពលរដ្ឋ​គឺ​ត្រូវតែ​អនុវត្ត​ទៅ​តាម​ខ្លឹម​សារ​រដ្ឋ​ធម្មនុញ្ញ​ ដែល​បើក​ទូលាយ​សិទ្ធិ​ សេរី​របស់​បង​ប្អូន​ដើម្បី​នឹង​អញ្ជើញ​ទៅ​បោះឆ្នោត»។​

លោក​នាយ​ឧត្តម​សេនីយ៍ ​ខៀវ សុភ័គ​ ​អ្នក​នាំ​ពាក្យ​ក្រសួង​មហា​ផ្ទៃ​ មិន​ផ្តល់​ការ​អធិប្បាយ​ទៅ​លើ​វិធានការ​ដែល​អាច​នឹង​ធ្វើឡើង​ចំពោះ​គណបក្ស​ប្រជា​ធិបតេយ្យ​មូលដ្ឋាន​ទេ​ ប្រសិន​បើ​គណបក្ស​មួយ​នេះ​ធ្វើ​ការ​ឃោសនា​រក​សំឡេង​ឆ្នោត​ដោយ​ភ្ជាប់​ការ​បាញ់​សម្លាប់​លោក​ កែម ឡី។​ ​មួយ​វិញទៀត​ លោក​មាន​ប្រសាសន៍​ថា ​ការ​ឃោសនា​មិន​ទាន់​ចាប់​ផ្តើម​នៅ​ឡើយ​ទេ។​

«នៅ​ពេល​នេះ​ ​គឺ​មិន​ទាន់​ដល់​ដំណាក់​កាល​នៃ​ការ​ឃោសនា​នៅ​ឡើយ»។​

រី​ឯ​លោក​ ​ហង្ស ពុទ្ធា​ ​អ្នក​នាំពាក្យ​របស់​ ​គ.ជ.ប.​ ​មាន​ប្រសាសន៍​ថា​ ស្ថាប័ន​បោះឆ្នោត​នឹង​ពិនិត្យ​លើ​ទិដ្ឋភាព​ផ្លូវ​ច្បាប់ចំពោះ​ខ្លឹមសារ​នៃ​ការ​ឃោសនា​របស់​គណបក្ស​ប្រជា​ធិបតេយ្យ​មូលដ្ឋាន​ក្នុង​ការ​បោះឆ្នោត​ខែ​កក្កដា​នេះ។​

«គ.ជ.ប.​ ​មិន​ធ្វើ​បុរេវិនិច្ឆ័យ​ជាមុន​ទេ ​នៅមុន​ព្រឹត្តិ​ការណ៍​ដែល​កើត​ឡើង។​ អីចឹង​អ្វីៗ​ទាំង​អស់​ យើង​ត្រូវ​រង់​ចាំ​មើល​ថា​ តើ​ការ​ឃោសនា​នៃ​គណបក្ស​នយោបាយ​នីមួយៗ​ហ្នឹង​ ស្រប​ទៅតាម​ច្បាប់​ ស្រប​ទៅ​តាម​ក្រម​សីលធម៌​ដែរ​ឬអត់?​ បើសិន​ជា​សមស្រប​ គ.ជ.ប.​ នឹង​អបអរ​ ប៉ុន្តែ​បើ​ធ្វើ​ឲ្យ​ប៉ះពាល់ដល់​ដំណើរ​ការ​បោះឆ្នោត​ហ្នុង​ ក៏​គ.ជ.ប.ក៏​នឹង​មាន​វិធានការស្រប​ទៅតាម​ច្បាប់​ដែរ​ បាទ»។​

ទាំង​គណបក្ស​ប្រជា​ធិបតេយ្យ​មូលដ្ឋាន​ និង​គណបក្ស​កាន់​អំណាច​របស់​លោក​នាយក​រដ្ឋ​មន្ត្រី​ ហ៊ុន សែន​ បាន​សម្រេច​ដាក់​បេក្ខជន​ឲ្យ​ឈរ​ឈ្មោះ​នៅ​គ្រប់​រាជធានី​ខេត្ត​ក្រុង។​

ប៉ុន្តែលោក ​សាម អ៊ីន​ ​អគ្គលេខាធិការ​គណបក្ស​ប្រជា​ធិបតេយ្យ​មូលដ្ឋាន​ អះអាង​ថា​ ​ប្រវត្តិ​ការងារ​លោក​ កែម ឡី​ និងការណ៍​ដែល​លោក​ចូលរួម​បង្កើត​គណបក្ស​នេះ​គឺ​ជា​កត្តា​សំខាន់​ក្នុង​គោល​នយោបាយ​របស់​គណបក្ស​ប្រជា​ធិបតេយ្យ​មូលដ្ឋាន​ និង​សម្រាប់​យុទ្ធនាការ​ឃោសនា​បោះឆ្នោត។ ​ការ​ឃោសនា​ដោយ​ភ្ជាប់​ឃាតកម្ម​លោក ​កែម ឡី​ អាច​បន្ថែម​ភាព​តាន​តឹង​ខាង​នយោបាយ​ ទៅ​លើ​បញ្ហា​ចម្រូងចម្រាស​បច្ចុប្បន្ន​ ដែល​ក្រុម​មេដឹក​នាំ ​និង​មន្ត្រី​គណបក្ស​ប្រឆាំង​ ដែល​ត្រូវ​រំលាយ​នោះ ​បាន​អំពាវនាវ​ដោយ​ទទូច​ឲ្យ​ពលរដ្ឋ​នៅតែ​ផ្ទះ​ដើម្បី​ឈ្នះ​ឯង​ ខណៈ​ដែល​គណបក្ស​ប្រជាជន​កម្ពុជា​បាន​អំពាវនាវ​ឲ្យទៅ​បោះឆ្នោត។​ ​គណបក្ស​ប្រជាជន​ថា​ បើ​ពលរដ្ឋ​មិន​ទៅ​បោះឆ្នោត​ទេ ​គឺ​ស្មើ​នឹង​ប្រឆាំង​ព្រះ​មហាក្សត្រ។​

ដោយ​ឡែក​មេធាវី​មួយ​ចំនួន​និយាយ​ថា​ ការ​ឃោសនា​ដោយ​ប្រើ​ឃាតកម្ម​លោក​កែម ឡី​ គឺ​មិន​អាច​បង្ក​ឲ្យ​មាន​ផល​ប៉ះពាល់​ខាង​ច្បាប់​នោះ​ទេ ​ប្រសិន​បើ​ការ​ឃោសនា​នោះ​មិន​បាន​លើក​ឡើង​អំពី​ហេតុ​ផល​នៃ​ការ​ស្លាប់​របស់​លោក ​កែម ឡី។ ​ចំណែក​អ្នក​ឃ្លាំ​មើល​ការ​បោះឆ្នោត​មួយ​ចំនួន​បានលើក​ឡើង​ថា​ ការ​ឃោសនា​បោះឆ្នោតដែល​ភ្ជាប់​នឹង​ឃាតកម្ម​របស់​លោក​ កែម ឡី​ អាច​នឹង​ធ្វើ​ទៅ​បាន​ ដោយ​គ្មាន​បញ្ហា​ប្រឈម ​ប្រ​សិនបើ​គណបក្ស​ប្រជាធិបតេយ្យ​មូលដ្ឋាន​ បាន​កំណត់ថា​ ​ឃាតកម្ម​នេះ​ជា​ផ្នែក​មួយ​នៃ​គោល​នយោបាយ​របស់​បក្ស។​

លោក ​សាម អ៊ីន​ អគ្គលេខាធិការ​បក្ស​ប្រជា​ធិបតេយ្យ​មូលដ្ឋាន​ បាន​បញ្ជាក់​បន្ថែម​ថា​ គោល​នយោ​បាយ​មួយ​ចំនួន​របស់​គណបក្ស​ប្រជាធិបតេយ្យ​មូល​ដ្ឋាន​ បាន​ចាប់​បដិសន្ធិ​ពី​គំនិតរបស់​លោក ​កែម ឡី ​ដែល​ចង់​ឃើញ​ប្រព័ន្ធ​យុត្តិធម៌​មាន​ភាព​ឯករាជ្យ​ និង​អាច​មានការ​ជឿជាក់​បាន​សម្រាប់​មហាជន​ និង​ប្រព័ន្ធ​សុខាភិបាល​ ដែល​មាន​គ្រូពេទ្យ​ប្រកប​ដោយ​គុណភាព​ជាដើម៕

What Next?

Recent Articles

2 Responses to "គណបក្ស​ប្រជាធិប​តេយ្យ​មូលដ្ឋាន​ពិចារណា​ឃោសនា​បោះឆ្នោត​ដោយ​ភា្ជប់​ឃាតកម្ម​លោក កែម ឡី​ ប៉ុន្តែ​បារម្ភ​អំពី​ផ្លូវ​ច្បាប់"

  1. Sam says:

    Reluctant warriors. Lesson learned and traps are being laid along the way and one miss step ends up the same faith of CNRP. “Is it the bridge is being too far away”

  2. Free Cambodia says:

    You can see that these political parties are inexperienced and uneducated. We don’t care about who has more money and who killed Mr. Lay. When they claimed that they want to lead our country, they need to convince us on peace and stability, how to improve the economy, how to raise better standard of living, etc…

    My suggestion for their political party platform is to have a formal set of principle goals which are supported by a political party or individual candidate. In order to appeal to the general public for support and votes about complicated topics or issues they must tell us of what they can do for our people and nation. I don’t hear any positive from them, but only negativities. How can they expect us to vote for them?