ម្ដាយ​បណ្ឌិត កែម ឡី ថា​ខ្វះ​ថវិកា​សាងសង់​ចេតិយ​បន្ត​ខណៈ​សាងសង់​បាន​ប្រមាណ​៤០ភាគរយ

ដោយ សេក បណ្ឌិត
2018-06-18
RFA

ម្ដាយ​របស់​បណ្ឌិត កែម ឡី លោកស្រី ភោគ សេ ជជែក​ជាមួយ​លោក ឃួន សេរីវុធ ដែល​មក​គោរព​វិញ្ញាណក្ខន្ធ​កូន​ប្រុស​របស់​គាត់​នៅ​ភូមិ​អង្គតាកុប ឃុំ​លាយបូរ ស្រុក​ត្រាំកក់ ខេត្ត​តាកែវ កាល​ពី​ថ្ងៃ​ទី​២៧ កញ្ញា ឆ្នាំ​២០១៦។ RFA
ម្ដាយ​របស់​បណ្ឌិត កែម ឡី លោកស្រី ភោគ សេ ជជែក​ជាមួយ​លោក ឃួន សេរីវុធ ដែល​មក​គោរព​វិញ្ញាណក្ខន្ធ​កូន​ប្រុស​របស់​គាត់​នៅ​ភូមិ​អង្គតាកុប ឃុំ​លាយបូរ ស្រុក​ត្រាំកក់ ខេត្ត​តាកែវ កាល​ពី​ថ្ងៃ​ទី​២៧ កញ្ញា ឆ្នាំ​២០១៦។ RFA


ប្អូនប្រុស​និង​ម្តាយ​បង្កើត​របស់​លោក​បណ្ឌិត កែម ឡី ឲ្យ​ដឹង​ថា ចេតិយ​តម្កល់សព​លោក​បណ្ឌិត កែម ឡី សាងសង់​បាន​ប្រមាណ​៤០​ភាគរយ​ហើយ ប៉ុន្តែ​បច្ចុប្បន្ន កំពុង​ខ្វះ​ថវិកា​សម្រាប់​សាងសង់ ចេតិយ​បន្ត​ទៀត។ ក្រុម​គ្រួសារ អំពាវនាវ​ឲ្យ​សប្បុរសជន​ទាំង​ក្នុង និង​ក្រៅ​ប្រទេស បន្ត​ជួយ​បរិច្ចាគ​ថវិកា ដើម្បី​សាងសង់​ចេតិយ​ឲ្យ​បាន​រួចរាល់​ទាំងស្រុង។

ប្អូនប្រុស និង​ម្ដាយ​របស់​លោក​បណ្ឌិត កែម ឡី ឲ្យ​ដឹង​ថា ពួកគេ​កំពុង​ត្រូវការ​ថវិកា​ប្រមាណ​ជាង​១០ ម៉ឺន​ដុល្លារ​ទៀត ដើម្បី​បញ្ចប់​គម្រោង​សាងសង់​ចេតិយ​តម្កល់សព​លោក​បណ្ឌិត កែម ឡី ដែល​ស្ថិត​នៅ​ក្នុង​ទឹកដី​កំណើត​ភូមិ​អង្គ​តាកុប ឃុំ​លាយបូរ ស្រុក​ត្រាំកក់ ខេត្ត​តាកែវ។

ប្អូនប្រុស​បង្កើត​លោក​បណ្ឌិត កែម ឡី និង​ជា​ប្រធាន​គណបក្ស​ខ្មែរ​តែមួយ គឺ​លោកកែម រិទ្ធិសិត រៀបរាប់​ថា ថវិកា​ដែល​ប្រមូល​បាន​កាលពី​បុណ្យ​១០០​ថ្ងៃ ជាង​១​ម៉ឺន​ដុល្លារ និង​ថវិកា​របស់​លោក​នាយករដ្ឋមន្ត្រី ហ៊ុន សែន ចំនួន ៦​ម៉ឺន​ដុល្លារ​ដែល​សរុប​ទាំងអស់​ជាង ៧​ម៉ឺន​ដុល្លារ​នោះ បាន​ចំណាយ​អស់ហើយ សម្រាប់​សាងសង់​ចេតិយ​តម្កល់សព​លោក​បណ្ឌិត កែម ឡី ប៉ុន្តែ ចេតិយ​ទើប​សាងសង់​បាន​ប្រមាណ ៤០​ភាគរយ​ប៉ុណ្ណោះ។ លោក​បន្ថែម​ថា តាម​គម្រោង​របស់​គណៈកម្មការ​សាងសង់​ចេតិយ​ចាស់ គឺ​គ្រោង​ចំណាយ​ថវិកា​ជាង ១៧​ម៉ឺន​ដុល្លារ​ដើម្បី​សាងសង់​ចេតិយ៍ ដូច្នេះ​បច្ចុប្បន្ន​នៅ​ខ្វះ​ជាង ១០​ម៉ឺន ដុល្លារ​ទៀត។ ទំហំ​ចេតិយ​នេះ គឺ​ខាងក្រៅ​មាន​បណ្តោយ ៩​ម៉ែត្រ​គុណ​នឹង​៩​ម៉ែត្រ ចំណែក​ខាងក្នុង ៥​ម៉ែត្រ គុណ​នឹង​៥​ម៉ែត្រ រីឯ​កម្ពស់​១៦​ម៉ែត្រ។ «»

បច្ចុប្បន្ន​នេះ ការ​សាង​សង់​ចេតិយ​លោក​បណ្ឌិត កែម ឡី ត្រូវ​បាន​គណៈកម្មការ ដែល​បង្កើត​ឡើង ដោយ​អង្គការ​សង្គម​ស៊ីវិល ប្រគល់​សិទ្ធិ​ជូន​ក្រុម​គ្រួសារ​វិញ បន្ទាប់​ពី​មានរឿង​ចម្រូងចម្រាស ដោយ សារ​ការ​លូកដៃ​ពី​អ្នកនយោបាយ និង​ការឧបត្ថម្ភ​ថវិកា​ពី​លោក ហ៊ុន សែន ជាដើម។ ក្រោយ​ពី​មាន ការ​លូកដៃ​ពី​អ្នកនយោបាយ​នោះ អតីត​សមាជិក​គណៈកម្មការ​បុណ្យ​សព​បណ្ឌិត កែម ឡី ៣​នាក់ រួមមាន​នាយក​ប្រតិបត្តិ​មជ្ឈមណ្ឌល​សម្ពន្ធភាព​ការងារ និង​សិទ្ធិមនុស្ស (CENTRAL) លោក មឿន តុលា លោក ប៉ា ងួនទៀង នាយក​ប្រតិបត្តិ​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ និង​ព្រះតេជព្រះគុណ ប៊ុត ប៊ុនតិញ ស្ថាបនិក​បណ្ដាញ​ព្រះសង្ឃ​ឯករាជ្យ ត្រូវ​បាន​តុលាការ​ចោទប្រកាន់​និង​ចេញ​ដីកា​ឃុំខ្លួន​ពាក់ព័ន្ធ​នឹង​ការ​ចោទ​ថា ធ្វើ​ឲ្យ​បាត់​បច្ច័យ​បុណ្យ​សព លោក កែម ឡី តាម​បណ្ដឹង​របស់​ប្រធាន​គណបក្ស​យុវជន​កម្ពុជា​លោក ពេជ្រ ស្រស់។ ក្រុម​គណៈកម្មការ​បុណ្យ​សព និង​ក្រុម​គ្រួសារ​បណ្ឌិត កែម ឡី ចាត់​ទុក​ការចោទប្រកាន់​នោះ​ថា ជា​រឿង​អយុត្តិធម៌ ជា​រឿងប្រឌិត ព្រោះ​មិន​មាន​ការ​កិបកេង​បច្ច័យ​បុណ្យ​សព​ទេ។

លោក កែម រិទ្ធិសិត បញ្ជាក់​ថា លោក​នឹង​មិន​ស្នើសុំ​ទៅ​លោកនាយក​រដ្ឋមន្ត្រី ហ៊ុន សែន ឲ្យ​ជួយ​ឧបត្ថម្ភ​ថវិកា​ទៀត​ទេ ប៉ុន្តែ​លោក​អំពាវនាវ​ដល់​សប្បុរស​ជន​ទូទៅ ជួយ​ចូលរួម​ចូល​បុណ្យ​កសាង​ចេតិយ។ លោក​អះអាង​ថា ការ​ខ្វះខាត​ថវិកា​សាងសង់​ចេតិយ​នេះ មិនមែន​ដោយសារ​លោក​យក​កេរ្តិ៍​ឈ្មោះ​បងប្រុស ទៅ​បង្កើត​គណបក្ស​នយោបាយ ហើយ​បណ្ដាល​ឲ្យ​ពលរដ្ឋ​ខឹង​ស្អប់​មិន​ចូល​បច្ច័យ​នោះ​ទេ។ «»

អតីត​សមាជិក​គណៈកម្មការ​កសាង​ចេតិយ​ម្នាក់​ដែល​ទើប​លាឈប់ និង​បាន​ទៅ​ធ្វើ​ជា​ប្រធាន​មូលនិធិ កែម ឡី គឺ​លោក​សៅ កុសល មាន​ប្រសាសន៍​ថា លោក​សោកស្ដាយ​ដែល​គណៈកម្មការ​ចាស់​បាន​ត្រឹមតែ​បង្កើត​គម្រោង តែ​មិនបាន​ជួយ​ដល់​ទី​បញ្ចប់​ដោយសារតែ​មានការ​ធ្វើទុក្ខ​បុក​ម្នេញ​នានា សូម្បី​តែ​រៀបចំ​ពិធី​បុណ្យខួប​១​រយ​ថ្ងៃ ក៏​មាន​គេ​ព្យាយាម​រារាំង​ដែរ។ លោក​បញ្ជាក់​ថា មូលហេតុ​ដែល​ចំណាយ​ថវិកា​ដល់ ១៧​ម៉ឺន​សម្រាប់​កសាង​ចេតិយ​នោះ ព្រោះ​តាម​គម្រោង​ធ្វើតាម​រចនាបថ​ប្រាសាទ ភ្នំ​ជី​សូ​តំណាង​ឲ្យ​ខេត្ត​តាកែវ និង​ប្រាសាទ​ព្រះវិហារ ដែល​ត្រូវ​ប្រើ​សម្ភារៈ​ថ្លៃៗ។ «»

ងាក​ទៅ​មើល​ស្ថានភាព​ម្តាយ​បង្កើត​លោក​បណ្ឌិត កែម ឡី អាយុ​៧៨​ឆ្នាំ គឺ​លោកស្រី ភោគ សេ វិញ នៅតែ​នឹករលឹក និង​សោកសង្រេង​ខ្លាំង​ណាស់​ចំពោះ​ការបាត់បង់​កូនប្រុស​ជាទី​ស្រលាញ់។ ទោះ យ៉ាង​ណា​ក្តី​ទំហំ​នៃ​ការ​នឹករលឹក​របស់​អ្នក​ម្ដាយ​ចំពោះ​លោក​មាន​ត្រូវ​បាន​កាត់បន្ថយ​ខ្លះ​ដោយសារ ការ​រំកិល​នៃ​ពេលវេលា។ លោកស្រី ភោគ សេ រៀបរាប់ថា លោកស្រី​នៅតែ​តត្រុក​ក្បែរ​ផ្នូរ​របស់​កូន បោស​ជូតៗ និង​ដាំ​ផ្កា​ពេញទី​នោះ។ អ្នក​ម្ដាយ​រូប​នេះ ថែមទាំង​បន្ត​សម្រាន្ត​នៅ​ជាប់​នឹង​ផ្នូរ​របស់​លោក​ជាប្រចាំ​ទៀត​ផង។ «»

ក្រៅពី​នឹករលឹក​ដល់​កូនប្រុស​ដែល​ត្រូវ​បាន​ឃាតក​ឃោរឃៅ​បាញ់សម្លាប់​ក្នុង​ស្តារម៉ាតកាលតិច កណ្តាល​ក្រុង​ភ្នំពេញ កាលពី​ថ្ងៃ​ទី​១០ ខែ​កក្កដា ឆ្នាំ​២០១៦​នោះ លោកស្រី​ក៏​តែង​មាន​អារម្មណ៍​នឹក រលឹក​ដល់​ចៅៗ​ទាំង​៥​នាក់ កំពុង​រស់នៅ​ប្រទេស​អូស្ត្រាលី​ជាមួយ​ម្ដាយ​ដែរ ដោយ​មិន​ដឹង​ថ្ងៃ​ណា​បាន​ជួប​មុខ​ទៀត​ទេ។ «»

ម្ដាយ​របស់​លោក កែម ឡី ឲ្យ​ដឹង​ថា លោកស្រី មាន​សុខភាព​មិនសូវ​មាំទាំ​ដូច​មុន​ទៀត​ឡើយ ហើយ ជីវិត​របស់​លោកស្រី គឺ​ពឹង​ផ្អែកលើ​ការ​ជូន​បច្ច័យ​របស់​ប្រជាពលរដ្ឋ​ខ្មែរ​ជិត​ឆ្ងាយ​ដែល​ចូល​ទៅ​គោរព និង​អុជ​ធូប​ជូន​លោក​បណ្ឌិត កែម ឡី។ លោកស្រី​បញ្ជាក់​ថា មាន​មនុស្ស​ចាប់ពី ១០​នាក់ ដល់​៥០​នាក់ ទៅ​គោរព​និង​អុជ​ធូប​ជូន​លោក កែម ឡី ជាពិសេស​នៅ​ថ្ងៃ​ចុង​សប្ដាហ៍ និង​ថ្ងៃ​បុណ្យទាន។«»

ប្អូនប្រុស និង​ម្ដាយ​បង្កើត​លោក​បណ្ឌិត កែម ឡី ក៏​មាន​គម្រោង​នឹង​រៀបចំ​ពិធីបុណ្យ​រម្លឹក​ខួប​២​ឆ្នាំ​នៃ​មរណភាព​លោក​បណ្ឌិត​កែម ឡី នៅ​ទីតាំង​តម្កល់សព ចាប់ពី​ថ្ងៃ​ទី​១០ ដល់​ថ្ងៃ​ទី​១១ ខែ​កក្កដា ឆ្នាំ​២០១៨។ ក្រុម​គ្រួសារ​អំពាវនាវ​ដល់​សាធារណជន​ទាំងអស់ អញ្ជើញ​ចូលរួម​ពិធីបុណ្យ ដើម្បី​បង្ហាញ​ការ​គោរព​ស្រលាញ់​លោក​បណ្ឌិត កែម ឡី និង​ជួយ​ចូល​បច្ច័យ​សម្រាប់​កសាង​ចេតិយ​បន្ត​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles