សាក្សី​ទី​ ៨ ​ចូល​ទៅ​បំភ្លឺ​ក្នុង​សំណុំ​រឿង​លោក​ កឹម សុខា

លោក កឹម សុខា ពេល​ត្រូវ​បាន​នាំ​ឡើង​តុលាការ​នា​ពេល​កន្លង​មក។




ភ្នំពេញប៉ុស្តិ៍

ភ្នំពេញៈ ​លោក​ កែវ រតនា អតីត​ប្រធានការិយាល័យ​វិទ្យុ​របស់​អតីត​គណបក្ស​សង្គ្រោះ​ជាតិ​ដែល​ជា​សាក្សី​ចុងក្រោយ​ក្នុង​ចំណោម​សាក្សី ៨ រូប​ដែល​ចៅក្រម​ស៊ើបសួរ​លោក គី ឫទ្ធី បាន​កោះហៅ​បាន​ចូល​បំភ្លឺ​នៅ​សាលា​ដំបូង​រាជធានី​ភ្នំពេញ​កាលពី​ថ្ងៃ​សុក្រ​ពាក់ព័ន្ធ​នឹង​សំណុំ​រឿង ​«​ក្បត់ជាតិ​» ​ដ៏ចម្រូងចម្រាស​របស់​លោក កឹម សុខា ដែល​មជ្ឈដ្ឋាន​ជាច្រើន​ចាត់​ទុក​ថា​គឺជា​រឿង​នយោបាយ​។

លោក​ រតនា ​បាន​ប្រាប់​ភ្នំពេញ​ប៉ុស្តិ៍​តាម​ទូរស័ព្ទ​កាលពី​ម្សិលមិញ​ថា​ចៅក្រម​បាន​សាកសួរ​លោក​ពាក់ព័ន្ធ​នឹង​លោក កឹម សុខា និង​ការងា​របស់​លោក​ផ្ទាល់ ពេល​បម្រើ​ការងារ​នៅ​វិទ្យុ​របស់​គណបក្ស​សង្គ្រោះ​ជាតិ​។

លោក​ថ្លែង​ថា​៖ «​ខ្ញុំ​បាន​ចូល​បំភ្លឺ​ហើយ​រយៈពេល​ជាង​មួយ​ម៉ោង​។ រឿង​ទាំងអស់​ហ្នឹង​គេ​កោះហៅ​ខ្ញុំ​ទាក់ទង​នឹង​រឿង​សន្ទិដ្ឋិភាព​ឯកឧត្តម កឹម សុខា គឺ​ទាក់ទង​រឿង​ទាំងអស់​នេះ​។ សំណួរ​ភាគច្រើន​ទាក់ទង​នឹង​ឯកឧត្តម កឹម សុខា ខ្លះ​ទៅ​ហើយ​ក៏​មាន​សំណួរ​ទាក់ទង​ការងារ​របស់​ខ្ញុំ​ខ្លះ​ទៅ និង​បញ្ហា​ផ្សេងៗ​ទៀត​»​។ «​ក្នុង​នាម​សាក្សី​បើ​សិន​មាន​លិខិត​ណាមួយ​ដែល​នៅ​តែ​សង្ស័យ​ ឬ​នៅ​មិនទាន់​ទទួល​បាន​ចម្លើយ​ខ្ញុំ​នឹង​បន្ត​បំភ្លឺ តែ​ខ្ញុំ​សង្ឃឹម​ថា​អ្វី​ដែល​ខ្ញុំ​បាន​ផ្តល់​ល្អ​ប្រសើរ​ទៅ​ចុះ​ក្នុង​នាម​ជា​អ្នកព័ត៌មាន យើង​មិន​មាន​អ្វី​ផ្សេង​ក្រៅពី​ព័ត៌មាន​ទេ​»​។

លោក​ សុខា ត្រូវ​បាន​ចាប់​ខ្លួន​កាលពី​យប់​ថ្ងៃទី​ ៣ ខែ​កញ្ញា​ឆ្នាំ​មុន​ហើយ​ត្រូវ​បាន​តុលាការ​ចោទប្រកាន់​ពី​បទ​ «​ក្បត់ជាតិ​» ដែល​ការចោទប្រកាន់​នេះ​គឺ​ពាក់ព័ន្ធ​នឹង​វីដេអូឃ្លីប​មួយ​ដែល​លោក​បាន​និយាយ​នៅ​ប្រទេស​អូស្ត្រាលី​ពី​ឆ្នាំ​ ២០១៣​។

បើ​តាម​លោកស្រី​ ម៉េង សុភារី មេធាវី​លោក​ សុខា ក្រុម​មេធាវី​បាន​ប្តឹង​ទៅ​តុលាការ​កំពូល​ពាក់ព័ន្ធ​នឹង​ការសុំ​នៅ​ក្រៅ​ឃុំ ប៉ុន្តែ​មក​ទល់​ពេល​នេះ​តុលាការ​កំពូល​មិន​ទាន់​សម្រេច​លើ​ថ្ងៃ​សវនាការ​នៅ​ឡើយ​៕


Contact author: នៀម ឆេង

What Next?

Recent Articles

One Response to "សាក្សី​ទី​ ៨ ​ចូល​ទៅ​បំភ្លឺ​ក្នុង​សំណុំ​រឿង​លោក​ កឹម សុខា"

  1. Free Cambodia says:

    We all know that Sokha has been used by the US. Sokha has been promised with assistance and support if he does lead the country oneday. Sokha had received unlimited funds for his campaign and movement from the US. But look at Sokha now, he is in jail alone, and US cannot help him. My message is that please do not betray your own country because others promising you the help.