ខុមហ្វ្រែល​បដិសេធ​នឹង​ការ​បំភ្លៃ​របស់​ព័ត៌មាន​ក្នុង​ស្រុក​មួយ​ចំនួន​នៃ​របប​លោក ហ៊ុន សែន

ដោយ សន ចាន់រដ្ឋា
2018-07-11
RFA

លោក គល់ បញ្ញា ប្រធាន​អង្គការ​ខុមហ្វ្រែល (Comfrel) ថ្លែង​ទៅ​កាន់​អ្នក​កាសែត នៅ​សណ្ឋាគារ​អ៊ីមភើរៀល រាជធានី​ភ្នំពេញ នៅ​ថ្ងៃ​ទី ២០ មករា ២០១៥។ RFA
លោក គល់ បញ្ញា ប្រធាន​អង្គការ​ខុមហ្វ្រែល (Comfrel) ថ្លែង​ទៅ​កាន់​អ្នក​កាសែត នៅ​សណ្ឋាគារ​អ៊ីមភើរៀល រាជធានី​ភ្នំពេញ នៅ​ថ្ងៃ​ទី ២០ មករា ២០១៥។ RFA


គណៈកម្មាធិការ​ដើម្បី​ការបោះឆ្នោត​ដោយ​សេរី និង​យុត្តិធម៌​នៅ​កម្ពុជា ហៅ​កាត់​ថា ខុមហ្វ្រែល (Comfrel) បដិសេធ​ចំពោះ​ការចោទប្រកាន់ និង​បកស្រាយ​បំភ្លៃ​របស់​បណ្ដាញ​ព័ត៌មាន​សង្គម និង​ប្រព័ន្ធ​ផ្សព្វផ្សាយ​ក្នុងស្រុក​មួយ​ចំនួន ដែល​ចោទ​អង្គការ​របស់​ខ្លួន​ថា​បាន ធ្វើ​សកម្មភាព​អុកឡុក​ការ​បោះឆ្នោត និង​បង្ក​ចលាចល​នៅ​ក្រោយ​ការបោះឆ្នោត។

សេចក្តី​ប្រកាស​ព័ត៌មាន​របស់​អង្គការ​ខុមហ្វ្រែល ផ្សាយ​ថ្ងៃទី១០ ខែ​កក្កដា បញ្ជាក់​ថា​អង្គការ​ខុមហ្វ្រែល​បង្កើត​មក​ដើម្បី​ជួយ​ដល់​ការបោះឆ្នោត អោយ​មាន​ភាព​សេរី និង​យុត្តិធម៌​តាម​បែប​ប្រជាធិបតេយ្យ។ អង្គការ​ខុមហ្វ្រែល​ចាត់​ទុក​ការចោទប្រកាន់ មក​លើ​អង្គការ​របស់​ខ្លួន​ថា ជា​ទម្រង់​នៃ​ការ​គំរាមកំហែង បំភិតបំភ័យ​ចំពោះ​សិទ្ធិ​ចូលរួម​សកម្មភាព​ក្នុង​សកម្មភាព​ឃ្លាំមើល​ស្ថានភាព​របស់​ប្រជាពលរដ្ឋ នៅ​ថ្ងៃ​បោះឆ្នោត​ជ្រើសតាំង​តំណាងរាស្ត្រ​នីតិកាល​ទី៦ ដែល​នឹង​ធ្វើឡើង​នៅ​ថ្ងៃ​ទី ២៩ ខែ​កក្កដា ឆ្នាំ​២០១៨។

អង្គការ​ខុមហ្វ្រែល នឹង​មិន​ដាក់​អ្នកសង្កេតការណ៍​សម្រាប់​ឃ្លាំមើល​ការបោះឆ្នោត​នេះ​ឡើយ ប៉ុន្តែ​អង្គការ​នេះ​នឹង​សហការ​ជាមួយ​អង្គការ​ដៃគូ ដើម្បី​គាំទ្រ​សកម្មភាព​ប្រជាពលរដ្ឋ​ស្ម័គ្រចិត្ត​ឃ្លាំមើល​ការ​អនុវត្ត​សិទ្ធិ និង​ឆន្ទៈ​បោះឆ្នោត​របស់​ពលរដ្ឋ។

អង្គការ​ខុមហ្វ្រែល​សង្ឃឹម​ថា ការ​គំរាមកំហែង​ទាំងនេះ​នឹង​បន្ត​កើតមាន​ឡើង ដល់​កម្រិត​មួយ​ដែល អង្គការ​នេះ​សម្រេចចិត្ត​ដក​សកម្មភាព​ឃ្លាំមើល​របស់​ប្រជាពលរដ្ឋ​ស្ម័គ្រចិត្ត​នោះ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles