មន្ត្រី​ថា ការរិះគន់ កងកម្លាំង​ធ្វើ​យុទ្ធនាការ​បោះឆ្នោត​គឺ​មិន​យល់​ពី​ច្បាប់​កម្ពុជា

លោក ប្រេដ អាដាម ប្រធាន Human Rights Watch ប្រចាំ​តំបន់​អាស៊ី។ រូបថត AFP



and
ភ្នំពេញប៉ុស្តិ៍

ភ្នំពេញៈ ប្រតិកម្មតប​នឹង​ការរិះគន់​របស់​អង្គការ​ឃ្លាំ​មើល​សិទ្ធិមនុស្ស​អន្តរជាតិ​ថា កងកម្លាំង​ប្រដាប់​អាវុធ​យក​ពេលវេលា​ទៅ​ចូលរួម​ជួយ​ធ្វើ​យុទ្ធនាការ​រក​សំឡេងឆ្នោត​ឲ្យ​គណបក្ស​កាន់​អំណាច​មុន​ពេល និង​ក្នុង​អំឡុង​យុទ្ធនាការ​ឃោសនា​បោះឆ្នោត​ជា​ការ​រំលោភ​ច្បាប់​កម្ពុជា​នោះ​មន្ត្រី​ជាន់​ខ្ពស់​នៃ​បក្ស​នេះ​ចាត់​ទុក​អ្នក​រិះគន់​បែប​នេះ​ជា​អ្នក​ដែល​មិន​យល់​ពី​ច្បាប់​របស់​កម្ពុជា​។

អ្នកនាំពាក្យ​គណបក្ស​ប្រជាជន​កម្ពុជា​ដែល​ជា​បក្ស​កាន់អំណាច​លោក​ សុខ ឥសាន និង​អ្នក​នាំពាក្យ​នគរបាល​ជាតិ​លោក​ គៀត ច័ន្ទថារិទ្ធ បាន​ថ្លែង​ការពារ​ប្រហាក់​ប្រហែល​គ្នា​ចំពោះ​កងកម្លាំង​ប្រដាប់អាវុធ​មានដូចជា យោធា កងរាជ​អាវុធហត្ថ និង​នគរបាលជាតិ​ដែល​ត្រូវ​បាន​ចោទ​ថា យក​ពេលវេលា​ទៅ​ជួយ​ធ្វើ​យុទ្ធនាការ​ឃោសនា​រក​សំឡេង​ឆ្នោត​ឲ្យ​បក្ស​ប្រជាជន​កម្ពុជា​ក៏​ដូចជា​ជួយ​រក​សំឡេងឆ្នោត​ឲ្យ​លោក​នាយករដ្ឋមន្ត្រី​ ហ៊ុន សែន​។

មន្ត្រី​អ្នក​នាំពាក្យ​ទាំង​ ២ ​រូប​អះអាង​ស្រដៀង​គ្នា​ថា កងកម្លាំង​ប្រដាប់អាវុធ មិន​បាន​អនុញ្ញាត​ឲ្យ​យក​ពេលវេលា​ទៅ​ធ្វើ​យុទ្ធនាការ​ឃោសនា​បោះឆ្នោត​ឲ្យ​បក្ស​កាន់​អំណាច​ក្នុង​ម៉ោង​ការងារ​របស់​ពួកគេ​ទេ ហើយ​ច្បាប់​ក៏​មិន​បាន​ហាម​កងកម្លាំង​ប្រដាប់អាវុធ​ពី​ការចូលរួម​សិទ្ធិ​នយោបាយ​ដែរ​។

លោក ឥសាន ថ្លែង​ថា​៖ «​អ្នក​ដែល​អួតខ្លួន​ថា Human Rights Watch គាត់​អត់​ស្គាល់​ច្បាប់​កម្ពុជា​ផង​ហើយ​មក​និយាយ​ទាំង​បំពាន​។ យើង​មិន​ចាប់​អារម្មណ៍​ទេ ពីព្រោះ​ការ​ដែល​ទិតៀន និង​វាយប្រហារ​មក​លើ​រាជរដ្ឋាភិបាល​ក៏ដូចជា​គណបក្ស​កាន់​អំណាច​ដោយសារ​វាយប្រហារ​ទាំង​ខុសច្បាប់ ដូច្នេះ​ហើយ​យើង​យល់​ថា​ប្រជាពលរដ្ឋ​មើល​ឃើញ​ហើយ​អ្នកណា​ជេរ​គេ អ្នកណា​វាយប្រហារ​គេ​ដោយ​បំពាន ហើយ​ខ្ញុំ​យល់​ថា​មិន​អាច​មាន​ឥទ្ធិពល​ដល់​ជំនឿ​របស់​ប្រជាពលរដ្ឋ​ទេ​»​។

លោក​ គៀត ច័ន្ទថារិទ្ធ បញ្ជាក់​ថា​៖ «​មន្ត្រីរាជការ​យល់​ច្បាប់ទម្លាប់ គេ​មិន​ចេះ​តែ​ធ្វើ​ទេ គេ​ធ្វើ​នៅ​ក្រៅ​ពេល​បំពេញភារកិច្ច​។ ទី​ ២ គេ​សុំច្បាប់​ពី​អង្គភាព ដូច្នេះ​មិន​មាន​អ្វី​ខុស​នោះ​ទេ ហើយ​គេ​មិន​យក​ឯកសណ្ឋាន​កងទ័ព ឬ​នគរបាល​យក​ទៅ​ពាក់​ដើរ​ទៅ​ឃោសនា​ទេ​»​។

អង្គការ​ឃ្លាំមើល​សិទ្ធិ​មនុស្ស​អន្តរជាតិ​ពី​ម្សិលមិញ​អះអាង​ថា កងកម្លាំង​ប្រដាប់អាវុធ​កំពុង​សកម្ម​ក្នុង​ការ​ចូលរួម​ជួយ​រក​សំឡេងឆ្នោត​ឲ្យ​គណបក្ស​ប្រជាជន​កម្ពុជា​ក្នុង​អំឡុង​មុន និង​ពេល​យុទ្ធនាការ​ឃោសនា​បោះឆ្នោត​បាន​និង​កំពុង​ចាប់ផ្តើម​ដែល​ទង្វើ​បែប​នេះ​គឺជា​ការរំលោភ​ច្បាប់​កម្ពុជា​ដែល​តម្រូវ​ឲ្យ​ពួកគេ​រក្សា​ជំហរ​នៅ​ជា​ភាព​អព្យាក្រឹត​។

តាម​សេចក្តី​ប្រកាស​ព័ត៌មាន​ចេញ​ពី​ម្សិលមិញ អង្គការ​ឃ្លាំមើល​សិទ្ធិ​មនុស្ស​អន្តរជាតិ​ (Human Rights Watch) ដ៏ល្បី​មួយ​នេះ​ដែល​មាន​ស្នាក់ការ​នៅ​ទីក្រុង​ញូវយ៉ក សហរដ្ឋអាមេរិក​ក៏​បាន​រកឃើញ​ថា​សមាជិក​ជាន់ខ្ពស់​នៃ​កងកម្លាំង​សន្តិសុខ​បាន​បង្ហាញ​នូវ​ភាពលម្អៀង​ទៅ​រក​លោក​នាយករដ្ឋមន្ត្រី​ ហ៊ុន សែន និង​គណបក្ស​ប្រជាជន​កម្ពុជា​នៅឯ​កន្លែង​ជួបជុំ​ជា​សាធារណៈ​នានា និង​ព្រឹត្តិការណ៍​ផ្សេងៗ​នៅ​ទូទាំង​ប្រទេស​កម្ពុជា​។

មាត្រា​ ៩ ​នៃ​ច្បាប់​ស្តីពី​លក្ខន្តិកៈ​ទូទៅ​នៃ​មន្ត្រី​យោធា​នៃ​កងយោធពល​ខេមរភូមិន្ទ​ចែង​ថា​ «​មន្ត្រី​យោធា​ត្រូវ​នៅ​អព្យាក្រឹត​ក្នុង​តួនាទី និង​សកម្មភាព​របស់​ខ្លួន​ហើយ​ការប្រើ​តួនាទី​ ឬ​មុខងារ និង​សម្ភារ​របស់​រដ្ឋ សម្រាប់​សកម្មភាព​នយោបាយ​ណា​មួយ​ត្រូវ​បាន​ហាមឃាត់​»​។

លោក​ ប្រេដ អាដាម នាយក​អង្គការ​ឃ្លាំមើល​សិទ្ធិមនុស្ស​អន្តរជាតិ​ប្រចាំ​អាស៊ី ថ្លែង​ថា​៖ «​ដើម្បី​ឈ្នះ​ការបោះឆ្នោត​បោក​បញ្ឆោត វា​មិន​គ្រប់គ្រាន់​សម្រាប់​គណបក្ស​ប្រជាជន​កម្ពុជា​ដែល​ជា​បក្ស​កាន់អំណាច​ដើម្បី​ហាម​បក្សប្រឆាំង [​បក្ស​កាន់​អំណាច​] ត្រួតត្រា​លើ​ស្ថាប័ន​បោះឆ្នោត​ទាំងអស់ និង​បិទ​ប្រព័ន្ធ​ផ្សព្វផ្សាយ​ទៀត​»​។

លោក​ថា​៖ «​កាន់តែ​ច្បាស់​ទៀត​នោះ​គណបក្ស​ប្រជាជន​កម្ពុជា​គិត​ថា​ខ្លួន​ក៏​ត្រូវ​ការ​ផង​ដែរ ដើម្បី​ដាក់ពង្រាយ​ឧត្តមសេនីយ៍​ដ៏គួរ​ឲ្យ​ខ្លាច​មួយ​ចំនួន​របស់​ប្រទេស​នេះ ដើម្បី​ធ្វើ​យុទ្ធនាការ និង​បំភិតបំភ័យ​ប្រជាពលរដ្ឋ​ឲ្យ​ទៅ​បោះឆ្នោត​»​។

កម្ពុជា​នឹង​រៀបចំ​ការបោះឆ្នោត​ថ្ងៃ​ទី​ ២៩ ខែ​កក្កដា​ក្នុង​បរិយាកាស​មួយ​ដែល​អតីត​បក្ស​សង្គ្រោះ​ជាតិ​ត្រូវ​បាន​រំលាយ ហើយ​ប្រធាន​គណបក្ស​នេះ លោក​ កឹម សុខា ត្រូវ​បាន​ចាប់​ដាក់គុក និង​ស្ថាបនិក​គណបក្ស​លោក​ សម រង្ស៊ី បាន​និរទេស​ខ្លួន​ដោយ​បង្ខំ​។

អង្គការ​មួយ​នេះ​ក៏​បាន​បង្ហាញ​អំពី​ព័ត៌មាន​របស់​ប្រព័ន្ធ​ផ្សព្វផ្សាយ​ក្នុង​ស្រុក​ថា​ចាប់​តាំងពី​យុទ្ធនាការ​ផ្លូវការ​ចាប់ផ្តើម​ថ្ងៃទី​ ៧ ខែ​កក្កដា ឧត្តមសេនីយ៍ សៅ សុខា អគ្គមេបញ្ជាការ​ស្តីទី​កងទ័ព​កម្ពុជា​បាន​ធ្វើ​យុទ្ធនាការ​ឲ្យ​គណបក្ស​ប្រជាជន​កម្ពុជា​ដោយ​ប្រាប់​អ្នកចូលរួម​កាលពី​ថ្ងៃទី​ ៨ កក្កដា នៅឯ​វត្ត​មួយ​ក្នុង​ខេត្ត​កណ្តាល​ថា​ «​ក្នុង​ការ​ដឹកនាំ​ដ៏ឈ្លាសវៃ​របស់​សម្តេច​តេជោ ហ៊ុន សែន នាយករដ្ឋមន្ត្រី​នៃ​កម្ពុជា​ប្រទេស​របស់​យើង​បាន​អភិវឌ្ឍ គ្រប់កន្លែង​ក្នុង​ប្រទេស​មាន​ផ្លូវ ស្ពាន ប្រឡាយ សាលារៀន មន្ទីរពេទ្យ​។​ល​។​»​។

ឧត្តមសេនីយ៍ ហ៊ីង ប៊ុនហៀង ដែល​ថ្មីៗ​នេះ​ត្រូវ​បាន​ដាក់​ទណ្ឌកម្ម​ចំពោះ​ការរំលោភ​សិទ្ធិមនុស្ស​ដោយ​សហរដ្ឋអាមេរិក​បាន​និយាយ​ទៅ​កាន់​គ្រូបង្រៀន​ប្រមាណ​ ១០០០ ​នាក់ នៅឯ​ការជួបជុំ​មួយ​កាលពី​ថ្ងៃទី​ ៨ ខែ​កក្កដា​ថា​៖ «​ការអភិវឌ្ឍ និង​សន្តិភាព​របស់​ជាតិ​ទាំង​មូល​ទូទាំង​ប្រទេស​ក្រោម​ការដឹកនាំ​ដ៏ឈ្លាសវៃ​របស់​សម្តេច តេជោ ហ៊ុន សែន ប្រមុខ​រដ្ឋាភិបាល និង​ជា​ប្រធាន​គណបក្ស​ប្រជាជន​កម្ពុជា​» ​ហើយ​បាន​អំពាវនាវ​ឲ្យ​អ្នក​ទាំង​នោះ​បោះឆ្នោត​ឲ្យ​គណបក្ស​ប្រជាជន​កម្ពុជា​។

អង្គការ​ឃ្លាំមើល​សិទ្ធិមនុស្ស​អន្តរជាតិ​មួយ​នេះ​ក៏​បាន​បង្ហាញ​ពី​របាយការណ៍ ដែល​ទទួល​បាន​ពី​សមាជិក​ជាន់ខ្ពស់​នៃ​កម្លាំង​សន្តិសុខ​ដែល​ធ្វើ​យុទ្ធនាការ​ឲ្យ​លោក​ ហ៊ុន សែន និង​គណបក្ស​ប្រជាជន​កម្ពុជា​មុន​យុទ្ធនាការ​ផ្លូវការ​ចាប់ផ្តើម​ថ្ងៃទី​ ៧ ខែ​កក្កដា​ដែល​ថា​នេះ​ជា​ការ​រំលោភ​ច្បាប់​កម្ពុជា​។

លោក សម គន្ធាមី នាយក​ប្រតិបត្តិ​គណៈកម្មាធិការ​អព្យាក្រឹត និង​យុត្តិធម៌​ដើម្បី​ការបោះឆ្នោត​ដោយ​សេរី និង​ត្រឹមត្រូវ​នៅ​កម្ពុជា​ហៅ​កាត់​ថា និចហ្វិក បាន​ថ្លែង​ថា​ «​ការលើកឡើង​របស់​ Human rights watch គឺ​ត្រឹមត្រូវ​ដោយសារ​តែ​នៅ​បាត់ដំបង និង​កន្លែង​ផ្សេងៗ​ទៀត​មាន​រដ្ឋមន្ត្រី​ប្រាប់​យោធា​ និង​កម្លាំង​ប្រដាប់​អាវុធ​ទៅ​បោះឆ្នោត​ជូន​គណបក្ស​ប្រជាជន​ការពិត​នៅពេល​ដែល​គាត់​លើកឡើង​បែប​ហ្នឹង​ជា​សាធារណៈ​វា​ខុស​ក្រម​សីលធម៌​ និង​ច្បាប់​ដោយសារ​កងកម្លាំង​ប្រដាប់​អាវុធ​ជា​មនុស្ស​អព្យាក្រឹត​។ គជប ត្រូវ​ចេញ​លិខិត​ព្រមាន និង​ស្តីបន្ទោស​៕


Contact authors: មាស សុខជា and ម៉ិច ដារ៉ា

What Next?

Recent Articles

2 Responses to "មន្ត្រី​ថា ការរិះគន់ កងកម្លាំង​ធ្វើ​យុទ្ធនាការ​បោះឆ្នោត​គឺ​មិន​យល់​ពី​ច្បាប់​កម្ពុជា"

  1. Anonymous says:

    of cause there is no one in the world understanding your jungle law . your time is just about over SOK ESAN you just the mushroom grooving on a dead tree . do not be so proud of yourself you are nothing to me to give you any credit at all. instate this old dump guy was the born that stuck in Cambodian through . not so long Cambodian some thing have to be change soon. GOD bless Cambodia and all innocent Cambodian

  2. Free Cambodia says:

    Brad Adams is anti-Cambodia. He has to say something to keep his job active so he can ask for more money for his NGO from US-based foundations. It’s disgrace.

    We know his job and what he does for his organization. We understand our law perfectly. To say that we don’t understand Cambodian law is to say that Cambodians are from different planet.

Leave a Reply

Submit Comment