លោក​ ហ៊ុន សែន ​បាន​លើក​យក​ការ​ទប់ស្កាត់​បដិវត្តន៍​ពណ៌​មក​ឃោសនា

លោក ហ៊ុន សែន ក្នុង​ពិធី​បើក​យុទ្ធនាការ​ឃោសនា​។ ហេង ជីវ័ន




ភ្នំពេញប៉ុស្តិ៍

ភ្នំពេញៈ ​លោក​នាយក​រដ្ឋមន្ត្រី​ ហ៊ុន សែន ​កាលពី​ម្សិលមិញ​បាន​ថ្លែង​នៅលើ​ទំព័រ​ហ្វេសប៊ុក​ក្នុង​ការ​ឃោសនា​សារ​នយោបាយ​ដើម្បី​រក​សំឡេង​ឆ្នោត​ដោយ​លោក​អះអាង​ថា​ក្នុង​អាណត្តិ​ទី​ ៥ ​កន្លង​មក​កម្ពុជា​បាន​ឆ្លងកាត់​ស្ថានការណ៍​ «​ដ៏គ្រោះ​ថា្នក់​» ប៉ុន្តែ​ក្រោម​ការដឹកនាំ​របស់​លោក​បាន​ទប់ស្កាត់​ទាន់​ពេលវេលា​ចំពោះ​អ្វី​ដែល​លោក​ហៅថា​ជា​ «​ឧបាយកល​បដិវត្តន៍​ពណ៌​» ​ដែល​អាច​នាំ​ជាតិ​ទៅ​រក​ «​គ្រោះមហន្តរាយ​» ជា​ការ​ចោទប្រកាន់​ដែល​អតីត​គណបក្ស​សង្គ្រោះជាតិ​បាន​ច្រានចោល​។

សារ​នយោបាយ​របស់​លោក ហ៊ុន សែន ធ្វើ​ឡើង​ចំ​ថ្ងៃទី​ ៦ នៃ​យុទ្ធនាការ​ឃោសនា​បោះឆ្នោត​ដែល​គណបក្ស​នយោបាយ​ចំនួន ២០ កំពុង​ស្វះស្វែង​រក​សំឡេងឆ្នោត​នៅ​ទូទាំង​ប្រទេស​ដោយ​គ្មាន​វត្តមាន​អតីត​គណបក្ស​សង្គ្រោះ​ជាតិ ដែល​ជា​គូប្រជែង​យូរ​ឆ្នាំ​ដ៏ខ្លាំងក្លា​របស់​គណបក្ស​កាន់​អំណាច​ចូលរួម​នោះ​។

តាមរយៈ​ការលើក​ឡើង​ពី​សមិទ្ធផល​នានា​ដែល​គណបក្ស​កាន់​អំណាច​សម្រេច​បាន​នា​អាណត្តិ​កន្លង​មក​លោក ហ៊ុន សែន បាន​អះអាង​ពី​ការដឹកនាំ​ប្រទេស​ទប់ស្កាត់​ «​ឧបាយកល​បដិវត្តន៍​ពណ៌​» ​ទាំង​ក្នុង និង​ក្រៅ​ប្រទេស​ដែល​ហាក់​សំដៅ​ដល់​អតីត​គណបក្ស​សង្គ្រោះ​ជាតិ​ដែល​ត្រូវ​បាន​តុលាការ​កំពូល​រំលាយ​ កាលពី​ចុង​ឆ្នាំ​មុន ​ហើយ​អតីត​មេបក្ស​ប្រឆាំង​លោក កឹម សុខា កំពុង​ជាប់ឃុំ​នៅ​ក្នុង​ពន្ធនាគារ​ត្រពាំងផ្លុង ជិត​ព្រំដែន​ប្រទេស​វៀតណាម លើ​ការចោទ​ប្រកាន់​ពី​បទ​ «​ក្បត់ជាតិ​» ឃុបឃិត​ជាមួយ​សហរដ្ឋអាមេរិក ប៉ុនប៉ង​ផ្តួលរំលំ​រដ្ឋាភិបាល​ស្របច្បាប់​។

លោក​ថ្លែង​ថា​៖ «​នៅក្នុង​នីតិកាល​ទី​ ៥ នៃ​រដ្ឋសភា រាជរដ្ឋាភិបាល​ដឹកនាំ​ដោយ​គណបក្ស​ប្រជាជន​កម្ពុជា​ដែល​មាន​រូបខ្ញុំ​ជា​នាយក​រដ្ឋមន្ត្រី​បាន​ដឹកនាំ​ប្រទេស ឆ្លងកាត់​ស្ថានការណ៍​នានា​ដ៏គ្រោះថ្នាក់​ការពារ​រឹងមាំ​នូវ​សន្តិភាព ស្ថិរភាព សន្តិសុខ និង​សណ្ដាប់ធ្នាប់​សង្គម​ដោយ​បាន​រាំង​ស្កាត់​ទាន់​ពេលវេលា​នៃ​ឧបាយកល​បដិវត្តន៍​ពណ៌​របស់​មជ្ឈដ្ឋាន​នៅក្នុង​ប្រទេស និង​នៅក្រៅ​ប្រទេស ដែល​ប៉ុនប៉ង​ធ្វើឲ្យ​មាន​ការ​ផ្លាស់ប្ដូរ​ផ្ទុយ​ពី​រដ្ឋធម្មនុញ្ញ​ដែល​នឹង​នាំ​ជាតិ​ទៅ​រក​គ្រោះមហន្តរាយ​ជាថ្មី​ទៀត​»​។

ព្រម​ជាមួយ​គ្នា​នេះ​លោក​ថា​៖ «​សន្តិភាព ស្ថិរភាព​នយោបាយ​រឹងមាំ បាន​ផ្តល់​ភាព​អំណោយផល​យ៉ាង​ខ្លាំង​ដល់​ការអភិវឌ្ឍ​សេដ្ឋកិច្ច​សង្គម​ឲ្យ​សម្រេច​បាន​លទ្ធផល​យ៉ាង​ល្អប្រសើរ ពិសេស​សមិទ្ធផល​ថ្មីៗ​លើ​គ្រប់​វិស័យ ផ្លូវ​ស្ពាន​ប្រព័ន្ធ​ធារាសាស្ត្រ ទឹកស្អាត អណ្ដូងទឹក ភ្លើងអគ្គិសនី ជាដើម​។ លោក​បន្ត​ថា​៖ «​ព្រម​ជាមួយ​នេះ​ប្រជាធិបតេយ្យ សិទ្ធិ​សេរីភាព​របស់​ពលរដ្ឋ និង​ការគោរព​អនុវត្ត​ច្បាប់​ក៏​កាន់តែ​ត្រូវ​បាន​ពង្រឹង​។ សមិទ្ធផល​ដ៏ថ្លៃថ្លា​ទាំងអស់​នេះ​កំពុង​បង្កើន​ភាពអនុគ្រោះ​ឲ្យ​ប្រជាជន​យើង​បន្ត​ឈាន​ទៅ​មុខ​បាន​កាន់​តែ​លឿន និង​សម្រេច​ជោគជ័យ​កាន់តែ​ធំ​ឡើង​គឺ​ការកសាង និង​ការពារ​មាតុភូមិ​»​។

លោក​នាយក​រដ្ឋមន្ត្រី​បាន​អំពាវនាវ​ម្ដង​ហើយ​ម្ដង​ទៀត​ឲ្យ​ពលរដ្ឋ​ទៅ​បោះឆ្នោត​ឲ្យ​គណបក្ស​ប្រជាជន ដើម្បី​សម្រេច​ជោគ​វាសនា​ប្រទេស​ដោយ​អះអាង​ថា គណបក្ស​របស់​លោក​មាន​កម្មវិធី​នយោបាយ​ «​ដ៏ត្រឹមត្រូវ​»​។

លោក​សង្កត់ធ្ងន់​ថា​៖ «​ការបោះឆ្នោត​មាន​អត្ថន័យ​សំខាន់​បំផុត ចំពោះ​ជោគវាសនា​របស់​ជាតិ​ជាការ​បោះឆ្នោត​ដែល​នឹង​សម្រេច​ភាព​គង់វង្ស យូរអង្វែង​នៃ​សន្តិភាព និង​ការ​អភិវឌ្ឍ​សម្រាប់​យើង​ទាំងអស់​គ្នា​។ អាស្រ័យ​ហេតុ​នេះ​សូម​បងប្អូន​ជនរួមជាតិ ដែល​បាន​ឃើញ​ច្បាស់​ហើយ​នូវ​ប្រពៃណី​ស្នេហា​ជាតិ សមិទ្ធផល​គ្រប់​វិស័យ និង​កម្មវិធី​នយោបាយ​ដ៏ត្រឹមត្រូវ​របស់​គណបក្ស​»​។

ប៉ុន្តែ​លោក អ៊ូ ច័ន្ទរ័ត្ន អតីត​តំណាងរាស្ត្រ​នៃ​អតីត​គណបក្ស​សង្គ្រោះ​ជាតិ​យល់​ថា ការលើក​យក​សមិទ្ធផល​តាមរយៈ​ការទប់ស្កាត់​ការចោទប្រកាន់​ដ៏ចម្រូងចម្រាស​ពី​ការ​ធ្វើ​បដិវត្តន៍​ពណ៌​មិនមែន​ជា​គុណសម្បត្តិ​ទេ តែ​ជា​គុណវិបត្តិ​ទៅ​វិញ ដោយ​ទង្វើ​របស់​រដ្ឋាភិបាល​កំពុង​ស្ថិត​ក្រោម​សម្ពាធ​របស់​សហគមន៍​អន្តរជាតិ​។

លោក​ថ្លែង​ថា​៖ «​ទោះ​គាត់​យល់​ថា​ការ​កម្ទេច​គណបក្ស​ប្រឆាំង​គឺជា គុណសម្បត្តិ ប៉ុន្តែ​ខ្ញុំ​មិន​យល់​ថា​ជា​គុណសម្បត្តិ​ទេ ជា​គុណវិបត្តិ​ទៅវិញ​ទេ​។ ឥឡូវ​កំពុង​តែ​នាំ​ទុក្ខ​ដល់​គណបក្ស​ប្រជាជន​ដែល​ជា​គណបក្ស​កាន់​អំណាច​ក៏ដូចជា​ប្រជាពលរដ្ឋ​ខ្មែរ​ទូទាំង​ប្រទេស​ដែរ​»​។

លោក​ ច័ន្ទរ័ត្ន បញ្ជាក់​ថា​ការប្រកួតប្រជែង​របស់​អតីត​គណបក្ស​សង្គ្រោះ​ជាតិ វា​អត់​មាន​អី​ខុស​នឹង​គោលការណ៍​ប្រជាធិបតេយ្យ​ហើយ​ទង្វើ​របស់​បក្ស​កាន់​អំណាច ចំពោះ​គណបក្ស​ប្រឆាំង​ធ្វើឲ្យ​ប្រជាពលរដ្ឋ​ខ្មែរ​ និង​អន្តរជាតិ​យល់​ថា ជា​ការ​រំលោភបំពាន​សិទ្ធិ​មនុស្ស និង​បំផ្លាញ​លទ្ធិប្រជាធិបតេយ្យ​ទៅវិញ​ទេ​។

លោក​បន្ត​ថា​៖ «​ជាពិសេស​រាជរដ្ឋាភិបាល​ក្រោយពី​បាន​កម្ទេច​គណបក្ស​ប្រឆាំង​ធំ​ជាងគេ​ក្នុង​ប្រទេស​រួច​មក​មាន​ការគាបសង្កត់​ដាក់​សម្ពាធ​ពី​សហគមន៍​អន្តរជាតិ​ខ្លាំង​ដោយ​គេ​មើល​ឃើញ​ថា មិនមែន​ជា​រឿង​ដូច​ដែល​គាត់​យល់​នោះ​ទេ មិនមែន​ជា​រឿង​បដិវត្តន៍​ពណ៌​មិនមែន​ជា​រឿង​ការ​ចង់​ផ្តួលរំលំ​រដ្ឋាភិបាល​ ឬ​ក៏​ធ្វើឲ្យ​មាន​អស្ថិរភាព​ក្នុង​ប្រទេស​ទេ វា​ជា​រឿង​ប្រជាធិបតេយ្យ​សុទ្ធសាធ​»​។

លោក មាស នី អ្នកវិភាគ​នយោបាយ​យល់​ថា​ការ​បន្ត​ពន្យល់​ពលរដ្ឋ​អំពី​ការ​កម្ចាត់​បដិវត្តន៍​ពណ៌ ឬ​រំលាយ​អតីត​គណបក្ស​ប្រឆាំង​របស់​លោក​ ហ៊ុន សែន គឺជា​វិធីសាស្ត្រ​មួយ​របស់​គណបក្ស​កាន់​អំណាច​យូរអង្វែង​មួយ​នេះ ដើម្បី​ទប់​កំហឹង​ពលរដ្ឋ​ច្រើន​លាន​នាក់​ដែល​ធ្លាប់​គាំទ្រ​អតីត​គណបក្ស​សង្គ្រោះ​ជាតិ​។

លោក​ថ្លែង​ថា​៖ «​មាន​ការ​ខុស​គ្នា​ពី​មុន​ហេតុអ្វី​បានជា​គាត់​ឥឡូវ​ខំប្រឹង​ម្ល៉េះ​? វា​អាច​ថា គាត់​មាន​ការ​ព្រួយបារម្ភ​! ពី​មុន​គាត់​ធ្លាប់​និយាយ​ថា​គាត់​មិន​បាច់​ចេញ​ទៅ​ឃោសនា​បោះឆ្នោត​ឲ្យ​ត្រឹម​តែ​មន្ត្រី​គាត់​ចេញ​ទៅ​ក៏​គណបក្ស​ប្រជាជន​ឈ្នះ​ដែរ ប៉ុន្តែ​ម្ដង​នេះ​គាត់​ត្រូវ​ធ្វើ​ខ្លួនឯង​»​។

បើ​តាម​លោក​ មាស នីថា ទោះបី​អតីត​គណបក្ស​ប្រឆាំង​ត្រូវ​រំលាយ​ទៅ​ហើយ​ក្ដី​ក៏​រចនាសម្ព័ន្ធ​គណបក្ស​នេះ​នៅ​តែ​ធ្វើឲ្យ​លោក ហ៊ុន សែន ព្រួយបារម្ភ​អំពី​យុទ្ធនាការ​អំពាវនាវ​ឲ្យ​ពលរដ្ឋ​មិន​ទៅ​បោះឆ្នោត​របស់​ពួកគេ​ដែរ​។

លោក​បញ្ជាក់​ថា​៖ «​បើ​យើង​មើល​ពី​គណបក្ស​​តូចៗ​វា​ពិតជា​មិន​មាន​បក្ស​ណា​មួយ អាច​ទៅ​ដណ្ដើម​យក​ជ័យជម្នះ​ណា​មួយ​ពី​គណបក្ស​កាន់​អំណាច​បាន​ទេ​ ប៉ុន្តែ​ក្ដីបារម្ភ​មួយ​ដែល​យើង​អាច​ឃើញ ទោះបី​ជា​គណបក្ស​សង្គ្រោះ​ជាតិ​មិន​បាន​ចូលរួម​ក្នុង​ការប្រកួត​ការបោះឆ្នោត​ក៏ដោយ​ប៉ុន្តែ​ព្រលឹង​សង្គ្រោះ​ជាតិ​នៅ​តែ​តាម​ប្រកួត​ជាមួយ​ការបោះឆ្នោត​រហូត​…»៕


Contact author: បែន សុខហ៊ាន

What Next?

Recent Articles

2 Responses to "លោក​ ហ៊ុន សែន ​បាន​លើក​យក​ការ​ទប់ស្កាត់​បដិវត្តន៍​ពណ៌​មក​ឃោសនា"

  1. Anonymous says:

    this guy acting he is a Cambodian GOD but sorry through out your evil action we Cambodian knew you are a devil of your own nation. there was no such a thing call color revolution in Cambodia . Cambodian and the world knew where ever the mafia dictator stay there will be some people trying to eliminated it. I think it is now too late for this evil to change because time is limit the only GOD will know about it. GOD bless Cambodia and all innocent Cambodian

  2. Anonymous says:

    Veitcong mafia dictator and his groups are the criminals and must responsibility of destroying democracy and bury Parish Accord and giving Tral island to Youn hanoi without respected khmer people ‘. This veitcong mafia dictator cheated,lie therat.killed,jail all any body opposing him so this criminals guy must go to hell soon because GOD will punish criminals ‘

Leave a Reply

Submit Comment