មួង ណារ៉េត
2018-08-11
RFA
ស្ដាប់ ឬទាញយកសំឡេង
យុទ្ធនាការម្រាមដៃស្អាត របស់អ្នកលេងហ្វេសប៊ុកមួយចំនួនថា មិនទៅបោះឆ្នោត នៅថ្ងៃទី២៩ ខែកក្កដា ឆ្នាំ២០១៨។ Screenshot
គណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចលើកលែងការផាកពិន័យពលរដ្ឋ ៥នាក់ រស់នៅខេត្តកំពត ទាក់ទងនឹងការធ្វើយុទ្ធនាការម្រាមដៃស្អាត តាមបណ្ដាញសង្គមហ្វេសប៊ុក(Facebook)។ ពលរដ្ឋទាំង ៥នាក់នោះ មានឈ្មោះ សូ សេង ឈ្មោះ ប៉ែន ឈឹម កូវ យិតឡាយ សួង សារ៉ាន់ និង ម៉ម សុធី។
ក្នុងសេចក្ដីប្រកាសព័ត៌មានរបស់គ.ជ.ប កាលពីថ្ងៃទី១០ សីហា បង្ហាញថា ការសម្រេចការលើកលែងផាកពិន័យនេះ គឺក្រោយពេលក្រុមប្រឹក្សា ជំនុំជម្រះគ.ជ.ប រកមិនឃើញថា អ្នកទាំង៥នាក់ ពិតជាបានបង្ហោះផ្សព្វផ្សាយ ពីយុទ្ធនាការម្រាមដៃស្អាត តាមបណ្ដាញហ្វេសប៊ុកនោះទេ។ តាមពិត គឺម្ចាស់គណនី ឈ្មោះ នីវ ចំរើន ( Niv Chamroeun) ជាអ្នកបង្ហោះ ហើយមាន ជំទប់ទី២ ឃុំបឹងទូក ស្រុកទឹកឈូ មកពីគណបក្សកាន់អំណាច អ្នកស្រី មូល សុខុម អះអាងថា ម្ចាស់គណនីឈ្មោះនោះ។
ការសម្រេចលើកលែងការផាកពិន័យ អ្នកទាំង៥ ពេលនេះ គឺក្រោយពេលដែល គ.ជ.ប បានរងការរិះគន់យ៉ាងខ្លាំង ពីក្រុមអ្នកច្បាប់ និងសង្គមស៊ីវិល ដោយសារ ប្រធានគ.ជ.ប លោក ស៊ិក ប៊ុនហុក កាលពីថ្ងៃទី៨ សីហា បានសម្រេចចោទប្រកាន់អ្នកធ្វើយុទ្ធនាការម្រាមដៃស្អាត នៅឯខេត្តបាត់ដំបង ចំនួន ៣រូប ក្នុងចំណោម ៥រូប ពិន័យជាប្រាក់ ១០លានរៀល និង ៥លានរៀល។
ក្នុងលិខិតចុះថ្ងៃទី៨ សីហា ក្រុមប្រឹក្សាជំនុំជម្រះនៃគ.ជ.ប បានសម្រេចផាកពិន័យ និងជំនុំជម្រះពលរដ្ឋ៥នាក់នៅខេត្តបាត់ដំបងនោះ គឺមិនបានយកមាត្រា នៃច្បាប់ណាមួយ មកសំអាងទេ គឺសំអាងលើប្រវត្តិនៃការបោះឆ្នោត។ លោក ស៊ិក ប៊ុនហុក អះអាងថា មូលហេតុដែលចោទប្រកាន់ ដោយសារយុទ្ធនាការម្រាមដៃស្អាត បានជះឥទ្ធិពលដល់អ្នកចេញទៅបោះឆ្នោត ធ្វើឲ្យសន្លឹកឆ្នោតមិនបានការរហូតដល់ទៅជាង ៨ភាគរយ។
ប៉ុន្ដែ សង្គមស៊ីវិល និងក្រុមអ្នកច្បាប់រិះគន់ការចោទប្រកាន់របស់គ.ជ.ប ថាបានអនុវត្តខុសទាំងនីតិវិធី នឹងការបំបិទសិទ្ធិសេរីភាពពលរដ្ឋ ខណៈដែលគ្មានច្បាប់ចែង៕