មួង ណារ៉េត
2018-09-05
RFA
ស្ដាប់ ឬទាញយកសំឡេង
លោកនាយករដ្ឋមន្ត្រី ហ៊ុន សែន ថ្លែងក្នុងកិច្ចប្រជុំសភា នៅថ្ងៃទី៣១ ខែមករា ឆ្នាំ២០១៧។ Photo courtesy of National Assembly
តំណាងទូតលោកសេរី ៩ ប្រទេស មិនបានចូលរួមប្រជុំរដ្ឋសភាឯកបក្សរបបក្រុងភ្នំពេញ
របបក្រុងភ្នំពេញ បានចាប់ផ្ដើមបង្កើតរដ្ឋសភាឯកបក្ស នៅនីតិកាលទី៦ ជាផ្លូវការ នៅព្រឹកថ្ងៃទី០៥ កញ្ញា។ អ្នកនាំពាក្យរដ្ឋសភា ថា មានអង្គទូតចំនួន៩ អវត្តមាន មិនចូលរួមការអញ្ជើញរបស់រដ្ឋសភា។ អ្នកវិភាគយល់ថា របបក្រុងភ្នំពេញ ចង់បង្កើតរដ្ឋសភា និងរបបថ្មីឲ្យបានលឿន ដើម្បីបញ្ចៀសកុំឲ្យសហគមន៍អន្តរជាតិ ដាក់សម្ពាធសើរើ ព្រឹត្តិការណ៍បោះឆ្នោត ថ្ងៃទី២៩ កក្កដា ឡើងវិញ។
ក្រុមតំណាងរាស្ត្រឯកបក្ស នៃគណបក្សប្រជាជនកម្ពុជា ចំនួន១២៥នាក់ ដែលរងការចោទថា កើតចេញពីការបោះឆ្នោតបង្គ្រប់កិច្ច បាននាំគ្នាបង្កើតកិច្ចប្រជុំរដ្ឋសភា ជាលើកដំបូងរបស់ខ្លួន និងបាននាំគ្នាទៅស្បថចំពោះព្រះភ័ក្ត្រព្រះមហាក្សត្រ រួចរាល់ហើយ នៅទី៥ កញ្ញា។
មេដឹកនាំរបបក្រុងភ្នំពេញ លោក ហ៊ុន សែន បានសរសេរនៅក្នុងហ្វេសប៊ុក ក្រោយពេលបើកសម័យប្រជុំ ថាការប្រារព្ធពិធីបើកសម័យប្រជុំ លើកដំបូងនៃរដ្ឋសភា នីតិកាលទី៦ បានចាប់ផ្តើមឡើងនៅវេលាម៉ោង៨ព្រឹក។ លោក ហ៊ុន សែន អះអាងថា នៅក្នុងកិច្ចប្រជុំលើកដំបូង របស់រដ្ឋសភាឯកបក្ស នីតិកាលទី៦ ព្រះមហាក្សត្រ ព្រះបាទនរោត្តម សីហមុនី ទ្រង់មានជំនឿថា រដ្ឋសភា នៅក្នុងអាណត្តិថ្មី នឹងបន្តលើកកម្ពស់ជីវភាពប្រជាពលរដ្ឋ អភិវឌ្ឍ និងពង្រឹងប្រព័ន្ធការពារសង្គមបន្ថែមទៀត។ ចំណែករាជរដ្ឋាភិបាល នៅអាណត្តិថ្មី ដែលនឹងទទួលការទុកចិត្តពីរដ្ឋសភា នឹងបំពេញភារកិច្ចតាមគោលនយោបាយបន្តជំរុញកំណើនសេដ្ឋកិច្ច និងការអភិរក្ស អភិវឌ្ឍវប្បធម៌ដោយចិរភាព ដើម្បីធានាអត្ថិភាព ដ៏រឹងមាំនៃអត្តសញ្ញាណជាតិ ជំរុញការអភិវឌ្ឍសេដ្ឋកិច្ចសង្គម ស្របគ្នានឹងការលើកកម្ពស់សីលធម៌ សម្រាប់ភាពសុខដុមនៃសង្គមជាតិ។ លោក ហ៊ុន សែន អះអាងបន្ដថា ព្រះមហាក្សត្រ ទ្រង់បានសម្ដែងនូវក្តីសោមនស្សរីករាយ ចំពោះការបើកសម័យប្រជុំលើកដំបូងនេះ ហើយបានសម្ដែងនូវការសាទរចំពោះសមាជិករដ្ឋសភាអាណត្តិថ្មីទាំងអស់ ដែលប្រជាពលរដ្ឋបានសម្ដែងឆន្ទៈ និងជំនឿទុកចិត្តតាមរយៈការបោះឆ្នោតកន្លងទៅនេះ។ ក្រៅពីសមាសភាពតំណាងរាស្ត្រទាំង១២៥រូប ការបើកសម័យប្រជុំលើកដំបូង ក៏មានការអញ្ជើញចូលរួមពីឯកអគ្គរាជទូត និងឯកអគ្គរដ្ឋទូតបណ្ដាប្រទេសនានាប្រចាំនៅកម្ពុជាដែរ។
អគ្គលេខាធិការ និងជាអ្នកនាំពាក្យរដ្ឋសភា លោក ឡេង ប៉េងឡុង ប្រាប់អាស៊ីសេរីថា រដ្ឋសភា បានដាក់លិខិតអញ្ជើញតំណាងស្ថានទូតទាំងអស់នៅកម្ពុជា មានចំនួន៣១ស្ថានទូត ប៉ុន្តែចូលរួមបានតែ២២ ដោយអវត្តមានតំណាងអង្គទូតប្រទេសលោកសេរី ៩ ដែលសុទ្ធតែជាប្រទេសម្ចាស់ជំនួយដ៏ធំ និង ជាទីផ្សារនាំចេញសំលៀកបំពាក់ និងផលិតផលកម្ពុជាធំជាងគេបំផុត តាមរយៈប្រព័ន្ធអនុគ្រោះពន្ធ។ ដោយឡែក ចំពោះស្ថានទូតជប៉ុន បានចាត់តំណាងទូតឲ្យចូលរួមជំនួស។ «»
បណ្ដាស្ថានទូតទាំង៩ ដែលមិនចូលរួម បើកសម័យប្រជុំរដ្ឋសភាដំបូង ក្នុងនីតិកាលទី៦ គឺ ស្ថានទូតសហរដ្ឋអាមេរិក កាណាដា អូស្ត្រាលី បារាំង អាល្លឺម៉ង់ អង់គ្លេស ស៊ុយអែត សហភាពអឺរ៉ុប និងទូតប៊ុលហ្គារី។ ឯកអគ្គរដ្ឋទូត និងឯកអគ្គរាជទូត នៃបណ្ដាប្រទេស ដែលមិនចូលរួមបើកសម័យប្រជុំរដ្ឋសភាឯកបក្ស តាមការអញ្ជើញ បានប្រាប់ហេតុផលថា ពួកគេជាប់រវល់ នៅក្រៅប្រទេស មិនអាចចូលរួមបានទេ។
លោក ហ៊ុន សែន បន្ដថា ក្រោយពីពិធីបើកសម័យប្រជុំលើកដំបូងរួចរាល់ រដ្ឋសភា នឹងបើកពិធីបើកសម័យប្រជុំលើកទី១ ហើយនឹងចាប់ផ្ដើមការងារ ក្រោមអធិបតីភាព លោក ហេង សំរិន ព្រឹទ្ធសមាជិករដ្ឋសភា ដើម្បីសម្រេចអំពីសុពលភាពនៃអាណត្តិរបស់សមាជិកនីមួយៗ និងការអនុម័តបទបញ្ជាផ្ទៃក្នុងរបស់រដ្ឋសភា នីតិកាលទី៦។
នៅក្រោយកិច្ចប្រជុំលើកដំបូង ក្នុងនីតិកាលទី៦ ព្រឹទ្ធសមាជិកនៃរដ្ឋសភាឯកបក្ស លោក ហេង សំរិន បានចេញប្រកាសទទួលស្គាល់ សមាជិករដ្ឋសភា ១២៥នាក់ តាមបញ្ជីរបស់ គណៈកម្មាធិការជាតិរៀបចំការបោះឆ្នោត។ នៅរសៀលថ្ងៃដដែល លោក ហេង សំរិន បានដឹកនាំសមាជិករដ្ឋសភាឯកបក្សថ្មីទាំង១២៥នាក់ ចូលទៅស្បថក្នុងព្រះបរមរាជវាំង។
ប្រធានក្រុមអ្នកវិភាគវ័យក្មេង កញ្ញា លី ស្រីស្រស់ មើលឃើញថា ការប្រញាប់បង្កើតរដ្ឋសភា នីតិកាលថ្មី នៅពេលនេះ ហាក់ដូចជាលឿនពេក ព្រោះវិបត្តិនយោបាយមិនទាន់បានបញ្ចប់ទេ។ ចំណែកប្រសិទ្ធភាពរបស់រដ្ឋសភាឯកបក្សនៅអាណត្តិថ្មី នឹងមិនមានភាពល្អប្រសើរដូចរដ្ឋសភា ដែលមានគណបក្សប្រឆាំងនោះទេ។ អ្នកវិភាគរូបនេះ យល់ថា ការមិនចូលរួមរបស់បណ្ដាស្ថានទូត ប្រទេសប្រជាធិបតេយ្យ ជាការបង្ហាញថា ពួកគេមិនពេញចិត្ត និងមិនទទួលស្គាល់ រដ្ឋសភាឯកបក្សដែលកើតឡើងពីការបោះឆ្នោត មិនត្រឹមត្រូវ មិនសេរី មិនយុត្តិធម៌។
កញ្ញា លី ស្រីស្រស់ យល់ថា ក្រៅពីហេតុផលចង់ទៅប្រជុំនៅអង្គការសហប្រជាជាតិ របបក្រុងភ្នំពេញ ក៏ចង់បង្កើតរដ្ឋសភា និងរដ្ឋាភិបាលថ្មីឲ្យបានលឿន ដើម្បីបញ្ចៀសកុំឲ្យសហគមន៍អន្តរជាតិទាមទារសើរើករណី ព្រឹត្តិការណ៍ថ្ងៃទី២៩ កក្កដា ឡើងវិញដែរ។ «»
ទោះជាយ៉ាងណា មេដឹកនាំរបបក្រុងភ្នំពេញ លោក ហ៊ុន សែន អះអាងថា បន្ទាប់ពីបើកសម័យប្រជុំនិងចូលស្បថក្នុងព្រះបរមរាជវាំងរួចរាល់ នៅថ្ងៃទី៦ កញ្ញា សមាជិករដ្ឋសភា នឹងបោះឆ្នោតជ្រើសតាំងក្បាលម៉ាស៊ីនរួមមាន ប្រធាន អនុប្រធានរដ្ឋសភា ប្រធាន អនុប្រធានគណៈកម្មាធិការជំនាញនៃរដ្ឋសភា និងផ្ដល់សេចក្ដីទុកចិត្ត ចំពោះគណៈរដ្ឋមន្ត្រីថ្មី នៃរបបក្រុងភ្នំពេញ។
ស្របពេលដែលនីតិវិធីបង្គ្រប់កិច្ច ក្នុងការបង្កើតរដ្ឋាភិបាលថ្មី យ៉ាងប្រញាប់ប្រញាល់ បានប្រព្រឹត្តទៅតាមការចង់បានរបស់លោក ហ៊ុន សែន វិបត្តិនយោបាយកម្ពុជា នៅតែជាប់គាំង គ្មានដំណោះស្រាយ ឯសហគមន៍អន្តរជាតិ ក៏កំពុងត្រៀមវិធានការផ្សេងៗ រួមទាំងការដាក់ទណ្ឌកម្ម លើរបបនេះផង បើលោក ហ៊ុន សែន មិនស្ដារសិទ្ធិមនុស្ស និងប្រជាធិបតេយ្យឡើងវិញនោះទេ៕